ARTIKULO KʼAWUAITA 15
¿Kʼãrẽta kʼawuaseapanʉ Jesuba miõba okata obadadeba?
«Iyira naʉ̃ drʉade nebia owãsita bebikʉabʉde [...] zʉbʉriabibʉrata» (HECH. 10:38).
TRÃBI 13 Cristo es nuestro modelo
KʼÃRẼTA ŨDUDAITAa
1. Ũrĩbira sãwũã berabarisita Jesuba miõba okata oside.
KRĨCHADAYA poaga 29de Jesuba Daizeze Bedʼea jaradia jʉ̃drʉside. Jesuta akʉza yi papa Maríata, adewara ʉ̃kʉrʉ iyi kʼaidubemarata, trʉ̃sida piesta juwa jidabarabʉma jʉ̃ẽmarẽã Caná drʉade, Nazaretde Jesu warida kʼawa. Maríara yi juwa jidapanʉra neũdukʼawua, iyara ãyita kʼarebanʉmʉ. Maʉ̃ piestadera bedʼea zromata berabarisi, maʉ̃ bedʼea zromaba mejãcha perabiseabʉ yi juwa jidairãra jõdogo baera binora.b ¿Kʼãrẽa mawũã berabarisiba? Baribʉrʉ maʉ̃ ewaride ẽbẽrarãta mejãcha jʉ̃ẽsida baera, aramaʉ̃ta Maríaba Jesuʼa jarasi: «Bino jõdogo» (Juan 2:1-3). Aramaʉ̃ta Jesuba osi miõba odakata, iya baniara bino babisi (Juan 2:9, 10).
2, 3. (1) ¿Sãwũã zokʼasi Jesubara iyi zareara miõba okata obaside? (2) ¿Kʼãrẽ nebiata ũdupanʉ pikãga krĩchapanʉne Jesuba miõba okata obada ʉ̃rʉ?
2 Jesuba adewara mejãcha okʉasi miõba okata iya jaradiabaside.c Iya iyi zareata zokʼasi ẽbẽrarã mejãchaʉta kʼarebakʉaita. Jesuba miõba okata yi ũmeta oside nediasi 5.000 yumakẽrãra, tẽã 4.000. Dayirãba naʉ̃ne jʉachadara wẽrãrata akʉza wũãwũãrata jõmaʉ̃nẽ bakasi 27.000de ʉ̃ta (Mat. 14:15-21; 15:32-38). Akʉza maʉ̃ne Jesubara mejãcha bebikʉasi kayaberãra (Mat. 14:14; 15:30, 31). Krĩchara ẽbẽrarã kʼãrẽaba sobiapanasita Jesuba nediakʉaside akʉza bebikʉaside.
3 Dayirãba nemejãcha kʼawuaseapanʉ Jesuba miõba okata obadadeba. Naʉ̃ artikulode kʼawuadayi naʉ̃ba sãwũã audre ĩjãbiseabʉta, adewara kʼawuadayi Jesuba miõba okata obaside ũdubibasita eda krĩchabʉta akʉza so zʉbʉria akʉbʉta, adewara akʉdayi dayirãba sãwũã ũdubiseabʉta maʉ̃ra nebiata.
KʼAWUAPANɄ JEOWA Ʉ̃RɄ AKɄZA JESU Ʉ̃RɄ
4. ¿Kʼai ʉ̃rʉ audre ĩjãbibʉ Jesuba miõba okata obadadeba?
4 Jesuba miõba okata obadadeba dayirã bari iyi ʉ̃rʉ ĩjãbibʉ ẽ, awuarabʉrʉ akʉza ĩjãbibʉ yi Zeze Jeowa ʉ̃rʉ, iya zarea diasi baera maʉ̃ oita. Hechos 10:38ba jarabʉ: «Daizezeba sãwũã jidasita iyi jaure zareadeba akʉza zareata diasita [Jesuʼa], adewara iyira naʉ̃ drʉade nebia owãsita bebikʉabʉde Diaruba zʉbʉriabibʉrata, Daizezeta iyiʉ̃mebasi baera». Kĩrãbedaya Jesuba nekʼãrẽ obadadeba akʉza sãwũã bedʼeabadadeba ũdubibasita yi Zezeba sãwũã krĩchabadata akʉza sentibadata (Juan 14:9). Kõbebʉrʉ nebia ũbea kʼawuadayi Jesuba miõba okata obadadeba.
