Mʉ̃ra aduʼa sentibʉ Jeowa ʉ̃rʉ ĩjãbʉ baera

JEOWA SÃWŨÃ ŨDUKʼAWUASITA AKɄZA SÃWŨÃ JEOWA Ʉ̃RɄ ĨJÃSITA

Mʉ̃ra tosida 1948de pʉwʉrʉ zake Nigeriadebemane. Maʉ̃ ewadedera mʉ̃ zeze mebẽã Moustaphata akʉza mʉ̃ mebẽã nããbema Wahabita Jeowa ʉ̃rʉ Kʼawuabipanʉrãbasi. Mʉ̃ 9 poaga bidade, mʉ̃ zezera beisi, maʉ̃nera mʉ̃ra mejãcha sopʉasi. Mamina mʉ̃ mebẽã Wahabiba mʉ̃aʼa jara ũrĩbisi iyira jẽda ũduita. Iya mʉ̃aʼa mawũã jaradaba so zarea diasi mʉ̃aʼa akʉza naʉ̃ba kʼarebasi mʉ̃a Daizeze Bedʼea kʼawua jʉ̃drʉita. Adewara 1963de mʉ̃ra buru kʼoesi akʉza mʉ̃ mebẽrã ũbeasida.

1965de, mʉ̃ra mʉ̃ mebẽã Wilsonʼʉ̃me wãsi Lagosʼeda. Nama wuabemara yi nãã edebarirabawara sobia berabarisi kongregasion Igbobide. Mawũã sobiabadaba kʼarebasi mʉ̃abida ãyide kĩrãkʼa abarika oita krĩchamarẽã, maʉ̃ba enero 1968de yi nãã edebari ba jʉ̃drʉsi mʉ̃ra.

Mebẽã Beteldebema yi trʉ̃ Albert Olugbebiba, warrarata ãba yi jʉredasi jara ũrĩbita Nigeria bareare nesidabʉta yi nãã edebarira 100 ora diabʉta. Mʉ̃ara waidide kĩrãbebʉ mebẽã Olugbebiba jaradata, iya jarasi: «Marara waidide warrara, maʉ̃ba mara zareata akʉza mara ewarita Jeowaʼa diaseapanʉ. Nekʼãrẽ oita mejãcha waebʉ». Mʉ̃ara Isaíasde kĩrãkʼa nekʼãrẽ mejãcha okĩrãbasi Jeowaita, maʉ̃ kʼarea yi nãã edebari bʼaita solisituta birasi (Is. 6:8).

Mayo 1968de, mʉ̃ra zokʼa bʉesida pʉwʉrʉ Kanoena, Nigeria wadeare yi nãã edebari 100 ora diabari bamarẽã. Maʉ̃ poagadera yõta basi, maʉ̃ yõ trʉ̃ra Biafrabasi (1967-1970), ẽbẽrarã maʉ̃ yõne badadarãra wãsida Nigeria juwaraeda. Mebẽã abaʉba mʉ̃aʼa jarasi mama wã ẽ marẽã, iya maʉ̃ra jarasi krĩchabasi baera maʉ̃neba mʉ̃ kʼarebabʉta, mamina mʉ̃a iyaʼa jarasi: «Biga bʉa mʉ̃ ʉ̃rʉ krĩchabʉ baera, mamina Jeowaba mʉ̃ta mama wãmarẽãbʉbʉrʉ iya mʉ̃ra biʼia akʉibaibara».

JEOWA Ʉ̃RɄ ĨJÃBɄTA ŨDUBISI PɄWɄRɄ YÕNEBɄMAE

Pʉwʉrʉ Kanone mawũã yõ berabaridabara nekʼãrẽ mejãcha ãrĩsi akʉza ẽbẽrarã mama badarasida mejãcha zʉbʉriasi. Daiba Daizeze Bedʼea jaradia wãbʉrʉdera ode ũdupanasi ẽbẽrarã maʉ̃ yõne beadapeadara kakuata. Maʉ̃ pʉwʉrʉde kongregasionʼra biobasimina mebẽrã mejãchaʉta mĩrʉ wãsi maʉ̃ yõ kʼarea. Maʉ̃ba kongregasionera jaradiabarirãra 15de edapanasi, ãyira mejãcha perapanasi. Dai yi nãã edebarira 100 ora diabarirata mainʉ jʉ̃ẽsidera mebẽrãra mejãcha sobiasida. Mebẽrãra daiʼa idu yi kʼarebabisida akʉza ãyira so zareapanesi. Adewara daiba kʼarebasi ãya jẽda Daizeze Bedʼea jaradiakĩrãmarẽã. Akʉza ãyara jẽda zokʼa bʉesida ãyi inpormesida, adewara Betelʼa widisida kartarata zokʼa bʉemarẽã.

