YI 57
¿Kʼãrẽta berabariseabʉ nekayirua zromata osibʉrʉ?
Dayirãba Jeowa mejãcha kãgapanʉmina akʉza zarea opanʉmina Jeowa sopʉabi ẽ baita, edaʉde nemitiata oseapanʉ maʉ̃ awuara audre nemitia zromata oseapanʉ (1 Corintios 6:9, 10). Mamina bʉa maʉ̃ nekayirua zromata ora maʉ̃ba jarakĩrãbʉ ẽ Jeowaba bʉra jʉratotoita; awuarabʉrʉ iyara bʉa nemitia odara kĩrãduakĩrãbʉ akʉza kʼarebakĩrãbʉ.
1. ¿Kʼãrẽta odaibara Jeowaba dayirã nemitiata kĩrãduamarẽãra?
Jeowa kãgabʉba nemitiata obʉbʉrʉ mejãcha sopʉabʉ. Naʉ̃ bedʼeata Jeowaba iyi pʉwʉrʉʼa jaradadeba ũdubibʉ wãrĩnu dayirã kʼarebakĩrãbʉta: «Mara nemitiara purrubʉmina eskarlata kĩrãkʼa torro bayi niewe kĩrãkʼa» (Isaías 1:18). Dayirãba nemitia obʉta wua oẽ bʉrʉ Jeowabara jarabʉ jipa kĩrãduaita. ¿Nekayirua wua oẽ baira kʼãrẽta jarakĩrãbʉ? Jarakĩrãbʉ jipa wua oẽ baita dayirãba nekayirua odata akʉza soiduba Jeowa widita dayirãba nekayirua odata kĩrãduamarẽã. Mõbe mejãcha zarea odaibara maʉ̃ krĩcha mitia dayirã baebida wua kricha ẽ baita, awuarabʉrʉ bʼaita Jeowaba kãgabʉde (akʉra Isaías 55:6, 7).
2. ¿Jeowabara sãwũã kʼarebabʉ dayirãra zõrãrãneba nekayirua obʉrʉdera?
Nekayirua odaraitara Jeowabara naʉ̃ ũrãgʼata jarabʉ: «Trʉ̃ra zõrãrã kongregasionebemata» (akʉra Santiago 5:14, 15). Maʉ̃ra zõrãrãra Daizeze jaure zareaba jidada, ãyara mejãcha kãgapanʉ Jeowata akʉza iyi obejitarata. Zõrãrãʼa jaradiapanʉ dayirãta kʼarebamarẽã jẽda Jeowa neũdukʼawua bʼaita (Gálatas 6:1).
¿Zõrãrãbara sãwũã kʼarebabʉ dayirãta nemitiata ora? Zõrãrã ũmeba mawũã ẽ bʉrʉ zõrãrã ũbeaʉba Daizeze Bedʼeadeba ũrãgʼa diapanʉ daya nemitia oda ʉ̃rʉ akʉza so zareata diapanʉ, maʉ̃ awuara ũrãgʼa biata diapanʉ wua nemitiata oẽ marẽã. Mamina mebẽrã abaʉta zõrãrãba ũrãgʼa diabʉidu ãyi nemitiata amaekĩrã ẽ bʉrʉ, maʉ̃ra Jeowa organizasioneba ãĩ bʉedaibara mawũã kongregasion bia erbaita.
AUDRE BIʼIA KʼAWUADADRɄ
Biʼia kʼawuadaibara Jeowaba dayirãra kʼãrẽa ũrãgʼa diabʉta nemitia obʉrʉde akʉza biga diadaibara iya mawũã obʉ kʼarea.
3. Dayirãba nekayiruata jõma jarabʉdade Jeowaʉ̃me biʼia wãbʉ
Dayirãba nekayirua baduta obʉrʉde jaraibara, Jeowata sopʉabipanʉ baera. Akʉra Salmo 32:1-5, mõbe naʉ̃ta panʉidua:
¿Kʼãrẽa yibia dayirãba nemitia obʉta merai kaude Jeowa jaraita?
Dayirãba nemitia odata Jeowa jarape, zõrãrã kʼarebata widipanʉbʉrʉ aduʼa panañi. Akʉra BIDEOTA, mõbe naʉ̃ta panʉidua:
Canon Jeowa oma jẽda zemarẽãra, ¿zõrãrãbara sãwũã kʼarebasida?
Zõrãrã dayirãba wãrĩnu jaraira arigʉ yibia, ãyara dayirã kʼarebaitabʉ baera. Akʉra Santiago 5:16, mõbe naʉ̃ta panʉidua:
¿Bʉa wãrĩnuta jarabʉbʉrʉ zõrãrãitara zare ẽ baika bʉ kʼarebadaira? ¿Kʼãrẽa?
