Lepanʉraba widipanʉta

Davidba Salmo 61:8 bʉside jarasi «ewari jõmaʉ̃nẽ» Daizeze ʉ̃rʉ ibia bedʼea bʼaita, ¿naʉ̃ba jarakĩrãbasika iyira bei ẽ baita?

Mawũã ẽ, iya biʼia kʼawuabasi iyira ewari jõmaʉ̃nẽ ba ẽ baita.

Akʉra iya kʼãrẽ bʉdata naʉ̃ testode akʉza awuru testorane: «Mawũẽra mʉ̃ra bʉ trʉ̃ ʉ̃rʉ ibia trãbayi ewari jõmaʉ̃nẽ, mʉ̃a oita jaradara aripe oyi ewariza». «Bʉaʼa mʉ̃ soiduba bedʼeabʉa, Zeze Jeowa akʉza bʉ trʉ̃ ʉ̃rʉ ibia bedʼeabayi ewari jõmaʉ̃nẽ», «Bʉ trʉ̃ ʉ̃rʉ ibia bedʼeabayi ewari jõmaʉ̃nẽ» (Sal. 61:8; 86:12; 145:1, 2).

Davidbara kʼawuabasi iyira beita, adewara kʼawuabasi Jeowaba jarasita ẽbẽra nemitia odara beita akʉza kʼawuabasi iyira nemitia omiata. Adewara Davidbara kʼawuabasi ẽbẽrarã kʼẽrẽpa badara Abrahán, Isaac akʉza Jacobʼra, beisidata (Gén. 3:3, 17-19; Sal. 51:4, 5). Akʉza kʼawuabasi iyisida beita (Sal. 37:25; 39:4). Mamina Davidba Salmo 61:8de bedʼea bʉdaba jarakĩrãbasi iyara ewari jõmaʉ̃nẽ ibia bedʼea bʼaita Jeowa ʉ̃rʉ iyi zokʼaibʉeda (2 Sam. 7:12).

Davidbara bʉbasi iyi zokʼaibʉeda sãwũã berabaribadata, dayirãba Salmos 18, 51 akʉza 52 ʉ̃trearea akʉpanʉ kĩrãkʼa. Salmo 23de Davidba ũdubibʉ Jeowara obejara akʉbari kĩrãkʼabʉta, yiko bʉma edebʉta akʉza kʼarebabʉta, Davidsida mawũãbasi. Davidbara ewari jõmaʉ̃nẽ Jeowaba zokʼabʉta okĩrãbasi (Sal. 23:6).

Kĩrãbeidua jõma Davidba bʉdara Jeowaba bʉbisita. Akʉza iya bʉdara tẽãne aripe berabarisita. Bari jaraita Davidba jarasi Salmo 110de Jesura sõbede Jeowa juwarare bʼaita mawũã zarea erbaita. ¿Kʼãrẽa Jeowabara zarea diabasi Jesuara? Daizeze nejʉrara iyi juwa edre baebita akʉza ẽbẽrarã naʉ̃ drʉa jõmaʉ̃nẽbemata kʼawua oita. Dayirã ẽdrʉbibarita zesi Davidʼdeba, iyara ʉ̃tʉba zokʼayi akʉza ewari jõmaʉ̃nẽ saserdotebayi (Sal. 110:1-6). Adewara Jesuba jarasi Salmo 110de jarabʉra iyi ʉ̃rʉ bedʼeabasita akʉza ʉ̃ra zeide aripe berabarita (Mat. 22:41-45).

Davidbara bʉsi iyi bada ʉ̃rʉ akʉza ʉ̃ra zeide jẽda piradrʉbʉrʉde ewari jõmaʉ̃nẽ Jeowa ʉ̃rʉ ibia bedʼea bʼai ʉ̃rʉ. Naʉ̃ bedʼeaba ũdubibʉ Salmo 37:10, 11 akʉza 29de jarabʉra aripe berabarisita Israel ewaride akʉza aripe berabarita Daizezeba jarada naʉ̃ drʉade jõmaʉ̃nẽ aribaebʉrʉde (akʉra artikulo «Bʉra mʉ̃me ẽjũã kĩrãwãreãnẽ baya», parrapo 8de).

Salmo 61:8ba akʉza awurura testo naʉ̃ra ʉ̃rʉ abarika bedʼeabʉra, Davidba ewari jõmaʉ̃nẽ ibia bedʼeakĩrãbasita Jeowa ʉ̃rʉ Israelde iyi beiyeda. Akʉza ũdubibʉ Davidba kʼãrẽ oita Jeowaba ẽjũã kĩrãwãreãnẽ jẽda piradrʉbibʉrʉde.