Ewari jõmaʉ̃nẽ baseapanʉ

1. ¿Sãwũã kʼarebabʉ dayirãra Jeowaba dayirã ewari jõmaʉ̃nẽ babi ʉ̃rʉ krĩchaibara?

JEOWABARA jarabʉ iyi bedʼea ũrĩbʉra ewari jõmaʉ̃nẽ babita (Rom. 6:23). Dayirãba maʉ̃ ʉ̃rʉ biʼia krĩchabʉrʉde audre kãgabʉ Jeowara. Jeowaba dayirã mejãcha kãgabʉ baera iduaribi ẽ bayi mia kʼaiba iyideba jĩga babimarẽã.

2. ¿Kʼãrẽne kʼarebabʉ ewari jõmaʉ̃nẽ bʼaita ĩjãbʉbara?

² Jeowaba dayirã ewari jõmaʉ̃nẽ babita jarabʉbara, kʼarebabʉ dayirãba bedʼea zroma awuantaita akʉza dayirã nejʉraraba jarapanʉbʉsida beadaita maʉ̃ kʼarea Jeowaba zokʼabʉ obʉta idubʉda ẽ, ¿kʼãrẽa? Kʼawuapanʉ baera dayirãta kʼẽrẽpabʉta beidara, Jeowaba jẽda piradrʉbita ewari jõmaʉ̃nẽ bʼaita (Juan 5:28, 29; 1 Cor. 15:55-58; Heb. 2:15). Mamina, ¿kʼãrẽa wãrĩnu ĩjãseapanʉ ewari jõmaʉ̃nẽ bʼaita? Kʼawuadaya kʼãrẽa.

JEOWARA EWARI JÕMAɄ̃NẼ KIKIBARI

3. ¿Kʼãrẽa dayirãbara ĩjãseapanʉ Jeowabara kãgabʉta ewari jõmaʉ̃nẽ bamarẽã? (Salmo 102:12, 24, 27).

³ Kʼawuapanʉ Jeowabara dayirãra ewari jõmaʉ̃nẽ bamarẽã kãgabʉta, bebʉra iyideba zebʉ baera (Sal. 36:9). Akʉdaya ʉ̃kʉrʉ testode Jeowa ʉ̃rʉ jarabʉta iyira ewari jõmaʉ̃nẽ bakikibarita. Salmo 90:2de jarabʉ Jeowa ʉ̃rʉ, «bakikibarisi akʉza bakikibariyi». Adewara Salmo 102ba maʉ̃ kĩrãkʼa jarabʉ (akʉra Salmo 102:12, 24, 27). Akʉza propeta Habacucba jarasi Daizeze Jeowa ʉ̃rʉ: «¿Bʉra ewari jõmaʉ̃nẽ bakikibari ẽka? Mʉ̃ Daizeze, Neneẽãbʉ, bʉra beika» (Hab. 1:12).

4. ¿Kʼãrẽa dayirãitara zarea baseabʉ ĩjãita Jeowara ewari jõmaʉ̃nẽ bakikibarita? Akʉza jara ũrĩbira.

