ARTIKULO KʼAWUAITA 50
«Bʉra mʉ̃me ẽjũã kĩrãwãreãnẽ baya»
«Mʉ̃a idi wãrĩnuta jaraya, bʉra mʉ̃me ẽjũã kĩrãwãreãnẽ baya» (LUC. 23:43).
TRÃBI 145 Dios prometió un paraíso
KʼÃRẼTA ŨDUDAITAa
1. ¿Jesu bei nãã ẽbẽra kayirua iyi kʼawabʉba kʼãrẽta jarasi? (Luc. 23:39-43).
JESUTA akʉza ẽbẽra kayiruara ũme Jesu kʼawa badara, zʉbʉriasida ãyi bei nãã (Luc. 23:32, 33). Naʉ̃ra ẽbẽrarãra Jesu kʼarea ipidapanasi, naʉ̃ba ũdubisi ãyira Jesu kʼaidubema ẽ basita (Mat. 27:44; Mar. 15:32). Mamina ãyidebema abaʉba jẽda krĩchasi, mõbe naʉ̃ta jarasi Jesuʼa: «Mʉrã budebarua bʉta Rey babʉrʉdʼera», aramaʉ̃ta Jesuba jarasi: «Mʉ̃a idi wãrĩnuta jaraya, bʉra mʉ̃me ẽjũã kĩrãwãreãnẽ baya» (akʉra Lucas 23:39-43). Bia kʼawuada ẽ naʉ̃ ẽbẽra kayiruabara ĩjãsita Daizeze Nokʼo zeira arakʼaitabata akʉza Jesubida jara ẽ basi iyiʉ̃me ʉ̃tʉ bʼaita (Mat. 4:17). Awuarabʉrʉ Jesura bedʼeabasi aranʉ bʼai ẽjũã kĩrãwãreã zei ʉ̃rʉ, ¿kʼãrẽa mawũã jarapanʉ?
¿Kʼãrẽta kʼawuaseapanʉ yumakẽrã kayirua oda jẽda krĩchadadeba akʉza iya kʼawuabadadeba? (Akʉra parrapo 2 akʉza 3).
2. ¿Sãwũã kʼawuapanʉ yumakẽrã iya nemitia oda jẽda krĩchadara judiobasita?
2 Naʉ̃ ẽbẽra iya nemitia obʉ jẽda krĩchadara judiobasibaibara, naʉ̃ yumakẽrãba ababema jarasi: «¿Bʉsidʼa abʼarika beuidʼe bʉara wawia ẽka Daizezera?» (Luc. 23:40). Judiorabara Daizeze abapaiabʉrʉ yiwidʼipanasi, mamina wuabema ẽbẽrarãbara daizeze zeri ẽãra bioʼa yiwidʼipanasi (Éx. 20:2, 3; 1 Cor. 8:5, 6). Ãyi ũmena judiora ẽ basibʉrʉ ababema yumakẽrã jẽda krĩchadabara widibakasi: «¿Bʉara daizezerãra wawia ũdubibʉ ẽka?». Jeowabara zokʼa bʉe ẽ basi Jesura ẽbẽrarã naʉ̃ drʉadebemama, awuarabʉrʉ zokʼa bʉesi ẽbẽrarã Israeldebema Jeowadeba jĩga wãnama (Mat. 15:24). Adewara Jeowabara kʼawuabisi israelitara ẽbẽra beidara jẽda piradrʉbita. Yumakẽrã iya nekayirua oda jẽda krĩchadabara naʉ̃ ʉ̃rʉ bia kʼawuabasibaibara, maʉ̃ba iya jaradadeba ũdubisi Jeowabara Jesura jẽda piradrʉbita iyi Nokʼota zokʼamarẽã, maʉ̃ba iyara jʉ̃ãbasibaibara Jeowaba jẽda piradrʉbimarẽã.
