¿Kʼãrẽta jaradiabʉ Daizeze Bedʼeabara iyi parãna ʉ̃rʉra?

1. ¿Kʼãrẽa biga diapanʉ Jeowaʼa Daizeze Bedʼea kʼarea?

JEOWAʼA biga diapanʉ iya Daizeze Bedʼeata dayirã diasi baera. Naʉ̃ba dayirã ũrãgʼa biata diabʉ, mawũã bedʼea zroma zebʉrʉde awuantadamarẽã, adewara dayirã nebiata jʉ̃ãbibʉ akʉza Daizeze Bedʼeadeba Jeowabara jaradiabʉ iyira sãwũãbʉta. Dayirãba bia krĩchabʉdade Jeowaba kʼãrẽ nebia erbʉ ʉ̃rʉ, naʉ̃ba kʼarebabʉ audre kãgaita akʉza jʉrʉita iyi neũdukʼawua bʼaita (Sal. 25:14).

2. ¿Kʼãrẽneba Jeowabara jaradia zebʉrʉ iyi sãwũãbʉ ʉ̃rʉra?

² Jeowabara kãgabʉ iyita ũdukʼawuadamarẽã. Nããrãra Jeowara bedʼeabasi ʉ̃kʉrʉ iyi pʉwʉrʉdebemara kʼãĩmokãrãdeba, nekʼãrẽ ũdubibʉdeba akʉza angeleraneba (Núm. 12:6; Hech. 10:3, 4). Mamina sama estudiaita neẽbakasi naʉ̃ kʼãĩmokãrãda ʉ̃rʉ, nekʼãrẽ ũdubida ʉ̃rʉ akʉza angeleraba kʼãrẽ bedʼea jarada ʉ̃rʉ, Daizeze Bedʼeade eda bʉba ẽ basibʉrʉ, maʉ̃ kʼarea Jeowabara yumakẽrãra bʉbisi dayirãba kʼawuadamarẽã (Jer. 30:2). Daizezeba obʉra jõma aripebʉ baera, dayirãbara ĩjãseabʉ iya dayirã diadara iyiʉ̃me bedʼeamarẽã aripebʉta akʉza dayirã kʼarebaseabʉta (Sal. 18:30).

3. ¿Kʼãrẽta osi Jeowabara iyi Bedʼea idibasidu bamarẽã? (Isaías 40:8).

³ (Akʉra Isaías 40:8). Daizeze Bedʼeabara ẽbẽrarã ũrãgʼa bia dia zebʉrʉta poaga bio ba. ¿Sãwũã mawũã ozebʉrʉ? Nããrãra Daizeze Bedʼeara bʉsida nedʉwʉrʉ e ʉ̃rʉ (pergamino) akʉza royo ʉ̃rʉ, mamina tẽã maʉ̃ra jõsi, maʉ̃ kʼarea dayirãbara idi ewadera erpanʉ ẽ Daizeze Bedʼea nããra bʉdapeadara. Mamina Jeowaba osi ẽbẽrarãba maʉ̃nebema kopiata odamarẽã, yi kopia opananara nemitia omiabasimina jʉra kʼawua osida jõma aripe bʉdaita. Ẽbẽra Daizeze Bedʼea ʉ̃rʉ estudiabʉba jarasi: «Neẽ wua awuru librora naʉ̃ kĩrãkʼa jõma aripebʉ bʉra». Daizeze Bedʼea bʉdapeada kikibarimina, yi nekʼãrẽ maʉ̃ ʉ̃rʉ bʉdapeada jõsimina akʉza yi ẽbẽra bʉdapeadara nemitia omiabasimina, Daizeze Bedʼeabara jõma aripe jarabʉ Jeowaba krĩchabʉra.

4. ¿Kʼãrẽta kʼawuadai naʉ̃ artikulodera?

⁴ «Jõma kʼãrẽ biara akʉza jõma nekʼãrẽ aripebʉra» Jeowadeba zebʉ (Sant. 1:17). Nekʼãrẽ bia Daizeze Jeowaba dayirã diadara Daizeze Bedʼea. Ẽbẽra abaʉba dayirã nekʼãrẽ bia diabʉrʉdera naʉ̃ba ũdubibʉ iya dayirã bia ũdukʼawuabʉta akʉza kʼawuabʉta dayirãba kʼãrẽta nesidabʉta. Abarika Jeowaba dayirã iyi bedʼeata diasi baera naʉ̃ba ũdubibʉ dayirã ũdukʼawuabʉta akʉza krĩchabʉta dayirã ʉ̃rʉ. Naʉ̃ artikulode kʼawuadayi sãwũã Daizeze Bedʼeaba ũdubibʉta Jeowara buru biata, aripe obʉta akʉza kãga ũdubibʉta. Nããra kʼawuadayi sãwũã Daizeze Bedʼeaba ũdubibʉta Jeowara buru biata.

