¿Jeowaba panʉbʉka mʉ̃ yiwidʼibʉra?

1, 2. ¿Kʼãrẽa krĩchaseapanʉ Jeowabara panʉ ẽãta dayirã yiwidʼibʉra?

«SOBIADE ora Jeowaba zokʼabʉta, iya diayi bʉ soba kãgabʉta» (Sal. 37:4). Jipade yibia naʉ̃ bedʼeara mamina, ¿dayirãbara jʉ̃ãibaraka Jeowaba daya widibʉta mesera panʉmarẽã? ¿Kʼãrẽa yibia naʉ̃ ʉ̃rʉ krĩchaira? Akʉdaya ʉ̃kʉrʉ yizarata. Mebẽã wẽrã aba dobabʉba Jeowaʼa widisi Eskuela Ebangelizadorʼeda wãita trʉ̃namarẽã, mamina poaga bio berabarisidu iyira waidide trʉ̃na ẽ. Kʉ̃ra abaʉba Jeowaʼa widibʉ iyita bebimarẽã mawũã audre oita kongregasione, mawũãsidu be ẽ iyira, yibariraba Jeowaʼa widipanʉ kʼarebamarẽã ãyi wũãwũã kʼẽrẽpa bʼaita, mamina ãyi wũãwũãbara idubʉebʉ Jeowara.

² Bʉabida Jeowa nei widibaribaibara, mamina idibasidu iyara panʉ ẽ bʉ bedʼeara. Maʉ̃ kʼarea bʉa krĩchabaribaibara Jeowabara ʉ̃kʉrʉ bedʼeatrʉ panʉbʉta, mamina bʉ bedʼeara panʉ ẽãta. Mawũã ẽ bʉrʉ krĩchabaribaibara bʉara nei aña osita. Mawũã sentibasi mebẽã wẽrã aba yi trʉ̃ Janice.b Iyita akʉza yi kimaʉ̃me yiwidʼipanasi Betel wãi kʼarea. Iya jarabʉ: «Mʉ̃ara krĩchabasi daira maʉ̃ audre ẽãne trʉ̃naibasita, mamina poaga bio berabarisidu trʉ̃na ẽ basi daira. Mʉ̃ra maʉ̃ kʼarea mejãcha sopʉabasi mʉ̃a mʉ̃yikʉza widisi, ‹¿kʼãrẽta osi mʉ̃a Jeowa kĩrʉbita?›. Mʉ̃ra mejãcha yiwidʼibasi Jeowa kʼareba widita, mamina kʼawua ẽ iya kʼãrẽa panʉ ẽ basita mʉ̃ bedʼeara».

3. ¿Kʼãrẽta kʼawuadayi naʉ̃ artikulodera?

³ Edaʉde krĩchaseapanʉ Jeowabara panʉ ẽãta dayirã yiwidʼibʉra, ʉ̃kʉrʉ yumakẽrãra Jeowa ode kʼẽrẽpabadarabida iyaba krĩchasida (Job 30:20; Sal. 22:2; Hab. 1:2). ¿Kʼãrẽba kʼarebaseabʉ kʼawuaita Jeowabara panʉbʉta bʉ bedʼeara? (Sal. 65:2). Naʉ̃ bedʼea panʉnaita nããra panʉnaña naʉ̃ra bedʼea ũbeata: Nããra, ¿Jeowaba kʼãrẽta omarẽã jʉ̃ãnaibara? Yi ũmeta, ¿dayirãba kʼãrẽta omarẽã jʉ̃ãbʉ Jeowabara? Yi ũbeata, ¿kʼãrẽa nesidapanʉ dayirãba widida awuara widita?

¿JEOWABA KʼÃRẼTA OMARẼÃ JɄ̃ÃNAIBARA?