3. ¿Kʼãrẽ ʉ̃rʉ krĩchasibaibara naʉ̃ yumakẽrã nekayirua oda jẽda krĩchadabara Jesu bedʼeaside ẽjũã kĩrãwãreã ʉ̃rʉ? Jara ũrĩbira (Génesis 2:15).
3 Yumakẽrã nekayirua oda jẽda krĩchadara judiobasi baera kʼawuabasi Adán, Eva akʉza ẽjũã kĩrãwãreã Jeowaba ãyi bʉeda ʉ̃rʉ. Maʉ̃ yumakẽrãbara krĩchabasibaibara ẽjũã kĩrãwãreã Jesuba jaradara, nama uda bʼaita (akʉra Génesis 2:15).
4. ¿Jesuba yumakẽrã bedʼea jaradaba kʼãrẽta krĩchabiseabʉ dayirãʼa?
4 Jesuba naʉ̃ yumakẽrãʼa bedʼea jaradaba dayirã krĩchabiseabʉ sãwũã bʼaita ẽjũã kĩrãwãreãnẽ. Dayirãba kʼawuaseabʉ ẽjũã kĩrãwãreã sãwũã bʼaita krĩchabʉrʉde nokʼo Salomónba zokʼabada ʉ̃rʉ. Daizeze Bedʼeaba jarabʉ Jesura audre yi zromata Salomónʼira, maʉ̃ba jʉ̃ãseapanʉ Jesuba akʉza iyibawaraʉba zokʼabʉba naʉ̃ drʉara ẽjũã kĩrãwãreã babidaita (Mat. 12:42). Maʉ̃ kʼarea awuru obejarãra krĩchadaibara kʼãrẽta oibarata ẽjũã kĩrãwãreãnẽ bʼaita (Juan 10:16).
¿SÃWŨÃ BʼAI ẼJŨÃ KĨRÃWÃREÃNẼRA?
5. ¿Sãwũã bʼaita krĩchabʉ bʉra ẽjũã kĩrãwãreãnẽra?
5 Ẽjũã kĩrãwãreãnẽ krĩchabʉrʉde, ¿kʼãrẽ ʉ̃rʉ krĩchabʉ bʉa? Krĩchabʉbaibara ẽjũã kĩrãwãreã Edénʼne bada kĩrãkʼa (Gén. 2:7-9). Mawũã ẽ bʉrʉ krĩchabʉbaibara Miqueasba Daizeze pʉwʉrʉ ʉ̃rʉ jaradata «ãya ne u uba udamae jewedadayi akʉza bakuru iguera edre» (Miq. 4:3, 4). Akʉza krĩchabʉbaibara Daizeze Bedʼeaba jarabʉde yiko mejãcha bʼai ʉ̃rʉ (Sal. 72:16; Is. 65:21, 22). Mawũẽra bʉa krĩchabʉ, bʉ ẽjũã kĩrãwãreãnẽ bʉta yiko mejãchabʉmae, neponora mejãcha tũãpoabʉmae akʉza bʉa ũrĩbʉ bʉ mebẽrã ipidata, beidara jẽda piradrʉda sobiapanʉta. Bʉa maʉ̃ wãrĩnu ĩjãseabʉ maʉ̃ nebiara naʉ̃ ẽjũãne berabarita, mamina ẽjũã kĩrãwãreãnẽra trajo biata odayi.
Dayirãba ẽbẽra beida jẽda piradrʉbʉrʉra jaradiaibara. (Akʉra parrapo 6).
6. ¿Kʼãrẽ trajota odai ẽjũã kĩrãwãreãnẽra? (Akʉra potota).
