Buru bia wãrĩnuarabara trʉ̃nʉmʉ

1. ¿Ẽbẽrarãbara kʼãrẽta opanʉ akʉza kʼãrẽta krĩchapanʉ Daizeze Bedʼeaba ũrãgʼa diabʉ ʉ̃rʉra? (Proverbios 1:20, 21).

BADUMAE ũdupanʉ mebẽrãba dayirã kartarata sobiade dedekapanʉta ẽbẽrarã mejãchaʉʼa. ¿Bʉa maʉ̃ra mebẽrãne kĩrãkʼa jaradiabarika? Bʉa mawũã obaribʉrʉ krĩchabaribaibara Proverbiosba bedʼea jarabʉta. Nama jarabʉ buru biara ewarade bedʼeanʉmʉta ẽbẽrarãba ũrĩnamarẽã iyi ũrãgʼata (akʉra Proverbios 1:20, 21). Daizeze Bedʼeade akʉza dayirã kartarane edabʉ «buru bia wãrĩnuarãra», Jeowa buru biata. Naʉ̃ buru biata nesidabʉ ẽbẽrarã ewari jõmaʉ̃nẽ bʼaita. Dayirãra mejãcha sobiapanʉ ẽbẽrarãba dayirã kartara jidabʉrʉde, mamina jõmaʉ̃ba jidada ẽ. Ʉ̃kʉrʉbara kʼawuakĩrã ẽ Daizeze Bedʼeaba jarabʉra. Ʉ̃kʉrʉra ipidapanʉ dayirã kʼarea, ãya krĩchapanʉ Daizeze Bedʼeara kikibarita. Ʉ̃kʉrʉra ibia bedʼeapanʉ ẽ Daizeze Bedʼeaba dayirã sãwũã bʼai ʉ̃rʉ jarabʉ kʼarea, adewara jarapanʉ yi ẽbẽrarã Daizeze Bedʼeaba jarabʉta obʉra ẽbẽra kayiruata akʉza aukʼara Daizeze Bedʼeaba jarabʉdebʉta. Mawũãsidu Jeowaba kãgata ũdubibʉ baera iduaribibʉ jõmaʉ̃ba iyi ʉ̃rʉ kʼawuamarẽã. ¿Sãwũã obʉ maʉ̃ra?

2. ¿Sama ũduseapanʉ buru bia wãrĩnuarãra, mamina ʉ̃kʉrʉ ẽbẽrarãbara kʼãrẽta krĩchapanʉ?

² Jeowabara ẽbẽrarã iyi ʉ̃rʉ kʼawuabibʉ iyi bedʼeadeba, Daizeze Bedʼeara ẽbẽrarã mejãchaʉba erpanʉ akʉza Jeowa kʼarebadeba dayirã kartarasida bedʼea 1.000 audre awuara awuarakabʉ. Yi maʉ̃ kartara lebʉra akʉza mama jarabʉ obʉra bia wãmarẽã. Mawũãsidu ẽbẽrarã mejãchaʉba Jeowaba jarabʉta ũrĩkĩrã ẽ. Ãya mawũã obʉrʉdera ũdubipanʉ ãyi ʉ̃rʉ ĩjãbʉta mawũã ẽ bʉrʉ ĩjãbʉta awuru ẽbẽraba ũrãgʼa diabʉta. Naʉ̃ra ẽbẽrarãbara dayirãra kʼãrẽ ẽ kĩrãkʼa akʉbʉ Daizeze Bedʼeaba jarabʉta opanʉ baera. Naʉ̃ artikulode akʉdayi kʼãrẽ kʼarea ẽbẽrarãbara mawũã krĩchabʉta. Mamina nããra akʉdaya sãwũã erbaita buru bia Daizezedeba zebʉra.

JEOWA Ʉ̃RɄ KʼAWUAIBA BURU BIA BABIBɄ

3. ¿Kʼãrẽta odaibara wãrĩnu buru bia bʼaira?

