¿Kʼawuabasika?

¿Mardoqueora wãrĩnu basika?

ESTER librode mejãcha bedʼeabʉ ẽbẽra yi trʉ̃ Mardoqueo ʉ̃rʉ, iyira judiobasi. Iyira edesida Persiaeda, mamara iyira nokʼo deda trajabasi. Maʉ̃ra berabarisi siglo 5de Kristo nãã, nokʼo Asueroba zokʼabaside (naʉ̃ nokʼora iyabaʉta trʉ̃gapanʉ Jerjes I). Mardoqueoba kʼarebasi nokʼota, iyi kʼarebabariba nekayiruata oẽ marẽã iyi ʉ̃rʉ. Nokʼobara osi ẽbẽrarã jõmaʉ̃ba wawia ũdubidamarẽã Mardoqueoʼa, mawũã biga diabʉ ũdubita. Hamánʼra Mardoqueo akʉza judiora nejʉrabasi, iyi beida tẽã nokʼobara Mardoqueora iyi kʼarebabari babisi. Mardoqueora nokʼo kʼarebabari baera bedʼeata zokʼa bʉesi mawũã judiorata ẽdrʉbita ãyi makenanaineba (Est. 1:1; 2:5, 21-23; 8:1, 2; 9:16).

Ʉ̃kʉrʉ nekʼãrẽ ʉ̃rʉ nebʉrabari siglo 20 jʉ̃drʉdadebemaba jarasida, Ester librode Mardoqueo ʉ̃rʉ nebʉrabʉra sewidata. Mamina 1941ne nekʼãrẽ kikibari estudiabʉraba nei ũdusita mawũã ũdubita Daizeze Bedʼeaba Mardoqueo ʉ̃rʉ jarabʉra wãrĩnuta. ¿Kʼãrẽta ũdusida ãyara?

Nekʼãrẽ kikibari estudiabʉrabara ũdusida testo aba, maʉ̃ne eda bʉbasi yumakẽrã trʉ̃ta Marduka (kapũrĩa bedʼeade Mardoqueo). Iyira Susade trajabasibaibara plata jʉachabʉde. Maʉ̃ ũduside Arthur Ungnadba, Orientedebema nebʉrabariba jarasi «naʉ̃ testodera Mardoqueo ʉ̃rʉ bedʼeakata bedʼeasi Daizeze Bedʼeaba jarabʉ awuara».

Ungnadba maʉ̃ bedʼea jarada tẽã, mejãcha estudiapanʉraba mejãcha tradusi zebʉrʉ testo Persiadebemata, maʉ̃ne edabʉ tabliya egoro omata, maʉ̃ tabliyara ũdusida pʉwʉrʉ Persépolis ãrĩnamae, maʉ̃ra muro kʼawabasi. Maʉ̃ tabliyarãra bʉsida zokʼabaside nokʼo, yi trʉ̃ Jerjes I, maʉ̃ra bʉbʉ elamita bedʼeade akʉza mama edabʉ ʉ̃kʉrʉ trʉ̃ra Ester librode edabʉta.a

Maʉ̃ra tabliyara Persépolisde ũdudadera eda jarabʉ trʉ̃ Marduka, iyira sekretariode trajabasi Susade, nokʼo deda, maʉ̃ nokʼo trʉ̃ra Jerses I. Akʉza tabliya abaʉba jarabasi Mardukabara tradusibasita. Naʉ̃ bedʼeara abarikabʉ Daizeze Bedʼeaba Mardoqueo ʉ̃rʉ jarabʉme. Iyira nokʼo Asuero (Jerjes I) kʼarebabaribasi, Mardoqueobara bedʼea ũme bedʼeabasi. Mardoqueora Susade badua jewedabasi nokʼo puertade (Est. 2:19, 21; 3:3). Maʉ̃ nokʼo puertara, de zromabasi akʉza mama trajapanasi nokʼo kʼarebabarirata.

Marduka tabliyarane jarabʉra akʉza Mardoqueo Daizeze Bedʼeade jarabʉra nekʼãrẽ mejãchaʉde abarikapanʉ. Ãyira iyabaʉ ewaride panasi, iyabaʉ drʉade panasi akʉza iyabaʉ trajota erpanasi. Naʉ̃ba ũdubibʉ nekʼãrẽ kikibarira estudiabʉraba ũdudara iyabaʉ Mardoqueobaibarata Ester librode jarabʉme.