«Jeowaita trajakĩrãbasi»

Maʉ̃ tẽã sãwũã berabarida jõma jara ũrĩbi nãã jarayi mʉ̃ sãwũã Daizezeita ewari jõma traja jʉ̃drʉsita.

Mʉ̃ra tosida 1942de Curazaode mʉ̃ zezera Surinamʼnebemabasi. Mamina trajo kʼarea awuru pʉwʉrʉma wãsi. Mʉ̃ todaita poaga ũme waebʉde mʉ̃ zezetrʉ nããra Jeowa ʉ̃rʉ Kʼawuabipanʉrã basi Curazaode.a Mʉ̃ zezebara daiʼa semanaza Daizeze ʉ̃rʉ jaradiabasi. Daiba iya mawũã jaradiabʉrʉde kʼawuakĩrã ba ẽ basimina. Mʉ̃ 14 poagabaside mʉ̃ zezebara daira jõma edesi Surinamʼma iyi papa akʉi baera.

NEŨDUKʼAWUA BIABA KʼAREBASI MɄ̃RA

Surinamʼnera mʉ̃a jʉrʉsi neũdukʼawuara Jeowa ode kʼẽrẽpapanʉrata. Ãyira mʉ̃ira nãã panasi akʉza yi nãã edebaribasi. Naʉ̃ra mebẽrãba mʉ̃aʼa nebʉrapanaside ãya Daizeze Bedʼea jaradia jʉ̃ẽbʉrʉde sãwũã jʉ̃ẽnata, mejãcha sobiapanasi. Mawũã ẽ bʉrʉ ãba yi jʉre berabarida tẽã bedʼeapanasi Daizeze Bedʼea ʉ̃rʉ chĩdau akʉpanʉena. Naʉ̃ra neũdukʼawuaba kʼarebasi krĩcha bia jidaita akʉza oita mʉ̃a kãgabʉta. Mʉ̃ara Jeowaba kãgabʉta okĩrãbasi, mawũã mʉ̃ra 16 poagabʉta buru kʼoesi akʉza 18 poaga babʉrʉde yi nãã edebarita ojʉ̃drʉsi.

NEKʼÃRẼTA MEJÃCHA KʼAWUASI

Yi nãã edebaribaside mawũã nekʼãrẽ mejãcha kʼawuadaba, kʼarebasi Daizezeita ewari jõmaʉ̃nẽ trajaside. Bari jaraita, mʉ̃a nããra kʼawuasi yibiata wuabemara nekʼãrẽ jaradiaita. Mʉ̃ yi nãã edebaribasidera mebẽã Willem van Seijl iyira misionerobasi maʉ̃ba kʼarebakĩrãsi mʉ̃ta.b Maʉ̃ba jaradiasi sãwũã biʼia akʉibarata kongregasione omarẽã zokʼapanʉra. Mʉ̃a krĩcha ẽ basi mʉ̃a kʼãwũã nekʼãrẽ mejãcha jaradiadamarẽã nesidabʉta. Maʉ̃ poaga berabarida tẽã yi nãã edebari 130 ora diabari babisida. Aramaʉ̃ta mʉ̃a kʼareba jʉ̃drʉsi mebẽrã oi Surinamʼne panʉta. Mebẽrã biga diabʉ mʉ̃a ũrãgʼa nesidabʉde diasida baera, mebẽã Willemba mʉ̃aʼa ũrãgʼa diada kĩrãkʼa. Ãyi yizadeba mʉ̃a kʼawuasi mʉ̃ra ewari jʉrʉibarata wuabemara nejaradiaita.

Ũmeta, kʼawuasi nekʼãrẽ wiña erbʉdeba bʼaita akʉza jõma daucha erbaita. Jedeko jʉ̃drʉbʉrʉza mebẽã mʉ̃me bʉmeba krĩchanapasi kʼãrẽ yiko edaita semana zaita mawũã daidebema abaʉta wãbasi pʉwʉrʉidu yiko edaita. Mawũẽra daibara bia zokʼadaibarabasi daiʼa plata diapananara akʉza bia akʉibarabasi yikota jedeko ababayeda jõ ẽ marẽã. Dai wabida oide bʉeda daiba nesidabʉta jõra, neẽbasi kʼaiba kʼarebaita. Mʉ̃ warraraena nekʼãrẽ mejãcha erbaita krĩcha ẽ badaba akʉza nekʼãrẽ jõma daucha erba kʼawuadaba kʼarebasi Daizeze Jeowade jʉ̃zaba oita.