4. Jeremías 29:12​ba jarabʉdebara, ¿kʼãrẽta oita jarabʉ Jeowabara?

⁴ Jeowaba jarabʉ ũrĩta dayirã yiwidʼibʉra (akʉra Jeremías 29:12). Jeowabara kãga ẽbẽrarã iyi ode panʉrãra, maʉ̃ kʼarea iyara ewari jõmaʉ̃nẽ ũrĩñi ãyi bedʼeara (Sal. 10:17; 37:28). Mamina maʉ̃ba jarakĩrãbʉ ẽ dayirãba nekʼãrẽ jõma widibʉra Jeowabara jõma diaita, edaʉde Jeowaba dayirã bedʼea panʉmarẽãra jʉ̃ãibara ẽjũã bia zeita.

5. ¿Dayi yiwidʼibʉrʉdera kʼãrẽta akʉbʉ Jeowabara? Jara ũrĩbira.

⁵ Dayirã Jeowa yiwidʼibʉrʉdera iyara krĩchabʉ kʼãrẽne abarikabʉta dayirãba widibʉta iya nekʼãrẽ oita krĩchabʉme (Is. 55:​8, 9). Maʉ̃ nekʼãrẽ iya oita krĩchabʉdebemara naʉ̃: ẽbẽrarã ẽjũã biade ãba sobiapanamarẽã, mamina Diarubara jarabʉ dayirãra audre bia panʉta dayirãba kãgata opanʉnebʉrʉ (Gén. 3:​1-5). Mamina Jeowabara iduaribibʉ ẽbẽrarãba ãya kãgata odamarẽã, mawũã ũdubita Diaruba jarabʉra sewidata, naʉ̃ drʉadera ẽbẽrarãba ãya kãgata obʉdeba kayiruata mejãchabʉ baera (Ecl. 8:9). Dayirãbara kʼawuapanʉ Jeowabara nemitia naʉ̃ drʉadebʉra jõma ãĩ bʉe ẽãta, ẽbẽrarãba krĩchaseabʉ baera ãya okĩrãta obʉdeba bia wãseabʉta.

6. ¿Kʼãrẽa wãrĩnu ĩjãibara Jeowabara nekʼãrẽ aripe obʉta akʉza kãgade obʉta?

⁶ Ẽbẽrarãba yiwidʼipanʉ Jeowaʼa iyabaʉ ʉ̃rʉ, mamina Jeowabʉrʉ kʼawuabʉ sãwũã panʉita ãyi aba abakaʉʼa. Bari jaraita, nokʼo Ezequías kayanʉmasidera kʼareba widisi Jeowa iyi bebimarẽã, Jeowaba bebisi iyira (2 Rey. 20:​1-6). Mamina apostol Pablo kayanʉmaside Jeowaʼa soiduba yiwidʼisi iyi bebimarẽã, mamina Jeowabara bebi ẽ basi (2 Cor. 12:​7-9). Kõbebʉrʉ akʉdaya yiza Santiago akʉza Pedrodeta, ãyira ũmena bebʉdepanasi beaitanʉmasi baera Herodesba, maʉ̃ kʼarea kongregasionebemara yiwidʼipanasi ãyi kʼarea, mamina Santiagora beasida, Pedrora Jeowaba ẽdrʉbisi (Hech. 12:​1-11). Maʉ̃ kʼarea widiseapanʉ: ¿Jeowabara kʼãrẽa kʼarebasi Pedrora akʉza Santiagora kʼãrẽa kʼareba ẽ basi? Daizeze Bedʼeaba jara ẽ maʉ̃ ʉ̃rʉra.c Mamina dayirãba wãrĩnu ĩjãseapanʉ Jeowaba obʉra jõma aripe obʉta (Deut. 32:4). Kʼawuapanʉ Santiagota akʉza Pedroʉ̃mera Jeowaba bia akʉbasita (Apoc. 21:14). Edaʉde Jeowaba dayirã yiwidʼira panʉbʉ dayirãba krĩcha ẽ badade. Kʼawuapanʉ Jeowara ẽbẽra biata akʉza iya dayirãra kãgata, maʉ̃ kʼarea aña krĩchada ẽ iya dayirãba widibʉ sãwũã panʉbʉ kʼareara (Job 33:13).