6 Jeowaba osi dayirãra sobia trajadamarẽã (Ecl. 2:24). Mejãcha trajo odayi Jesuba mil poagabayeda zokʼabʉrʉdera, ẽbẽrarã zʉbʉriadeba ẽdrʉdarãra akʉza jẽda piradrʉdarãra nesidayi wuata, yikota akʉza deta, maʉ̃ kʼarea mejãcha trajadaibara mamina maʉ̃ trajora zare ẽ bayi. Adán Evaʉ̃me ne u bada kĩrãkʼa ẽjũã kĩrãwãreãnẽ dayirãsida ne uibara abarika. Yibiabayi ẽbẽra piradrʉbʉrʉra jaradiaita Jeowa ʉ̃rʉ akʉza Jeowaba kʼãrẽ oita krĩchabʉ ʉ̃rʉ, yi Jeowa ʉ̃rʉ kʼawua ẽ beidara akʉza Jeowa ũdukʼawuada Jesu nama zei naweda.
7. ¿Kʼãrẽne ĩjãseabʉ akʉza kʼãrẽa?
7 Ĩjãseapanʉ ẽjũã kĩrãwãreãnẽ bia bʼaita, aduʼa bʼaita akʉza nekʼãrẽ jõma erbaita, ¿kʼãrẽa? Jeowaba ũdubisi iyi Nokʼoba zokʼabʉrʉde sãwũã bʼaita, dayirãba maʉ̃ ʉ̃rʉ kʼawuaseabʉ akʉbʉrʉde nokʼo Salomónba sãwũã zokʼada ʉ̃rʉ.
NOKʼO SALOMÓNBA ZOKʼABADABA ŨDUBIBɄ SÃWŨÃ BʼAITA ẼJŨÃ KĨRÃWÃREÃNẼ
8. ¿Sãwũã aripe berabarisi Salmo 37:10, 11 akʉza 29ra nokʼo Davidba bʉda tẽãra? (Akʉra «Lepanʉraba widipanʉta» naʉ̃ kartade).
8 Nokʼo Davidba bʉsi ʉ̃ra zeide nokʼo buru biaba akʉza kʼẽrẽpabʉba zokʼabʉrʉde sãwũã bʼaita (akʉra Salmo 37:10, 11, 29). Dayirãba ẽbẽra jaradiabʉrʉde ẽjũã kĩrãwãreã ʉ̃rʉ ũdubipanʉ Salmo 37:11ta, maʉ̃ra yibia Jesuba ũdubisi baera katumane bedʼea bia jaradamae, naʉ̃ testora ʉ̃ra zeide aripe berabarita (Mat. 5:5). Nokʼo Davidba bedʼea bʉdade jarabasi nokʼo Salomónba zokʼabʉrʉde sãwũã bʼaita. Salomónba zokʼabasidera Daizeze pʉwʉrʉra nekʼãrẽ biata mejãcha erbasi. Maʉ̃ drʉade mejãchabasi lecheta, adewara kũrabari kũata. Daizezeba jarasi: «Bʉa ũrĩbʉbʉrʉ mʉ̃a jara wãta [...] Mʉ̃a diayi aduʼa bʼaita pʉwʉrʉra, marara bia kʼãĩbayi adewara miõba perabida ẽ bayi» (Lev. 20:24; 26:3, 6). Naʉ̃ bedʼeara aripe berabarisi Salomónba zokʼabaside (1 Crón. 22:9; 29:26-28). Jeowaba jarasi ẽbẽra kayiruara daizeze zeri ẽã yiwidʼipanʉrãra wua neẽ baita (Sal. 37:10). Bedʼea Salmo 37:10, 11 akʉza 29de jarabʉra nãã aripe berabarisi akʉza ʉ̃ra zeidebida abarika berabariyi.
9. ¿Kʼãrẽta jarasi nokʼo wẽrã Sabadebemabara Salomónba zokʼabʉ ʉ̃rʉra?
