Dayirãba jʉ̃ãbʉra zarea erbaibara

1. ¿Jeowabara kʼãrẽ nebiata jʉ̃ãbibʉ dayirãra?

JEOWABA dayirã jʉ̃ãbibʉ ewari jõmaʉ̃nẽ bʼaita. Ʉ̃kʉrʉbara jʉ̃ãbʉ ʉ̃tʉ ewari jõmaʉ̃nẽ bʼaita mawũã beika bʼaita (1 Cor. 15:50, 53). Mamina, ʉ̃kʉrʉbara jʉ̃ãpanʉ nama egorode ewari jõmaʉ̃nẽ bʼaita, kaya ẽã akʉza sobia (Apoc. 21:3, 4). Dayirãba jʉ̃ãpanʉbʉrʉ ʉ̃tʉ bʼaita mawũã ẽ bʉrʉ nama Egorode, naʉ̃ nebia jʉ̃ãira yibia.

2. ¿Kʼãrẽ kʼarea nebia jʉ̃ãpanʉ?

² Daizeze Bedʼeade jʉ̃ãbai jarabʉbara jarakĩrãbʉ nebiata jʉ̃ãita. Dayirãbara wãrĩnu ĩjãibara nebia ʉ̃ra zeide jʉ̃ãpanʉra aripe berabarita Jeowadeba zebʉ baera (Rom. 15:13). Dayirãba kʼawuapanʉ, Jeowaba kʼãrẽ nebia weita jarabʉta, adewara kʼawuapanʉ iya oya adara aripe obʉta (Núm. 23:19). Kʼawuapanʉ Jeowabara kãgabʉta akʉza zarea erbʉta iya oya ada aripe berabaribita. Dayirãba nebia jʉ̃ãpanʉra bari ewarade mawũã jʉ̃ãpanʉ ẽ, mawũã ẽ bʉrʉ mawũã berabarimarẽã kãgapanʉ baera mawũã krĩchapanʉ ẽ, awuarabʉrʉ jʉ̃ãpanʉ kʼawuapanʉ baera maʉ̃ra wãrĩnu berabarita.

3. ¿Kʼãrẽta kʼawuadai naʉ̃ artikulodera? (Salmo 27:14).

³ Daizeze ʉ̃tʉbemabara dayirãra mejãcha kãga akʉza kãgabʉ dayirãba iyi ʉ̃rʉ ĩjãmarẽã (akʉra Salmo 27:14). Dayirãba Jeowaba nebia weya abʉta jʉ̃ãpanʉbʉrʉ, naʉ̃ba kʼarebayi bedʼea zroma ũdubʉrʉde so zarea bʼaita akʉza sobiade awuantaita. Akʉdaya sãwũã dayirãba nebia jʉ̃ãbʉba kʼarebabʉta. Maʉ̃itara nããra kʼawuadaya, sãwũã dayirãba nebia jʉ̃ãbʉra nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉta akʉza kasko kĩrãkʼabʉta, maʉ̃are akʉdayi sãwũã dayirãba nebia jʉ̃ãbʉra zarea erbaseabʉta.

DAYIRÃBA NEBIA JɄ̃ÃBɄRA NEKʼÃRẼ ZɄGɄABA JÃBA AÑA WÃ Ẽ BAITA KʼAREBABɄ KĨRÃKʼABɄ

4. ¿Kʼãrẽa dayirãbara nebia jʉ̃ãbʉra nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ? (Hebreos 6:19).

⁴ Pabloba ebreora karta bʉ dia bʉesidera, jarasi dayirãba nebia jʉ̃ãbʉra, nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉta (akʉra Hebreos 6:19). Pablo awuru pʉwʉrʉeda wãbasidera pusade wãbasi. Maʉ̃ba iya kʼawuabasi jãbata piki oũbemarẽãra nekʼãrẽ zʉgʉata bʉeibarabasita. Ewari aba iyira jãbade wãbasi, maʉ̃ne iya ũdusi sãwũã jãba yibariraba nekʼãrẽ zʉgʉata doi balbʉebʉta, mawũã maʉ̃ jãba piki oũbemarẽã akʉza mõgarama tei ẽ marẽã (Hech. 27:29, 39-41). Nekʼãrẽ zʉgʉaba jãba aña wã ẽ baita kʼarebabʉ kĩrãkʼa, dayirãba nebia jʉ̃ãbʉba kʼarebabʉ dayirã Jeowa kʼawa bʼaita akʉza iyideba jĩga wã ẽ baita bedʼea zroma nãgʉ kĩrãkʼabʉta zebʉrʉde. Dayirãba nebia jʉ̃ãbʉ zarea erbʉba kʼarebayi bedʼea zroma awuantaita, ĩjãpanʉ baera maʉ̃ra ewari jõmaʉ̃nẽ mawũã ba ẽ baita. Kĩrãbedaibara Jesuba jarasita dayirãra pẽwãnaibasita (Juan 15:20). Dayirãba krĩchapanʉbʉrʉ Jeowaba nebia weya abʉ ʉ̃rʉ, naʉ̃ba kʼarebayi ewariza iyaʼa audre diaita.