³ Buru biabara jarakĩrãbʉ bia zokʼaita dayirãba kʼawuabʉta krĩcha bia jidaita. Mamina maʉ̃ awa ẽ. Daizeze Bedʼeaba jarabʉ: «Jeowaʼa wawia ũdubibʉdeba zebʉ buru biara, Neneẽãbʉ ʉ̃rʉ kʼawuaiba ũrĩ kʼawuabibʉ» (Prov. 9:10). Maʉ̃ba dayirãba nekʼãrẽ jidai naweda krĩchaibara Jeowaba krĩchabʉ kĩrãkʼa, kʼawuaita Jeowaba sãwũã krĩchabʉta dayirãba oitabʉ ʉ̃rʉ. Naʉ̃ta oseabʉ Daizeze Bedʼea estudiabʉrʉde akʉza dayirã kartarata. Mawũã opanʉnera ũdubipanʉ dayirãra buru biata (Prov. 2:5-7).

4. ¿Kʼãrẽa Jeowabʉrʉ diaseabʉ buru biara?

⁴ Jeowabʉrʉ wãrĩnu diaseabʉ buru biara (Rom. 16:27). Nããra, nekʼãrẽ jõmabʉra Jeowaba parãsi baera, iyara biʼia ũdukʼawuabʉ iya parãnara (Sal. 104:24). Ũmeta, Jeowaba nekʼãrẽ jõma obʉba ũdubibʉ iyira buru biata. (Rom. 11:33). Ũbeata, Jeowaba ũrãgʼa diabʉbara kʼarebabʉ yi ẽbẽrarã maʉ̃ bedʼea ũrĩbʉrãra (Prov. 2:10-12). Dayirãta buru bia bakĩrãpanʉbʉrʉ, Daizeze Bedʼeade nãã kʼawuadata ĩjãibara akʉza iduaribibara naʉ̃ba kʼawua jaramarẽã sãwũã krĩchaita akʉza kʼãrẽta oita.

5. ¿Kʼãrẽta berabaribʉ ẽbẽrarãba ĩjãna ẽ baera buru bia wãrĩnuarãra Daizezedeba zebʉta?

⁵ Dayirãba ũdupanʉ ẽbẽrarãba jarapanʉta naʉ̃ drʉade nekʼãrẽ bʉra biʼia parãbʉta. Mamina ãyara ĩjãna ẽ bʉta nekʼãrẽ jõma parãnara akʉza jarapanʉ nekʼãrẽra iyidoba zesita. Ʉ̃kʉrʉba jarapanʉ Daizezera bʉta mamina krĩchapanʉ Daizeze Bedʼeaba jarabʉra kikibarita, maʉ̃ kʼarea opanʉ ãya okĩrãbʉta. Ẽbẽrarãba mawũã krĩchapanʉ kʼarea, ¿kʼãrẽta berabarinʉmʉ? ¿Naʉ̃ drʉara audre biabʉka ẽbẽrarãba Jeowa ʉ̃rʉ ĩjãi kaude ãyi ʉ̃rʉ ĩjãbʉ baera? ¿Maʉ̃ra ẽbẽrarã wãrĩnu sobiapanʉka akʉza nebiata jʉ̃ãpanʉka? Dayirãba ũdupanʉba ĩjãbibʉ naʉ̃ testoba jarabʉra wãrĩnuta: «Yi Jeowa ʉ̃rʉbʉra buru bia neẽbayi, kʼawua ẽ bayi saʉ̃ta yibiata akʉza saʉ̃ta zeri ẽãta akʉza mia kʼãrẽ ũrãgʼata zeri ẽ bayi» (Prov. 21:30). Naʉ̃ kʼawuaiba kʼarebabʉ dayirãba Jeowa widita buru bia wãrĩnuarata diamarẽã, mamina ẽbẽra mejãchaʉba mawũã oda ẽ, ¿kʼãrẽa?

¿KʼÃRẼA ẼBẼRABARA ŨRĨKĨRÃ Ẽ BURU BIA WÃRĨNUARÃRA?

6. Proverbios 1:22-25 bayeda jarabʉdebara, ¿kʼairaba ũrĩkĩrã ẽ buru bia wãrĩnuarãra?

⁶ Ẽbẽra mejãchaʉba ũrĩkĩrã ẽ buru bia wãrĩnuaraba jaranʉmʉta. Daizeze Bedʼeaba jarabʉdebara kĩrã ũbeabʉ yi ẽbẽrarã buru bia wãrĩnuara ũrĩkĩrã ẽãta, kʼãrẽ kʼawua ẽ panʉrata, ipidamiarata akʉza krĩcha neẽ kĩrãkʼa berata (akʉra Proverbios 1:22-25). Audre bia kʼawuadaya sãwũã panʉta ẽbẽrarã buru bia Daizezedeba zebʉ ũrĩkĩrã ẽãta akʉza kʼãrẽta odaibarata ãyi kĩrãkʼa ba ẽ baita.

