Israelitarãra yõne wãsida, ¿kʼãrẽa idira dayirãbara ãyide kĩrãkʼa oẽ?

GOROGORORA nokʼo nazidebemaba Jeowa ʉ̃rʉ Kʼawuabipanʉrã jarasi: «Marata wã ẽ bʉrʉ Inglaterraeda akʉza Franciaeda yõne, marara beiyi», maʉ̃ta mawũã jarasi Segunda Guerra Mundial baeside. Gorogorora nazi jõma põga baranʉmasimina akʉza ãyi kʼawapanasimina mebẽrãbara oda ẽ basi Daizeze Jeowaba kãga ẽãra. Naʉ̃ yizaba ũdubibʉ sãwũã krĩchapanʉta Jeowa ʉ̃rʉ Kʼawuabipanʉrãbara yõ ʉ̃rʉ: Daira yõenara wã ẽ beadaitabarabʉmina.

1. DAIZEZE PɄWɄRɄRA ABAPAIBASI

Nawedara. Jeowaba jidasi Israelta iyi pʉwʉrʉ bamarẽã. Jeowaba israelitara jarasi: «Pʉwʉrʉ mejãchabʉde marara mʉ̃ pʉwʉrʉbayi» (Éx. 19:5). Daizezebara ãya drʉata diasi mama bamarẽã, maʉ̃ kʼarea Daizezeba israelitara jarabʉrʉde awuru pʉwʉrʉme yõ wãmarẽã, bea ẽ basi abari Daizeze odepanʉrata.a

Idi ewadera. Daizeze pʉwʉrʉ idibemara naʉ̃ drʉa jõmaʉ̃nẽbema akʉza bedʼea awuara bedʼeabʉ (Apoc. 7:9). Idi ewade Jeowa ʉ̃rʉ Kʼawuabipanʉrãta yõena wãra ariya beayi ãyi mebẽrãta.

2. JEOWABA ZOKʼASI ISRAELITARATA YÕENA WÃNAMARẼÃ

Nawedara. Jeowaba jarabasi israelitara sõbede akʉza kʼãrẽa yõena wãnaibarabasita. Bari jaraita, Jeowaba jarasi israelitara kananeobawara yõ wãmarẽã, mawũã Jeowaba kʼawua oita ãyira jipa nekayirua omiabasi baera. Ãyira angele kayiruara yiwidʼipanasi, ãyi kakuata bia zokʼada ẽ basi akʉza ãyi wũãwũãta beapanasi sakripisiode diaita. Jeowabara zokʼasi israelitara maʉ̃ra ẽbẽrarãra jõma makenamarẽã, mawũã iyi pʉwʉrʉba abarika oda ẽ marẽã (Lev. 18:24, 25). Israelitara Daizezeba drʉa bia diadamae panʉne edaʉde Jeowaba zokʼabasi yõ wãnamarẽã ãyi mebẽrã kʼarebaita ãyi nejʉradeba (2 Sam. 5:17-25). Mamina Jeowabara iduaribi ẽ basi israelitaraba jidamarẽã sõbede yõ wãita, maʉ̃ba Daizezeba zokʼa ẽãne ãyidoba yõ wãpanasidera bia wã ẽ basi (Núm. 14:41-45; 2 Crón. 35:20-24).

Idi ewadera. Ẽbẽrarãra Daizeze Jeowabara zokʼa ẽ yõenara. Idi ewadera ẽbẽrarãra yõpanʉ ãyikʉza bia bʼaita, mawũã yõ ẽ Daizezeba kãgabʉ oita. Ẽbẽrarãra yõena wãpanʉ ãya drʉata mejãcha erbakĩrãbʉ baera, platata mejãcha ũdukĩrãpanʉ baera akʉza kãgapanʉ baera wuabema ẽbẽraba ãya krĩchabʉ kĩrãkʼa krĩchadamarẽã politika ʉ̃rʉ. Mamina ʉ̃kʉrʉ ẽbẽraba jarapanʉ yõpanʉta Daizeze trʉ̃ kʼarea, Daizezeʼa yiwidʼibidamarẽã akʉza Daizeze nejʉra makenamarẽã, ¿maʉ̃ra wãrĩnuka? Jeowabara wãrĩnu kʼarebayi iyi ode panʉrarã akʉza makenañi iyi nejʉrarãra Armagedón yõ zebʉrʉde (Apoc. 16:14, 16). Naʉ̃ yõnera gorogorora angeleratrʉ yõñi mawũã ẽbẽrarã iyi odepanʉrata yõ ẽ bayi (Apoc. 19:11-15).

3. ISRAELITARABARA MAKENA Ẽ BASI JEOWA ĨJÃPANANARA

Nawedara. Israelitarabara beada ẽ basi Daizeze ĩjãbʉ ũdubipanʉra, mamina beapanasi Jeowaba beamarẽã zokʼabʉta. Akʉdaya yiza ũme, nããra Jeowaba zokʼasi israelitara Jericódebema jõma makenamarẽã, mamina ãyara beada ẽ basi Rahabta akʉza yi mebẽrãbawara iya ĩjãbʉta ũdubisi baera (Jos. 2:9-16; 6:16, 17). Ũmeta, pʉwʉrʉ Gabaónʼnebemara jõma makena ẽ basi ãya Jeowa wawiabʉta ũdubisida baera (Jos. 9:3-9, 17-19).

