Biʼia krĩchara bedʼea zroma ũdubʉrʉde

1. ¿Kʼãrẽta jarakĩrãbʉ bia krĩchaibara? (2 Timoteo 4:5).

DAYIRÃBA bedʼea zroma ũdubʉrʉdera, zarea baseabʉ Jeowaʉ̃me akʉza iyi organizasionʼʉ̃me kʼẽrẽpa bʼaita. ¿Kʼãrẽta odaibara maʉ̃ bedʼea zroma awuantaita? Dayirãra bia krĩchaibara, ʉrʉmapanaibara akʉza dayirãba ĩjãbʉta zarea erpanaibara (akʉra 2 Timoteo 4:5). Dayirãra bia krĩchapanʉ aduʼapanʉne, nekʼãrẽ berabarinʉmʉ ʉ̃rʉ biʼia krĩchabʉdade akʉza zarea opanʉne Jeowaba krĩchabʉ kĩrãkʼa krĩchadaita. Mawũã opanʉbʉrʉ dayirãba kãgabʉa yi edebida ẽ bayi.

2. ¿Kʼãrẽta kʼawuadai naʉ̃ artikulodera?

² Nããbema artikulode, dayirãba kʼawuasida bedʼea zroma ũbea ũduseapanʉta, mamina naʉ̃ artikulode bedʼeadayi bedʼea zroma ũbea kongregasione ũduseapanʉta. Maʉ̃ba dayirãitara zarea baseabʉ Jeowaʉ̃me akʉza iyi organizasionʼʉ̃me kʼẽrẽpa baita. Nããra, mebẽã abaʉba dayi bia eda ẽãne. Ũme, dayaʼa ũrãgʼa diabʉdade. Ũbea, kongregasionba awuara obʉrʉde dayirãita zareabʉde maʉ̃rane kĩrãkʼa oita. Dayirãba naʉ̃ bedʼea zroma erbʉdera, ¿sãwũã bia krĩchai akʉza mawũã Jeowaʉ̃me adewara yi organizasionʼʉ̃me kʼẽrẽpa baseapanʉ?

MEBẼÃ ABAɄBA DAYI BIA EDA ẼÃNE

3. ¿Kʼãrẽta odaibara mebẽã abaʉba bia eda ẽ bʉrʉ?

³ ¿Bʉra edaʉde krĩcha obarika mebẽrã kongregasion nãã edebariba bʉta bia eda ẽ basi baera? Maʉ̃ta mawũã berabarisibʉrʉ mebẽãbara krĩña mawũã oẽ basibaibara (Rom. 3:23; Sant. 3:2). Mawũãsidu bʉra bia kʼãĩ ẽ baibara akʉza krĩcha zroma obʉbaibara maʉ̃ kʼarea. Maʉ̃ba bʉyikʉza widibʉbaibara: «¿Naʉ̃ mebẽãba mawũã obʉbʉrʉ, wãrĩnu naʉ̃ra Jeowa organizasionka?». Mamina Diaruba, dayirãta mawũã krĩchadamarẽã kãgabʉ (2 Cor. 2:11). Dayirã mawũã krĩchabʉba Jeowadeba akʉza iyi organizasioneba jĩga babiseabʉ. Maʉ̃ kʼarea dayi mebẽã abaʉba dayita bia eda ẽ bʉrʉ, ¿kʼãrẽta oseapanʉ bia krĩchaita akʉza mitia krĩcha ẽ baita?

4. ¿Sãwũã bia krĩchasi Joséra, iyi bia edada ẽ baside akʉza kʼãrẽta kʼawuapanʉ iyi yizadeba? (Génesis 50:19-21).