5. ¿Kʼãrẽ kʼãrẽa Jesuba miõba okata osi? (Mateo 20:30-34).
5 Nããra, Jesuba yi Zezeʉ̃meba mejãcha kãga dayirãra. Jesu nama egorodebaside, iya ũdubisi ẽbẽrarã kãgabʉta iya iyi zareadeba ẽbẽrarã bebikʉaside. Ewari aba yumakẽrãra dauberrepanʉ ũmeba iyaʼa kʼarebata widisida (akʉra Mateo 20:30-34). Nama akʉpanʉ Jesura «so zʉbʉriape bebikʉasita». Bedʼea «so zʉbʉriape», naʉ̃ bedʼea griegodera jarakĩrãbʉ dayi sode mejãcha so zʉbʉria sentibʉta ẽbẽra zʉbʉriabʉ kʼarebai kʼarea. Jesuba ẽbẽrarã mejãcha kãga baera so zʉbʉriata ũdubisi wuabemara, maʉ̃ kʼarea iya nediasi ẽbẽrarã jarrabʉrata akʉza kʼarebasi ẽbẽra yagaba baribʉta (Mat. 15:32; Mar. 1:41). Jeowabara so zʉbʉriata ũdubibʉ, maʉ̃ kʼarea iyira akʉza Jesuʉ̃me zʉbʉriapanʉ dayirã zʉbʉriabʉrʉdera (Luc. 1:78; 1 Ped. 5:7). Ãya kãgapanʉ idi bedʼea zroma ũdupanʉra jipa jõbidaita.
6. ¿Kʼãrẽta oseabʉ Jesubara yi Zezeba iyaʼa zarea diasi baera?
6 Ũmeta, Daizezeba Jesuʼa zareata diasi bedʼea zroma idi ũdupanʉta ara omarẽã. Jesuba miõba okata odadeba, ũdubisi bedʼea zromara ara oseabʉta daya obe ẽãta. Bari jaraita, zarea barabʉ ẽdrʉbita nemitiadeba, maʉ̃ba kayabibʉ baera akʉza beibibʉ baera (Mat. 9:1-6; Rom. 5:12, 18, 19). Jesuba miõba oka odaba ũdubisi iya bebikʉaseabʉ kayara jõma akʉza beidarãra piradrʉbikʉaseabʉ (Mat. 4:23; Juan 11:43, 44). Akʉza zarea barabʉ taʉbita nãgʉ zromata, adewara ãĩ jʉretaseabʉ angel kayiruara ẽbẽrarãneba (Mar. 4:37-39; Luc. 8:2). Kʼawuabʉrʉde Jeowaba Jesuʼa mejãcha zarea diasita maʉ̃ nebia oita dayirãra aduʼapanʉ.
7, 8. (1) Jesuba miõba oka odadebara, ¿kʼãrẽne ĩjãbibʉ? (2) ¿Saʉ̃ miõba okata ũdukĩrãbʉ ẽjũã bia zebʉrʉdera?
