YI 37
Daizeze Bedʼeaba trajo ʉ̃rʉ jarabʉta akʉza plata ʉ̃rʉ
¿Ewari abaʉde krĩcha zroma obarika bʉ trajo kʼarea mawũã ẽ bʉrʉ plata mejãcha neẽ kʼarea? Ewari abaʉde zare dayirãba nesidabʉ ũduira, maʉ̃ daʉcha Jeowaba kãgabʉ oita. Daizeze Bedʼeabara ũrãgʼa biata diabʉ dayirãba kʼãrẽ oseabʉ ʉ̃rʉ.
1. ¿Kʼãrẽta jarabʉ Daizeze Bedʼeabara trajai ʉ̃rʉra?
Daizezebara kãgabʉ dayi trajabʉmae sobiabamarẽã. Daizeze Bedʼeabara jarabʉ: «Ẽbẽrarã sobiabibʉ [...] iyi trajabʉdeba nekʼãrẽ bia» ũdudamarẽã (Eclesiastés 2:24). Jeowara mejãcha trajakĩrã, maʉ̃ba dayirã zarea trajapanʉne Jeowade kĩrãkʼa opanʉ, maʉ̃ba sobiabibʉ iyita akʉza dayirãsida sobiapanʉ.
Dayi trajaira yibia, mamina audre yibia Jeowade nãã bʉeita (Juan 6:27). Iyara jarabʉ, iyidebemata nãã bʉera, diaita dayirãba nesidabʉta.
2. ¿Dayirãbara platara sãwũã akʉdaibara?
Daizeze Bedʼeaba jarabʉ plataba dayirã kʼarebabʉmina dia ẽ dayi sobia baita (Eclesiastés 7:12). Daizeze Bedʼeabara naʉ̃ ũrãgʼata diabʉ: «sobia panaidua nekʼãrẽ maraba erbʉba» akʉza jarabʉ platata mejãcha kãgada ẽ baibarata (akʉra Hebreos 13:5). Dayirãba erbʉba sobiabʉbʉrʉ krĩchanʉma ẽ bayi nekʼãrẽ audre erbaita, adewara wuabemara debe neẽ bayi (Proverbios 22:7). Plata kʼãrẽa jemene ẽ bayi akʉza jʉrʉ ẽ bayi atiaude platabara totoita.
3. ¿Dayi platara sãwũã zokʼaseabʉ wuabemara kʼarebaita?
Dayirãba «soiduba diakĩrã» diabʉde akʉza dayirãba «erbʉta wuabemara diakĩrã» diabʉde obʉ Jeowade kĩrãkʼa (1 Timoteo 6:18). Dayirãba plata biʼia zokʼaseabʉ kongregasione kʼarebapanʉne akʉza dayirã mebẽrãba nesidabʉ kʼarebabʉde. Jeowabara akʉ ẽ dayirãba kʼãrẽaba diabʉra awuarabʉrʉ akʉbʉ kʼãrẽa diabʉta. Dayirãba soiduba diapanʉbʉrʉ Jeowata mejãcha sobiabiyi akʉza dayirãsida sobiapanañi (akʉra Hechos 20:35).
AUDRE BIʼIA KʼAWUADADRɄ
Akʉdayi sãwũã trajai ʉ̃rʉ aukara krĩcha ẽ baita akʉza sãwũã dayirãba erbʉba sobia bʼaita.
4. Bʉa trajo biʼia obʉdeba ũdubira Jeowaba kãgabʉ obʉta
Bʉta Jeowa neũdukʼawuabʉrʉ iyide kĩrãkʼa akʉyi trajora. Akʉra BIDEOTA, mõbe naʉ̃ta panʉidua:
Yeisonba iyi trajode obadadera, ¿bʉara saʉ̃ta audre bia ũdusi?
¿Yeisonbara kʼãrẽta obasi iyi trajode audre krĩcha ẽ baita?
Akʉra Colosenses 3:23, 24, mõbe naʉ̃ta panʉidua:
¿Kʼãrẽa yibia dayirã trajora Jeowaba akʉbʉ kĩrãkʼa akʉita?
Dayirãba trajo erbaira arigʉ yibia, mamina Jeowadebemata audre yibia baibara dayirãitara.
5. Dayirãba nekʼãrẽ erbʉba sobiapanʉbʉrʉ nebiata ũduseapanʉ
Ẽbẽra mejãchaʉba platara ãya erbʉde weta erbakĩrãbʉ, mamina Daizeze Bedʼeabara awuara jaradiabʉ: Akʉra 1 Timoteo 6:6-8, mõbe naʉ̃ta panʉidua:
¿Kʼãrẽ ũrãgʼata diabʉ Daizeze Bedʼeabara?