7. ¿Kʼãrẽa ʉ̃kʉrʉ ẽbẽrarãbara jidapanʉ kʼãrẽ kʼawua ẽ bʉ kĩrãkʼa bʼaita?

⁷ «Yi kʼãrẽ kʼawua ẽ panʉrata». Naʉ̃ra ẽbẽrarãbara jõma ĩjãpanʉ. Maʉ̃ba ãyira mesera sewapanʉ (Prov. 14:15 nota). Dayirãba jaradia wãbʉrʉdera ũdupanʉ maʉ̃ra ẽbẽrarãta. Bari jaraita, krĩchara nokʼora religionʼraba akʉza politikoraba ẽbẽrarã mejãcha sewa zebʉrʉ ʉ̃rʉ. Ʉ̃kʉrʉra mejãcha kĩrʉbʉ kʼawuabʉrʉde ãyi nokʼoba ãyaʼa sewanebʉrʉ jarasita. Mamina Proverbios 1:22​ba jarabʉ kĩrãkʼa, ʉ̃kʉrʉbara jidabʉ kʼãrẽ kʼawua ẽ bʉ kĩrãkʼa bʼaita, ãyima mawũã bia bʼai kĩrãkʼabʉ baera (Jer. 5:31). Ãyira sobiapanʉ ãya okĩrãta opanʉne akʉza ũrĩkĩrã ẽ Daizeze Bedʼeaba zokʼabʉta. Ẽbẽra mejãchaʉta naʉ̃ ẽbẽra wẽrã Quebecʼdebema (Canadá), kĩrãkʼa sentipanʉ. Iya Jeowa ʉ̃rʉ Kʼawuabipanʉrã jaraside: «Dai saserdoteba daiʼa sewanebʉrʉ jarabʉbʉrʉ, maʉ̃ra iyidebʉ, daibara kʼawua ẽ». Dayirãra maʉ̃ra ẽbẽrarã kʼãrẽ kʼawua ẽ bʉ kĩrãkʼa bakĩrãpanʉ ẽ (Prov. 1:32; 27:12).

8. ¿Kʼãrẽba kʼarebayi buru bia bʼaita?

⁸ Daizeze Bedʼeaba jaradiabʉ kʼãrẽ kʼarea ẽbẽrarã kʼãrẽ kʼawua ẽ bʉ kĩrãkʼa ba ẽ baita, awuarabʉrʉ kʼãrẽa audre kʼawua wãibarata (1 Cor. 14:20). Dayirãra buru bia baseabʉ Daizeze Bedʼearadebemaba jarabʉta opanʉne akʉza maʉ̃ba wiña wiñane kʼawua wãñi sãwũã Daizeze Bedʼearadebemaba kʼarebabʉta bedʼea zroma ara oita akʉza krĩcha bia jida kʼawuaita. Yibiabayi dayikʉza bia krĩchaita naʉ̃ ʉ̃rʉ. Bari jaraita, bʉa Daizeze Bedʼeata kʼawuabʉbʉrʉ, ãba yi jʉrebarima wãbʉbʉrʉ, mamina wabida buru kʼoe ẽ bʉrʉ, krĩchaseabʉ kʼãrẽta oita mawũã buru kʼoeita. ¿Bʉta yi buru kʼoema bʉrʉ zarea obʉka audre nejaradiabari bia bʼaita? ¿Bʉa nekʼãrẽ jidabʉrʉdera Daizeze Bedʼeaba jarabʉde obʉka? ¿Wuabemarãra bia edabʉka Jesuba obada kĩrãkʼa? Bʉa kʼawuara kʼãrẽne awuara oibarata, zarea ora Jeowaba zokʼabʉ oita ‹maʉ̃ba buru bia diabʉ baera yi kʼawua ẽ bada› (Sal. 19:7).

9. ¿Ipidamiarabara sãwũã ũdubibʉ buru bia wãrĩnuara Daizezedeba zebʉ kãga ẽãta?