⁴ Kĩrʉrãra. José warraraenara yi mebẽrãbara bia edada ẽ basi, jʉradebasi akʉza beakĩrãpanasi (Gén. 37:4, 18-22). Maʉ̃ kʼarea Joséra nẽdo bʉesida awuru nezokʼa bamarẽã. Maʉ̃ba bedʼea zromara 13 poagabayeda ũdusi. Maʉ̃ba Josébara iyikʉza widibasibaibara, wãrĩnu Jeowabara iyira kãgabʉ kʼawuaita, mawũã ẽ bʉrʉ Jeowabara doba amaesita iya kʼareba nesidabʉde. Mawũã odapeada kʼareara Joséra kĩrʉ ẽ basi, awuarabʉrʉ aduʼabasi. Josébara yi mebẽrã zʉbʉria oseabasimina mawũã oẽ basi, awuarabʉrʉ kãgata ũdubisi ãyaʼa (Gén. 45:4, 5). Josébara mawũã osi, iya biʼia krĩchasi baera akʉza krĩcha ẽ basi iya kʼãrẽ bedʼea zromane berabarinʉmʉta, awuarabʉrʉ krĩchasi Jeowaba kʼãrẽta oita krĩchabʉta (akʉra Génesis 50:19-21). ¿Kʼãrẽta kʼawuapanʉ? Bʉta mebẽã abaʉba bia eda ẽã basibʉrʉ, kĩrʉrãra Jeowaʉ̃me akʉza krĩcharãra Jeowaba bʉ doba amaesita. Awuarabʉrʉ krĩchara sãwũã Jeowaba kʼãrẽbanʉmʉta maʉ̃ bedʼea zroma awuantaita. Akʉrãra mebẽrãba nekʼãrẽ aña obʉta, awuarabʉrʉ ãyaʼa kãgata ũdubira (1 Ped. 4:8).

5. ¿Miqueasbara sãwũã bia krĩchabʉta ũdubisi, iyi bia edada ẽ baside?

⁵ Akʉdayi yiza idi ewaridebemata, mebẽã trʉ̃ra Miqueas iyira Sudaméricadebema.b Miqueasʼra krĩcha zroma obasi, mebẽrã kongregasionebema nãã edebʉba iyita bia edada ẽ basi baera. Iya jarasi: «Mʉ̃ra kʼawua krĩcha zroma okabasi, kʼãĩ ẽ basi, mʉ̃ra perabasi adewara mejãcha jẽgabasi kʼãrẽta obe ẽ baera». Mawũãsidu iyira zarea osi, bia krĩchaita akʉza iyikʉza bia sentita adewara Jeowaʼa badua yiwidʼibasi, iyi jaure zareadeba kʼarebamarẽã maʉ̃ bedʼea zroma awuantaita akʉza jʉrʉsi dayirã kartarane maʉ̃ ʉ̃rʉ bedʼeabʉta. ¿Kʼãrẽta kʼawuapanʉ? Bʉta mebẽã abaʉba bia eda ẽ bʉrʉ, zarea ora aduʼa bʼaita akʉza mitia krĩcha ẽ baita. Edaʉde dayirãbara jõma kʼawua ẽ, kʼãrẽa mebẽãbara mawũã edasita, mawũã ẽ bʉrʉ mawũã jarasita. Mawũẽra Jeowaʼa yiwidʼida akʉza Jeowaʼa jarada iya kʼarebamarẽã, iya nekʼãrẽ akʉbʉ kĩrãkʼa akʉita. Dayirãba mawũã opanʉbʉrʉ kʼawuayi, kʼãrẽa mawũã osita mebẽãbara akʉza iyiʉ̃me kĩrʉ ẽ bayi (Prov. 19:11). Kĩrãbera Jeowabara biʼia kʼawuabʉta kʼãrẽta sãwũã berabarinʉmʉra akʉza iya zarea diayi maʉ̃ bedʼea zroma awuantaita (2 Crón. 16:9; Ecl. 5:8).

DAYAʼA ŨRÃGʼA DIABɄDADE

6. Dayirã kʼẽãbʉdadera, ¿kʼãrẽa akʉdaibara Jeowaba maʉ̃ ũrãgʼadeba dayirãʼa kãgata ũdubikĩrãbʉta? (Hebreos 12:5, 6, 11).

⁶ Dayi kʼẽãbʉdadera sopʉa sentiseabʉ. Mamina dayi mawũã sopʉabida ʉ̃rʉ krĩchanʉmʉba krĩchaseapanʉ dayirã mawũã kʼẽãna ẽ baibarabasita adewara dayirãba mawũã krĩchapanʉbʉrʉ, mebẽãba dayirã kʼẽãbʉrʉde ũduda ẽ bayi Jeowaba dayirãʼa kãga ũdubibʉta maʉ̃neba (akʉra Hebreos 12:5, 6, 11). Dayirãta mawũã krĩchapanʉbʉrʉ iduaribiseabʉ Diaruba sewamarẽã. Diarubara kãgabʉ ũrãgʼa diapanʉta ũrĩna ẽ marẽã akʉza Jeowadeba adewara iyi organizasioneba jĩga bamarẽã kãgabʉ. Bʉta kʼẽãsidabʉrʉ, ¿sãwũã ũdubiseabʉ bia krĩchabʉta?