Jõma jarada bʉa nekayirua odara akʉza wãrĩnuta jarada zõrãrãʼa, mõbe Jeowaba bʉ ũrãgʼabʉrʉta ibiade ũrĩdua.
4. Jeowaba so borekea akʉbʉta ũdubibʉ ẽbẽra nemitia opananara
Ẽbẽra abaʉba iya nemitia odata ara okĩrã ẽ bʉrʉ akʉza kãga ẽ bʉrʉ Jeowaba jarabʉ oita, maʉ̃ ẽbẽraʉ̃me badua bedʼeanʉmabe ẽ. Akʉra 1 Corintios 5:6, 11 mõbe naʉ̃ta panʉidua:
Krĩchaidua naʉ̃ta: arina erapua obaribara pan masara jõma oreguea obari, maʉ̃ kĩrãkʼa dayirãta ẽbẽra nekayirua odabawara badua bedʼeapanʉbʉrʉ, ¿kʼãrẽta berabariseabʉ dayirã kongregasionʼra? ¿Kʼãrẽa?
Zõrãrãba Jeowaba obʉ kĩrãkʼa opanʉ baera so borekeata ũdubibʉ nekayirua opananara, maʉ̃ kʼarea jʉrʉpanʉ kongregasioneba jĩgapanʉrata mawũã kʼarebaita. Jeowa odeba ãĩ bʉedapeadara mejãchaʉta jẽda zepanʉ kongregasionʼena, ¿kʼãrẽba jẽda zebibʉ? Ãyi kʼẽãsidadera mejãcha pʉbasimina kʼarebasi biʼia krĩchaita (Salmo 141:5).
Jeowabara dayirã so borekea akʉbʉ, kãgabʉ akʉza aukʼara omarẽã widi ẽ, ¿maʉ̃ra sãwũã ũdubibʉ nemitia opananara?
5. Dayirãba nemitiata ara okĩrãbʉbʉrʉ Jeowaba kĩrãduabʉ dayi nemitiara
Jesuba nebʉra jaradadeba kʼãrẽbabʉ kʼawuaita Jeowa sãwũã krĩchabʉta nemitia odata wua oda ẽ bʉrʉ. Akʉra Lucas 15:1-7, mõbe naʉ̃ ʉ̃rʉ panʉidua:
¿Naʉ̃ nebʉrabara kʼãrẽta jaradiabʉ Jeowa ʉ̃rʉra?
Akʉra Ezequiel 33:11, mõbe naʉ̃ta panʉidua:
¿Daya nemitia odata wua okĩrã ẽã ũdubita, nãã kʼãrẽta odaibara?
Jeowara obejara akʉbari kĩrãkʼabʉ baera biʼia akʉbʉ iyi obejarãra.
Ʉ̃KɄRɄBA WIDIPANɄTA: «Mejãcha perakʉ zõrãrã jaraita. Mʉ̃a odata jarara, ãyara mʉ̃ra kongregasioneba ãĩ bʉedayi».
¿Bʉara kʼãrẽta jaraseabʉ mebẽrã mawũã krĩchabʉara?
KĨRÃBEITA
Dayirãba jipa nekayirua odata wua oẽ baita krĩchabʉbʉrʉ, Jeowabara wãrĩnu kĩrãduayi dayirã nemitiara.
Panʉnadrʉ
¿Kʼãrẽa yibia dayirãba jipa nekayirua odara Jeowa jaraita?
¿Kʼãrẽta odaibara Jeowaba dayirãba nemitia odata kĩrãduamarẽã?
Dayirãba jipa nekayiruata odara, ¿kʼãrẽa zõrãrã kʼarebata wididaibara?
JɄRɄDA AUDRE KʼAWUAITA
Akʉra Isaías 1:18 Jeowaba ẽbẽra so zʉbʉria akʉbʉdeba sãwũã kʼarebasita.
Mia ewari ababida aña krĩchadakara Jeowaba soborekea akʉbʉ ʉ̃rʉra (5:02)
¿Zõrãrãbara kʼãrẽta opanʉ ẽbẽraba nekayirua oda kʼarebaita?
Ẽbẽrarã ariya nemitia opanʉrabida ũdubipanʉ kãgata akʉza so borekeata, ¿sãwũã ũdubipanʉ maʉ̃ra?
«Zõrãrãbara sãwũã kʼarebaseabʉ ẽbẽra kongregasioneba ãĩ wãnara» (Jarakabʉ, agostode 2024de)
Akʉra naʉ̃ nebʉrata: «Mʉ̃ra Jeowama wãkĩrãbʉ», naʉ̃ yumakẽrãbara ũdusi sãwũã Jeowaba iyima jeda zebisita.
«Daizeze Bedʼeabara mʉ̃ bebʉra awuarababibʉ» (Jarakabʉ, 1ne abrilde 2012de)