7. ¿Kʼãrẽ ʉ̃rʉ krĩcha ẽ baita opanʉ akʉza kʼãrẽa?

⁷ Wuabema sãwũã berabarinʉmʉta akʉ ẽ baibara dayideʉ̃me. Bari jaraita daya Daizezeʼa yiwidʼiseabʉ dayi kʼãrẽ sãwũã berabarinʉmʉta kʼarebamarẽã, mamina kʼareba ẽ kĩrãkʼanʉmʉ. Tẽã juneane kʼawuayi daya awuru mebẽãba widisita Jeowa daya widida kĩrãkʼabʉta, mamina Jeowaba kʼarebasi kĩrãkʼabʉ maʉ̃ra. Mebẽã yi trʉ̃ Annata maʉ̃ kĩrãkʼa berabarisi, iya yiwidʼisi yi kima Matthew kʼarebamarẽã kanserdeba. Maʉ̃ne mebẽã wẽrãra ũme kanserba kayapanasi ãyisida. Anna Daizezeʼa soiduba yiwidʼisi kʼarebamarẽã yi kimata akʉza maʉ̃ra mebẽrã wẽrãrãra kanserba baripananarasida. Mebẽã wẽrãrãra besida, mamina yi kimara beisi. Nããra Annaba widisi naʉ̃ra wẽrãrãra bedara Jeowaba kʼarebasi kʼawuaita, maʉ̃ta mawũãsibʉrʉ kʼãrẽa kʼareba ẽ basi yi kimara bemarẽã. Wãrĩnu bʼaira bia kʼawuada ẽ maʉ̃ra, mamina kʼawuapanʉ aranʉbai jõma Jeowaba taʉbita dayirã pʉabʉra akʉza beidarãra jõma jẽda piradrʉbita (Job 14:15).

8. (1) Isaías 43:2​ba jarabʉdebara, ¿sãwũã kʼarebabʉ Jeowaba dayirãra? (2) ¿Dayirã yiwidʼibʉba sãwũã kʼarebai bedʼea zroma ũdubʉdade? (Akʉra bideo Yiwidʼibʉba kʼarebabʉ bedʼea zroma awuantaita).

⁸ Jeowaba ewari jõmaʉ̃nẽ kʼarebayi. Jeowara zeze bia baera kãgabʉ dayirã zʉbʉriada ẽ marẽã (Is. 63:9). Dayirãba bedʼea zroma mejãcha ũdupanʉ, maʉ̃neba Jeowabara jõma ẽdrʉbi ẽ, bari jaraita maʉ̃rabʉ do kĩrãkʼa akʉza tʉbʉ kĩrãkʼa (akʉra Isaías 43:2). Mawũãmina Jeowaba jarabʉ dayirã bedʼea zroma berabarinʉmʉne iya kʼarebaita awuantadamarẽã, adewara kʼarebayi maʉ̃ba dayirã iyiʉ̃me kʼẽrẽpa bʼaita akʉza Jeowaba iyi jaure zareata diabʉ dayirãba bedʼea zroma awuantaita (Luc. 11:13; Filip. 4:13). Ĩjãseapanʉ Jeowaba diaita dayirãba nekʼãrẽ nesidabʉta mawũã bedʼea zroma awuantaita akʉza dayirã kʼẽrẽpa bʼaita.d

¿DAYIRÃBA KʼÃRẼTA OMARẼÃ KÃGABɄ JEOWABARA?