7 Ũbea, dayirãbara wãrĩnu ĩjãseabʉ Daizezeba nebia diaya adara Daizeze Nokʼodeba wãrĩnu weita. Jesu nama egoroeda zeside, iya miõba oka odaba ũdubisi kʼãrẽta oita Daizeze Nokʼo zokʼa jʉ̃drʉbʉrʉdera. Krĩchara kʼãrẽ nebia ũdudaita Jesuba naʉ̃ drʉa zokʼabʉrʉde. Jõmaʉ̃ta zrogapanañi Jesuba kayata akʉza zʉbʉria jõma jõbi baera (Is. 33:24; 35:5, 6; Apoc. 21:3, 4). Wua jarrada ẽ bayi akʉza zʉbʉriada ẽ bayi naʉ̃ drʉa neida berabaribʉ kʼarea (Is. 25:6; Mar. 4:41). Akʉza mejãcha sobiapanañi jẽda ũdui baera mebẽrã beidarãra (Juan 5:28, 29). ¿Saʉ̃ miõba okata ũdukĩrãbʉ ẽjũã bia zebʉrʉdera?
8 Jesuba miõba okata oside ũdubisi eda krĩchabasita akʉza so borekea ũdubisita, audre yibia dayirãba ũdubita maʉ̃ nebiata iyide kĩrãkʼa. Yiza ũme akʉdayi, nããra akʉdayi Caná drʉade juwa jidapanʉ piesta opananata.
KʼAWUAPANɄ SÃWŨÃ EDA BʼAITA KRĨCHAITA
9. ¿Kʼãrẽta osi Jesubara juwa jidapanʉ piestadera? (Juan 2:6-10).
9 (Akʉra Juan 2:6-10). Juwa jidada piestara bino jõsidera Jesubara, ¿bania bino babibarabasika? Nesida ẽ basi. Propesiaraba jara ẽ basi Jesuba maʉ̃ta oibarabasita. Krĩchara naʉ̃ta, bʉta juwa jidanʉmʉne bino jõra bʉta krĩcha zroma obayi maʉ̃ kʼarea, Jesuba mawũã berabaribʉta ũdusi baera so borekea akʉsibaibara, mawũã bania bino babisi, naʉ̃ artikulo jʉ̃drʉside jarada kĩrãkʼa. Jesubara 390 litro baniabadara bino bia babisi, mawũã bino mejãcha diasibaibara juwa jidapanʉraba tẽã erbamarẽã akʉza nedo bʉeda kʼãrãpe plata erpanamarẽã. Maʉ̃ kʼarea yi juwa jidapanʉrãra mejãcha sobiapanasibaibara.
Jesude kĩrãkʼa nebia obʉdade oda ẽ badrʉ wuabemaraba dayitrʉ akʉdamarẽã. (Akʉra parrapo 10 akʉza 11).e
10. ¿Kʼãrẽ nebiata jarabʉ Juan nejʉacha zroma 2dera? (Akʉra potota).
10 Adewara bia krĩchara Juan nejʉacha zroma 2de eda kʼãrẽ nebia jarabʉ ʉ̃rʉ. Nama eda jarabʉ Jesubara kʉgʉrʉde baniabadara iyi juwaba bira ẽ basita, awuarabʉrʉ zokʼasi nezokʼaraba maʉ̃ta biradamarẽã, mawũã osi wuabema ẽbẽraba iyitrʉ akʉda ẽ marẽã (nejʉacha zake 6 akʉza 7). Adewara Jesuba bania bino babisidera iyi juwaba jueda kʼãrãpe ede ẽ basi piesta ara obʉmara, awuarabʉrʉ jarasi nezokʼara maʉ̃ta edemarẽã piesta ara obʉma (nejʉacha zake 8). Akʉza Jesuba bania bino babisidera ẽbẽra ẽzadra piradrʉ kʼãrãpe jara ẽ basi: «Doidua naʉ̃ binota mʉ̃a odata».
11. ¿Kʼãrẽta kʼawuapanʉ Jesuba miõba oka odadebara?
