¿Jeowa ʉ̃rʉ Kʼawuabipanʉrãra kristianoaraka?

Jeowa ʉ̃rʉ Kʼawuabipanʉrãbara ĩjãpanʉ wãrĩnu kristianoarata. ¿Kʼãrẽa mawũã ĩjãpanʉ? Kʼawuadaya kʼãrẽa mawũã jarabʉta akʉza kʼãrẽa maʉ̃ trʉ̃ta zokʼabʉta adewara dayirãi kʼãrẽ kãgata ũdubibʉta.

1. ¿Jeowa ʉ̃rʉ Kʼawuabipanʉrãbara kʼãrẽta ĩjãpanʉ?

Jesuba jarasi Daizezeʼa: «Bʉ bedʼeabara wãrĩnuta jaradiabʉ» (Juan 17:17). Jeowa ʉ̃rʉ Kʼawuabipanʉrãbara Jesude kĩrãka opanʉ: ewari jõmaʉ̃nẽ daiba jaradiabʉra Daizeze Bedʼeadeba obʉ. Akʉra sãwũã jʉ̃drʉsita Jeowa ʉ̃rʉ Kʼawuabipanʉrã idi ũdupanʉra. Poaga 1870 kʼawa Daizeze Bedʼea jaradiabariraba audre biʼia akʉ jʉ̃drʉsida Daizeze Bedʼeaba kʼãrẽta jaradiabʉta. Iglesiaraba oda ẽ basimina Daizeze Bedʼeaba jaradiabʉta, ãya jõma osida Daizeze Bedʼeade eda jarabʉta. Maʉ̃ tẽã ãya wãrĩnu kʼawuadata awuru ẽbẽrarã jaradiasida.a

2. ¿Kʼãrẽa daira trʉ̃gapanʉ Jeowa ʉ̃rʉ Kʼawuabipanʉrã?

Jeowabara jarabʉ ẽbẽrarã iya zokʼabʉ ũrĩpanʉra, wãrĩnu iyi ʉ̃rʉ kʼawuabibarirata (Hebreos 11:4-12:1). Nããbema kristiano ewaridera Daizezeba jarasi iyi pʉwʉrʉʼa: «Marara mʉ̃ ʉ̃rʉ kʼawuabipanʉrã» (Isaías 43:10). Adewara Jesura trʉ̃gapanʉ «Kʼawuabibari Kʼẽrẽpabʉ» (Apocalipsis 1:5). Maʉ̃ kʼarea poaga 1931neba, trʉ̃gasida Jeowa ʉ̃rʉ Kʼawuabipanʉrã. Maʉ̃ trʉ̃ kʼãrẽa mejãcha sobiapanʉ.

3. ¿Jeowa ʉ̃rʉ Kʼawuabipanʉrãbara sãwũã Jesu kãgata ũdubipanʉ?

Jesubara mejãcha kãgabasi iyi kʼaidubemarãra, iyitara yi mebẽrã kĩkãkʼabasi (akʉra Marcos 3:35). Jeowa ʉ̃rʉ Kʼawuabipanʉrãra ãbabʉ, maʉ̃ kʼarea jõma ẽbẽrarã Jeowa odebʉra mebẽrã kĩrãkʼa akʉbʉ, adewara maʉ̃ kʼarea dayirãi jarapanʉ mebẽrã (Filemón 1, 2). Adewara naʉ̃ bedʼeata ũrĩpanʉ: «Mebẽrã jõmaʉ̃ʼa kãgata ũdubidua» (1 Pedro 2:17). Jeowa ʉ̃rʉ Kʼawuabipanʉrãbara naʉ̃ kãgara kĩrã bio ũdubipanʉ, mebẽrã naʉ̃ drʉa jõmaʉ̃nebemata zʉbʉriabʉrʉdera mesera kʼarebapanʉ.

AUDRE BIʼIA KʼAWUADADRɄ

4. Daizeze Bedʼeadeba jaradiapanʉ

Jeowabara jarasi Daizeze Bedʼeade eda audre biʼia ũrĩnaita. Akʉra Daniel 12:4, mõbe naʉ̃ta panʉidua:

• ¿Kʼãrẽta «mejãcha eaba wãñi» Daizeze ode panʉranera Daizeze Bedʼea audre kʼawua wãne?

Kʼawuara sãwũã ẽbẽrarã Daizeze Bedʼea jaradiabariraba akʉpanasita Daizeze Bedʼeara maʉ̃ne basi Charles Russell. Akʉra BIDEOTA, mõbe naʉ̃ta panʉidua:

BIDEO: Daizeze Bedʼeade kʼawuabʉta wãrĩnu kʼawuasida (7:45)

• Bideodera, Charles Russellba akʉza Daizeze Bedʼea jaradiabariraba, ¿sãwũã biʼia akʉpanasi Daizeze Bedʼeara?

¿Kʼawuabasika?

Edaʉde daiba nãã ĩjãbadara idubʉepanʉ ¿kʼãrẽa? Abarika ũnadrʉ bʉside ũmadaʉba chirua wiña wiñane ũna wãbari kĩrãkʼa, Daizezebida abarika wiña wiñane audre bia ũrĩbi wã Daizeze Bedʼeata (akʉra Proverbios 4:18). Daizeze Bedʼeade eda jarabʉra awuara ẽ mina, dayirãba ĩjãbʉta audre kʼawua wãne awuara krĩcha wãna.

