Huldabara ũdubʉ iya kãgabadata

INDONESIADE pʉwʉrʉ Sangir Besarde panʉ mebẽã wẽrãrata ũbea. Poaga dããraba ãyira playade trajapanʉta. Ãyira mamara ũdukaʉde Daizeze bedʼeata jaradiapanʉ baera, mamina atiara nekʼãrẽ awuruta opanʉ.

Nããrãra ãyira pusa doidu jʉ̃ẽ kʼãrãpe mõgarata mamaʉ̃ba wepanasi. Maʉ̃ra mõgararãra balon aba yi zromabasi, mõbe ãyira jeweda kʼãrãpe martiyoba bogachipanasi maʉ̃ mõgarara. Tẽã maʉ̃ mõgara birachimara tarrode eda bʉe kʼãrãpe deda edepanasi. Maʉ̃are ãya maʉ̃ra bolsade eda bʉepanasi karrude edeita. Maʉ̃ra mõgararãra zokʼapanasi karretera parãita.

Maʉ̃ra mebẽã wẽrãranebemara Huldabasi. Iyira wuabemaraira audre trajaseabasi maʉ̃ obʉde. Iya plata ũdubadara yi mebẽrãba nesidabʉ edaita zokʼabasi. Mamina iya maʉ̃ plata ũdubadaba nekʼãrẽ awuruta okĩrãbasi. Tableta edakĩrãbasi JW Library^® erbaita. Huldaba kʼawuabasi bideoraba akʉza maʉ̃ aplikasionba nekʼãrẽ awuru erbʉba kʼarebaita Daizeze Bedʼea audre bia ũrĩta.

Huldara nrʉemaza diapeda, ora ũmebayeda trajabasi mõgara bogachibʉde. Iyara maʉ̃ra jedeko aba ẽzadrabayeda osi. Iyi mawũã mejãcha trajasi baera plata ũdusi table edaita.

Huldaba jarabʉ: «Mʉ̃ra mawũã mõgara bogachidaba mejãcha mapaebasi. Mamina maʉ̃ pʉara taʉsi mʉ̃ tableta zokʼaside Daizeze bedʼea jaradia wãita akʉza ãba yi jʉrebarima wãi nãã estudiabʉde». Adewara jarasi naʉ̃ tablebara mejãcha kʼarebasita kaya zroma zeside, maʉ̃nera nekʼãrẽ jõma internetʼneba obasi baera. Hulda kʼarea sobiapanʉ iya kãgabʉta ũdusi baera.