Wuabemara ʉ̃rʉ krĩchaiba ewari jõmaʉ̃nẽ nebiata ũdubʉ

Mʉ̃ zezera Iglesia Unida Canadádebema nokʼobasi, maʉ̃ba mʉ̃ta mʉ̃ mebẽãʉ̃mera diapedaza domingode zokʼabasi eskuela iglesiadebemaena, maʉ̃ jõna tẽã 11 diapeda wãpanasi maʉ̃ iglesiaeda. Daira wãsi kewarare mʉ̃ papa kʼaidu ãba yi jʉrepanʉma, mama ũdubasi maʉ̃ra religionʼra jipa awuarabasita.

Mʉ̃ papabara jarasi iyi neũdukʼawua nãã ­erbadaraʼa iya kʼawuanʉmʉ ʉ̃rʉ, Bob akʉza Marionʼ­ʉ̃mera, ãyira Jeowa ʉ̃rʉ Kʼawuabipanʉrã ba zesida. Poaga 1958de mebẽã Hutchesonba edesi iyi wũãwũãra ũbeabʉta akʉza mʉ̃ta, asamblea pʉwʉrʉ biodebemama, osida New Yorkde, maʉ̃ra osida ewari 8 bayeda. Ãyira mejãcha zarea osida maʉ̃ asambleaeda mʉ̃ ededaita, maʉ̃ asambleara mʉ̃itara arigʉ yibiabasi.

WUABEMARABA MɄ̃ Ʉ̃RɄ KRĨCHAIBA KʼAREBASI Ʉ̃RA ZEIDE KʼÃRẼ OITA

Mʉ̃ warraraenara basi nedʉwʉrʉbʉmae, mʉ̃ra mejãcha sobiabasi maʉ̃ta akʉbasi baera. Mʉ̃a nedʉwʉrʉrata mejãcha akʉkĩrãbasi baera krĩchasi nedʉwʉrʉra akʉbari mediko bʼaita, maʉ̃ kʼarea mʉ̃ papaʼa jarasi, mamina mʉ̃ papara zõrãrã kongregasionebemabawara bedʼeasi mʉ̃aʼa ũrãgʼa biata diamarẽã. Zõrãrãbara mʉ̃aʼa jarasida dayirãra naʉ̃ ewari jõbodoarepanʉta, maʉ̃ba jarasida mʉ̃ta unibersidaeda wãra, mʉ̃ra Jeowadeba jĩgara bʼaita (2 Tim. 3:​1). Mʉ̃a ũrĩsi ãyi ũrãgʼata maʉ̃ba wã ẽ basi unibersidaeda.

Mʉ̃a biode krĩchabasi mʉ̃ ­kolegiodeba ẽdrʉ­da tẽãra kʼãrẽta sãwũã oita, maʉ̃ena Daizeze Bedʼea jaradiabasi sabadoza akʉza domingoza, mamina mʉ̃ra sobia ba ẽ basi akʉza krĩcha ẽ basi yi nãã edebari bʼaita. Mʉ̃ zezera Jeowa odebʉ ẽ baera jarasi trajamarẽã mʉ̃ yãba empresade, Torontode. Mawũã maʉ̃ta ĩjã kʼãrãpe traja jʉ̃drʉsi iyi kʼaidu

Mʉ̃ra Torontodera ewariza ẽbẽrarã Jeowa odebʉ ẽ bawara trajabasi baera maʉ̃ba Jeowadeba jĩga wãbisi. Mʉ̃ra basi mʉ̃ zezonaʉ̃me, mamina iyira Jeowa ode ba ẽ basi maʉ̃ba mʉ̃ zezona beisidera kʼawua ẽ basi sama bʼaita.