11 ¿Kʼãrẽta kʼawuapanʉ Jesuba bania bino babidadeba? Kʼawuapanʉ edabʉta krĩchaibarata. Jesuba miõba okata obaside iya jara ẽ basi wuabemara iyi zareadeba maʉ̃ta obasita, awuarabʉrʉ jarasi maʉ̃ miõba okata obasita Daizeze jaure zareadeba (Juan 5:19, 30; 8:28). Dayirãba Jesude kĩrãkʼa opanʉbʉrʉ jarada ẽ bayi nebiara dayabʉrʉ bia osita. Kongregasione dayirãba nebia erbʉra jarada ẽ baibara dayidobaʉba maʉ̃ra jõma ũdusita, awuarabʉrʉ Daizeze ʉ̃rʉ ibia bedʼeabibara, jõma erbʉra maʉ̃neba zebʉ baera (Jer. 9:23, 24). Dayirãbara Jeowa kʼareabʉrʉ nebiata erpanʉ, dayirã dobaʉbara nebiara ũdu ẽ baera (1 Cor. 1:26-31).
12. ¿Sãwũã Jesude kĩrãkʼa eda krĩchabʉta ũdubiseabʉ? Yizata jara ũrĩbira.
12 Adewara krĩchara sãwũã Jesuba eda krĩchabadade kĩrãkʼa odaita. Krĩchara naʉ̃ yizata, zõrãrã kongregasionebema abaʉba kʼarebayi zõrãrã kʼarebabari abaʉta, iya diskurso diakata bia jara ũrĩbita. Maʉ̃ba mebẽãbara diskurso biata diayi akʉza maʉ̃ra jõmaʉ̃ba kãgadayi. Ãba yi jʉreberabarida tẽã, mebẽã abaʉba zõrãrã yi kʼarebada jarayi: «Mebẽãbara kʼãrẽ diskurso biata diasi jõma ũrĩsi, ¿bʉa kʼãrẽta krĩchabʉ?». Maʉ̃ kʼarea zõrãrãba jaraseabʉ: «Iya kʼãwũã bia jaradiasi mʉ̃a kʼarebasi baera». Mawũã ẽ bʉrʉ iya jaraseabʉ: «Ãjã, iya bia osi, maʉ̃ kʼarea mʉ̃ra mejãcha sobiabʉ iyi kʼarea». Dayirãta edabʉta krĩchapanʉbʉrʉ jarakada ẽ bayi wuabemara daya kʼarebasita wuabemarata, awuarabʉrʉ sobiapanañi Jeowaba daya obʉta bia akʉbʉ baera (naʉ̃ testoʉ̃me akʉra Mateo 6:2-4; Heb. 13:16). Dayirãba Jesude kĩrãkʼa eda krĩchabʉta ũdubipanʉnera mejãcha sobiabibʉ Jeowata (1 Ped. 5:6).
KʼAWUAPANɄ SO BOREKEA AKɄITA
13. ¿Jesubara kʼãrẽta ũdusi Naín pʉwʉrʉdera akʉza kʼãrẽta osi? (Lucas 7:11-15).
13 (Akʉra Lucas 7:11-15). Dããrabade propeta Eliseora basi pʉwʉrʉ Sunemne, mama jẽda piradrʉbisi pẽdrakiru wauta, mawũãnata 900 poaga berabarisi, Jesura pʉwʉrʉ Naínʼnebʉ maʉ̃ra Sunem kʼawabʉ (2 Rey. 4:32-37). Jesu pʉwʉrʉ kʼawa babʉrʉde, ũdusi beidara joʉeda ededata, maʉ̃ kʼarea jõmaʉ̃ta krĩcha zroma opanʉ. Naʉ̃ pẽdrabara yi wau abapai erbʉta aduasi. Maʉ̃ba krĩcha zroma obʉmina dobabʉ ẽ, ẽbẽra maʉ̃ pʉwʉrʉdebemata iyi kʼaidubʉ, ẽbẽrarã mawũã ode wãne Jesuta eda bedʼeasi, mawũã pẽdra wau jẽda piradrʉbita. Jesuba ẽbẽra ũbea jẽda piradrʉbidabemara naʉ̃ta yi nããbema. Naʉ̃ra bʉ Ebangeliorane.
Daʉ kʼawuapanadrʉ Jesude kĩrãkʼa yi zʉbʉriapanʉra so borekea ũdubidaita. (Akʉra parrapo 14-16 bayeda).