Idi ewadera. Yõena wãpanʉrabara jõma daucha beapanʉ Jeowa ĩjãpanʉrainʉ. Edaʉde maʉ̃ra yõnera ẽbẽra biarasi beapanʉ.

4. ISRAELITARA YÕENA WÃBɄRɄDERA ŨRĨBARABASI JEOWABA NEKʼÃRẼ OMARẼÃ ZOKʼABɄTA

Nawedara. Jeowabara israelitara jaradiabasi kʼãrẽta oibarata yõena wãbʉrʉde. Bari jaraita, edaʉde Jeowaba jarasi israelitara bedʼea abarika zemarẽã ãyi nejʉraʉ̃me (Deut. 20:10). Jeowabara jarabasi gorogorora israelitara ãyita neneẽã bamarẽã akʉza ãyi panʉmae neneẽã erpanamarẽã, adewara wawia ũdubidamarẽã Jeowaba zokʼabʉta (Deut. 23:9-14). Mamina awuru pʉwʉrʉdebema gorogororabara ãya drʉa jãrĩ badamaera wẽrãrata wawa opanasi, Jeowaba jarasi israelitara mawũã oda ẽ marẽã. Adewara Jeowaba zokʼabasi israelitara ãya drʉa jãrĩnamae yuwẽrãta ãyi pʉwʉrʉeda erjʉ̃ẽbasibʉrʉ jʉ̃ãibarasita jedeko aba, mawũã maʉ̃me mia kʼãĩta (Deut. 21:10-13).

Idi ewadera. Pʉwʉrʉra mejãchaʉta bedʼea abarika zepanʉ mawũã ãyirainʉ yõna ẽ baita. Ãyira mawũã bedʼea abarika zepanʉ ẽbẽrarã mejãcha kʼarebaita, mamina mejãchaʉba ũrĩna ẽ maʉ̃ra.

5. DAIZEZEBARA KʼAREBASI IYI PɄWɄRɄTA

Nawedara. Daizezera yõsi iyi pʉwʉrʉ kʼarea akʉza edaʉde miõba okata obasi iyi pʉwʉrʉ kʼarebaita. Bari jaraita, Jeowabara sãwũã kʼarebasi israelitara pʉwʉrʉ Jericódebema jõma makenaita, Jeowa kʼarebadeba israelitara «yõena wãita jʉrasidadera, murora kõra totosi», mawũã ãyitara mejãcha zare ẽ basi eda wã kʼãrãpe makenaita Jericódebemara (Jos. 6:20). ¿Israelitarabara sãwũã makenasida amorreorãra? «Jeowabara bajãneba ãyira batasi kue ta zromaba [...] audre beisi ãyira kue taba israelitaraba beadaraira espadaba» (Jos. 10:6-11).

KRISTIANO WÃRĨNUARABARA JɄRɄBɄ ADUʼA BʼAITA WUABEMABAWARA

Dayirãba kʼawuada kĩrãkʼa israelitarãra awuarapanasi idibema kristianoraira, mamina adewarabʉ kʼãrẽ kʼarea Jeowa ʉ̃rʉ Kʼawuabipanʉrãra wã ẽãta yõenara. Bari jaraita, Daizezeba jarasi naʉ̃ ewari jõbodoarera ẽbẽrarã iya nejaradiabʉrabara, yõra kʼawua ẽ baita akʉza yõena wãna ẽ baita (Is. 2:2-4). Adewara Jesuba jarasi iyi kʼaidubemarãra yõena wãna ẽ baita akʉza politikade eda bada ẽ baita (Juan 15:19).

Akʉza Jesubara jaradiasi yi kʼaidubemara mesera kĩrʉna ẽ marẽã, kĩrʉ kiki kʼawua ẽ marẽã akʉza yõta jʉrʉda ẽ marẽã (Mat. 5:21, 22). Adewara jarasi yi kʼaidubemara jʉrʉdamarẽã sãwũã aduʼa bʼaita wuabemabawara akʉza kãgadamarẽã ãyi nejʉrata (Mat. 5:9, 44).

¿Dayirãbara sãwũã oseabʉ maʉ̃ra? Dayirãra wãmapanʉ yõenara, mamina kongregasione mebẽã abaʉta akʉbʉbʉrʉ nejʉra kĩrãkʼa, zarea oibara mawũã sentibʉta ãĩ bʉedaita (Sant. 4:1, 11).

Dayirãra yõena wãna ẽ baibara, awuarabʉrʉ ũdubibara kãgata akʉza jʉrʉibara aduʼa bʼaita dayirãinʉ (Juan 13:34, 35). Zarea odaibara kʼaiare ba ẽ baita Jeowaba naʉ̃ drʉade yõpanʉ jõbiyeda (Sal. 46:9).