5. ¿Sãwũã kʼarebasi Jesura nebia jʉ̃ãiba awuantaita iyi zʉbʉria beibasimina?

⁵ Akʉdaya sãwũã nebia jʉ̃ãbʉba kʼarebasita Jesu kʼẽrẽpa bʼaita iyi zʉbʉria beadaibasimina. Pentecostés poaga 33 ewaribaside, Pedroba jarasi bedʼea Salmosʼne jarabʉta, mawũã ũdubita sãwũã Jesu aduʼabasita iyi zʉbʉria beadaita kʼawuabasimina. Pedroba jarasi: «Maʉ̃ba mʉrã sobia bʼʉa, bʼʉsridʼa trʉ̃ã bʼʉa, adu-a bʼʉa. Bʉara mʉ [...] ãmaẽ ẽã beudʼata bʼe maẽrã, mʉrã bʉ nezokʼa kĩrãẽpa bʼʉra bʼerawabi ẽã. Bʉara mʉãã kʼawuabisia mʉrã wakusa zokʼai bʼaita, bʉa mʉrã sobia bʼabiya mʉ ũme bʼʉba» (Hech. 2:25-28; Sal. 16:8-11). Jesuba iyi beita kʼawuabasimina, ĩjãbasi Jeowaba iyira jẽda piradrʉbibasita akʉza jẽda yi Zezeʉ̃me ʉ̃tʉ ãba bʼaibasita (Heb. 12:2, 3).

6. ¿Kʼãrẽta jarasi mebẽã abaʉba jʉ̃ãbai ʉ̃rʉra?

⁶ Nebia jʉ̃ãbʉba kʼareba zebʉrʉ dayirã mebẽrãba bedʼea zroma awuantamarẽã. Akʉdaya kʼãrẽta berabarisita mebẽã Leonardta. Iyira Inglaterrade basi akʉza kʼẽrẽpabasi. Primera Guerra Mundial berabarinʉmaside, iyira karselʼeda bʉesida gorogororane eda wãkĩrã ẽ basi baera, jedeko ũmebayeda karselde doba besi akʉza maʉ̃ tẽã mejãcha trajabisida, iya bʉsi: «Mʉ̃ kʼãwũã berabaridaba, mʉ̃aʼa kʼawuabisi daya bedʼea zroma awuantaira mejãcha nesidata nebia jʉ̃ãita, dayirãbara erpanʉ Jesu yizata, apostolera yizata, propetara yizata akʉza nebia Daizeze Bedʼeadebemata. Naʉ̃ba kʼarebabʉ dayirãba nebia jʉ̃ãita ʉ̃ra zeide akʉza dayirãba awuantabʉta zarea erbaita». Nebia jʉ̃ãira Leonardʼitara nekʼãrẽ zʉgʉaba jãba aña wã ẽ baita kʼarebabʉ kĩrãkʼabasi, abarika baseabʉ bʉitabida.

7. Dayirãba bedʼea zroma ũdubʉba, ¿sãwũã kʼarebabʉ dayirãba nebia jʉ̃ãbʉ zarea ĩjãita? (Romanos 5:3-5; Santiago 1:12).

⁷ Dayirãba bedʼea zroma awuantabʉrʉde akʉza Jeowaba dayirã sãwũã kʼarebabʉ ũdubʉrʉde, kʼawuapanʉ Jeowabara bia akʉbʉta (akʉra Romanos 5:3-5; Santiago 1:12). Naʉ̃ba kʼarebabʉ dayirãba nebia jʉ̃ãbʉta wãrĩnu zarea ĩjãita. Dayirãba Daizeze Bedʼea kʼawua jʉ̃drʉside ĩjãbadaira, Diarubara dayirãra krĩcha zroma obikĩrãbʉ bedʼea zroma ũdubibʉdeba, mamina Jeowa kʼarebadeba awuantaseapanʉ dayirãba bedʼea zroma erbʉra.