DAIZEZE BEDʼEABARA ŨDUBIBɄ JEOWARA BURU BIATA

5. ¿Sãwũã ũdubibʉ Daizeze Bedʼeabara Jeowara buru biata?

⁵ Jeowabara kʼawuabʉ dayirãbara nesidabʉta ũrãgʼa biata, maʉ̃ ũrãgʼara Daizeze Bedʼeade edabʉ, adewara Daizeze Bedʼeabara ẽbẽra mejãchaʉta kʼareba zebʉrʉ akʉza Daizeze Bedʼeabara ẽbẽra bebʉra awuara babiseabʉ. Nããbema libro Daizeze Bedʼeade edabʉta nããra bʉside, Moisésba jarasi Daizeze pʉwʉrʉ israelitaraʼa: «Maʉ̃ra bari bedʼeabʉ ẽ maraita, awuarabʉrʉ bebʉta diabʉ» (Deut. 32:47). Ẽbẽrarã Daizeze Bedʼeaba jarabʉ ũrĩpanʉra sobia baseapanasi (Sal. 1:2, 3). Daizeze Bedʼea bʉdapeadata kikibarimina kʼarebaseabʉ ẽbẽra bebʉ awuara bamarẽã. Bari jaraita jw.org de «Daizeze Bedʼeabara awuara babibʉ», maʉ̃ne ũduseabʉ nebʉra 50 audre, sãwũã Daizeze Bedʼeaba ẽbẽra bebʉra awuara babisita akʉza ãyira sãwũã bia wãsita Daizeze Bedʼeaba jarabʉta osida baera (1 Tes. 2:13).

6. ¿Kʼãrẽa jarapanʉ neẽãta libro Daizeze Bedʼea kĩrãkʼabʉra?

⁶ Neẽ libro Daizeze Bedʼea kĩrãkʼabʉra, ¿kʼãrẽa? Jeowaba parãsi baera, iyara jõma oseabʉ, ewari jõmaʉ̃nẽbʉ akʉza buru bia. Ẽbẽra mejãchaʉba bʉbʉ librota mamina maʉ̃ba jarabʉra tẽã bʼaira zeri ẽ, mamina Daizeze Bedʼeaba ũrãgʼara diabʉbara ewari jõmaʉ̃nẽ kʼarebabʉ. Daizeze Bedʼearadebemabara biode kʼareba zebʉrʉ ẽbẽrarãta. Dayirãba ledara Daizeze Bedʼeata akʉza maʉ̃ ʉ̃rʉ krĩchapanʉbʉrʉ, Daizezeba kʼarebayi iyi jaure zareadeba dayirãba odamarẽã Daizeze Bedʼeaba jarabʉta (Sal. 119:27; Mal. 3:16; Heb. 4:12). Daizezeba kʼarebakĩrãbʉ dayirãra, maʉ̃ kʼarea badua le bʼaibara Daizeze Bedʼeata.

7. ¿Sãwũã ãba zebisi Daizeze Bedʼeabara Daizeze pʉwʉrʉ nããbemara?

⁷ Daizeze Bedʼeaba kʼarebabʉ Jeowa pʉwʉrʉra ãba bamarẽã, naʉ̃ba ũdubibʉ Jeowara buru biata. Israelitara Jeowaba drʉa diaya adama jʉ̃ẽsidadera, ãyi aba abaka panasi ãya drʉa diadapeadade. Ʉ̃kʉrʉra trajapanasi beda wuaide, paka akʉide akʉza ne uide, maʉ̃ba ʉ̃kʉrʉ israelitara jĩgabadara ãyirainʉ yi kʼarebadaita akʉza maʉ̃ ʉ̃rʉ krĩchadaita aduaseapanasi. Mamina maʉ̃ta mawũã berabari ẽ marẽã Jeowabara jarasi israelitara, poagade bio ãba yi jʉremarẽã iyi bedʼea ũrĩta akʉza wuabemara jara ũrĩbita iyi bedʼeata (Deut. 31:10-13; Neh. 8:2, 8, 18). Krĩchara kʼãrẽaba sobiabasita israelita abaʉta iyi Jerusalénma jʉ̃ẽbʉrʉde ũdubʉrʉde israelitara mejãchabʉta Jeowaʼa yiwidʼita. Jeowabara mawũã kʼarebasi iyi pʉwʉrʉra ãba panamarẽã. Tẽã kongregasion kristiana babʉrʉdera maʉ̃nera edabasi yumakẽrãrata, yuwẽrãrata, plata barabʉrata, plata neẽãrata, bedʼea awuara bedʼeabʉrata. Mamina naʉ̃raba Daizeze Bedʼeata kãgapanasi baera Daizeze Jeowa ãba yiwidʼipanasi. Ẽbẽra Daizeze kongregasion nãã zebʉbara Daizeze Bedʼeara audre bia ũrĩseabasi mebẽrãbawara ãba yi jʉrebʉdeba akʉza mebẽrã kʼarebadeba (Hech. 2:42; 8:30, 31).