14. ¿Kʼãrẽ nebiata jarabʉ Lucas nejʉacha zroma 7dera? (Akʉra potota).
14 Krĩchara kʼãrẽ nebia ʉ̃rʉ jarabʉta Lucas nejʉacha zroma 7de. Jesuba pẽdra mejãcha jẽgabʉta ũduside so borekea akʉsi (nejʉacha zake 13). Jesuba ũdusibaibara pẽdrara iyi wũãwũã beida kʼawa zʉbʉria jẽgateita, maʉ̃ kʼarea iya so borekea akʉsibaibara. Mamina bari so borekea akʉ ẽ basi awuarabʉrʉ oũdubisi ibiade jaraside: «Jẽgarãrũã». Maʉ̃ tẽã iyiareba nebiata osi, pẽdra wau beidata jẽda piradrʉbisi akʉza iyi juwade jẽda diasi (nejʉacha zake 14 akʉza 15).
15. ¿Kʼãrẽta kʼawuapanʉ Jesuba ẽbẽra jẽda piradrʉbidadeba?
15 ¿Kʼãrẽta kʼawuapanʉ Jesuba pẽdra wau jẽda piradrʉbidadebara? Kʼawuapanʉ wuabemara zʉbʉriabʉta so borekea akʉdaibarata. Dayirãbara jẽda piradrʉbibe ẽ ẽbẽra beidara Jesuba obada kĩrãkʼa. Mamina dayirãbara akʉseabʉ ẽbẽra zʉbʉriabʉra, maʉ̃ne dayirãbara so borekea akʉbʉta ũdubiseabʉ, dayirãreba jʉrʉseabʉ yi zʉbʉriabʉʼa so zarea diaita akʉza daya wãrĩnu kʼarebabʉ ũdubita, mawũã wuabemara so borekea akʉbʉta ũdubiseabʉ.d (Prov. 17:17; 2 Cor. 1:3, 4; 1 Ped. 3:8). Ẽbẽra mejãcha zʉbʉriabʉdera dayirãba ãya nesidabʉde wiña kʼarebabʉrʉdera naʉ̃ba so zarea diaseabʉ akʉza mejãcha kʼarebaseabʉ.
16. Potoba ũdubibʉdera, ¿kʼãrẽta kʼawuapanʉ mebẽã wẽrã nebʉra abaʉdeba?
16 Krĩchara naʉ̃ nebʉrata. Ewari aba mebẽã wẽrãra kongregasione trãnʉmasi, maʉ̃ne ũdusi iya awuru mebẽã wẽrãra jẽganʉmʉta maʉ̃ trãbi trãpanʉena. Maʉ̃ trãbidera jarabasi beidara jẽda piradrʉi ʉ̃rʉ, maʉ̃ kʼarea jẽgabasi yi kau beidata dããraba ẽ basi baera. Mebẽãba maʉ̃ ũdubʉrʉde waña orrasi, iyi bʉra kʼãrãpe ãba trãnaita. Mebẽã wẽrã yi kau beidabara jarasi: «Mʉ̃a sentisi mebẽrã mejãcha kãgabʉta, kongregasionebʉrʉ bʉ, dayirã sãwũã kʼarebaira». Mebẽãra maʉ̃ ewaride ãba yi jʉrebarima jʉ̃ẽsi baera mejãcha sobiabasi. Wuabemara mejãcha zʉbʉriabʉde ãyi kʼarebaya dayirãba nekʼãrẽ wiña opanʉbʉsida, maʉ̃ra Jeowabara bia akʉbʉ (Sal. 34:18).
JESUBA MIÕBA OKATA ESTUDIAI Ʉ̃RɄ DAYIRÃ AUDRE ZAREA ĨJÃBIBɄ
17. ¿Kʼãrẽta kʼawuasida naʉ̃ artikulodera?