Maʉ̃ tẽã daibara kʼawuasida bedʼea hausata. Ẽbẽrarã naʉ̃ bedʼea bedʼeapanʉrabara ũrĩkĩrãbasi dai bedʼeara, ãyi bedʼeade jaradiapanasi baera. Mamina ʉ̃kʉrʉ religion nokʼorabara kãga ẽ basi Jeowa ʉ̃rʉ Kʼawuabipanʉrãra, maʉ̃ kʼarea pẽwã jʉ̃drʉsida. Ewari aba daira yumakẽrã abaʉba pẽwãsi kucho zake juwade abʉba. Daira iyi nãã wãbasi baera, mĩrʉ wãsi iyideba. Mawũãsidu Jeowaba kʼarebasi dai aduʼapanaita, adewara maʉ̃ pʉwʉrʉdera yi nãã edebarirãra audre wari wãsi. (Sal. 4:8). Idi ewadera naʉ̃ pʉwʉrʉdera nejaradiabarirãra 500 audrebʉ kongregasion 11bʉde.

DAIRA NÍGERDERA PẼWÃSIDA

Kanonebʉta jedeko ũbea berabarida tẽã, mʉ̃ta akʉza mebẽrã ũme yi nãã edebarirata, agosto 1968de zokʼa bʉesida pʉwʉrʉ Niameyʼena, maʉ̃ra Nígerdebasi. Dai mama panʉne kʼawuasida Áfricadebemara Níger pʉwʉrʉta audre jʉ̃wʉrʉta. Mama bʼaira zarebasi jʉ̃wʉrʉ baera, mamina maʉ̃ daucha daibara mamabema bedʼeasida kʼawuaibarabasi, pransesta. Mawũãsidu Jeowa ʉ̃rʉ ĩjãbʉta ũdubisida baera, maʉ̃ pʉwʉrʉde jaradia jʉ̃drʉsida Daizeze Bedʼeata mebẽrã mamabemabawaraʉba. Maʉ̃ audre ẽãne ẽbẽrarã yi le kʼawuapanʉrabara jidasida kartara daiba dedekabʉta, mõbe maʉ̃ta lesida akʉza ʉ̃kʉrʉra daidʉ zepanasi kartara ʉ̃rʉ widi jʉ̃ẽita. Maʉ̃ karta trʉ̃ra naʉ̃ La verdad que lleva a vida eterna.

Tẽã daiba kʼawuasida nokʼora maʉ̃ pʉwʉrʉdebemabara kãga ẽ basita Jeowa ʉ̃rʉ Kʼawuabipanʉrãra. Julio poaga 1969de, daiba osida asamblea sirkuitodeta. Maʉ̃ ewaridera ẽbẽrarã 20 jʉ̃ẽsi. Maʉ̃ asambleadera daiba jʉ̃ãpanasi ẽbẽrarã ũme buru kʼoeita. Mamina maʉ̃ asambleade yi ewari nããrabebemane jenenerata jʉ̃ẽsida mõbe wua oẽbasi asambleara. Ãyara kongregasionʼra akʉbari zõrãrã aba jida edesida akʉza yi nãã edebari 100 ora diabarirata jida edesida komisariaeda. Bedʼeata widi kʼãrãpe jarasida nrʉema akʉ jʉ̃ẽmarẽã. Maʉ̃neba daiba kʼawuapanasi asambleara oauda ẽ baita. Maʉ̃ba de abaʉmae diskursota diasida, mõbe yi ẽbẽrarã buru kʼoeitapanʉrata chupea buru kʼoesida, mawũã jeneneraba kʼawuada ẽ marẽã.

Semana berabarida tẽã mʉ̃ta akʉza yi nãã edebarira 100 ora diabʉrata 5 jʉretasida maʉ̃ pʉwʉrʉdeba. Dai maʉ̃ pʉwʉrʉdeba wãmarẽãra ewari ũme diasida, aramaʉ̃ta daira wãsida Betel Nigeriadebemama. Mama daiʼa jarasida awuru pʉwʉrʉeda wãmarẽã.

Mʉ̃ra zokʼa bʉesida Nigeria pʉwʉrʉ zakeda, yi trʉ̃ Orisunbareʼeda. Namabema mebẽrãbawara sobiade jaradiasi mʉ̃ara Daizeze Bedʼeara. 6 jedeko berabarida tẽã mʉ̃ra zokʼa bʉesida Nígerʼeda. Mʉ̃itara zarebasimina sobiabasi akʉza jẽda yi ũdui baera mebẽrã Nígerdebemabawara.