⁴ ¿Bʉitara zareka ĩjãita Jeowara ewari jõmaʉ̃nẽ bakikibarita? (Is. 40:28). Naʉ̃ra ẽbẽra mejãchaitabida zare maʉ̃ ʉ̃rʉ ĩjãita. Naʉ̃ta jarasi Elihúba Daizeze ʉ̃rʉ: «Iyi sõbe poagabʉta kʼawuabeda ẽ» (Job 36:26). Dayirãba maʉ̃ ʉ̃rʉ bia ũrĩna ẽ baera, maʉ̃ba jarakĩrãbʉ ẽ neẽãta. Bari jaraita naʉ̃ta krĩchara, dayirãba kʼawua ẽ baera enerjiaba bombiyo sãwũã pʉreabibʉta, maʉ̃ba jarakĩrãbʉ ẽ enerjia neẽãta. Abarika dayirãba biʼia ũrĩna ẽ mina sãwũã Jeowara ewari jõmaʉ̃nẽbʉta, naʉ̃ba jarakĩrãbʉ ẽ Jeowara ewari jõmaʉ̃nẽ babe ẽãta. Dayirãba bia ũrĩ ẽ kʼarea Jeowara kʼãrẽa ewari jõmaʉ̃nẽbʉta, maʉ̃ba Daizezeba obʉra ariya piki erba ẽ, iyara wuabʉrʉ owãñi (Rom. 11:33-36). Jeowara bakikibari nekʼãrẽ jõma parãi nãã. Bari jaraita, ũmadaʉ parãi nãã, chĩdau parãi nãã. Daizeze Bedʼeabara jarabʉ naʉ̃ drʉara Jeowa jaure zareaba parãsita akʉza iyira bʉta bajã parãi nãã (Jer. 51:15; Hech. 17:24). Adewara dayirãbara, ¿kʼãrẽ kʼãrẽa ĩjãseabʉ ewari jõmaʉ̃nẽ bʼaita?

JEOWABARA PARÃSI EWARI JÕMAɄ̃NẼ PANAMARẼÃ

5. ¿Kʼãrẽ nebiata berabarita jʉ̃ãseabasi Adán Evaʉ̃mebara?

⁵ Jeowaba nekʼãrẽ jõma odara parãsi beimarẽã, awuarabʉrʉ ẽbẽrarãtrʉ parãsi bei ba ẽ marẽã. Jeowaba Adánʼa jarasi: «Mamina, neta nebia nemitia kʼawuabibʉra, maʉ̃ra kʼobe ẽã asi, maʉ̃ kʼobʉrʉ ewaridera beibaribaya asi» (Gén. 2:17). Adán Evaʉ̃meba ũrĩsidabʉrʉ Jeowaba zokʼabʉta bei ẽ bakasi, Jeowabara ewari abaʉde iduaribikasibaibara bakuru bebʉdebemata ãya komarẽã, maʉ̃ ewaride ãya maʉ̃ netata kosibʉrʉ ãyira ewari jõmaʉ̃nẽ panakasib (Gén. 3:22).

6, 7. (1) Adewara, ¿kʼãrẽba ũdubibʉ Jeowabara parã ẽ basita ẽbẽrarã beimarẽã? (2) ¿Ẽjũã biadera kʼãrẽta oita krĩchabʉ? (Akʉra potorata).

⁶ Sientipikorabara jarabʉ, dayi buru morrobara nekʼãrẽ mejãcha kʼawuaseabʉta. Poaga 2010de karta siensia ʉ̃rʉ bedʼeabʉba jarasi dayi buru morrobara nekʼãrẽ mejãcha wuagaseabʉta. Bari jaraita, dayirãba telebisorta 300 poagabayeda akʉra, maʉ̃ra jõma dayi buru morrode wuagaseabʉta akʉza maʉ̃ audre wueta eda wuagaseabʉta. Naʉ̃ yizaba ũdubibʉ Jeowabara parãsita dayi buru morrora dayi 70 mawũã ẽ bʉrʉ 80 poagabʉde wueta eda wuagamarẽã (Sal. 90:10).