Bob akʉza Marionʼʉ̃meba mʉ̃ra asambleaeda edesida poaga 1958de, maʉ̃rãra mʉ̃itara mʉ̃ yibari kĩrãkʼabasi. Naʉ̃rabara mʉ̃ra edesida ãyi deda bamarẽã akʉza kʼarebasida mʉ̃a audre orramarẽã Jeowata. Maʉ̃ta poaga 1960de buru kʼoesi ãyi wũãwũã Johnʼʉ̃me akʉza Johnbara yi nãã edebarita ojʉ̃drʉsi, maʉ̃ yizaba mʉ̃abida abarika jaradiakĩrãsi. Mebẽrãba ũdu wã baera mʉ̃ara Jeo­wadera audre bia owãta, jarasida Escuela del Ministerio Teocráticode zõrãrã bamarẽã.a

NEŨDUKʼAWUA BIATA ŨDUSI AKɄZA TRAJO YIWIDITA DIASIDA

Mʉ̃ra poaga 1966de juwa jidasi Randi Bergeʼʉ̃me, iyira yi nãã edebaribasi akʉza audre jaradiakĩrãbasi Daizeze Bedʼea jaradiaita nesidabʉmae, maʉ̃ta ewari aba kongregasionʼra akʉbari zõrãrãba daiʼa jarasi kʼareba wãmarẽã kongregasion Orilliata, maʉ̃ra basi Ontariode. Mawũã daira mama bʼaita wãsida.

Dai mama Orilliade jʉ̃ẽbʉrʉdera mʉ̃ kimara yi nãã edebaribasi baera akʉza iyira mejãcha sobiabasi baera Daizeze Bedʼea jaradiabʉde, mʉ̃abida abarika okĩrãsi, mawũã yi nãã edebari ba jʉ̃drʉsi mʉ̃ kimaʉ̃me. Mʉ̃ra mejãcha sobiabasi Daizeze Bedʼeadeba ẽbẽrarã wãrĩnuta jaradiabasi baera. Mama kʼarebasi ẽbẽra aba yi kimaʉ̃me Orilliadebemata Jeowa ode bamarẽã, maʉ̃ba mʉ̃ra arigʉ sobiabasi.

BEDʼEA AWUARA KʼAWUASI AKɄZA KRĨCHA AWUARA BESI

Mʉ̃ Torontode baside ũdukʼawuasi Arnold MacNamarata, iyira Betelde yi nãã edebaribasi. Maʉ̃ mebẽãba mʉ̃aʼa widisi yi nãã edebari 100 ora diabari bakĩrãbʉ kʼawuaita, aramaʉ̃ta mʉ̃a panʉsi: «Ãjã, mamina mʉ̃ra Quebecmabʉrʉ zokʼa bʉerãra». Mʉ̃ra wakĩrã ẽ basi mamara, ẽbẽrarã ingle bedʼea bedʼeabʉba protestata osida baera Quebecde. Quebecdera bedʼeabasi pranse bedʼeata, maʉ̃ ewaridera Quebecdebema politikorabara kãgabasi Quebec pʉwʉrʉra jĩga bamarẽã Canadádeba.

Aramaʉ̃ta Arnoldba panʉsi: «Sukursalbara mebẽrã yi nãã edebari 100 ora diapanʉra atiara jʉ̃zaba Quebecʼedabʉrʉ zokʼabʉta». Aramaʉ̃ta wãña ĩjãsi, Randisida mejãcha sobiabasi mama Daizeze Bedʼea jaradia bʼaita. Daiba kʼawuapanʉ bia jidasidata.

Semana juesoma pranse bedʼea kʼawuada tẽã, mʉ̃ta Randita akʉza awuru mebẽã juwa jidapanʉme wãsida Rimouskieda, maʉ̃ra basi 540 kilometro Montrealdeba. Ewari aba kongregasione mʉ̃a bedʼeata jarasi, mʉ̃ara jaraibasi mebẽrã mejãcha zeita asambleaeda, mʉ̃a mebẽrã Austriadebema mejãcha zeita jarai kʼaude jarasi abestruzta mejãcha zeita.