7. (1) Potoba ũdubibʉ kĩrãkʼa Pedroʼa ũrãgʼa diada tẽãra, ¿Jeowabara sãwũã zokʼasi? (2) ¿Kʼãrẽta kʼawuabʉ bʉara Pedro yizadebara?

⁷ Ũrĩra ũrãgʼara akʉza bʉa jaradapeadade oũdubira. Jesubara Pedrora ũrãgʼada ʉ̃rʉ, ũrãgʼa diabasi iyi kʼaidubemara kĩrãbita akʉza jarabasi iya kʼãrẽta aña obasita (Mar. 8:33; Luc. 22:31-34). Pedrora mejãcha perabasibaibara mawũã berabarida kʼarea, mamina mawũãsidu iyira Jesuʉ̃me kʼẽrẽpabasi. Pedrobara ũrĩsi Jesuba iyaʼa ũrãgʼa diadara akʉza ara osi iya aña obadata. Pedrora kʼẽrẽpabasi baera Jeowabara zokʼasi iya nekʼãrẽ bio omarẽã kongregasione akʉza kongregasionta kʼarebamarẽã (Juan 21:15-17; Hech. 10:24-33; 1 Ped. 1:1). ¿Kʼãrẽta kʼawuapanʉ Pedro yizadeba? Dayi kʼẽãsidade sãwũã sentida ʉ̃rʉ krĩcha ẽ bʉrʉ, naʉ̃ba kʼarebayi ũrĩta maʉ̃ ũrãgʼara akʉza ara oita daya aña obʉta, maʉ̃ta obʉbʉrʉ nebiata ũduyi dayirãba akʉza wuabemarabida, adewara Jeowabara dayirãta audre zokʼayi akʉza mebẽrãta kʼarebadayi.

8, 9. Nããrãra Bernardo kʼẽãsidadera, ¿sãwũã sentisi akʉza kʼãrẽba kʼarebasi krĩcha awuara erbaita?

⁸ Akʉdaya kʼãrẽta berabarisita mebẽã Bernardo Mozambiquedebemata. Iyaʼa jarasida wua zõrãrã kongregasionebema babe ẽ baita. Maʉ̃ kʼarea, ¿sãwũã sentibasiba Bernardora? Iya jarasi: «Mʉ̃ra sopʉabasi, mʉ̃a kãga ẽ basi baera mʉ̃ sãwũã kʼẽãnapeadara». Adewara iyira krĩcha zroma obasi kʼawua ẽ basi baera sãwũã krĩchadaita mebẽrãba iyi ʉ̃rʉ akʉza iya jarabʉ: «Jedeko bio berabarisi mʉ̃ bia krĩchaita akʉza Jeowa ʉ̃rʉ ĩjãita adewara iyi organizasion ʉ̃rʉ». ¿Kʼãrẽba kʼarebasi Bernardora bia krĩchaita?

⁹ Bernardobara aña krĩchabʉra ara osi. Iya jara ũrĩbibʉ: «Mʉ̃ zõrãrã basiedara zokʼabasi Hebreos 12:7ta mebẽrã kʼarebaita ãya bia krĩchadamarẽã Jeowaba sãwũã kʼẽãbʉ ʉ̃rʉ, aramaʉ̃ta mʉ̃yikʉza krĩchasi: ‹¿Kʼairaba ũrĩbara naʉ̃ bedʼeara?›. Jõma Jeowa odepanʉraba akʉza mʉ̃abida ũrĩbara». Aramaʉ̃ta Bernardora nekʼãrẽ jõma osi akʉza jẽda Jeowa ʉ̃rʉ adewara iyi organizasion ʉ̃rʉ ĩjãita, Daizeze Bedʼeata badua lebasi akʉza maʉ̃ ʉ̃rʉ krĩchabasi akʉza iya bia kʼawua ẽ basimina mebẽrãba sãwũã krĩchabʉta iyi ʉ̃rʉ, ãyibawara Daizeze bedʼea jaradia wãbasi adewara ãba yi jʉrebarima wãbasi. Mawũã berabarida tẽã, iyira jẽda zõrãrã kongregasionebema babisida. Bʉta Bernardo kĩrãkʼa kʼẽãsidabʉrʉ krĩcharãra bʉ sãwũã sentida ʉ̃rʉ, awuarabʉrʉ bia krĩchara bʉaʼa ũrãgʼa diada ʉ̃rʉ, adewara ara ora bʉa nekʼãrẽ aña obʉtac (Prov. 8:33; 22:4). Mawũã ora Jeowabara bʉaʼa nebiata mejãcha diayi, iyiʉ̃me akʉza iyi organizasionʼʉ̃me kʼẽrẽpabʉ kʼarea.