Ũbeata, kʼawuasi yibiata ẽbẽrarã jaradiaita ãyi bedʼeade. Mʉ̃ra bedʼea kʼawuabasi olande, ingle, papiamento akʉza surinamés (iyabaʉta de sranan). Naʉ̃ bedʼeara Surinamʼne bedʼeapanasi. Mʉ̃a ũdusi ẽbẽrabara audre ũrĩpanʉta ãyi bedʼeade jaradiapanʉne, mamina ʉ̃kʉrʉ bedʼea kʼawuaita zarebasi. Maʉ̃nebemata audre zare basi saramakano bedʼea kʼawuaita. Mawũãsidu mʉ̃ra zarea osi maʉ̃ bedʼea kʼawuaita akʉza maʉ̃ba mejãcha sobiabasi mawũãbʉta poaga bio bade ẽbẽrarã mejãchaʉʼa jaradiasi ãyi bedʼeade bedʼeabasi baera.

Edaʉde aña jarabasi, bari jaraita ewari aba Daizeze Bedʼea ʉ̃ra kʼawuabʉta bipʉaba kayabasi, maʉ̃ kʼarea mʉ̃a widikĩrãbasi iyi sãwũã sentibʉta, mamina mʉ̃a widibʉrʉdera jarasi iyi biogobʉ kʼawuaita, maʉ̃ ẽbẽra wẽrãbara bedʼeabasi saramakano bedʼeata, mawũẽra iyira mejãcha pera sentibasi mʉ̃a mawũã widida kʼarea. Mʉ̃a mawũã aña jarabasimina zarea osi Daizeze Bedʼeara ãyi bedʼeade jaradiaita.

MɄ̃A AUDRE OMARẼÃ ZOKʼAPANɄTA OSI

Poaga 1970de mʉ̃ra kongregasionʼra akʉbari zõrãrã babisida. Maʉ̃ poagade mʉ̃a akʉ wãsi mebẽrã oide panʉrata ũdubita bideo «Visitando la central mundial de los testigos de Jehová». Mainʉ jʉ̃ẽira daira wãibarabasi jãba zromane maʉ̃ jãbade daiba edesida motor luzdebemata, gasolinata, ĩbirarata akʉza nekʼãrẽ maʉ̃ bideo ũdubita. Dai mainʉ jʉ̃ẽbʉrʉdera daiba erpananara jõma edepanasi maʉ̃ bideo ũdubidu. Mamina mʉ̃a audre kĩrãbebʉ naʉ̃ra mebẽrãbara mejãcha kãgabasita mʉ̃a ãyaʼa ũdubidabara. Mʉ̃ra mejãcha sobiabasi Jeowa ʉ̃rʉ jaradiabasi baera akʉza iyi organizasion ʉ̃rʉ. Mʉ̃a trajo obʉ kʼarea ẽbẽrarã mejãchaʉba Jeowata orrasida. Mʉ̃a maʉ̃ta ũdubʉrʉ kʼarea mʉ̃ra mejãcha sobiabasi.

JɄ̃KARA ŨBEA ÃBA ZEBISI

Mʉ̃ doba bʉeda zare ẽ basimina Jeowade oita, juwa jidakĩrãbasi. Maʉ̃ kʼarea Jeowaʼa yiwidʼisi iya ũdu diamarẽã kima biata akʉza Jeowade obʉde sobiade awuantamarẽã maʉ̃ oide. Poaga aba berabarida tẽã mʉ̃ra bedʼea jʉ̃drʉsi mebẽã wẽrã Ethelʼʉ̃me. Iyira yi nãã edebari 130 ora diabaribasi. Iyira audre zare trajakĩrãbasi Jeowaita iyita zarea basimina. Ethelbara iyi wikakiruedaʉba kãgabasi apostol Pablo yizata akʉza iyabida Jeowa audre diakĩrãbasi apostol Pabloba oda kĩrãkʼa. Mawũã daira juwa jidasida septiembre 1971ne akʉza mʉ̃ kimaʉ̃meba kongregasionʼra akʉbari zõrãrãbasi.

