YI 05
Daizeze Bedʼeabara erbʉ dayirãita Daizeze bedʼeata
Jeowaba nekʼãrẽ biata diasi dayirãʼa: 66 libro Daizeze Bedʼeade edabʉta. Mamina bʉa krĩchaseabʉ: «¿Samaʉ̃ba zesi Daizeze Bedʼeara? ¿Kʼaiba odaba?». Nama widibʉ panʉita, akʉdaya sãwũã zesita Daizeze bedʼeara dayirã ewaridu.
1. Daizeze Bedʼea yumakẽrãba bʉsidabʉrʉ, ¿sãwũã jarapanʉ Daizezeba odata?
Daizeze Bedʼeara yumakẽrã 40 panʉba bʉsida, ãyira pʉwʉrʉ awuarapanasi akʉza nekʼãrẽ awuara opanasi. Bʉ jʉ̃drʉsida poaga 1513 Kristo nãã akʉza maʉ̃ta mabʉsida poaga 98de Kristo tẽã. Maʉ̃ kʼarea Daizeze Bedʼea bʉ jʉ̃drʉdadeba akʉza mabʉyeda berabarisi poaga 1.600 kʼawa. Mawũãsidu, Daizeze Bedʼeara yiya bedʼeachu ẽ. ¿Sãwũã kʼawuapanʉ? Daizezeba osi baera (akʉra 1 Tesalonicenses 2:13). Naʉ̃ra yumakẽrãbara bʉda ẽ basi ãyi krĩchata, awuarabʉrʉ «ẽbẽrarã Daizeze jauredeba bedʼeasida» (2 Pedro 1:21). Naʉ̃ra yumakẽrãbara Daizeze jaure zareadeba bʉsida Daizeze krĩchata (2 Timoteo 3:16).
2. ¿Kʼairaba leseabʉ Daizeze Bedʼeara?
Daizeze Bedʼeara «bedʼea awuarabʉraita akʉza ẽbẽra awuarabʉraita adewara pʉwʉrʉraitabida», naʉ̃raba akʉseabʉ Daizeze Bedʼeaba jarabʉra (akʉra Apocalipsis 14:6). Daizezebara kãgabʉ iyi bedʼea ẽbẽra mejãchaʉba ledamarẽã, maʉ̃ kʼarea bedʼea awuara awuaraka mejãcha tradusibibʉ. Mawũẽra ẽbẽra jõmaʉ̃ba kʼawuaseabʉ Daizeze Bedʼeaba kʼãrẽta jaradiabʉra ãyi bʉmae akʉza ãyi bedʼeade.
3. ¿Kʼãrẽta osi Jeowabara Daizeze Bedʼeata neida oda ẽ marẽã?
Daizeze Bedʼea bʉ jʉ̃drʉsidadera, bʉsida nekʼãrẽ ãrĩseabʉ ʉ̃rʉ. Bʉsida nedʉwʉrʉ e ʉ̃rʉ akʉza papiro ʉ̃rʉ. Mamina Daizeze Bedʼea mejãcha kãgapanʉra ẽbẽrabara maʉ̃neba bio yizata bʉkʉasida. Ãyara ãyi juwaba opanasi akʉza jʉra kʼawua opanasi. Ẽbẽra kayirua mejãchaʉba krĩcha zebʉda Daizeze Bedʼea taʉbita. Mamina ẽbẽra Daizeze Bedʼea kãgabʉba ãyi bebʉidu akʉsida. Jeowaba nekʼãrẽ jõma ozebʉrʉ Daizeze Bedʼea dayirãinu zemarẽã. Daizeze Bedʼeaba jarabʉ: «Daizeze bedʼeara, ewari jõmaʉ̃nẽ baya» (Isaías 40:8).
AUDRE BIʼIA KʼAWUADADRɄ
Audre kʼawuadayi sãwũã Daizezeba iyi Bedʼea ẽbẽrarã bʉbisita akʉza kʼãrẽta osita Daizezeba Daizeze Bedʼea neida oda ẽ marẽã, mawũã ẽbẽra jõmaʉ̃ba erbamarẽã iyi bedʼeara.
4. Daizeze Bedʼeabara jarabʉ kʼaiba odata
Akʉra BIDEOTA. Maʉ̃ tẽã akʉra 2 Timoteo 3:16, mõbe naʉ̃ta panʉidua:
Daizeze Bedʼea yumakẽrãba bʉsidabʉrʉ, ¿kʼãrẽa jarapanʉ Daizeze Bedʼea Daizezedeba zesita?
¿Wãrĩnuka Daizezeba iyi krĩcha ẽbẽrarã bʉbidara?