8. ¿Sãwũã Daizeze Bedʼeabara Jeowa pʉwʉrʉra ãba babibʉ idi ewadera?

⁸ Jeowabara idibasidu iyi Bedʼeadeba iyi pʉwʉrʉra ãba zebibʉ, Daizeze Bedʼeadera jõma bʉchu Jeowa ʉ̃rʉ, dayirãba iyi ʉ̃rʉ kʼawuaibarata. Dayirãra ãba yi jʉrepanʉ semanaza kongregasione akʉza asamblea opanʉ, Daizeze Bedʼea leita akʉza ũrĩta maʉ̃ba kʼãrẽta jarakĩrãbʉta. Jeowabara zokʼabʉ iyi Bedʼeata iyi pʉwʉrʉ «ãba iyi ode bamarẽã» (Sof. 3:9).

9. ¿Kʼãrẽ nebiata oũdubibara Daizeze Bedʼea ũrĩra? (Lucas 10:21).

⁹ Akʉra Daizezera kʼãrẽa buru biata. Daizezebara iyi krĩcha biara bʉbisi iyi Bedʼeade, mawũã eda krĩchapanʉrabʉrʉ ũrĩ kʼawuadamarẽã (akʉra Lucas 10:21). Ẽbẽra abaʉba jarasi: «Daizeze Bedʼeara audre jʉra kʼawua akʉpanʉ akʉza audre lepanʉ wuabemara libroraira». Mamina yi eda krĩchapanʉbʉrʉ ũrĩpanʉ mama eda kʼãrẽta jarakĩrãbʉta akʉza oũdubipanʉ (2 Cor. 3:15, 16).

10. Adewara Daizeze Bedʼeabara, ¿sãwũã ũdubibʉ Jeowara buru biata?

¹⁰ Akʉza bari jaradiabʉ ẽ iyi pʉwʉrʉ jõma. Awuarabʉrʉ jaradiabʉ akʉza so zarea diabʉ aba abakaʉʼa, maʉ̃ba ũdubibʉ Jeowara buru biata. Dayirãba Daizeze Bedʼea lebʉrʉde ũdupanʉ Jeowabara dayirã aba abaka krĩchabʉta (Is. 30:21). Bʉa bedʼea zroma erbʉdera, ¿ũdubarika Daizeze Bedʼeade ũrãgʼa bʉa nesidabadata? Daizeze Bedʼeara ẽbẽra jõmaita bʉsida mamina, ¿sãwũã idibasidu Daizeze Bedʼeabara ũrãgʼa biata erbʉ akʉza bʉsida sãwũã kʼarebabʉ? Daizeze Bedʼea parãnara audre buru bia baera jõmaraira (2 Tim. 3:16, 17).

DAIZEZE BEDʼEABARA ŨDUDIBɄ JEOWABARA JÕMA ARIPE OBɄTA

11. ¿Sãwũã ũdubisi Jeowabara jõmaʉ̃ta daucha akʉbʉta Daizeze Bedʼea bʉbiside?

¹¹ Aripe oira Jeowaba nebia erbʉdebema (Deut. 32:4). Jeowaba jõma aripe obʉ baera jõmaʉ̃ta daucha akʉbʉ (Hech. 10:34, 35; Rom. 2:11). Jeowabara jõmaʉ̃ta daucha akʉbʉta ũdubisi iduaribiside Daizeze Bedʼea bʉdamarẽã ẽbẽrarã maʉ̃ ewaride bedʼea panana bedʼeade. Daizeze Bedʼeade nããra 39 librobʉra ebreo bedʼeade bʉsida, Daizeze pʉwʉrʉra maʉ̃ ewaridera bedʼeabasi baera maʉ̃ bedʼeade. Yi nããrabema siglodera kristianorãra bedʼeabasi griego bedʼeade, maʉ̃ kʼarea Daizeze Bedʼeade yi jõbodoare 27 librobʉra, mejãchaʉta bʉsida griego bedʼeade. Jeowabara iduaribi ẽ basi Daizeze Bedʼeara bedʼea abapaide bʉdamarẽã. Idi ewadera 8 mil millones ẽbẽrarã bedʼea awuara awuaraka bedʼeapanʉ. ¿Ãyara sãwũã ũdukʼawuaseapanʉ Jeowa ʉ̃rʉra?