⁷ Adewara Jeowabara parãsi ẽbẽrarã ewari jõmaʉ̃nẽ bʼaita krĩchapanamarẽã akʉza Daizeze Bedʼeaba jarabʉ ẽbẽra sode bʉesita «ewari jõmaʉ̃nẽ bakĩrãnamarẽã» (Ecl. 3:11). Maʉ̃ba beibʉra dayirã nejʉra kĩrãkʼa akʉpanʉ (1 Cor. 15:26). ¿Dayirã kayabʉrʉdera bari kʼãrẽ oẽã jʉ̃ãpanʉka beiyeda? Mawũã ẽ, wãpanʉ medikoeda, mawũã ẽ bʉrʉ dopanʉ remediota biaita. Maʉ̃ kʼarea dayirãba oseabʉta jõma obʉ bei ẽ baita, adewara dayirã mebẽrã zõrãrãta mawũã ẽ bʉrʉ warrarata beira maʉ̃ra dayirãitara pʉ (Juan 11:32, 33). Dayirãra ewari jõmaʉ̃nẽ bʼaita krĩchaseapanʉ akʉza ewari jõmaʉ̃nẽ nekʼãrẽ kʼawuaseapanʉ, Daizezeba parãsi baera dayirãra ewari jõmaʉ̃nẽ panamarẽã. Aranʉ Jeowaba naʉ̃ra wãrĩnu aripe berabaribiyi, mamina nekʼãrẽ bio obʉ dayirãba ĩjãnaita ewari jõmaʉ̃nẽ bʼai ʉ̃rʉ. Atia akʉdayi Jeowaba naena kʼãrẽ odata akʉza idi ewade kʼãrẽ obʉta, mawũã ũdubita iya oita krĩchabʉra awuara krĩcha ẽãta.

JEOWABA OITA KRĨCHABɄRA AWUARA KRĨCHA Ẽ

8. ¿Kʼãrẽta jaradiabʉ Isaías 55:11dera, Jeowaba dayirãita oita krĩchabʉ ʉ̃rʉ?

⁸ Adán Evaʉ̃meba nemitia osidamina akʉza maʉ̃ kʼarea iyideba zebʉra beipanʉmina, Jeowaba oita krĩchabʉra awuara krĩcha ẽ (akʉra Isaías 55:11). Jeowabara kãgabʉ iyiʉ̃me kʼẽrẽpabʉra ewari jõmaʉ̃nẽ panamarẽã, maʉ̃ta jarapanʉ dayirãba akʉpanʉ baera iya kʼãrẽta jara zebʉrʉta akʉza ozebʉrʉta mawũã iya krĩchabʉta aripe berabarimarẽã.

9. ¿Kʼãrẽ nebiata diaya abʉ Jeowabara? (Daniel 12:2, 13).

⁹ Jeowabara jarasi ẽbẽra beidara jẽda piradrʉbita, mawũã ewari jõmaʉ̃nẽ panamarẽã (Hech. 24:15; Tito 1:1, 2). Jobʼbara kʼawuabasi Jeowabara jẽda piradrʉbikĩrãbʉta ẽbẽrarã beidara (Job 14:14, 15). Propeta Danielbida kʼawuabasi Jeowaba ẽbẽrarã jẽda piradrʉbita wua bei ẽ baita (Sal. 37:29; akʉra Daniel 12:2, 13). Adewara judiora Jesu ewaridebemarabida ĩjãpanasi Jeowabara iyi ode kʼẽrẽpabʉra ewari jõmaʉ̃nẽ babiseabʉta (Luc. 10:25; 18:18). Jesura badua bedʼeabasi naʉ̃ nebia ʉ̃rʉ akʉza iyisida Jeowaba jẽda piradrʉbisi (Mat. 19:29; 22:31, 32; Luc. 18:30; Juan 11:25).

10. ¿Kʼãrẽta ũdubibʉ ẽbẽrarã naena beida jẽda piradrʉdabara? (Akʉra potota).

¹⁰ Jeowaba diabʉ bebʉra, maʉ̃ba iyira zareabarabʉ ẽbẽrarã beida jẽda piradrʉbita. Maʉ̃ba iya zarea diasi propeta Eliásʼa pẽdra Sareptadebema wauta jẽda piradrʉbimarẽã (1 Rey. 17:21-23). Tẽã juneane propeta Eliseobida Daizeze jaure zareaba jẽda piradrʉbisi sunamita wauta (2 Rey. 4:18-20, 34-37). Naʉ̃ba ũdubibʉ Jeowara zarea barabʉta ẽbẽra beida jẽda piradrʉbita. Jesu nama egoroeda zesidebida ũdubisi Jeowaba iyaʼa diasita maʉ̃ zareata (Juan 11:23-25, 43, 44). Atiara Jesura ʉ̃tʉbʉ akʉza Jeowaba jõma iya zokʼamarẽã diasi «ʉ̃tre nʉmʉta druadʼe nʉmʉta». Mawũã Jesubara jõma aripe berabaribiyi ẽbẽrarã beida jẽda piradrʉi ʉ̃rʉ jarabʉra, mawũã wua bei ẽ marẽã (Mat. 28:18; Juan 5:25-29).