Dai Rimouskide panʉne zesida mebẽrã wẽrãrata kimare, maʉ̃ awuara zesi mebẽrã Huberdeauʼrata, maʉ̃ba ãya erbasi kaura ũme, maʉ̃rasida jʉ̃ẽsi. Mebẽrã Huberdeauʼraba deta arrendasida, adewara maʉ̃ dera trʉ̃gasida de torroata, yi drʉ̃daʉra dera torroabasi baera akʉza mamarabasi korrarata 7, maʉ̃ dedarabasi ẽbẽrarã 12 mawũã ẽ bʉrʉ 14. Daira yi nãã edebari baera jaradiapanasi diapeda, kewarare akʉza diamasi. Maʉ̃ba sobiapanasi mawũã mebẽrãbawarapanʉ baera, maʉ̃ba daitara yibiabasi kʼaibawara Daizeze Bedʼea jaradia wãita, diamasi mejãcha kʉrãzamina.

Daira ãyibawara neũdukʼawua biabasida baera ãyira dai mebẽã kĩrãkʼa akʉpanasi. Edaʉde daira diamasi ãba zeda kʼãrãpe yikota opanasi, mawũã ãba nekodaita, mebẽã abaʉta trã kʼawuabʉ baera maʉ̃ba sabadoza trãpe bairapanasi.

Mawũẽra Rimouskidera ẽbẽrarãbara ũrĩkĩrãbasi Jeowa ʉ̃rʉra. Dai juesoma poagabayeda Rimouskidebasidera ũdu zesi sãwũã daiba Daizeze Bedʼea jaradiabadara buru kʼoesidata akʉza kongregasionbara 35 ẽbẽrarã erbasita Daizeze Bedʼea jaradiabarirata.

Daibara Quebecdera kʼawuasida Daizeze Bedʼea sãwũã biʼia jaradia kʼawuaita adewara ũdusida Jeowaba sãwũã kʼarebabʉta daiba Daizeze Bedʼea audre bia jaradiaita akʉza daiba nesidabʉta jõma diabʉta. Daibara mejãcha kãgasida ẽbẽra pranse bedʼea bedʼeabʉra ãyi kulturata akʉza ãyi bedʼeata adewara naʉ̃ba kʼarebasi daiba kãgaita awuru kulturadebemasida (2 Cor. 6:13).

Ewari aba, Betelba daiʼa jarasi wãnamarẽã Tracadiema, maʉ̃ra bʉ Nueva Brunswickde. Maʉ̃ ewaridera daitara zareabasi, de arrendadata ewari bio ba ẽ basi baera akʉza kolegiode ewari wiñaena trajabasi baera adewara daiba Daizeze Bedʼea jaradiapanana ẽbẽrarã nejaradiabaribasida, maʉ̃ awuara akʉza daibara parãpanasi Daizeze deta.

Daira mejãcha yiwidʼipanasi pʉwʉrʉ Tracadiema wãita, maʉ̃ra awuarabasi baera Rimouskibadaira. Krĩchasida wãita Jeowaba mawũã omarẽã kãgabasi baera, mawũã osida. Daibara ũrĩsida Jeowaba zokʼadara akʉza ũdusida sãwũã Jeowaba kʼarebasita daiba bedʼea zroma erbadara (Mal. 3:10). Randibara mejãcha ĩjãbasi Jeowa ʉ̃rʉ, adewara zarea obasi Jeowaba zokʼabʉ aripe oita, maʉ̃ awuara iyira sobia ipidabasi baera zare ẽ basi mama wãita.

Dai kongregasionera zõrãrã abapaibasi iyi trʉ̃ra Robert Rossbasi. Maʉ̃ta yi kima Lindaʉ̃me yi nãã edebaribasi. Yi kimata biogo besi mawũã ãyira wũãwũãbarasida, mawũãsidu maʉ̃ pʉwʉrʉdeba wã ẽ basi. Ãyi wũãwũã dapʉẽpanʉena mʉ̃aʼa akʉza Randiʼa ãya so zarea diasida, mawũã daiba Daizeze Bedʼea jaradiakĩrã jaradiapanamarẽã.