KONGREGASIONBA AWUARA OBɄRɄDE DAYIRÃITA ZAREABɄDE MAɄ̃RANE KĨRÃKʼA OITA

10. ¿Kʼãrẽa ʉ̃kʉrʉ yumakẽrã israelitaraitara zareabasi Jeowa organizasionʼʉ̃me kʼẽrẽpa bʼaita iya awuara oside?

¹⁰ Kongregasione awuara opanʉnera, dayirãita zarea baseabʉ Jeowa organizasionʼʉ̃me kʼẽrẽpa bʼaita. Dayirãta jʉra kʼawuapanʉ ẽ bʉrʉ Jeowadeba jĩga wãseabʉ. Bari jaraita, krĩchara sãwũã israelitaraitara awuara besita Jeowaba Moisésʼa Ley diaside, maʉ̃ Ley diai nawedara, mebẽrã burubara saserdotede kĩrãkʼa oibarabasi, adewara altarta oibarabasi akʉza Jeowaʼa sakripisio diabasi yi mebẽrã bari (Gén. 8:20, 21; 12:7; 26:25; 35:1, 6, 7; Job 1:5). Mamina Jeowaba Moisésʼa Ley diada tẽãra, mebẽrã burubara maʉ̃ta wua obe ẽ baibarabasi, Jeowaba jidasi baera Aarón mebẽrãta saserdote bamarẽã akʉza maʉ̃raba sakripisio diaibarabasi baera. Maʉ̃neba ʉ̃ta Jeowa organizasionʼra awuara besi baera, mebẽrã buruta saserdote kĩrãkʼa basibʉrʉ akʉza sakripisio obasibʉrʉ, maʉ̃ta Aarónʼneba zeda ẽ basibʉrʉ beibarabasid (Lev. 17:3-6, 8, 9). ¿Maʉ̃ basi ẽka Coréba, Datánba, Abiramba akʉza 250 mebẽrã buruba Moisésba akʉza Aarónba jarabadara ũrĩ ẽ badara? (Núm. 16:1-3). Maʉ̃ ʉ̃rʉra bia kʼawuada ẽ, mamina kʼawuapanʉ Coréta akʉza iyiʉ̃me badarata Jeowaʉ̃me kʼẽrẽpa ba ẽ basita. Jeowa organizasionba awuara obʉrʉde dayirãita zarebʉrʉ iyiʉ̃me kʼẽrẽpa bʼaita, ¿dayirãbara kʼãrẽta oibara?

11. ¿Kʼãrẽta kʼawuapanʉ koatitaranebara?