DAYIRÃBA NEBIA JɄ̃ÃBɄRA KASKO KĨRÃKʼABɄ

8. ¿Sãwũã dayirãba nebia jʉ̃ãbʉra kasko kĩrãkʼabʉ? (1 Tesalonicenses 5:8).

⁸ Adewara Daizeze Bedʼeaba jarabʉ dayirãba nebia jʉ̃ãbʉra kasko kĩrãkʼabʉta (akʉra 1 Tesalonicenses 5:8). Gorogorobara kaskota jʉ̃basi mawũã iyi nejʉraba iyi buruma deguebibʉrʉde awuantaita. Dayirãbida abarika jʉra kʼawua akʉibara dayirã krĩchata. Mawũã Diaruba aña krĩchabi ẽ marẽã. Diarubara nekʼãrẽ mejãcha zokʼabʉ dayirãʼa nemitia obita akʉza aña krĩchabita. Kaskoba gorogoro buru neida berabari ẽ marẽã kʼarebabada kĩrãkʼa abarika dayirãba nebia jʉ̃ãbʉba kʼarebabʉ dayirã krĩchata, mawũãtrʉ Jeoware kʼẽrẽpa baseapanʉ.

9. ¿Kʼãrẽta obʉ yi ẽbẽrarã nebia jʉ̃ã ẽãbara?

⁹ Dayirãba ewari jõmaʉ̃nẽ bʼaita jʉ̃ãbʉba kʼarebayi biʼia krĩchaita nekʼãrẽ obʉrʉde, mamina dayirãba kʼãrẽ kãgabʉ awa krĩchapanʉbʉrʉ, kĩrãduaseapanʉ dayirãba ewari jõmaʉ̃nẽ bʼaita jʉ̃ãpanʉta. Akʉdaya ʉ̃kʉrʉ mebẽrã Corintodebema kʼãrẽ berabaridata. Ãyara iduaribisida ĩjãbʉta Jeowaba ẽbẽrarã jẽda piradrʉbiya abʉta (1 Cor. 15:12). Pabloba jarasi yi ẽbẽrarã jẽda piradrʉi ʉ̃rʉ ĩjã ẽãbara iya kãgatrʉ okĩrãbʉta (1 Cor. 15:32). Idi ewadera ẽbẽrarãbara nebiata jʉ̃ãpanʉ ẽ baera nekʼãrẽ mejãcha opanʉ ãyi mawũã sobia bʼaita, mamina dayirãra awuarabʉ, jʉ̃ãpanʉ baera Daizezeba nebia weya abʉta. Dayirãba nebia jʉ̃ãbʉra kasko kĩrãkʼabʉ, kʼarebabʉ baera dayirã krĩchata, dayikʉza jʉ̃zaba krĩcha ẽ baita akʉza daya kãgabʉ awa krĩcha ẽ baita. Dayirãba maʉ̃ta ora ãrĩseabʉ dayirã Jeowa neũdukʼawua bʼaita (1 Cor. 15:33, 34).

10. ¿Sãwũã nebia jʉ̃ãbʉba kʼarebaseabʉ aña krĩcha ẽ baita?

¹⁰ Dayirãba nebia jʉ̃ãbʉba kʼarebayi krĩcha ẽ baita zeri ẽãta zarea oita Jeowa sobiabita. Ʉ̃kʉrʉba krĩchaseabʉ: «Mʉ̃ra eda ba ẽ bayi jari ẽbẽrarã ewari jõmaʉ̃nẽ bʼaitabʉbawarara, mʉ̃ara oau ẽ bayi Jeowaba mʉ̃a omarẽã zokʼabʉra». Akʉdaya Elifazba Jobʼa kʼãrẽ jaradata: «¿Sãwũã neneẽã baseabʉ ẽbẽra beibarira?». Maʉ̃are iya naʉ̃ta jarasi Daizeze ʉ̃rʉ: «Akʉra, Daizezeba ĩjã ẽ iyi neneẽãbʉra ʉ̃rʉ akʉza iyi dabʉmara bajãsida neneẽãbʉ ẽ» (Job 15:14, 15). Naʉ̃ra jipa sewida. Kĩrãbeibara kʼaiba jarabʉta maʉ̃ sewidara, Diaruba. Iya kʼawuabʉ dayirãba iduaribidara iya aña krĩchabita, mawũãra aduaseabʉta dayirãba nebia jʉ̃ãbʉra. Maʉ̃ba ũrĩrãra naʉ̃ sewidata, awuarabʉrʉ ĩjãra Jeowaba wãrĩnu weita iya nebia weya abʉra akʉza ĩjãra Jeowabara kãgabʉta bʉra ewari jõmaʉ̃nẽ bamarẽã, adewara kʼarebaita bʉa maʉ̃ta ũdumarẽã (1 Tim. 2:3, 4).