NEKʼÃRẼ BIATA MEJÃCHA ŨDUSIDA JEOWABA ZOKʼABɄMA WÃPANɄ BAERA

Dai Tracadiede panʉta poaga ũme berabarida tẽã jarasida awuru trajota omarẽã, kongregasionʼra zõrãrã akʉbari bamarẽã. Mawũã 7 poagabayeda akʉbasi kongregasion ingle bedʼea bedʼeabʉta, maʉ̃ tẽã daira zokʼa bʉesida pranse bedʼea bedʼeabʉma Quebecde. Tẽã superintendente distritota yi trʉ̃ Léonce Crépeaultʼta ibia bedʼeasi mʉ̃a diskurso diada kʼarea.b Maʉ̃are mʉ̃aʼa widisi: «¿Sãwũã bʉa jaradiabʉbara kʼarebaseabʉ wuabemara?». Naʉ̃ba kʼarebasi mʉ̃a bia krĩchaita mʉ̃a nekʼãrẽ ­jaradiabʉ ʉ̃rʉ adewara sãwũã naʉ̃ba ẽbẽrarã kʼarebaseabʉta.

Poaga 1978de asamblea odara mʉ̃itara yibiabasi, maʉ̃ asamblea trʉ̃ra «Fe Victoriosa» basi, maʉ̃ra osida Montrealde, daibara jʉ̃ãpanasi maʉ̃ asambleaeda jʉ̃ẽnamarẽã 80.000 ẽbẽrarãta. Mʉ̃ra trajabasi mebẽrã yiko diaide, mama jaradiasida kʼãrẽ yiko oibarata, sãwũã oibarata akʉza mama nekʼãrẽ jõma oira yiwidibasi. Daibara erpanasi nebera zromarata 20, mamina edaʉde maʉ̃ra ãrĩbasi. Ewari aba daira estadioeda wãibarabasi ara oita, mamina mama jʉ̃ẽbʉrʉdera estadiodera jemenebarabasi maʉ̃ba jʉ̃ãibarabasi ãyi ẽdrʉyeda. Mawũã jʉ̃ãpanʉta diamasidubʉrʉ eda wãsida, mawũẽra daibara tʉbʉra pʉreabibarabasi ũnadrʉi naweda, mawũã yiko diaita wuabema ẽbẽrarã. Maʉ̃ kʼarea daira mejãcha mapaepanasi mamina maʉ̃neba kʼawuasida ãba trajaibarata akʉza sobia trajadaibarata. Mawũã trajada kʼarea neũdukʼawua biata ũdusida, mawũã idibasidu ãyibawara neũdukʼawua bia. Asamblea Quebecde odapeadara arigʉ yibiabasi, maʉ̃ nãã poagara 1940 akʉza 1950de mebẽrã mejãcha pẽwãsida baera.

Mʉ̃a nekʼãrẽ mejãcha kʼawuasi kongregasionʼ­ra akʉbari zõrãrãneba Montrealde asamblea ­obaside. Poaga abaʉde mebẽã David Splaneʼba akʉbasi opisina asambleadebemara, idira iyira ­Zõrãrã buru biadebema. Mamina tẽã mebẽã David Splaneʼba trajo obadata mʉ̃a omarẽã jarasida adewara mebẽãbara mʉ̃ra mejãcha kʼarebasi.

Poaga 2011de Randita mʉ̃me kongregasionʼra akʉbari zõrãrãbasi poaga 36 bayeda, maʉ̃enara nekʼãrẽ biata mejãcha ũdusida. Tẽãne mʉ̃aʼa jarasida nejaradiabari bamarẽã eskuela zõrãrã kongregasionebemaraita adewara poaga ũmebayeda daira korra awuara awuaraka kʼãĩsida 75 bayeda. Daita mawũã oira mejãcha zareabasimina biode yibiabasi. Maʉ̃ta Eskuela zõrãrã kongregasionebemaita obʉ jõna tẽãra, zõrãrãbara mejãcha biga diasida Zõrãrã burubiara ãyita mejãcha krĩchabʉ baera.