12. Daniel 12:4ba jarabʉra idi ewaridera, ¿sãwũã aripe berabari zebʉrʉ?

¹² Jeowabara Danieldeba jarasi naʉ̃ ewari jõbodoarera ẽbẽrarã mejãchaʉba ũdukʼawuadaita Daizezera akʉza kʼawuadaita kʼãrẽta jaradiakĩrãbʉta Daizeze Bedʼeaba (akʉra Daniel 12:4). Ẽbẽra mejãchaʉba Jeowa ʉ̃rʉ kʼawua zebʉda Daizeze Bedʼeara tradusipanʉ baera, ʉ̃tʉ zebipanʉ baera akʉza dedekapanʉ baera. Maʉ̃ daucha kartara Daizeze Bedʼeadeba jaradia bʉsida ʉ̃tʉ zebipanʉ baera akʉza dedekapanʉ baera. Daizeze Bedʼeara mejãcha tradusibʉda wuabema libroraira akʉza ẽbẽrarã mejãcha dedekabʉda. Empresaraba Daizeze Bedʼea nedobʉra mejãcha balebʉ, mamina Jeowa ʉ̃rʉ Kʼawuabipanʉrãbara Daizeze Bedʼeade ʉ̃kʉrʉ librorata tradusibʉ, mawũã ẽ bʉrʉ Daizeze Bedʼeata jõma tradusibʉ 240 bedʼea awuara awuaraka audre akʉza badu ẽbẽraba erbaseabʉ Daizeze Bedʼeara, maʉ̃ barira plata widida ẽ, maʉ̃ kʼarea ẽbẽrarã pʉwʉrʉ jõmaʉ̃debemaba ũrĩpanʉ Daizeze Bedʼeara Daizeze ewari zei nãã (Mat. 24:14). Jeowabara jõma aripe obʉ baera kãgabʉ ẽbẽrarã jõmaʉ̃ba iyi ʉ̃rʉ ũdukʼawuamarẽã Daizeze Bedʼeadeba, mawũã ũdubibʉ iyara dayirãra mejãcha kãgabʉta.

DAIZEZE BEDʼEABARA ŨDUBIBɄ JEOWABARA DAYIRÃRA KÃGABɄTA

13. ¿Kʼãrẽa jaraseapanʉ Daizeze Bedʼeabara ũdubibʉta Jeowa kãgata? (Juan 21:25).

¹³ Daizeze Bedʼeaba ũdubibʉ Jeowaba nebia erbʉdebemara audre yibiata kãgata (1 Juan 4:8). Jeowaba jidasi iyi Bedʼeade kʼãrẽta eda bʉdaita. Iyara bʉbisi kʼawuaita kʼãrẽta oibarata dayirãra iyi neũdukʼawua bʼaita akʉza kʼãrẽta oibarata idi ewade sobia bʼaita akʉza ewari jõmaʉ̃nẽ bʼaita. Jeowaba dayirã mejãcha kãgabʉ baera jaradiasi dayirãba nesidabʉ awapai, mawũã iya kãgabʉde panamarẽã (akʉra Juan 21:25).

14. ¿Adewara Daizeze Bedʼeade edabʉba, sãwũã ũdubibʉ Jeowaba dayirã kãgabʉta?

¹⁴ Jeowaba dayirã kãgabʉta ũdubisi iyi Bedʼeadeba dayirã sãwũã bedʼeabʉdeba. Jeowabara Daizeze Bedʼeadera aukʼara bʉ amae ẽ basi dayirãba kʼãrẽta oibara ʉ̃rʉ akʉza kʼãrẽta obe ẽ ʉ̃rʉ, awuarabʉrʉ dayirã krĩchabibʉ nebʉra Daizeze Bedʼeade edabʉdeba, propesiadeba akʉza dayirã ũrãgʼa bia diabʉdeba. Mawũã dayirãbara Daizeze Bedʼeara audre kãgadayi akʉza soiduba ũrĩnañi Jeowaba jarabʉra.