⁹ Buru bia Daizezedeba zebʉ ũrĩkĩrã ẽãra «yi ipidamiara». Edaʉde dayirãba Daizeze Bedʼea jaradia wãbʉrʉde ũdupanʉ ẽbẽrarã mawũã panʉta. Ãyira sobiapanʉ awuru ʉ̃rʉ ipidabʉrʉde (Sal. 123:4). Daizeze Bedʼeabara jarabʉ ewari jõbodoarera bʼaita ipidamiarata (2 Ped. 3:3, 4). Lot wigurane kĩrãkʼa, idi ewadebida ẽbẽrarãbara ũrĩkĩrã ẽ Jeowaba zokʼabʉra (Gén. 19:14). Ẽbẽrarã Daizeze Bedʼeaba jarabʉde opanʉra kʼarea ʉ̃kʉrʉrãra maʉ̃ra kʼarea ipidapanʉ. Yi ipidapanʉrãra mawũãpanʉ ãya kãgata okĩrãpanʉ baera (Jud. 7, 17, 18). Daizeze Bedʼeaba jarabʉdera naʉ̃ra ẽbẽrarã ipidamiarãra apostatara kĩrãkʼabʉ akʉza Daizeze Bedʼeaba zokʼabʉ ũrĩkĩrã ẽ kĩrãkʼabʉ.

10. Salmo 1:1ne jarabʉde kĩrãkʼa, ¿kʼãrẽta odaibara ipidamiara kĩrãkʼa ba ẽ baita?

¹⁰ ¿Kʼãrẽta oibara ipidamiara kĩrãkʼa ba ẽ baita? Ãba ba ẽ baibara ipidamiarabawara akʉza jari ẽbẽrarã nekʼãrẽ jõmaʉ̃ kʼarea mitia bedʼeabʉrabawara (akʉra Salmo 1:1). Naʉ̃ba jarakĩrãbʉ dayirãbara le ẽ baibarata akʉza ũrĩ ẽ baibarata nekʼãrẽ apostataraneba zebʉra. Dayirãba kʼawuapanʉ jʉra kʼawua panʉ ẽ bʉrʉ, nekʼãrẽ jõmaʉ̃ kʼarea imitia bedʼeaseapanʉ akʉza krĩchaseapanʉ Jeowaba akʉza iyi organizasionba jarabʉra biga ẽãta. Dayirãba maʉ̃ra ẽbẽrane kĩrãkʼa krĩchabʉ kʼawuaira naʉ̃ta widibara: «¿Mʉ̃a nekʼãrẽ omarẽã jarabʉdadera mʉ̃ra imitia bedʼeabʉka maʉ̃ ʉ̃rʉ? ¿Jʉrʉbʉka yi nãã edebʉraba kʼãrẽne aña obʉta?». Dayirãba mawũã krĩchabʉta ara odara Jeowata sobiabidayi (Prov. 3:34, 35).

11. ¿Sãwũã akʉbʉ ẽbẽrarã krĩcha neẽ kĩrãkʼa berabara Jeowaba zokʼabʉra?

¹¹ Buru bia wãrĩnuara Daizezedeba zebʉ ũrĩkĩrã ẽãrãra «yi krĩcha neẽ kĩrãkʼa bera». Maʉ̃ra ẽbẽrarã mawũãpanʉ jipa ũrĩkĩrã ẽ baera Daizezeba zokʼabʉta (Prov. 12:15). Ãyira Jeowa buru bia yi zokʼabikĩrã ẽ (Sal. 53:1). Dayirãba Daizeze Bedʼea jaradia wãbʉrʉdera naʉ̃ra ẽbẽrarãra imitia bedʼeapanʉ dayirã ʉ̃rʉ, dayirãba Daizeze Bedʼeaba zokʼabʉde opanʉ baera. Ãyira kʼãrẽ bia jaraira neẽ. Daizeze Bedʼeaba jarabʉ: «Buru bia wãrĩnuarãra jĩgabʉ krĩcha neẽ kĩrãkʼa beranebara; iyara kʼãrẽ jaraira neẽ pʉwʉrʉ puertadera» (Prov. 24:7). Krĩcha neẽ kĩrãkʼa berabara ũrãgʼa bia diai neẽ, maʉ̃ kʼarea Jeowaba jarabʉ jĩga bamarẽã ẽbẽrarã krĩcha neẽ kĩrãkʼa beranebara (Prov. 14:7).

12. ¿Kʼãrẽba kʼarebayi krĩcha neẽ kĩrãkʼa ba ẽ baita?