11. ¿Sãwũã Jesu beidadeba kʼarebabʉ dayirã ewari jõmaʉ̃nẽ bʼaita?

¹¹ ¿Jeowabara kʼãrẽ kʼarea iduaribisi yi warra zʉbʉria oda kʼãrãpe beadamarẽã? Jesuba jarasi: «Daizezebara ẽbẽrarã mejãcha kãgabʉ baera diasi yi Warra aba bʉta iyidebema ĩjãbʉra bei ẽ bamarẽã, awuarabʉrʉ ewari jõmaʉ̃nẽ bʼaita» (Juan 3:16). Mawũã Jesu dayirã kʼarea beibʉrʉba, kʼarebasi dayirãba ewari jõmaʉ̃nẽ bʼaita jʉ̃ãnamarẽã (Mat. 20:28). Apostol Pablobara bʉsi Jeowaba kʼãrẽ oita krĩchabʉ ʉ̃rʉ jaraside: «Beira yumakẽrã abaʉdeba zeda kĩrãkʼa, ẽbẽra beidara jẽda piradrʉira zeyi yumakẽrã abaʉdeba. Kʼãwũã, Adánʼneba ẽbẽra jõma beinʉmʉ kĩrãkʼa, mawũã abarika Kristodeba jõmaʉ̃ba erpanañi ewari jõmaʉ̃nẽ panaita» (1 Cor. 15:21, 22).

12. ¿Sãwũã kʼarebayi Daizeze Nokʼobara Jeowaba dayirãita oita krĩchabʉra aripe berabarimarẽã?

¹² Jesuba jaradiasi iyi kʼaidubemara yiwidʼipanamarẽã Daizeze Nokʼota zemarẽã akʉza Daizezeba krĩchabʉta omarẽã naʉ̃ drʉade (Mat. 6:9, 10). Jeowaba krĩchabʉ dayirã ẽbẽrarã nama egorode ewari jõmaʉ̃nẽ panamarẽã. Mawũã oita iya jidasi Jesuta iyi Nokʼota zokʼamarẽã, Jeowabara jʉrʉ zebʉrʉ ẽbẽrarã 144.000rata nama egorodebemata, maʉ̃raba Jesuʉ̃meba zokʼadamarẽã. Mawũã Jeowaba oita krĩchabʉta aripe berabaribidamarẽã (Apoc. 5:9, 10).

13. ¿Kʼãrẽta onʉmʉ Jeowabara idi ewaridera akʉza kʼãrẽta oibara dayirãbara?

¹³ Jeowabara ẽbẽrarã mejãchaʉta ãba jʉrenʉmʉ adewara jaradiabʉ odamarẽã iyi Nokʼoba zokʼabʉde (Apoc. 7:9, 10; Sant. 2:8). Idi ewadera ẽbẽrarãra ãyirainʉ yi jʉrapanʉ akʉza yõpanʉ, mamina Daizeze pʉwʉrʉde edabʉra zarea opanʉ maʉ̃ jʉrabʉ ãĩ bʉedaita akʉza ãya obʉba ũdubibʉ ‹kuchora pala babita› (Miq. 4:3). Ãyira yõnera eda wã ẽ, awuarabʉrʉ jaradiapanʉ sãwũã bia bʼaita Daizeze ʉ̃rʉ wãrĩnuta jaradiapanʉne akʉza Daizezeba kʼãrẽ oita krĩchabʉ ʉ̃rʉ jaradiapanʉne (1 Tim. 6:19). Edaʉde ãyi mebẽrãra ãyi ʉ̃rʉ baseabʉ mawũã ẽ bʉrʉ Daizeze Nokʼoarebʉ kʼarea bedʼea zromata ũduseabʉ plata neẽãne, mamina Daizezebara diayi ãya nekʼãrẽ nesidabʉra (Mat. 6:25, 30-33; Luc. 18:29, 30). Naʉ̃ba ũdubibʉ Jeowa Nokʼora wãrĩnubʉta akʉza Jeowaba oita krĩchabʉra aripe berabari wãita.