9. Santiago 1:​6, 7​ba jarabʉdebara, ¿kʼãrẽa ĩjãibara Jeowaba dayirã kʼarebaita?

⁹ Jeowaba jʉ̃ãbʉ dayirãba iyi ʉ̃rʉ ĩjãnamarẽã (Heb. 11:6). Krĩchaseapanʉ dayirãba bedʼea zroma ũdubʉdebara ẽdrubi ẽãta akʉza Jeowabara dayirãra kʼareba ẽ baita, mamina Daizeze Bedʼeabara jarabʉ: «Daizeze zareadeba wãrĩzeseabʉ muro ʉ̃rʉ» (Sal. 18:29). Maʉ̃ba Jeowaba dayirã bedʼea panʉ ẽ baita krĩchai kaude, soiduba yiwidʼibara Jeowa akʉza ĩjãibara iya ũrĩta dayirã bedʼeara (akʉra Santiago 1:​6, 7).

10. Yizadeba jara ũrĩbira dayirãba kʼãrẽta oibarata Jeowaʼa yiwidʼida tẽã.

¹⁰ Jeowabara kãgabʉ dayirãba wididade odamarẽã. Mebẽã abaʉba Jeowaʼa widibʉ kʼarebamarẽã iyi trajode ewarita diamarẽã, mawũã asamblea regionalʼeda wãita, ¿sãwũã panʉi Jeowabara maʉ̃ yiwidʼira? Jeowabara zowaĩnĩgʉata diaseabʉ naʉ̃ mebẽãta iyi zokʼabʉme bedʼea wãmarẽã, mamina maʉ̃itara naʉ̃ mebẽãra wãibara iyi zokʼabʉidu maʉ̃me bedʼeaita. Iyi zokʼabʉba dia ẽã abʉbʉrʉ iyara widida ʉ̃rʉ widibara, mawũã ẽ bʉrʉ jaraseabʉ awuru ewaride trajaita.   

11. ¿Kʼãrẽa yiwidʼida ʉ̃rʉ yiwidʼibara nekʼãrẽ dayirã krĩcha zroma obibʉ ʉ̃rʉ?

¹¹ Jeowabara jʉ̃ãbʉ dayirãba badua wididamarẽã nekʼãrẽ dayirã krĩcha zroma obibʉ ʉ̃rʉ (1 Tes. 5:17). Jesuba jara ũrĩbisi dayirãba nekʼãrẽ widibʉra edaʉde mesera panʉ ẽ baita (Luc. 11:9). Maʉ̃ba mapaerãra, awuarabʉrʉ widida ʉ̃rʉ widira Jeowaʼa (Luc. 18:​1-7). Dayirãba Jeowa widida ʉ̃rʉ widibʉdera iyaʼa ũdubipanʉ dayirãba nekʼãrẽ widibʉra wãrĩnu kãgapanʉta akʉza ũdubipanʉ ĩjãpanʉta iya dayirãra wãrĩnu kʼarebaseabʉta.

¿KʼÃRẼA EDAɄDE DAYA WIDIBɄRA AWUARA WIDIBARA?

12. (1) Dayirã sãwũã yiwidʼibʉ ʉ̃rʉ kʼawuaita, ¿kʼãrẽta widibara akʉza kʼãrẽa? (2) ¿Kʼãrẽta oseabʉ dayirã yiwidʼibʉrʉde Jeowaʼa wawia ũdubita? (Akʉra rekuadro «¿Mʉ̃ sãwũã yiwidʼibʉba Jeowaʼa wawia ũdubibʉka?»).