¹¹ Jeowa organizasionba awuara obʉrʉde maʉ̃are bara. Koatitara drʉa ibʉawabʉde basidera, trajo biata erbasi. Israelitara aña wãibarabasidera koatitarabara Arca bedʼea abarika zedata pʉwʉrʉ nãã edepanasi (Núm. 3:29, 31; 10:33; Jos. 3:2-4). Maʉ̃ra ãyitara arigʉ yibiabasi, mamina jõma awuara besi israelitara Jeowaba drʉa diaya adama jʉ̃ẽside akʉza mama ariya piki paneside. Maʉ̃ kʼarea nesida ẽ basi Arca bedʼea abarika zedara aña edeita, maʉ̃ba Salomón nokʼo basidera koatitarãra trajo awuara diasida. Ʉ̃kʉrʉra trãbasi, ʉ̃kʉrʉta templo akʉbasi, adewara ne wuagabarita akʉpanasi (1 Crón. 6:31-33; 26:1, 24). Daizeze Bedʼeabara jara ẽ ãyi maʉ̃ trajo yiwidi kʼarea imitia bedʼeapanasita akʉza jara ẽ ãya awuru trajo audre yibiata wididata, ãya nãã opanana kʼarea. Naʉ̃neba, ¿kʼãrẽta kʼawuapanʉ? Jeowa organizasionba awuara obʉrʉdera, ãyita kʼarebaibara akʉza ãyiare panaibara, ãya zokʼabʉra dayimabʉ ẽ mina. Sobiabara badu trajo Jeowa organizasionba bʉaʼa diabʉ kʼarea. Kĩrãbera bʉa trajo obʉba ũdubi ẽãta bʉra audre yibiata akʉza Jeowaitara audre yibiata bʉa iyi bedʼea ũrĩbʉta bʉa kʼãrẽ trajo obʉira (1 Sam. 15:22).

12. ¿Sãwũã sentisi Zainara Beteldeba ãĩ wãsidera?

¹² Akʉdaya Zaina kʼãrẽ berabaridata, iyira Oriente Mediodebema. Iyi Jeowaita trajabʉde jarasida awuru trajota omarẽã Jeowaita, maʉ̃ne aduasi iya pribilegio mejãcha kãgabʉta. Zainara 23 poagabasi Betelde trajabʉta, maʉ̃ta Beteldeba ãĩ wã kʼãrãpe Daizeze bedʼeata jaradia wãmarẽã jarasida. Iya jarasi: «Mʉ̃aʼa awuara omarẽã jarasidadera mʉ̃itara zarebasi, mʉ̃a krĩchabasi mʉ̃a kʼãrẽ obe ẽãta akʉza mʉ̃yikʉza widibasi: ‹¿Kʼãrẽta aña osi mʉ̃ara?›». Maʉ̃ awuara mebẽrã kongregasionebemabara audre sopʉabisida iyira, ãya jarasida: «Bʉa trajota bia obasibʉrʉ Jeowa organizasionba kʼãwũã ãĩ jʉreta ba ẽ bakasi». Maʉ̃ kʼarea Zainara mejãcha sopʉabasi adewara diamasiza jẽgabasi, mamina iya jarasi: «Mawũãsidu aña krĩcha ẽ basi Jeowa ʉ̃rʉ akʉza iyi organizasion ʉ̃rʉ». ¿Kʼãrẽba kʼarebasi bia krĩchaita?

13. ¿Kʼãrẽta osi Zainabara wua aña krĩcha ẽ baita?

¹³ Zainara zarea osi wua aña krĩcha ẽ baita, ¿kʼãrẽba kʼarebasi iyira? Iya lesi dayirã kartara bedʼea zroma ũdubʉ ʉ̃rʉ bedʼeabʉta. Iya lesi La Atalaya 1 febrero 2001nebemata yi artikulo trʉ̃ra «Usted puede afrontar el desánimo». Naʉ̃ba biode kʼarebasi iyira. Naʉ̃ kartadera bedʼeabʉ Marcos Daizeze Bedʼea bʉda ʉ̃rʉ. Nama jara ũrĩbibʉ sãwũã Marcosʼra iyi kĩrãkʼa sentibasita awuru trajota omarẽã jarasidade. Zainaba jarabʉ: «Marcos yizara mʉ̃itara remedio kĩrãkʼabasi, kʼarebasi baera mʉ̃ta wua sopʉa ẽ baita». Zainara iyi neũdukʼawuadeba jĩga ba ẽ basi akʉza yi edebi ẽ basi iyi aña krĩchabʉa, adewara iya kʼawuasi Jeowabara iyi jaure zareadeba kʼareba jaradiabʉta iyi organizasionʼra akʉza yi nãã edepanʉrabara iyi ʉ̃rʉ krĩchapanʉta. Adewara kʼawuasi Jeowa organizasionbara nekʼãrẽ jõma oibarata, Jeowaba zokʼabʉ jõma aripe oita.

14. ¿Kʼãrẽta zareabasi Vladoitara akʉza kʼãrẽba kʼarebasi iyira?