Nekʼãrẽ wĩka erpanʉmina sobiapanaseabʉ. Akʉra BIDEOTA, mõbe naʉ̃ta panʉidua:
Naʉ̃ra mebẽrãra nekʼãrẽ mejãcha erbʉ ẽ mina, ¿kʼãrẽa mejãcha sobiapanʉ?
Mamina dayirãba nekʼãrẽ erbʉidu audre kãgapanʉbʉrʉ, ¿kʼãrẽta berabariseabʉ? Jesubara yizata aba ũrĩbisi maʉ̃ta audre kãgapanʉbʉrʉ zʉbʉriaseabʉta. Akʉra Lucas 12:15-21, mõbe naʉ̃ta panʉidua:
Jesuba yiza jaradadebara, ¿bʉara kʼãrẽta kʼawuabʉ? (Akʉra nejʉacha zake 15).
Akʉra Proverbios 10:22 akʉza 1 Timoteo 6:10, mõbe naʉ̃ta panʉidua:
¿Bʉmara saʉ̃ta audre yibia: Jeowa neũdukʼawua bʼaita mawũã ẽ bʉrʉ plata mejãcha erbaita? ¿Kʼãrẽa?
¿Kʼãrẽta berabariseabʉ platata audre kãgapanʉbʉrʉ?
6. Dayirãba nesidabʉra jõma Jeowaba diayi
Dayirãba Jeowaʼa ũdubiseapanʉ kʼãrẽaba kãgapanʉta trajo neẽ bʉrʉde akʉza plata neẽ bʉrʉde. Akʉra BIDEOTA, kʼawuaita kʼãrẽta oseabʉta bedʼea zroma ũdubʉdade, mõbe naʉ̃ta panʉidua:
Naʉ̃ bideodera, ¿mebẽrãbara kʼãrẽ bedʼea zromata ũdusida?
¿Bedʼea zroma aukara krĩcha ẽ baita kʼãrẽta osi?
Akʉra Mateo 6:25-34, mõbe naʉ̃ta panʉidua:
¿Kʼare nebiata diaita jarabʉ Jeowabara iyidebemata nããra bʉepanʉrara?
Ʉ̃KɄRɄBA KRĨCHAPANɄTA: «Mejãcha trajaibara mʉ̃ mebẽrãba nesidabʉ diaita, maʉ̃ kʼarea semanaza wã be ẽ ãba yi jʉrebʉma».
¿Kʼãrẽ testoba kʼarebaseabʉ kʼawuaita Daizezedebema nãã bʉeira audre yibiata?
KĨRÃBEITA
Trajora arigʉ yibia akʉza plata erbaisida yibia, mamina maʉ̃ba jĩgara edebi ẽ baibara Daizezedeba.
Panʉnadrʉ
¿Kʼãrẽba kʼarebaseabʉ dayirã trajo Jeowaba akʉbʉ kĩrãkʼa akʉita?
¿Daya erbʉba sobiabʉbʉrʉ bʉra sãwũã kʼarebaseabʉ?
Jeowaba bʉa diabʉbʉrʉ jõma bʉa kʼãrẽ nesidabʉta, ¿bʉa sãwũã ĩjãbʉta ũdubiseabʉ iya wãrĩnu bʉa nesidabʉ diaita?
JɄRɄDA AUDRE KʼAWUAITA
Kʼawuara Daizeze Bedʼeaba kʼãrẽta jarabʉta plata ʉ̃rʉ.
«¿Dayirã jõma nekayirua berabaribʉra platadeba mawũãbʉka?» (Artikulo de jw.org)
Daizezeba jarabʉdebara akʉra kʼãrẽa nekʼãrẽ diaseabʉta.
«¿Daizeze Bedʼeabara kʼãrẽta jarabʉ wuabema nekʼãrẽ diai ʉ̃rʉra?» (Artikulo jw.org)
¿Platabari jemeneira nekayiruaka?
«Daizeze Bedʼeaba jarabʉta: Platabari jemenei ʉ̃rʉ» (¡Despertad!, marzode 2015de)
Akʉra yumakẽrã aba jemenemiabadata akʉza nezrʉgamiabadata adewara kʼawuara iyi bebʉ sãwũã awuara besita.
«Mʉ̃ara mejãcha kãgabasi kabayode jemeneita platabari» (Jarakabʉ, 1ne noviembrede 2011de)