5. Ũdubipanʉ Jeowa ʉ̃rʉ Kʼawuabipanʉarata

BIDEO: Jõmaʉ̃ba ũdukʼaude naʉ̃ trʉ̃ne (2:40)

• ¿Kʼãrẽa yibia Jeowa ʉ̃rʉ Kʼawuabipanʉrã trʉ̃gaira?

¿Kʼãrẽa Jeowabara jʉrʉsi ẽbẽrarãta iyi ʉ̃rʉ Kʼawuabipanamarẽã? Jeowa ʉ̃rʉ mejãcha sewa nebʉrata jara zebʉda baera, naʉ̃ra ẽbẽrarãbara Daizeze Jeowa ʉ̃rʉ wãrĩnuta jaradiaibasi. Akʉdaya naʉ̃ra sewa nebʉradebemata kĩrã ũme.

Ʉ̃kʉrʉ religionʼrabara jaradiabʉ Daizezebara kãgabʉta nekʼãrẽ omaneba iyaʼa yiwidʼidamarẽã mamina, ¿maʉ̃ra wãrĩnuka? Akʉra Levítico 26:1, mõbe naʉ̃ta panʉidua:

• Naʉ̃ testoba jarabʉdera, ¿kʼãrẽta krĩchabʉ Daizezebara nekʼãrẽ oma ʉ̃rʉra?

Ʉ̃kʉrʉ religionbara jaradiapanʉ Jesura iyabaʉ Daizezeta mamina, ¿maʉ̃ra wãrĩnuka? Akʉra Juan 20:17, mõbe naʉ̃ta panʉidua:

• Naʉ̃ testoba jarabʉdera, ¿Daizezeta Jesumera iyabaʉka?

• Jeowabara zokʼasi iyi ʉ̃rʉ kʼawuabipanʉrata jaradamarẽã iyi ʉ̃rʉ akʉza yi warra ʉ̃rʉ, ¿bʉara sãwũã krĩchabʉ maʉ̃ ʉ̃rʉra?

6. Dayirãi kãgata ũdubipanʉ

Daizeze Bedʼeabara jarabʉ kristianorara daya kakuaza abʉ kĩrãkabʉta. Akʉra 1 Corintios 12:25, 26, mõbe naʉ̃ta panʉidua:

• ¿Kʼãrẽta omarẽã kãgabʉ kristianora wãrĩnuaraba awuru zʉbʉriabʉrʉde?

• Bʉara, ¿kʼãrẽta ũduzebʉrʉ Jeowa ʉ̃rʉ Kʼawuabipanʉrãba obʉta wuabemara kʼarebaita?

Jeowa ʉ̃rʉ Kʼawuabipanʉrã abaʉdebemata badumae zʉbʉriabʉrʉdera mebẽrã naʉ̃ drʉa jõmaʉ̃nebemara aramaʉ̃ta wãbʉ kʼarebade. Maʉ̃ kʼawuaita akʉra BIDEOTA. Mõbe naʉ̃ta panʉidua:

BIDEO: Haitíde nãgʉ zroma Matthew berabarisi (5:29)

• Jeowa ʉ̃rʉ̃ Kʼawuabipanʉrãba awuru zʉbʉriabʉrʉde kʼarebapanʉnera bʉmara, ¿kãgata ũdubipanʉka?

KĨRÃBEITA

Jeowa ʉ̃rʉ Kʼawuabipanʉrãra kristianora wãrĩnuara. Naʉ̃ drʉa jõmaʉ̃nẽ mebẽrã abapanʉ kĩrãkʼabʉ akʉza iyabaʉ Daizezeta kãgabʉ, ãya jõma jaradiabʉra Daizeze Bedʼeadeba jaradiabʉ adewara wuabemara jaradiabʉ wãrĩnuta Jeowa ʉ̃rʉ.

Panʉnadrʉ

• ¿Kʼãrẽa trʉ̃gasida Jeowa ʉ̃rʉ Kʼawuabipanʉrã?

• ¿Sãwũã ũdubipanʉ dayirãi yi kãgapanʉta?

• Bʉmara, ¿Jeowa ʉ̃rʉ Kʼawuabipanʉrãra kristianoaraka?

JɄRɄDA AUDRE KʼAWUAITA

Dai ʉ̃rʉ audre bia kʼawuara.

Jeowa ʉ̃rʉ Kʼawuabipanʉrãbara: ĩjãbʉta ũdubibʉ. Yi 1: Pariguadeba ẽdrʉsida (1:00:53)

Akʉra aba, aña jaradiapanʉnebemata sãwũã Jeowa ʉ̃rʉ Kʼawuabipanʉrãba aripe jaradia wãta.

Daizeze Pʉwʉrʉra iyi trʉ̃ ʉ̃rʉ ibia bedʼeapanʉ (7:08)

Akʉra bʉa Jeowa ʉ̃rʉ Kʼawuabipanʉrã ʉ̃rʉ widibʉta.

«Jeowa ʉ̃rʉ Kʼawuabipanʉrã ʉ̃rʉ badua widipanʉta» (Pagina jw.org)

Stephenʼra mejãcha jʉranʉmʉba nemitiata obisi. Kʼawuara kʼãrẽta ũdusita Jeowa ʉ̃rʉ Kʼawuabipanʉrãne iya awuara ojʉ̃drʉita.

«Mʉ̃ bebʉra wuabʉrʉ mitia wãsi» (Jarakabʉ, 1ne juliode 2015de)