ARANɄ NEBIATA ŨDUDAYI

14, 15. ¿Sãwũã aripe berabaribiyi Jeowabara beibʉ wua neẽ baya abʉra?

¹⁴ Jesubara ʉ̃tʉ zokʼanʉmʉ Daizeze Nokʼota akʉza aranʉ jõma aripe berabaribiyi Jeowaba jaradata (2 Cor. 1:20). 1914deba, Jesubara iyi nejʉrarata iyi juwa edre baebi zebʉrʉ (Sal. 110:1, 2). Aranʉ Jesubara 144.000bawaraʉba jõma makenañi ẽbẽra kayiruara naʉ̃ drʉadebʉta (Apoc. 6:2).

¹⁵ Jesuba mil poagabayeda zokʼabʉrʉdera jẽda piradrʉbiyi ẽbẽrarã beidara akʉza Daizezeba zokʼabʉta ũrĩbʉra kʼarebayi, ãya nemitia oka bʼaita akʉza ãyi kakua neneẽã erbamarẽã. Mil poaga berabarida tẽã Jeowaba kʼawuabʉrʉde kʼaira ẽbẽrata kʼẽrẽpapanʉta, maʉ̃rãra «panañi egorode, ãyira ewari jõmaʉ̃nẽ jipa neneẽã panañi» (Sal. 37:10, 11, 29). Akʉza dayirã nejʉrara «beibʉra wuara neẽbayi jipa jõbiyi» (1 Cor. 15:26).

16. ¿Dayirãra kʼãrẽ kʼarea Jeowaʉ̃me kʼẽrẽpa bʼaibara?

¹⁶ Dayirãba kʼawuasida naʉ̃ artikulode dayirã ewari jõmaʉ̃nẽ bʼaita jʉ̃ãpanʉra wãrĩnu berabarita Daizeze Bedʼeaba jarabʉ baera. Naʉ̃ nebia jʉ̃ãpanʉbara kʼarebaseabʉ dayirãba awuantadamarẽã idi ewade bedʼea zroma ũdupanʉta, mamina dayirãba Jeowaʼa sobiabira bari maʉ̃ nebia jʉ̃ãpanʉ kʼarea kʼẽrẽpa ba ẽ baibara, awuarabʉrʉ dayirãra kʼẽrẽpabaibara wãrĩnu Jeowata Jesuʉ̃me kãgapanʉ baera (2 Cor. 5:14, 15). Naʉ̃ba kʼarebabʉ ãyide kĩrãkʼa oita akʉza wuabemara jaradiaita ãya kʼãrẽ nebia weya abʉ ʉ̃rʉ (Rom. 10:13-15). Dayirãba nekʼãrẽta soiduba diapanʉbʉrʉ Jeowara dayirã neũdukʼawuabayi (Heb. 13:16).

17. ¿Dayirã aba abakaʉba kʼãrẽta oibara? (Mateo 7:13, 14).

¹⁷ ¿Bʉra ewari jõmaʉ̃nẽ bakĩrãbʉka? Jeowabara jarabʉ dayirã diaita ewari jõmaʉ̃nẽ bʼaita. Mamina maʉ̃itara jidaibara dayirã ewari jõmaʉ̃nẽ bʼai ota (akʉra Mateo 7:13, 14). ¿Sãwũã panai ewari jõmaʉ̃nẽ panʉnera? Maʉ̃ra panʉnañi wuarebema artikulode.