BɄA NEBIA JɄ̃ÃBɄTA ZAREA ĨJÃBARA

11. ¿Kʼãrẽa jʉ̃ãibara Jeowaba nebia weya abʉ aripe berabariyeda?

¹¹ Dayirãitara zarea baseabʉ jʉ̃ãita Jeowaba nebia weya abʉ aripe berabarita. Daizezera kikibari baera iyitara ewari mejãcha berabari ẽ, mamina dayirãitara dããraba kĩrãkʼabʉ jʉ̃ãpanʉta (2 Ped. 3:8, 9). Iyara jõma oyi, iya oya abʉra, mamina dayirãba kãgabʉ ewaride oẽ bayi. ¿Kʼãrẽba kʼarebayi dayirãba nebia jʉ̃ãbʉ zarea ĩjãita Jeowaba weya abʉ aripe berabariyeda? (Sant. 5:7, 8).

12. Hebreos 11:1 akʉza 6ba jarabʉdebara, ¿sãwũã kʼarebaseabʉ dayirãba ĩjãbʉba nebia jʉ̃ãita?

¹² Dayirãba nebia jʉ̃ãbʉra zarea ĩjãpanañi Jeowa kʼawapanʉbʉrʉ, iyabʉrʉ oseabʉ baera dayirãba nebia jʉ̃ãbʉra aripe berabarimarẽã. Daizeze Bedʼeaba jarabʉ dayirãba nebia jʉ̃ãbʉbara kʼarebabʉta ĩjãita Jeowara «wãrĩnubʉta akʉza iyi jʉrʉbʉara nebiata [diabʉta]» (akʉra Hebreos 11:1, 6). Dayirãba ĩjãpanʉbʉrʉ Jeowara wãrĩnubʉta, ĩjãnañi iya nebia weya abʉra aripe oita. Akʉdaya kʼãrẽta oibarata dayirã audre Jeowa neũdukʼawua bia bʼaita akʉza dayirãba jʉ̃ãbʉ sãwũã audre zarea ĩjãita.

13. ¿Sãwũã Daizeze neũdukʼawua baseapanʉ?

¹³ Jeowaʼa yiwidʼira akʉza Daizeze Bedʼea lera. Dayirãba Jeowa ũdu ẽ mina, kʼawuapanʉ iyi kʼawa baseapanʉta akʉza ĩjãpanʉ iya ũrĩta dayirã yiwidʼira (Jer. 29:11, 12). Dayirãbara Daizeze Bedʼeara ũrĩseapanʉ iyi bedʼea lepanʉne akʉza maʉ̃ ʉ̃rʉ krĩchapanʉne. Dayirãba lebʉrʉde Jeowaba sãwũã biʼia akʉsita ẽbẽrarã iyiare kʼẽrẽpa pananata, naʉ̃ba kʼarebabʉ dayirãba nebia jʉ̃ãbʉta audre zarea ĩjã wãita. Jõma «nekʼãrẽ bʉdapeadara bʉsida dayirãba kʼawuadamarẽã, dayirãba awuantabʉdeba akʉza Daizeze Bedʼeaba so zarea diabʉdeba nebiata jʉ̃ãnamarẽã» (Rom. 15:4).

14. ¿Kʼãrẽa bia krĩchaibara Jeowaba kʼãrẽ nebia ozebʉrʉta wuabemara kʼarea?