Nokʼoba jarabʉ iyi nezokʼaʼa kartata bʉmarẽã, aramaʉ̃ta iyi nezokʼabara bʉchu iyi nokʼoba jarabʉta. Abarikabʉ Daizeze Bedʼeata, ẽbẽraba bʉsida Daizeze Bedʼeara, mamina yi krĩchara Daizezede.
5. Daizeze Bedʼea taʉbikĩrãpanasimina neida berabari ẽ basi
Daizeze Bedʼeara Daizezeba osi baera, iya akʉbasi. Mejãcha nokʼoraba krĩchasida Daizeze Bedʼea taʉbidaita akʉza religion nokʼorabida kãga ẽ basi ẽbẽraba Daizeze Bedʼea ledamarẽã, mawũã ẽbẽra Daizeze Bedʼea mejãcha kãgapanʉra, nejʉra mejãcha erbasidu akʉsida Daizeze Bedʼea neida berabari ẽ marẽã. Akʉra yumakẽrã aba Daizeze Bedʼea akʉda ʉ̃rʉ, akʉra BIDEOTA, mõbe naʉ̃ta panʉidua:
Bʉa kʼawuasi Daizeze Bedʼea neida berabari ẽ marẽã nejõma osidata. Maʉ̃ kʼarea, ¿bʉa lekĩrãbʉka? ¿Kʼãrẽa mawũã krĩchabʉ?
Akʉra Salmo 119:97, mõbe naʉ̃ta panʉidua:
¿Kʼãrẽa ẽbẽrabara ãyi bebʉ ũdusidu Daizeze Bedʼea tradusisida akʉza dedekasida?
6. Bʉ libro jõmaʉ̃raita
Daizeze Bedʼeara mejãcha tradusi zebʉda akʉza mejãcha dedeka zebʉda. Akʉra Hechos 10:34, 35, mõbe naʉ̃ta panʉidua:
¿Kʼãrẽa kãgabʉ Daizezebara Daizeze Bedʼeara bedʼea awuara awuaraka tradusidamarẽã akʉza jõmaʉ̃ drʉade dedekadamarẽã?
¿Daizeze Bedʼeadebemara bʉara saʉ̃ta audre kãgabʉ?
Naʉ̃ drʉadera
wiña waebʉ
ẽbẽra jõmaʉ̃ba
Daizeze Bedʼea ãyi bedʼeade leita
Bedʼea awuara awuaraka
3.000
audrebʉ,
jõma mawũã ẽ bʉrʉ wiña
5.000 millones
ʉ̃tʉzebipanʉ Daizeze Bedʼeara,
badu libroraira
Ʉ̃KɄRɄBA KRĨCHAPANɄTA: «Daizeze Bedʼeara kikibari akʉza ẽbẽrarãba bʉsida».
¿Bʉara sãwũã krĩchabʉ?
¿Kʼãrẽba ũdubibʉ Daizeze Bedʼeara Daizezedeba zedata?
KĨRÃBEITA
Daizeze Bedʼeara Daizezedeba zesi baera, iya obʉ ẽbẽra jõmaʉ̃ba erpanamarẽã.
Panʉnadrʉ
¿Daizezeba sãwũã osi Daizeze Bedʼea ẽbẽraba bʉdamarẽã?
Bʉmara, ¿kʼãrẽa Daizeze Bedʼeara neida berabari ẽ basi? ¿Kʼãrẽa Daizeze Bedʼeara mejãchade bedʼea awuara wuaraka erpanʉ?
¿Bʉra sãwũã sentibʉ Daizezeba nejõma osi baera bʉaʼa iyi bedʼea diaita?
JɄRɄDA AUDRE KʼAWUAITA
Kʼawuara Daizeze Bedʼea sãwũã ozebʉdata, Daizeze Bedʼea nããra juwaba bʉda kikibarideba idi Daizeze Bedʼea tradusipanʉinu.
«Daizeze Bedʼea kikibarimina sãwũã erpanʉ idibasidu» (¡Despertad!, noviembre 2007de)
Akʉra sãwũã Daizeze Bedʼea nejʉrara ũbea erbʉdeba ẽdrʉdata.
«Daizeze Bedʼeara. ¿Sãwũã akʉza kʼãrẽneba ẽdrʉzebʉrʉ?» (Jarakabʉ, num. 4, 2016de)
Akʉra ʉ̃kʉrʉ ẽbẽrarã kʼãrẽne zʉbʉriasita Daizeze Bedʼea tradusibʉ kʼarea.
Daizeze Bedʼeara mejãcha tradusi zebʉda. Mamina, ¿sãwũã kʼawuapanʉ Daizeze Bedʼeaba jarabʉra awuara jara ẽãta?