YI 58
Jeowaʉ̃me kʼẽrẽpa panaibara
Dayirã kristianoaraba Jeowata mejãcha kãgapanʉ baera iduaribida ẽ bayi mio ẽbẽraba iyideba jĩgara babimarẽã. Bʉabida mawũã krĩchabʉ, bʉra wãrĩnu Jeowaʉ̃me kʼẽrẽpa bakĩrãbʉ. Akʉza Jeowabara akʉbʉ bʉ kʼãrẽ obʉra (akʉra 1 Crónicas 28:9). ¿Kʼãrẽba jĩgara babiseabʉ bʉra Daizezedebara? ¿Kʼãrẽta oseabʉ Daizezedeba jĩgara ba ẽ baita?
1. ¿Sãwũã wuabemaraba obʉdeba jĩgara babiseabʉ Daizezedeba?
Ʉ̃kʉrʉ ẽbẽrarãbara kãga ẽ Jeowaʉ̃me kʼẽrẽpa bamarẽã. ¿Kʼairaba mawũã okĩrãpanʉ? Ʉ̃kʉrʉ ẽbẽrarã Daizeze ode badaba. Jeowa odeba ãĩ wã kʼãrãpe jarapanʉ sewidata, mawũã dayirãba Daizeze ʉ̃rʉ ĩjãbʉta ĩjã ẽã wãmarẽã. Maʉ̃ra ẽbẽrarãra ũdukaʉde apostatade. Adewara ẽbẽra religion zeri ẽãne edabʉrabida Jeowa ʉ̃rʉ Kʼawuabipanʉrã ʉ̃rʉbida sewa nebʉrata jarapanʉ, mawũã ẽbẽrarã yi kʼawua ẽ panʉraba ũrĩkĩrãna ẽ marẽã. Yibia ẽ bayi ãyibawara bedʼeakaita, ãya libro obʉ akʉita akʉza internetʼne bideode eda akʉita apostataraba odata, Jesura bedʼeasi maʉ̃ra ẽbẽra ʉ̃rʉ: «Krĩcha oraidua ãyi kʼarea. Ãyira yi nãã edebari ũdu ẽã bʉ, maʉ̃ba yi ũdu ẽã bʉba edera abarika yi ũdu ẽã bʉta, eda zobeade baedayi» (Mateo 15:14).
Mamina, ¿kʼãrẽta berabariseabʉ dayi neũdukʼawuaba Jeowata kãga ẽ aduara? Bʉmabida maʉ̃ba dayirãra sopʉaseabʉ. Mamina maʉ̃ awa ẽ, maʉ̃ ẽbẽraba krĩchabiseabʉ iyiʉ̃me kʼẽrẽpa bʼamarẽã mawũã Jeowaʉ̃me kʼẽrẽpa babi ẽ baita. Mamina dayirãbara kʼawuapanʉ Jeowaʉ̃mebʉrʉ kʼẽrẽpa bʼaibarata nekʼãrẽ baduira (Mateo 10:37). Maʉ̃ kʼarea dayirãbara ũrĩpanʉ Jeowaba zokʼabʉta, apostatarabawara ãbapana ẽ baita (akʉra 1 Corintios 5:11).
2. ¿Kʼãrẽba obiseabʉ Jeowaʉ̃me kʼẽrẽpa bʼaita mawũã ẽ bʉrʉ ba ẽãta?
Wãrĩnu Jeowata kãgapanʉbʉrʉ, trajode, dayirã komʉnidaba obʉrʉta akʉza nekʼãrẽ badu, religioraneba zebʉta oda ẽ baibara. Maʉ̃ kʼarea Jeowaba jarabʉ iyi pʉwʉrʉʼa: «Ãĩ wãidua kaʉ̃nebara», maʉ̃bara jarakĩrãbʉ Babilonia (religiora zeri ẽã) zromaneba ãĩ wãibarata (Apocalipsis 18:2, 4).
AUDRE BIʼIA KʼAWUADADRɄ
Akʉra bʉa kʼãrẽta oseabʉta wuabemara yi edebi ẽ baita bʉ kʼẽrẽpabʉdeba. Adewara akʉra kʼãrẽa Babilonia zromaneba jĩgarabʉba ũdubipanʉ Jeowaʉ̃me kʼẽrẽpabʉta.
3. Jʉra kʼawuabara ẽbẽrarã aña jaradiabʉraneba
¿Dayirãba Jeowa organizasion ʉ̃rʉ aña jarapanʉta ũrĩpanʉbʉrʉ kʼãrẽta odaibara? Akʉra Proverbios 14:15, mõbe naʉ̃ta panʉidua:
¿Kʼãrẽa ĩjãna ẽ baibara dayirãba jõma ũrĩpanʉra?
Akʉra 2 Juan 10, mõbe naʉ̃ ʉ̃rʉ bedʼeidua:
¿Sãwũã edadaibara apostatarãra?
Apostatarabawara bedʼeapanʉ ẽ mina ĩjãseabʉ ãya jarabʉta, ¿maʉ̃ra sãwũã berabariseabʉ?