Ethel warisidera yi mebẽrãbara nekʼãrẽ biara mejãcha erba ẽ basi. Maʉ̃ kʼarea iyitara zare ẽ basi Daizeze Bedʼea jaradiaita maʉ̃ oide. Bari jaraita, daiba oi zromane mebẽrã kongregasionta akʉ wãpanasidera, nekʼãrẽ mejãcha edepana ẽ basi, adewara do zromane kuipanasi akʉza mama wua tõpanasi adewara mebẽrãba nekʼãrẽ badu diapanʉta kopanasi. Kopanasi opogata, pirañata akʉza badu nedʉwʉrʉ ãya oide beabʉrʉta. Epedeko neẽãnera pada kiduade nekopanasi akʉza kuzarra neẽãnera juwaba nekopanasi. Daita Jeowaba zokʼabʉ aripe oya zarea opanʉnera sentipanasi jʉ̃kara ũbea teitea kabʉ kĩrãkʼabʉta (Ecl. 4:12). Daira mejãcha sobiapanʉ mawũã berabarida kʼarea.

Ewari aba mebẽrã akʉbadata dai jẽda urubaside berabarisi mʉ̃a nãã nebʉradata. Jãbara chorrode wã baera mesera baniaba bira totosi, mamina jẽda mesera ʉ̃tʉ deguesi, baribʉrʉ daibara jʉ̃basi salbabidata akʉza jãbadeba doi wã ẽ basi mamina jãbara baniaba bira totosi.

Maʉ̃ba dai portade yiko abadara do barrea pea bʉesida maʉ̃ba jãba chikaita. Dai yikora jõma balbʉesida baera bedawuasida do barrea wãena. Mamina mia ababida jida ẽ basi. Aramaʉ̃ta Jeowa yiwidʼisida maʉ̃ ewarita yiko diamarẽã mawũã yiwidʼida tẽã mebẽã abaʉba dugata balbʉesi maʉ̃ne jidasi beda arabiachuta, mawũã dai juesomata nekodaita.

KIMA, ZEZE AKɄZA KONGREGASIONʼRA AKɄBARI ZÕRÃRÃ

Dai kongregasionʼra akʉbari zõrãrãne panʉta poaga juesoma babʉrʉde, daiba kʼawuasida wũãwũã baraibasita. Mʉ̃ra mejãcha sobiabasi mawũã kʼawuaside, kʼawua ẽ basimina maʉ̃neba ʉ̃ta kʼãrẽ berabarita. Daibara mejãcha kãgapanasi Jeowaita ewari jõmaʉ̃nẽ trajaita, maʉ̃ta mawũã oseabasibʉrʉ. Poaga 1976de tosida dai wũãwũã Ethniëlta maʉ̃ta poaga ũme audu jedeko 6 babʉrʉde tosida dai wũãwũã tẽãbema Giovannita.

Maʉ̃ ewaridera mejãcha nesidabasi baera Surinamʼne Daizeze Bedʼea jaradiaita, sukursalbara nekʼãrẽ jõma osi, mama mʉ̃ta kongregasionʼra zõrãrã akʉbari zõrãrãne bamarẽã dai wũãwũã dapʉẽpanʉena. Naʉ̃ba iduaribibasi jedeko abaʉde semana ũme kongregasionta akʉ wãmarẽã akʉza yi wuabemara semanara dai bʉmae yi nãa edebari bʼaita. Ethelta akʉza mʉ̃ wũãwũãrata mʉ̃ kʼaidu wãbasi mʉ̃a kongregasion dai de kʼawabʉta akʉ wãbaside. Mamina mʉ̃ra doba wãbasi kongregasion akʉ wãbaside akʉza asamblea obaside oi zromane.