9 Nokʼo wẽrã Sabadebemaba ũrĩsi Israel pʉwʉrʉ biabʉta akʉza aduʼabʉta nokʼo Salomónba zokʼabaside. Maʉ̃ nokʼo wẽrãra jĩgaʉba zesi Jerusalénma iya jaradapeada wãrĩnu kʼawuaita (1 Rey. 10:1). Salomónba sãwũã zokʼabʉ akʉda tẽã iya jarasi: «Mamina ẽzadrabida jarada ẽ basi mʉ̃ara [...] Sobiapanʉ bʉ yumakẽrãrãra akʉza bʉ nezokʼarãra bʉ kʼawabʉ baera bʉ buru bia ũrĩta» (1 Rey. 10:6-8). Salomónba zokʼadaba ũdubisi Jeowaba kʼãrẽ oita Jesuba zokʼabʉrʉde.
10. ¿Kʼãrẽne audre yi zroma Jesura Salomónʼira?
10 Jesura nekʼãrẽ biode yi zromabasi Salomónʼira. Salomónʼra kayirua omiabasi maʉ̃ba nemitiata osi, mawũã Jeowa pʉwʉrʉta mejãcha zʉbʉriabisi. Mamina Jesubara biʼia zokʼabʉ iyira nekayirua oka baera (Luc. 1:32; Heb. 4:14, 15). Jesura kʼẽrẽpabasi Jeowaʉ̃me Diaruba mejãcha bedʼea zroma ũdubibasimina. Kristoba ũdubisi kayirua oẽ baita iyi pʉwʉrʉ zʉbʉriabira. Iyira Nokʼo audre yibia.
11. ¿Kʼairabawaraʉba zokʼai Jesubara?
11 Jesu 144.000bawara trajayi ẽbẽrarã akʉita akʉza naʉ̃ drʉade Jeowaba oyada aripe berabarimarẽã (Apoc. 14:1-3). Ãyira nama udabaside zʉbʉria berabarisi baera, maʉ̃ba kʼawuabʉ ãya ẽbẽra kʼãrẽ zʉbʉriade berabaribʉra. ¿Kʼãrẽta oi Jesubawara zokʼairabara?
¿KʼÃRẼTA OI ẼBẼRARÃ Ʉ̃TA WÃIRABARA?
12. ¿Kʼãrẽ trajota diai Jeowabara 144.000ra?
12 Jesu akʉza iyi kʼaidu zokʼairabara audre trajota erbʉ Salomónba erbadaira. Salomónba akʉsi pʉwʉrʉ iyi chumaebematrʉ, Jesu kʼaidu zokʼairabara naʉ̃ drʉa jõmaʉ̃nẽ ẽbẽrarã mejãchabʉta zokʼayi. Jeowaba trajo biata diabʉ ẽbẽrarã 144.000ra.
13. ¿Jesu kʼaidu zokʼairabara kʼãrẽ nebiata odai?
13 Jesu kĩrãkʼa 144.000rãra nokʼorabayi akʉza saserdoterabayi (Apoc. 5:10). Israelitaraba ley ũrĩbaside saserdoteraba kʼarebabasi neneẽã baita akʉza Jeowa kʼawa bʼaita. Maʉ̃ kĩrãkʼa Jesura akʉza iyibawara zokʼairãra saserdotera bʼai baera, kʼarebayi Daizeze pʉwʉrʉra neneẽã baita akʉza Jeowa kʼawa bʼaita (Heb. 10:1). Kʼawuada ẽ mina Jesuba akʉza iyi kʼaidu zokʼairaba sãwũã jaradiaita, mamina kʼawuapanʉ Jeowaba ẽjũã kĩrãwãreãnẽ jaradiaita maʉ̃raneba dayirãba kʼãrẽ oita (Apoc. 21:3, 4).
¿KʼÃRẼTA OIBARA AWURU OBEJARABARA ẼJŨÃ KĨRÃWÃREÃNẼ BʼAIRA?
14. ¿Kʼãrẽne abarikabʉ awuru obejarata akʉza mejãchabʉ ẽãraʉ̃mera?