15. (1) ¿Sãwũã ũdubibʉ Jeowabara ẽbẽrarã iyi Bedʼea lepanʉ ʉ̃rʉ krĩchabʉta? (2) ¿Potodera kʼãrẽ nebʉra Daizeze Bedʼeadebema ʉ̃rʉ krĩchabʉ wũãwũã zakeba, kʉ̃rã abaʉba akʉza ẽbẽra wẽrãba? (Gén. 39:1, 10-12; 2 Rey. 5:1-3; Luc. 2:25-38).

¹⁵ Daizeze Bedʼeabara ũdubibʉ Jeowabara dayirã ʉ̃rʉ krĩchabʉta, iya iduaribisi baera Daizeze Bedʼeade eda bʉmarẽã ẽbẽrarã sãwũã sentibada ʉ̃rʉ. Dayirãbara kʼawuaseabʉ Daizeze Bedʼea bʉdapeadara sãwũãbasita, ãyisida dayirã kĩrãkʼa krĩchabasi baera akʉza sentipanasi baera (Sant. 5:17). Dayirãba kʼawuabʉrʉde Jeowaba ẽbẽrarã dayirã kĩrãkʼabʉta sãwũã edadata, naʉ̃ba kʼawuabibʉ «Jeowaba so borekea akʉbʉta akʉza so zʉbʉria akʉbʉta» (Sant. 5:11).

16. Daizeze Bedʼeadera jarabʉ ẽbẽrarã nemitia oda ʉ̃rʉ, ãya maʉ̃ta jipa jẽda krĩchasi baera Jeowabara kĩrãduasita naʉ̃ba, ¿kʼãrẽta jaradiabʉ Jeowa ʉ̃rʉ? (Isaías 55:7).

¹⁶ Daizeze Bedʼeabara ũdubibʉ Jeowabara dayirãra kãgabʉta daya nemitia obʉrʉde zeri ẽ kĩrãkʼa akʉ ẽãne. Israelitarabara badua nemitiata osida Jeowa nãã, mamina ãya maʉ̃ta soiduba jẽda krĩchasidadera Jeowabara jõma kĩrãduasi ãya odara (akʉra Isaías 55:7). Kristianora nããbema siglodebemabida kʼawuabasi Jeowabara kãga ũdubibʉta, Pablobara bʉsi ẽbẽra kongregasion Corintodebema abaʉba nemitia oda ʉ̃rʉ, mamina iya maʉ̃ta jẽda krĩchasi baera jarasi wuabema mebẽrã iya odata jipa kĩrãduadamarẽã akʉza maʉ̃ʼa so zarea diadamarẽã (2 Cor. 2:6, 7; 1 Cor. 5:1-5). Naʉ̃ba ũdubibʉ Jeowabara zeri ẽ kĩrãkʼa akʉ ẽãta iyi odebʉra iya nemitia oda kʼarea, awuarabʉrʉ ũrãgʼa diabʉ akʉza jarabʉ jẽda iyi neũdukʼawua bamarẽã, mawũẽra ẽbẽra abaʉba nemitia osibʉrʉ, mamina iya maʉ̃ta jẽda krĩchasibʉrʉ Jeowabara iya odara jipa kĩrãduayi (Sant. 4:8-10).

BIʼIA AKɄRA DAIZEZE BEDʼEATA

17. ¿Kʼãrẽa Daizeze Bedʼeara Jeowaba dayirã nekʼãrẽ bia diada?

¹⁷ Jeowabara dayirã nekʼãrẽ biata diasi, maʉ̃ra Daizeze Bedʼea. Dayirãba kʼawuatabeda kĩrãkʼa, Daizeze Bedʼeabara ũdubibʉ Jeowara buru biata, aripe obʉta akʉza kãga ũdubibʉta. Adewara Daizeze Bedʼeabara ũdubibʉ Jeowabara kãgabʉta dayirãba iyita ũdukʼawuadamarẽã akʉza yi neũdukʼawua badamarẽã kãgabʉta.

18. ¿Dayirãbara sãwũã Jeowaʼa biga diabʉta ũdubidai iyi Bedʼea kʼareara?

¹⁸ Dayirãbara Daizeze Bedʼeara akʉ ẽ baibara bari librora kĩrãkʼa (Sant. 1:17). Maʉ̃ kʼarea dayirãbara Jeowaʼa biga diaibara iyi Bedʼea kʼarea. Dayirãbara mawũã biga diabʉta ũdubiyi Daizeze Bedʼea lepe akʉza maʉ̃ ʉ̃rʉ bia krĩchabʉde. Mawũã opanʉbʉrʉ Jeowabara dayirã nebiata diayi akʉza biʼia ũdukʼawuadayi Jeowata (Prov. 2:5).