¹² Dayirãra jari ẽbẽrarã Daizezeba ũrãgʼa diabʉ jʉrabʉ kĩrãkʼa panʉ ẽ. Dayirãba kãgapanʉ Jeowaba zokʼabʉra. Dayirãba ũdubʉrʉde Jeowaba zokʼabʉ obʉde bia wãta, naʉ̃ba kʼarebayi dayirãba Jeowaba zokʼabʉ audre kãga wãita. Akʉra kʼãrẽ bedʼea zromata ũdupanʉta yi ẽbẽrarã Jeowaba zokʼabʉde bʉ ẽãraba akʉza akʉra bʉ sãwũã bia wãta Daizezeba zokʼabʉta obʉ baera (Sal. 32:8, 10).

13. ¿Jeowabara ajuerzade jarabʉka iya ũrãgʼa diabʉta omarẽã?

¹³ Jeowaba iduaribibʉ kʼãrẽ, iyi ũrãgʼata jõmaʉ̃ba kʼawuadamarẽã, mamina iya ajuersade jara ẽ maʉ̃ ũrãgʼaba jarabʉta odamarẽã. Naʉ̃ra ẽbẽrarã yi Jeowaba zokʼabʉ ũrĩ ẽãrãra zʉbʉriayi ãya kʼãrẽ obʉdeba akʉza Jeowaba jõma makenañi (Prov. 1:29-32). Yi ẽbẽrarã Daizezeba ũrãgʼa diabʉ ũrĩbʉraitara akʉza maʉ̃ta obʉraitara naʉ̃ nebiatabʉ: «Mamina yi mʉ̃ bedʼea ũrĩbʉra aduʼabayi, nekʼãrẽ kayirua berabaribʉba jãrĩ ẽ bayi aduʼabʉta» (Prov. 1:33).

BURU BIA WÃRĨNUARÃRA DAYIRÃITA YIBIA

14, 15. ¿Kʼãrẽta kʼawuapanʉ Proverbios 4: 23​deba?

¹⁴ Jeowaba ũrãgʼa diabʉta opanʉbʉrʉ audre bia wãñi. Jeowabara iduaribibʉ kʼãrẽ, iyi ũrãgʼara jõmaʉ̃ba kʼawuadamarẽã. Bari jaraita, Proverbios librode Jeowaba ũrãgʼa biata diabʉ kʼãrẽ, dayirãba obʉrʉde maʉ̃ba kʼarebaseabʉta. Atia ũrãgʼa kimare kʼawuadayi.

¹⁵ Bʉ sota bia akʉra. Daizeze Bedʼeaba jarabʉ: «Audre bia akʉibara dayirã sora, maʉ̃ba erbʉ baera dayirã bebʉra» (Prov. 4:23). Dayirã soara biʼia akʉira, yikota biʼia koibara, ejersisio oibara akʉza oẽ baibara nekʼãrẽ dayi so kayabiseabʉta. Dayirã sode sãwũã krĩchabʉ akʉza sãwũã sentibʉ bia akʉidebida abarikabʉ. Maʉ̃ oira Daizeze Bedʼeata leibara, ãba yi jʉrebarima wãibara akʉza Daizeze Bedʼeata jaradia wãibara. Akʉza jĩga bʼaibara nekʼãrẽ dayirãʼa kayirua obiseabʉdeba. Bari jaraita, nekayiruata akʉ ẽ baibara akʉza nekayiruata jeme ẽ baibara, adewara neũdukʼawua kayiruarata erba ẽ baibara.

16. ¿Idi ewadera sãwũã kʼarebabʉ Proverbios 23:4, 5​ba?

¹⁶ Sobiabara nekʼãrẽ bʉya erbʉba. Daizeze Bedʼeaba naʉ̃ ũrãgʼata diabʉ: «Mejãcha trajarãra plata mejãcha erbaita [...] Bʉa maʉ̃ta akʉbʉrʉdera neẽãdogo, ãyira ita ʉ̃tʉ zeyi nejõbʉ kĩrãkʼa mõbe ʉ̃ta wãbari wãñi» (Prov. 23:4, 5). Ẽbẽrarãbara mesera aduaseabʉ ãya nekʼãrẽ erbʉra. Mawũãsidu idi ewadera ẽbẽrarã plata barabʉta akʉza plata neẽãta mejãcha krĩcha zroma obʉ plata audre ũduya. Ãyi mawũã plata mejãcha jʉrʉbʉba edaʉde aduaseabʉ ãyi ʉ̃rʉ ibia bedʼeabʉta akʉza ãyi neũdukʼawuarata aduaseabʉ, adewara ãyisida kayaseabʉ (Prov. 28:20; 1 Tim. 6:9, 10). Mamina ũrãgʼa Daizeze Bedʼeadebʉbara kʼarebabʉ dayirãba plata erbaita aukʼara krĩcha ẽ baita akʉza mawũã sobia bʼaita dayirãba nekʼãrẽ erbʉba (Ecl. 7:12).