14 Jesuba trʉ̃gasi iyi kʼaidu zokʼairãra «mejãchabʉ ẽãta» (Luc. 12:32). Akʉza Jesuba awuru ẽbẽrarã trʉ̃gasi «awuru obejara». Maʉ̃ra grupo ũmera ãbapanʉ (Juan 10:16). Maʉ̃ra ẽbẽra grupo ũmebʉra idira ãba trajapanʉ akʉza ʉ̃ra ẽjũã kĩrãwãreã zeidebida ãba traja wãnañi. Mejãchabʉ ẽãrãra ʉ̃ta wãñi, awuru obejarãra nama uda bayi ewari jõmaʉ̃nẽ ẽjũã kĩrãwãreãnẽ. Mamina awuru obejarabara nekʼãrẽ oibara ewari jõmaʉ̃nẽ bʼaita.
Idi ewadeba ũdubibara dayirãra ẽjũã kĩrãwãreãnẽ bakĩrãbʉta. (Akʉra parrapo 15).b
15. (1) ¿Sãwũã ãba trajapanʉ awuru obejarãra ʉ̃ta wãiraʉ̃mera? (2) ¿Sãwũã mebẽãde kĩrãkʼa oseapanʉ? (Akʉra potota).
15 Yumakẽrã nekayirua oda jẽda krĩchadaba Jesuʼa biga diai nãã beisi. Dayirã awuru obejarabara nekʼãrẽ bio oseabʉ Jesuʼa biga diabʉ ũdubita. Bari jaraita, Jesu kãgabʉra ũdubipanʉ ʉ̃ta wãira sãwũã edapanʉne, Jesuba kʼawua oya asi awuru obejara, ãya yi ʉ̃ta wãira sãwũã erpanʉneba (Mat. 25:31-40). Dayirãbara yi ʉ̃ta wãirãra kʼarebaseabʉ jaradia wãbʉrʉde akʉza ẽbẽrarã buru kʼoebibʉrʉde (Mat. 28:18-20). Maʉ̃ kʼarea bia zokʼadaibara Daizezeba diabʉra iyi ʉ̃rʉ jaradiaita ẽbẽrarã. Bari jaraita, libro Bʉra ewari jõmaʉ̃nẽ sobia baseabʉ, wabida ũdu ẽ bʉrʉ ẽbẽra abaʉʼa Daizeze ʉ̃rʉ jaradiaita, zarea ora aba ũduita mawũã Daizeze ʉ̃rʉ jaradiaita.
16. ¿Kʼãwũãenaʉba kʼãrẽta oibara Daizeze Nokʼo edre bakĩrãbʉ ũdubira?
16 Jʉ̃ã ẽ baibara ẽjũã bia zeita Jeowaba kãgade bʼaita. Idi ewadeʉba zarea oibara wãrĩnu jaraita akʉza ẽbẽra bia bʼaita, adewara kʼẽrẽpa bʼaibara Jeowaʉ̃me, dayi kimaʉ̃me akʉza mebẽrã kongregasionbawarabida. Kʼãwũãena ũrĩbʉbʉrʉ Jeowaba jarabʉta, zare ẽ bayi ẽjũã kĩrãwãreãnẽbida Jeowaba jarabʉ ũrĩta. Kʼãwũãena nekʼãrẽ okʼawuaseabʉ ẽjũã kĩrãwãreãnẽ bakĩrãbʉ ũdubita. Naʉ̃ kartade akʉra naʉ̃ artikulo aba, yi trʉ̃ra «¿Bʉra nekʼãrẽ oya awa bʉka ẽjũã kĩrãwãreãnẽra?».