Mʉ̃ra jẽda jʉ̃ẽsi Niameyʼeda. Mama ẽbẽra ne nẽdobʉba kʼawuasi mʉ̃ra Jeowa ʉ̃rʉ Kʼawuabipanʉrãta, maʉ̃ kʼarea mʉ̃aʼa nei widisi Daizeze Bedʼea ʉ̃rʉ. Iya Jeowa ʉ̃rʉ kʼawua jʉ̃drʉsi akʉza tẽã iya sigarriyo dobadata akʉza itua dobadara idubʉsi. Maʉ̃neba ʉ̃ta mʉ̃a ũdusi Jeowa pʉwʉrʉ sãwũã audre wari wãsita pʉwʉrʉ Nígerde. Mʉ̃ nãã jʉ̃ẽsidera basi 31 ẽbẽrarã nejaradiabarirata, mʉ̃ tẽã jʉ̃ẽbʉrʉdera basi 69 nejaradiabarirata.

«BIA KʼAWUA Ẽ GUINEANE DAIZEZE BEDʼEA JARADIABɄRA SÃWŨÃ WÃTA»

Diciembre poaga 1977de, mʉ̃ra wãsi Nigeriaeda, mama mʉ̃a nei jaradiadaibasi. Mʉ̃ra semana ũbeabayeda basi mamara. Maʉ̃ne mebẽã Malcolm Vigoba mʉ̃aʼa kartata diasi. Maʉ̃ kartara Betel Sierra Leonaneba zokʼa bʉesida. Mebẽrãbara jʉrʉpanasi mebẽã aba kaya ẽãbʉta, dobabʉta akʉza ingle adewara pranses bedʼea bedʼeabʉta, kongregasionʼra akʉbari bamarẽã Guineane. Mebẽã Vigoba jara ũrĩbisi mʉ̃ara maʉ̃ kʼarea nejaradiapanasita akʉza mama wãita zare bʼaita. Maʉ̃ kʼarea iya jarasi mama wãi nãã biʼia krĩchamarẽã. Mamina mʉ̃a iyaʼa jara ũrĩbisi: «Mʉ̃ta Jeowaba mama wãmarẽã zokʼabʉbʉrʉ wãñi».

Mʉ̃ra wãsi Sierra Leonaena. Ãba yi jʉresi mebẽrã Betel mamabemaʉ̃me, mebẽã Betel akʉbaridebema abaʉba mʉ̃aʼa jarasi: «Bia kʼawua ẽ Guineane Daizeze Bedʼea jaradiabʉra sãwũã wãta». Maʉ̃ pʉwʉrʉde Daizeze Bedʼea sãwũã jaradiabʉra Betel Sierra Leonanebemaba akʉibarabasi. Mamina naʉ̃ pʉwʉrʉde nokʼorata ãyirai yõpanasi baera zarebasi mebẽrã maʉ̃ pʉwʉrʉdebemabawara bedʼeaira. Mebẽrã Betel Sierra Leonanebemaraba zarea opanasimina maʉ̃ pʉwʉrʉdera ũduda ẽ basi kʼaita Jeowa ʉ̃rʉ Kʼawuabipanʉrãbari bedʼeamarẽãra. Ãya mʉ̃aʼa jarasida, Conakriʼeda wãmarẽã nokʼora permiso widita mama bʼaita.

Mʉ̃ Conakriʼeda jʉ̃ẽside, bedʼeasi nokʼo mamabemaʉ̃me. Mʉ̃a jara ũrĩbisi mʉ̃ra maʉ̃ pʉwʉrʉde bakĩrãbʉta ẽbẽrarã Daizeze Bedʼea ʉ̃rʉ jaradiaita. Iya mʉ̃aʼa jarasi mʉ̃ra mama babe ẽãta, karselʼeda edeseapanasi baera, mawũã ẽ bʉrʉ beaseapanasi baera akʉza jarasi «jẽda wãra Nigeriaeda Daizeze Bedʼea ʉ̃rʉ jaradiaita». Mʉ̃a iyaʼa jarasi mʉ̃ra mama bakĩrãbʉta, maʉ̃ kʼarea wãsi bedʼeade nokʼo kʼarebabariʉ̃me. Iya mʉ̃ra bia edasi.

Mʉ̃ra jẽda wãsi Sierra Leonaena. Mõbe mebẽrã jara ũrĩbisi mʉ̃ mainʉ sãwũã berabaridata. Mʉ̃a ãyaʼa jara ũrĩbiside permiso diasidata Guineane bamarẽã, ãyira mejãcha sobiasida.

Poaga 1978deba 1989 bayeda, mʉ̃ra Guineane akʉza Sierra Leonaenane kongregasionʼra akʉbari zõrãrãbasi akʉza edaʉde pʉwʉrʉ Liberiadebema kongregasionta akʉ jʉ̃ẽbasi. Abedaedara, mʉ̃ra mejãcha kayabasi, mamina mebẽrãba mʉ̃ra mejãcha kʼarebasida, ãya ospitalʼeda edepanasi.