Dayirãba Jeowa ʉ̃rʉ akʉza iyi organizasion ʉ̃rʉ imitia jarapanʉta ĩjãpanʉbʉrʉ, ¿maʉ̃bara sãwũã krĩchabiseabʉ Jeowara?
4. Kʼẽrẽpabara Daizezeʉ̃me mebẽã abaʉba nekayirua zromata osimina
Dayirãba kʼawuara mebẽã kongregasionebemaba nemitia zromata osita, ¿kʼãrẽta odaibara? Akʉdaya Daizezeba israelitara pʉwʉrʉra ley diada ʉ̃rʉ. Akʉra Levítico 5:1.
Naʉ̃ testoba jarabʉ kĩrãkʼa, dayirãba kʼawuara mebẽã abaʉba nekayirua zromata osita, waña jaraibara daya kʼawuabʉta zõrãrãʼa, mamina maʉ̃ oi nãã bedʼeaibara ibiade iya nekayirua odata jaramarẽã zõrãrãʼa. Iya maʉ̃ta oẽ bʉrʉ, dayirãba Jeowata audre kãgapanʉ baera dayirãba jaraseabʉ zõrãrãʼa. ¿Kʼãrẽa naʉ̃ obʉba ũdubipanʉ kãgata akʉza kʼẽrẽpapanʉta...
... Jeowaʉ̃me?
... ẽbẽra nekayirua odaʼa?
... kongregasionebemaraʼa?
Mebẽã abaʉta bedʼea zromane eda wãsibʉrʉ kʼarebara.
5. Jĩgara baidua Babilonia zromanebara
Akʉra Lucas 4:8 akʉza Apocalipsis 18:4, 5 mõbe naʉ̃ta panʉidua:
¿Mʉ̃ trʉ̃ra eda religion zeri ẽãrane bʉta bʉka?
¿Mʉ̃ra edabʉka organizasion nekʼãrẽ wuabemaraba obʉde mamina maʉ̃ra zebʉ religion zeri ẽãneba?
¿Mʉ̃a trajo erbʉbara kʼarebabʉka religion zeri ẽãra?
¿Mʉ̃ra edabʉka religiora zeri ẽãba nekʼãrẽ badu obʉde?
¿Mʉ̃ara wuabida nesidabʉka religion zeri ẽãraneba jĩgara bʼaita?
Maʉ̃ranebema abaʉta bʉa mawũã asibʉrʉ, ¿kʼãrẽta oseabʉ? Jidara bʉ krĩcha aduʼa babita akʉza oũdubita Jeowaʉ̃me kʼẽrẽpabʉta.
¿Bʉara kʼãrẽta oi bʉaʼa jaradara religion zeri ẽãba kʼarebamarẽã?
Ʉ̃KɄRɄBA KRĨCHAPANɄTA: «Mʉ̃a kʼawua ẽ bʉrʉ apostataraba Jeowa ʉ̃rʉ Kʼawuabipanʉrã ʉ̃rʉ jarapanʉta, ¿mʉ̃ra sãwũã wãrĩnuare bedʼeai?».
¿Mawũã krĩchaira yibiaka? ¿Kʼãrẽa?
KĨRÃBEITA
Dayirãta Jeowaʉ̃me kʼẽrẽpa bakĩrãbʉbʉrʉ ãba ba ẽ baibara Jeowa ʉ̃rʉ imitia bedʼeapanʉrabawara akʉza jipa ãĩ bʼaibara religion zeri ẽãnebara.
Panʉnadrʉ
¿Kʼãrẽa akʉda ẽ baibara, leda ẽ baibara akʉza ũrĩna ẽ baibara apostataba jarabʉra?
¿Dayirãbara sãwũã akʉibara mebẽã Jeowa ʉ̃rʉ Kʼawuabipanʉrã wua bakĩrã ẽãra?
Dayirãbara kʼãrẽta oseabʉ Jeowa bedʼea ũrĩta religion zeri ẽãneba ãĩ wãita?
JɄRɄDA AUDRE KʼAWUAITA
Akʉra bʉa kʼãrẽta oseabʉta wuabemaraba Jeowa ʉ̃rʉ Kawuabipanʉrã ʉ̃rʉ sewida jarabʉrʉde.
«¿Jõma kʼãrẽ berabaridata biʼia kʼawuabʉka?» (Jarakabʉ, agosto 2018de)
¿Sãwũã kʼawuaseapanʉ ẽbẽrarãba obʉra Babilonia zromare panʉta?
¿Ʉ̃kʉrʉbara kʼãrẽta ozebʉrʉ dayirãba ĩjãbʉta wua ĩjã ẽ bamarẽã?
Akʉra nebʉrata: «Wũãwũãrainʉba jʉrʉbasi Daizezeta», akʉra sãwũã saserdoteba amaesita religion zeri ẽãta.
«Daizeze Bedʼeabara mʉ̃ bebʉra awuarababibʉ» (Jarakabʉ, 1ne juliode 2011de)