17. ¿Dayirãba nãã kayirua oda kʼarea sopʉabaibaraka? Jara ũrĩbira
17 Krĩcha zroma oẽ baibara dayirãba nãã nemitia oda kʼarea, maʉ̃ kʼarea krĩña kayirua oẽ baibara Jesuta dayirãbari beisi baera (Heb. 10:26-31). Mamina daya wãrĩnu jẽda krĩchabʉbʉrʉ akʉza Jeowa kʼarebata, zõrãrã kʼarebaʉ̃me jʉrʉbʉbʉrʉ, adewara nekayiruata wua oẽ bʉrʉ, Jeowaba kĩrãduayi dayirã kayiruara (Is. 55:7; Hech. 3:19). Kĩrãbeidua Jesuba jaradata pariseoraʼa: «Mʉãrã jʉrʉdʼe ze ẽbasia ãzhikusa biata bʼeta, awuarabʉrʉ ẽdrʉbigaita jʉrʉdʼe zesia kʼazhirua omiãrãta» (Mat. 9:13). Jesuta dayirãbari beisi baera Jeowaba kĩrãduabʉ dayirã kayiruara.
BɄRA ẼJŨÃ KĨRÃWÃREÃNẼ BASEABɄ EWARI JÕMAɄ̃NẼ
18. ¿Kʼãrẽ ʉ̃rʉ bedʼeakĩrãi ẽjũã kĩrãwãreãnẽ yumakẽrã Jesu kʼawa beidaʉ̃mera?
18 Krĩchara bʉ ẽjũã kĩrãwãreãnẽbʉta akʉza bedʼeabʉta yumakẽrã jẽda krĩchadaʉ̃me Jesu kʼawa beidata. Biga diapanʉ Jesuta mara ũmebari beisi baera, bʉa widibʉbaibara iya Jesu iyi beibodoeda sãwũãbasita nama uda akʉza iyi sãwũã sentisita Jesuba jaraside iyira bʼaita ẽjũã kĩrãwãreãnẽ. Adewara naʉ̃ yumakẽrãba widibʉbaibara bʉaʼa sãwũãbasita naʉ̃ ewari jõbodoarera. Yibiabayi Daizeze Bedʼea jaradiaita ẽbẽrarã naʉ̃ yumakẽrã kĩrãkʼa bera (Efes. 4:22-24).
Poaga milbayeda mebẽã abaʉta iya okĩrãbadata obʉ ẽjũã kĩrãwãreãnẽ (Akʉra parrapo 19).
19. ¿Kʼãrẽa mase ba ẽ bai ẽjũã kĩrãwãreãnẽra? (Akʉra poto yi nããrabemata).
19 Ẽjũã kĩrãwãreãnẽra mase ba ẽ bayi ẽbẽra mejãcha ũdukʼawuai baera akʉza trajota mejãcha erbai baera, adewara ewariza ewariza, audre ũdukʼawua wãnañi Jeowata akʉza iya nebia diabʉta ũdudayi. Ewariza iyi ʉ̃rʉ audre kʼawuaseapanʉ akʉza iya oda ʉ̃rʉ, naʉ̃ drʉade bei ẽã kikibari baera audre kãgadayi Jeowata. Biga diapanʉ Jeowaʼa akʉza Jesuʼa ãya diai baera ewari jõmaʉ̃nẽ bʼaita.
TRÃBI 22 Jeowa bʉ Nokʼo zebira
a ¿Bʉa badua krĩchabʉka ẽjũã kĩrãwãreã ʉ̃rʉ? Mawũã oira yibia, dayirãba krĩchapanʉbʉrʉ Jeowaba kʼãrẽ nebia wei ʉ̃rʉ, naʉ̃ba kʼarebayi wuabemara sobiade jaradiaita Jeowaba nebia weya abʉ ʉ̃rʉ. Naʉ̃ artikuloba kʼarebayi dayirãba audre ĩjãnaita Jesuba ẽjũã kĩrãwãreã zeya abʉ ʉ̃rʉ.
b POTORABA ŨDUBIBɄTA: Mebẽã abaʉba ẽjũã kĩrãwãreãnẽ beidara jẽda piradrʉbʉrʉʼa jaradiakĩrãbʉ baera, idi ewadeʉba jaradiabʉ ẽbẽrarã.