17. Proverbios 12:18​ba jarabʉdebara, ¿dayirãbara sãwũã ũdubiseabʉ dayi bedʼeabʉdeba buru bia erbʉta?

¹⁷ Bia krĩchara bedʼeai nãã. Jʉra kʼawua panʉ ẽ bʉrʉ, dayirã sãwũã bedʼeabʉdeba awururata sopʉabiseabʉ. Daizeze Bedʼeaba jarabʉ: «Biʼia krĩcha ẽã bedʼeabʉba kõbʉ espadade kĩrãkʼa, mamina buru bia bedʼeabara bebibʉ» (Prov. 12:18). Awururaba nekʼãrẽ aña oda kʼarea imitia bedʼeada ẽ bʉrʉ kʼarebayi wuabemarabawara aduʼa bʼaita (Prov. 20:19). Dayirãba kãgapanʉbʉrʉ dayirã awurume bedʼeabʉrʉde aduʼa bʼaita akʉza ãyi sopʉabi ẽ baita, Daizeze Bedʼeata ewariza akʉibara akʉza maʉ̃ ʉ̃rʉ krĩchaibara (Luc. 6:45). Dayirãba Daizeze Bedʼeade akʉbʉta krĩchabʉbʉrʉ, naʉ̃ba kʼarebayi dayirã awururaʉ̃me bedʼeabʉrʉde so zarea diaita (Prov. 18:4).

18. Proverbios 24:6​ba jarabʉ obʉbara, ¿sãwũã kʼarebabʉ bʉa Daizeze Bedʼea jaradia wãbʉrʉde biʼia oita?

¹⁸ Jeowa organizasionba jarabʉta oibara. Daizeze Bedʼeaba naʉ̃ ũrãgʼa biata diabʉ: «Bia jaradiapanʉba yõena wãñi; ũrãgʼabari mejãcha erbʉba kʼarebayi adua ẽ baita» (Prov. 24:6, notara). Akʉdaya naʉ̃ testoba sãwũã kʼarebabʉta nejaradiabari bia bʼaita. Dayirãba kãgabʉde jaradiai kaude, zarea oibara dayirã ũrãgʼa diapanʉ kĩrãkʼa oita. Dayirã ãba yi jʉrebarima wãbʉrʉde ũrãgʼa biata diapanʉ. Bari jaraita, mebẽã abaʉba diskursota diabʉ, adewara mebẽã ũmeba oũdubipanʉ dayirãʼa jaradiaita sãwũã jaradia wãibarata. Adewara Jeowa organizasionba dayirãʼa diabʉ kartarata akʉza bideorata mawũã audre bia jaradiaita. Naʉ̃ba kʼarebabʉ ẽbẽrarãba Daizeze Bedʼeaba kʼãrẽ jarabʉta audre biʼia kʼawuaita. ¿Bʉra zarea obʉka Jeowa organizasionba diabʉta biʼia zokʼa kʼawuaita?

19. ¿Bʉra sãwũã sentibʉ Jeowaba buru bia diabʉ kʼarea? (Proverbios 3:13-18).

¹⁹ (Akʉra Proverbios 3:13-18). Mejãcha sobiapanʉ Daizeze Bedʼeade ũrãgʼa bia ũdubʉ kʼarea. Dayirãba naʉ̃ ũrãgʼata neẽbasibʉrʉ sobia ba ẽ bakasi. Naʉ̃ artikulode ũdubʉda ũrãgʼa biara Proverbiosde edabʉta. Daizeze Bedʼeabara ũrãgʼa biata erbʉ, maʉ̃ba dayirãra zarea oibara maʉ̃ ũrãgʼaba jarabʉta oita. Dayirãbara ẽbẽrarã naʉ̃ drʉadebemaba akʉbʉ kĩrãkʼa akʉbʉ ẽ, awuarabʉrʉ kʼawuapanʉ yi buru bia wãrĩnuara Daizezedeba zebʉ jʉrʉbʉra, sobia bʼaita.