¹⁴ Bia krĩchara Jeowaba sãwũã aripe ozebʉrʉta iya oya abʉra. Krĩchara Jeowaba kʼãrẽta osita Abrahán akʉza Sara bari. Ãya wũãwũã toira aukʼara zõnabapanasi, mawũãsidu tosida Jeowaba jarada kĩrãkʼa (Gén. 18:10). ¿Kʼãrẽta osi Abrahánbara? Daizeze Bedʼeaba jarabʉ: «Ĩjãsia zhi kĩmanebara warra baraidʼe bʼʉ ẽãta, aramaʉ̃ne bʼesia zhãrã bio zezeta» (Rom. 4:18). Abrahánba bia kʼawua ẽ basimina Jeowaba sãwũã iya oya ada aripe oibasita, ĩjãbasi maʉ̃ra aripe berabaribasita, mawũã iya jʉ̃ãbadara aripe berabarisi (Rom. 4:19-21). Naʉ̃ nebʉraba kʼarebabʉ dayirãba ĩjãita Jeowaba nebia weya abʉra aripe berabarita, dayirãita maʉ̃ berabarira zareabʉmina.

15. ¿Kʼãrẽa bia krĩchaibara Jeowaba kʼãrẽta ozebʉrʉ ʉ̃rʉ dayirã kʼarea?

¹⁵ Krĩchara Jeowaba kʼãrẽta ozebʉrʉta bʉ kʼarea. Krĩchara bʉa kʼãrẽ nebiata ũdu zebʉrʉta Daizeze Bedʼeade jarabʉ aripe berabaribʉ kʼarea. Bari jaraita, Jesuba jarasi Jeowaba bʉaʼa diaita, bʉa kʼãrẽ nesidabʉta (Mat. 6:32, 33). Adewara Jesuba jarasi Jeowaba iyi jaure zareata diaita, bʉa iyaʼa maʉ̃ta widira (Luc. 11:13). Jeowabara aripe ozebʉrʉ iya oya adara. Krĩchara Jeowaba kʼãrẽ nebiata diasita bʉa iyaʼa widida kĩrãkʼa. Bari jaraita, Jeowaba jarabʉ bʉ nemitia kĩrãduaita, bʉaʼa so zarea diaita akʉza bʉa kʼãrẽ nesidabʉ jõma diaita, mawũã bʉ iyi kʼawa bamarẽã (Mat. 6:14; 24:45; 2 Cor. 1:3). Bʉa krĩchabʉrʉde Jeowaba kʼãrẽta ozebʉrʉta bʉ kʼarea, naʉ̃ba kʼarebayi bʉa nebia jʉ̃ãbʉra wãrĩnu zarea ĩjãita akʉza Jeowaba weya abʉra aripe berabarita.

SOBIABARA BɄA NEBIA JɄ̃ÃBɄ KʼAREA

16. ¿Dayirãba nebia jʉ̃ãpanʉra, kʼãrẽa Daizezeba nebia diada?

¹⁶ Dayirãba ewari jõmaʉ̃nẽ bʼaita jʉ̃ãbʉra Daizezeba nebia diada. Dayirãba jʉ̃ãpanʉ nebia zeita akʉza ĩjãpanʉ maʉ̃ra aripe berabarita. Dayirãba nebia jʉ̃ãbʉra, nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ, so zarea diabʉ baera bedʼea zroma awuantaita, pẽwãbʉdade awuantaita akʉza beidebida. Adewara dayirãba nebia jʉ̃ãbʉra kasko kĩrãkʼabʉ, kʼarebabʉ baera dayirã krĩchata, mawũã krĩcha kayirua ãĩ bʉeita akʉza nebiata krĩchaita. Maʉ̃ nebia Daizeze Bedʼeadebʉba, kʼarebabʉ dayirã Daizeze kʼawa bʼaita akʉza kʼawuaita iya dayirãra mejãcha kãgata. Dayirãba nebia jʉ̃ãbʉ zarea ĩjãbʉba kʼarebayi nebia mejãcha ũduita.

17. ¿Kʼãrẽa sobiadaibara dayirãba nebia jʉ̃ãbʉ kʼarea?

¹⁷ Pabloba naʉ̃ta jarasi romanoraʼa: «Sobiaidua ʉ̃ra zei jʉ̃ãpanʉ kʼarea» (Rom. 12:12). Pablora sobiabasi, kʼawuabasi baera iyita kʼẽrẽpabasibʉrʉ ʉ̃ta wãseabasita. Dayirãsida sobia baseapanʉ nebia jʉ̃ãpanʉ kʼarea, kʼawuapanʉ baera Jeowaba aripe oita iya oya adara. Salmistaba jarasi: «Sobiabʉ [...] yi Daizeze Jeowa ʉ̃rʉ jʉ̃ãpanʉra [...] iyira ewari jõmaʉ̃nẽ kʼẽrẽpabʉ» (Sal. 146:5, 6).