¹⁴ Mebẽã Vladora 73 poagabasi, iyira Eslovenianebema, iyi kongregasionʼra awuru kongregasionʼʉ̃me ãba zebisida akʉza iyi Daizeze Nokʼo ʉ̃rʉ bedʼea bari demae ãba yi jʉrebadara, wuara zokʼada ẽ basi. Iya jarasi: «Mʉ̃a ũrĩ ẽ basi kʼãrẽa wua zokʼada ẽãta maʉ̃ Daizeze de biʼia kirura, mʉ̃ra sopʉabasi dããraba ẽ basi baera maʉ̃ de ara odapeadata akʉza mʉ̃ra karpintero baera mʉ̃a osi nekʼãrẽ maʉ̃ de bia ũdumarẽã. Adewara maʉ̃ kongregasion mawũã ãba zebisidadera, nekʼãrẽta awuara omarẽã jarasidadera, daitara jipa zarebasi daira zõrãrãbasi baera». ¿Kʼãrẽba kʼarebasi Vladora Jeowa organizasionʼare bʼaita? Iya jarabʉ: «Dayirãba obʉrʉde Jeowa organizasionba awuara omarẽã jarabʉta, naʉ̃ba kʼarebabʉ nebia ũduita. Mawũã Jeowa organizasionba awuara omarẽã jarabʉrʉde, dayirãba maʉ̃ta opanʉbʉrʉ zare ẽ bayi ʉ̃ra zebʉrʉde Jeowa organizasionba awuara obʉrʉde ũrĩta». Bʉ kongregasionta awuru kongregasionʼʉ̃me ãba zebida kʼarea, mawũã ẽ bʉrʉ, bʉ Jeowaita trajabʉde awuru trajota omarẽã jarada kʼarea, ¿krĩcha zroma obʉka? Ĩjãra Jeowabara kʼawuabʉta bʉ sãwũã sentibʉta mawũã berabaribʉrʉdera. Jeowa organizasionba awuara obʉrʉde, Jeowaʉ̃me akʉza yi organizasionʼʉ̃me kʼẽrẽpabʉbʉrʉ nebiata mejãcha ũduyi (Sal. 18:25).

BIA KRĨCHAIBARA NEKʼÃRẼ JÕMAɄ̃NẼ

15. ¿Kʼãrẽta oibara bia krĩchaita kongregasione bedʼea zroma ũdubʉrʉde?

¹⁵ Naʉ̃ ewari jõbodoarera dayirãbara bedʼea zromata ũdu wãnañi kongregasione. Naʉ̃ bedʼea zromaba oseabʉ zarea bamarẽã Jeowaʉ̃me kʼẽrẽpa bʼaita, maʉ̃ kʼarea biʼia krĩchadaibara nekʼãrẽ jõmaʉ̃nẽ. Mebẽã abaʉba bʉta bia eda ẽ basibʉrʉ, maʉ̃ kʼarea kĩrʉrãra. Bʉta kʼẽãsidabʉrʉ maʉ̃ kʼarea perarãra, awuarabʉrʉ ũrĩdua ũrãgʼata akʉza ara ora bʉa aña odata. Jeowa organizasionba bʉmabʉ ẽãta omarẽã zokʼadara, zarea odaibara soiduba ũrĩta akʉza oita.

16. ¿Sãwũã ĩjã baseapanʉ Jeowa ʉ̃rʉ akʉza iyi organizasion ʉ̃rʉ?

¹⁶ Bʉara Jeowa ʉ̃rʉ ĩjãbʉta ũdubiseabʉ akʉza iyi organizasion ʉ̃rʉ bedʼea zroma erbʉde. Mawũã ĩjãbʉta ũdubira, bia krĩchaibara, aduʼa bʼaibara akʉza nekʼãrẽra akʉibara Jeowaba akʉbʉ kĩrãkʼa. Kʼawuara Daizeze Bedʼeade ẽbẽrarã yiza biabʉdeba akʉza ãya sãwũã ara odata bedʼea zromara, maʉ̃ ʉ̃rʉ lera akʉza krĩchara, Jeowaʼa kʼareba widira akʉza kongregasioneba jĩga wãrãra. Mawũã ora Diarubara Jeowadeba akʉza iyi organizasioneba jĩga babi ẽ bayi (Sant. 4:7).