17 Dayirãba audre zare ĩjãñi estudiapanʉne Jesuba miõba okata oda ʉ̃rʉ. Maʉ̃neba dayirãba kʼawuapanʉ Jeowaba akʉza Jesuʉ̃meba kãgabʉta dayirãra. Jesubara zarea erchuta bedʼea zroma ara oita akʉza ĩjãbibʉ aranʉbai Daizeze Nokʼoba nebiata weita. Dayirãba naʉ̃ra nebʉra ʉ̃rʉ estudiaiba kʼarebabʉ pikãga krĩchaita sãwũã oũdubita Jesuba nebia ũdubibadata. Bʉyidoba estudiabʉrʉde estudiaseabʉ Jesuba miõba okata obada ʉ̃rʉ, mawũã ẽ bʉrʉ bʉ mebẽrãbawarabʉde estudiaseabʉ. Maʉ̃ta mawũã opanʉbʉrʉ erbayi dayirã mebẽrãbawara bedʼeabʉrʉde kʼãrẽ ʉ̃rʉ bedʼeaita (Rom. 1:11, 12).
18. ¿Kʼãrẽ ʉ̃rʉ bedʼeadayi wuarebema artikulodera?
18 Jesuba Daizeze bedʼea jaradiabʉta jõita wiña waebaside, maʉ̃ne piradrʉbisi ẽbẽra abaʉta, maʉ̃ta yi ũbeabasi, maʉ̃ra iyi neũdukʼawuabasi, mamina nããrera awuara osi iya wuabemara jẽda piradrʉbikʉadaira. ¿Kʼãrẽta kʼawuaseapanʉ Jesuba iyi neũdukʼawua jẽda piradrʉbidadebara? ¿Naʉ̃ba dayirã sãwũã audre zarea ĩjãbibʉ jẽda piradrʉdai ʉ̃rʉ? Wuarebema artikulode panʉnañi naʉ̃ra bedʼeata.
TRÃBI 20 Enviaste a Jesús, tu Hijo amado
a Taʉ totobisi nãgʉ zromata, bebisi kayabeta, jẽda piradrʉbisi beikʉadata. Jipade yibia dayirãba leita Jesuba miõba okata obada ʉ̃rʉra. Naʉ̃ ʉ̃rʉra dayirãbara bari lepanʉ ẽ Daizeze Bedʼeadera, awuarabʉrʉ lepanʉ dayirãba nebia kʼawuadaita. Dayirãba Jesu ʉ̃rʉ akʉza Jeowa ʉ̃rʉ audre ĩjãpanʉ naʉ̃ ʉ̃rʉ lebʉrʉdera akʉza naʉ̃neba kʼawuapanʉ dayirãba kʼãrẽ nebiata oũdubidaibarata.
b Yumakẽrã abaʉba jara ũrĩbibʉ: «Jesu waridamaera ẽbẽrarãbara krĩchapanasi wuabemarãra bia edaibarabasita. Yi de yibaribara dei zebʉrʉraba nesidabʉde wueta erbaibarabasi, ãyi bia edaita. Maʉ̃ kʼarea juwa jidabarabʉ ewaridera audre erbaibarabasi yikora».
c Ebangeliorane eda jarabʉ Jesuba miõba okata odara 30 ʉ̃tabʉta, maʉ̃ awuara okʉasi miõba okara, mamina Daizeze Bedʼeadera maʉ̃rãra aba abaka jara ũrĩbi ẽ. Ewari aba pʉwʉrʉra jõma jʉ̃ẽsida Jesu akʉde, mama Jesuba mejãchaʉta bebikʉasi (Mar. 1:32-34).
d Bʉa audre kʼawuakĩrãbʉbʉrʉ sãwũã wuabemara zʉbʉriabʉa so zarea diaita akʉza so borekea akʉita, akʉra artikulo «Jesús supo consolar a sus amigos», La Atalaya 1 noviembre 2010de.
e POTORABA ŨDUBIBɄTA: Jesuba ara jĩgaʉba akʉnʉmʉ juwa jidapanʉrata akʉza ãyi kʼawapanʉrata sobia bino dopanʉta.