Tẽã mʉ̃ra trʉ̃sida nejaradia bari bamarẽã ­Eskuela Ebangelizadorde. Mebẽrã mama jʉ̃ẽnara mejãcha krĩcha zroma opanasi ãya nekʼãrẽ mejãcha oibarabasi baera: maʉ̃ eskueladera jewedaibarabasi 7 orabayeda, kewaraza 3 orabayeda ­estudiaibarabasi. Ãyi korrara jaigʉa ẽã erbaibarabasi akʉza eskueladera asignasionta diapanasi kimare mawũã ẽ bʉrʉ juesoma ãya odamarẽã. Mʉ̃a akʉza wuabema mebẽã nejaradiabariʉ̃meba mebẽrã jara ũrĩbisida naʉ̃ nekʼãrẽ jõma oseabʉta Jeowa kʼarebadeba, adewara daira mejãcha ­sobiabasi mebẽrãba ĩjãbasi baera Jeowa ʉ̃rʉ, ­mawũã ãya oẽ baibadata aripe oseabasi baera.

WUABEMA Ʉ̃RɄ KRĨCHABɄBA EWARI JÕMAɄ̃NẼ NEBIATA ŨDUBɄ

Mʉ̃ papaba wuabema ẽbẽrata kãgabasi baera iya Daizeze ʉ̃rʉ jaradiasi, adewara maʉ̃ba kʼarebasi mʉ̃ zezeba Daizeze ĩjã ẽ basimina Jeowa ʉ̃rʉ kʼawuakĩrãmarẽã. Mʉ̃ papa beidata ewari ũbea berabaribʉrʉde mʉ̃ zezera zesi ãba yi jʉrebarima, mawũã ũrĩta diskurso aba. Mawũã ãba yi jʉrebarieda wãbʉta 26 poagabasi, mʉ̃ zezera buru kʼoe ẽ basimina zõrãrã kongregasionebemabara mʉ̃aʼa jarasida iyitrʉ nããra jʉ̃ẽbasita ãba yi jʉrebarimara, maʉ̃ra mawũã obasi semanaza.

Mʉ̃ papabida yiza biata amaesi yi wũãwũãraita. Mʉ̃ nawekaura ũbeabʉsida yi kimabawara atiara Jeowa odepanʉ, maʉ̃ranebemata ũme Betelde trajapanʉ: abara Betel Portugaldebʉ, ababemara Betel Haitídebʉ.

Randita mʉ̃me idira yi nãã edebari 100 ora diabari Hamilton Ontariode. Dai kongregasionʼra akʉbari zõrãrã basiedara mejãcha sobiapanasi mebẽrãbawara Daizeze Bedʼea jaradiapanasi baera, idira arigʉ sobiapanʉ akʉpanʉ baera sãwũã daiba ẽbẽrarã Daizeze Bedʼea jaradiabadara, sãwũã maʉ̃raba audre owãnata Daizezeba kãgabʉta akʉza atiara mebẽrã kongregasionebemabawara audre ãbapanʉ akʉza zarea opanʉ akʉpanʉne sãwũã Jeowaba kʼarebabʉta bedʼea zroma erbʉde.

Daiba jẽda kĩrãbepanʉne daiba odata, mebẽrã mejãcha biga diapanʉ sãwũã dai ʉ̃rʉ mejãcha krĩchada kʼarea. Daibara biga diabʉta ũdubipanʉ kʼarebabʉde mebẽrãba Jeowadeta audre odamarẽã (2 Cor. 7:​6, 7). Bari jaraita, papa aba yi wũãwũãrabawara yi nãã edebarira, aramaʉ̃ta mʉ̃a ­widisi yi kimaʼa iyira yi nãã edebari baseabʉ kʼawuaita, aramaʉ̃ta yumakẽrãba mʉ̃aʼa jarasi iya akʉbʉta yi nãã edebarirata ũbea. Mʉ̃a aramaʉ̃ta widisi iyaʼa: «¿Bʉara audre akʉseabʉka Jeowadeira?». Iyira yi nãã edebaribasi 6 jedekobayeda.

Randiba mʉ̃meba wuabema mebẽrãba jaradayi Jeowaba kʼãrẽ nebiata oda ʉ̃rʉ akʉza daiba jʉ̃ãpanʉ ãyabida daiba obada kĩrãkʼa Jeowaita sobiade trajadamarẽã (Sal. 71:​17, 18).