¿Kʼawuabasika?

¿Kʼãrẽa israelitarabara pagabasi yuwẽrã iyi kima bʼai kʼareara?

ISRAELITARA ewaribasidera yumakẽrãbara pagabasi yuwẽrã yi kima bʼai kʼareara, nekʼarẽ jõma oi naweda juwa jidadaita. Maʉ̃ra pagaseabasi oroba, nedʉwʉrʉraba mawũã ẽ bʉrʉ plataba. Edaʉde naʉ̃ra, yuwẽrã yi kima bʼai kʼareara pagapanasi iyibari trajabʉ kʼarea, Jacobʼba oda kĩrãkʼa, iyira trajasi Raquel zezeʉ̃me siete poagabayeda, mawũã osi Raquelʼʉ̃me juwa jidaya (Gén. 29:17, 18, 20). ¿Kʼãrẽa yi kima bʼai kʼareara pagabasi?

Carol Meyers, Daizeze Bedʼea ʉ̃rʉ mejãcha kʼawuabʉba jarasi: «Yi kaubara mejãchade kʼarebabasi yibarirata adewara kʼarebabasi neuita, maʉ̃ kʼarea iyiʉ̃me juwa jidaibara pagaibarabasi naʉ̃ kau kʼarea». Edaʉde yumakẽrãbara pagabasi yi kima bʼai kʼareara maʉ̃ mebẽrãsida yumakẽrã mebẽrãʉ̃me neũdukʼawua badamarẽã, mawũã bedʼea zroma erbʉdera ãyirainʉ yi kʼarebadamarẽã. Adewara yumakẽrãba pagabʉrʉdera yi kima bʼai kʼarea, ũdubibasi iyabʉrʉ akʉita mawũã wua yibariraba akʉ̃ ẽ baita yi kaura.

Yumakẽrãba yi kima bʼai kʼarea pagadaba jarakĩrãkʉa ẽ basi iya nẽdoseabʉta mawũã ẽ bʉrʉ ne edaseabʉta nekʼãrẽ badu kĩrãkʼa. Libro Instituciones del Antiguo Testamento naʉ̃ba jarabʉ: «Yumakẽrãba yi kima bari pagaira yuwẽrã mebẽrãta plata ganabʉ kĩrãkʼabʉmina mawũã ẽ basi, awuarabʉrʉ naʉ̃ta mawũã opanasi yuwẽrã mebẽrãta yi kauba kʼarebabʉta aduasi baera».

Idi ewadebida ʉ̃kʉrʉ drʉadera yumakẽrãbara yi kima bʼai kʼarea pagaibara. Yibarira kristianoraba jarabʉdade kʼãrẽta diabarata yi kaubarira, yi kima baya widibe ẽ nekʼãrẽ diamarẽãra iya diabe ẽãne wuetara (Filip. 4:5; 1 Cor. 10:32, 33). Mawũã ãya ũdubiyi «plata audre jʉrʉita» kãga ẽãta, adewara nekʼãrẽ mejãcha erbaisida (2 Tim. 3:2). Mawũã opanʉbʉrʉ yumakẽrãbara ewari bio jʉ̃a ẽ bayi yi kima yibariraba widibʉ jõma ũduyeda, adewara iyita yi nãã edebari 70 ora diabaribʉrʉ maʉ̃ta idubʉ ẽ bayi mejãcha trajabʉ kʼarea yi kima bʼai yibariraba nemejãcha widisi baera.

Ʉ̃kʉrʉ drʉadera nokʼoraba leyta diabʉ kʼãrẽ, sõbe diaibarata mawũã ẽ bʉrʉ kʼãrẽta diaibarata yi kima bʼai kʼareara, mawũãbʉdera yibarira kristianorabara ũrĩbara nokʼoraba jarabʉta, ¿kʼãrẽa? Daizeze Bedʼeaba jarabʉ baera: «Zhãrã jõma nokʼorã edre bʼeaudua» akʉza ũrĩbara nokʼoraba jarabʉta, Daizezeba zokʼabʉde awuarabʉ ẽ bʉrʉ (Rom. 13:1; Hech. 5:29).