Ewari aba, mʉ̃ra paludismoba kayasi akʉza lombriba. Mʉ̃ maʉ̃neba bibeida tẽã mʉ̃a kʼawuasi mebẽrãra ãyirai bedʼeapanasita mʉ̃ sama jõʉdai kʼarea. Mawũãsidu mʉ̃ara krĩcha ẽ basi Jeowaita trajabʉra idubʉita akʉza mʉ̃a kʼawuasi dayi aduʼa bʼaira ĩjãibarata Daizeze Jeowa ʉ̃rʉ, iyara jẽda piradrʉbibʉ baera beidarãra.

MɄ̃A MɄ̃ KIMAɄ̃MEBARA JEOWA Ʉ̃RɄ ĨJÃPANɄ

Poaga 1988de, Dorcasta ũdukʼawuasi mʉ̃ara, naʉ̃ ẽbẽra wẽrãra yi nãã edebaribasi akʉza iyara edabʉta ũdubibasi, adewara kʼẽrẽpabasi. Tẽã mʉ̃ra iyiʉ̃me juwa jidasi akʉza iyiʉ̃meba akʉ wãpanasi kongregasionʼrata. Dorcasbara ũdubibasi Jeowaita trajakĩrãbʉta. Daira ãba wãpanasi kongregasionʼra jĩgabʉ akʉde. Nekʼãrẽ badude wãpanasi kongregasionʼrainʉ jʉ̃ẽita. Mainʉ jʉ̃ẽira yi ora o mitiabasi jipa akʉza zobe zobekabasi.

Ewari aba daiba Daizeze Bedʼeata jaradia wãbasi, maʉ̃itara dota kĩrãbaribarabasi, maʉ̃ra puentedeba kĩrãbaripanasi. Mamina kueta mejãcha zesi baera maʉ̃ puentera ãrĩsi, maʉ̃ kʼarea jãbade wãibarabasi. Dorcas jãbadeba ãĩ wãita piradrʉbʉrʉde doi wãsi, mamina iyira mejãcha perasi maʉ̃ dodera korerata mejãchabasi baera akʉza dobe ẽ baera, mʉ̃sida dobe ẽ basi. Mamina warrara mama pananaraba kʼarebasida. Maʉ̃ tẽã daira miti kʼãĩmokʼãrãpanasi, mamina mawũãsidu daibara Daizeze Bedʼea jaradiabʉra idubʉda ẽ basi.

Poaga 1992de, kʼawuasida Dorcasʼra biogo besita, mamina Daizezeita ewari jõmaʉ̃nẽ trajabʉra maʉ̃ kʼarea idubʉda ẽ basi. Daiba kʼawuasida naʉ̃ wũãwũãra Jeowaba nebia diadata, maʉ̃ kʼarea dai kaura trʉ̃gasida Jahgift. 4 poaga berabarida tẽã tosida Ericta. Dai wũãwũãra ãyi ũmena Jeowaba nebia diada kĩrãkʼabʉ. Jahgiftʼra jĩgaʉba trajabasi kartara tradusi Conakride, akʉza Ericʼra zõrãrã kʼarebabari.

Dorcasbara yi nãã edebari 100 ora diabʉra idubʉsi. Mawũãsidu iya ojʉ̃drʉsi yi nãã edebari 50 ora diabarita dai wũãwũã dapʉẽbʉeda. Mamina Jeowa kʼarebadeba mʉ̃ara yi nãã edebari 100 ora diabʉra idubʉ ẽ basi akʉza mʉ̃ warrara warida tẽã Docasbara jẽda ojʉ̃drʉsi yi nãã edebari 100 ora diabʉta. Atia daira misionero bʼaita zokʼa bʉesida Conakryʼeda.

JEOWABA DAYIRÃRA BIA AKɄBɄ

Mʉ̃ra ewari jõmaʉ̃nẽ wãbʉ Jeowaba zokʼa bʉebʉrʉma. Mʉ̃ kimaba mʉ̃meba ũdupanʉ Jeowaba sãwũã bia akʉbʉta. Jeowa ʉ̃rʉ ĩjãiba kʼareba zebʉrʉ ẽbẽrarã plata mejãcha erbai ʉ̃rʉ ĩjãbʉba bedʼea zroma ũdubʉta ũdu ẽ baita. Dorcasba mʉ̃meba kʼãrẽ sãwũã berabari zebʉrʉdeba ũdubʉda dayi aduʼa bʼaira Jeowa ʉ̃rʉ ĩjãibarata (1 Crón. 16:35). Mʉ̃a kʼawuabʉ Jeowabara biʼia akʉbʉta ẽbẽrarã iyi ʉ̃rʉ ĩjãbʉrãra (1 Sam. 25:29).