Mawũẽra mʉ̃ara nekʼãrẽ jõma oibarabasi mʉ̃aʼa zokʼadapeadata aripe oita. Adewara mʉ̃ mebẽrãbawara semanaza ãba yi jʉrepanasi Jeowa ʉ̃rʉ kʼawuaita. Mʉ̃a oide mebẽrã kongregasionta akʉnʉmʉenara, Ethelbara dai wũãwũãrata ãba jʉrebasi semanaza Jeowa ʉ̃rʉ kʼawuaita. Adewara ewari erbʉde zarea obasi mʉ̃ mebẽrãbawara ãba bʼaita. Adewara Ethelba mʉ̃meba dai wũãwũãra edepanasi jemene akʉza nekʼãrẽ bia dai de kʼawabʉ akʉde. Mʉ̃ra badua diamasibasidu bia akʉbasi kongregasione nekʼãrẽ omarẽã zokʼapanʉta bia oita. Mʉ̃aena Ethelbara Proverbios 31:15ba jarabʉ kĩrãkʼa obasi. 4 diapeda piradrʉbasi ãbaʉba testo ewarizabemata leita akʉza dai wũãwũãsida nekope kolegioeda wãnamarẽã.

Daira zarea opanasi dai wũãwũã jaradiaita Jeowaʼa kãgamarẽã akʉza akʉdamarẽã Daizeze Bedʼea jaradiaira audre yibiata. Daibara kãgapanasi dai wũãwũãra Daizezeita ewari jõmaʉ̃nẽ trajamarẽã. Mamina kãga ẽ basi daiba jarapanʉ kʼarea mawũã odamarẽã. awuarabʉrʉ kãgapanasi ãyidobaʉba jidamarẽã mawũã oita. Daibara ewari jõmaʉ̃nẽ jara ũrĩbipananasi kʼãrẽaba sobiapanasita Daizeze Bedʼea jaradiapanʉne. Mamina maʉ̃ awa jara ũrĩbida ẽ basi, jarapanasi Jeowaba kʼãrẽaba kʼareba zebʉrʉta bedʼea zroma ũdubʉrʉde akʉza daibara jʉrʉpanasi dai warrarabara erpanamarẽã neũdukʼawua Jeowa ʉ̃rʉ Kʼawuabipanʉrã Jeowadeta nããra bʉebʉta nekʼãrẽ wuabemaira.

Jeowabara daiʼa nekʼãrẽ jõma diasi dai wũãwũãra dapʉẽita nesidabʉra. Mamina mʉ̃abida osi mʉ̃ya oibarata. Mʉ̃ oide 130 ora diabaribaside kʼawuasi sãwũã plata wuaga kʼawuaibarata, mawũã mʉ̃a nesidabʉ edaita. Mamina dai mawũã mejãcha zarea obasimina edaʉde erba ẽ basi daiba nesidabʉra. Maʉ̃ne Jeowaba daita kʼarebasikĩrã. Poagara 1980 jõbodoare akʉza 1990 jʉ̃drʉdogode mejãcha baesi yõta Surinamʼne. Maʉ̃ kʼarea zarebasi daiba nesidabʉ edaita mawũãsidu Jeowabara daiʼa diasi daiba nesidabʉra (Mat. 6:32).

MɄ̃A JÕMA ODA Ʉ̃RɄ KRĨCHABɄDE

Jeowabara daira ewari jõmaʉ̃nẽ kʼareba zebʉrʉ akʉza sobiapanʉ daiba obʉdeba. Dai wũãwũãra Jeowaba daiʼa nebia diada kĩrãkʼabʉ akʉza dapʉẽsida Jeowa ode kʼẽrẽpapanamarẽã adewara mejãcha sobiapanʉ ãya jidasida baera Daizezeita ewari jõmaʉ̃nẽ trajaita. Ethniëlta akʉza Giovannita jʉ̃ẽsida eskuela Daizeze ode panʉraba opanʉne, adewara atiara sukursal Surinamʼne trajapanʉ yi kimabawara.

Atia Ethelta mʉ̃me zõnabasidamina, daira zarea trajapanʉ yi nãã edebari 130 obaride. Daiba ewariza Jeowadeta opanʉ baera ewari neẽ mʉ̃a dowigui kʼawuaita. Mʉ̃a jẽda krĩchabʉrʉde mʉ̃ya odata krĩchabʉ kʼãwũã Daizezeita ewari jõmaʉ̃nẽ trajaita jidadara audre yibia basita.