¹² Dayirãba Jeowa yiwidʼibʉta iya panʉ ẽ bʉrʉ naʉ̃ra bedʼea ũbeata widiseapanʉ. Nããra, ‹¿Mʉ̃a widibʉra yibiaka?›. Dayirãba edaʉde krĩchapanʉ dayirãba widibʉra bigabʉta, mamina wãrĩnu bʼaira maʉ̃ ẽ basi dayirãba nesidabadara. Dayirãba bedʼea zroma erbʉde Jeowaʼa widipanʉ maʉ̃ bedʼea zroma sãwũã ara oi ʉ̃rʉ, mamina maʉ̃ bedʼea zromara nekʼãrẽ awurudeba ara oseabʉ. Edaʉde nekʼãrẽ dayirãba widibʉra Jeowaba kãgabʉde bʉ ẽ (1 Juan 5:14). Bari jaradaita, krĩchadaya yibarira dayirãba nãã jarada ʉ̃rʉ, ãyara Jeowa yiwidʼiside widisida kʼarebamarẽã ãyi wũãwũã Jeowa ode kʼẽrẽpa bʼaita. Ãya mawũã widibʉra bigabʉ kĩrãkʼabʉ, mamina Jeowabara dayirã ajuerzade jarabʉ ẽ iya kãgabʉta omarẽã, awuarabʉrʉ iya kãgabʉ dayirã aba abakaʉba soiduba odamarẽã iya kãgabʉta (Deut. 10:​12, 13; 30:​19, 20). Maʉ̃ba yibarirabara Jeowa widiseapanʉ kʼarebamarẽã ãyi wũãwũãra soidu jʉ̃ẽita, mawũã ãyira Daizeze neũdukʼawua bakĩrãnamarẽã (Prov. 22:6; Efes. 6:4).

13. Hebreos 4:16​ba jarabʉdebara, ¿Jeowaba sãwũã kʼarebabʉ dayirãra? Jara ũrĩbira.

¹³ Yi ũmeta, ‹¿Mʉ̃ yiwidʼibʉrʉ ewaride diaibaraka Jeowaba mʉ̃a widibʉra, mawũã ẽ bʉrʉ iyima bigabʉ ewaride diaibara?›. Dayirãbara krĩchaseapanʉ dayirãba widibʉra Jeowabara maʉ̃ ewaride panʉibarata, mamina wãrĩnu bʼaira Jeowabʉrʉ kʼawuabʉ nekʼãrẽ dayirãba widibʉra sõbede diaibarata (akʉra Hebreos 4:16). Dayirãbara krĩchaseapanʉ dayirãba widibʉta Jeowaba iyabaʉ ewaride dia ẽ bʉrʉ maʉ̃ra iyara diakĩrã ẽãta, mamina Jeowaba krĩchaseabʉ dayirãba widibʉra tẽã diaita audre bigata. Dayirã nãã bedʼeasida mebẽã aba Jeowa iyi bebimarẽã widida ʉ̃rʉ, Jeowaba iya jaradata osibʉrʉ Diarubara jaraseabasi iyara Jeowaba kãgata obʉta Jeowaba iyita bebisi baera (Job 1:​9-11; 2:4). Adewara Jeowabara kʼawuabʉ kʼãrẽ ewaride jõbita kayara (Is. 33:24; Apoc. 21:​3, 4). Dayirãbara jʉ̃ãibara Jeowaba maʉ̃ kaya jipa jõbibʉrʉ ewari zeita, maʉ̃ba naʉ̃ mebẽãbara Jeowa widiseabʉ iya zarea diamarẽã, mawũã iya kaya awuantaita akʉza Jeoware kʼẽrẽpa bʼaita (Sal. 29:11).

14. ¿Kʼãrẽta kʼawuapanʉ Janice nebʉradeba?

¹⁴ Kĩrãbedaya Janice yizata, iyira Jeowaʼa yiwidʼisi widita Betelde trajaita, 5 poaga berabarisi iya ũduita Jeowaba sãwũã panʉsita iya widibadara. Iya jarabʉ: «Maʉ̃ra poagaranera Jeowabara mʉ̃ara nekʼãrẽ jaradiabasi akʉza kʼarebasi mʉ̃ audre kristiana bia bʼaita. Mʉ̃a Jeowa ʉ̃rʉ ĩjãbʉra audre waribi wãibarabasi akʉza mʉ̃a Daizeze Bedʼea sãwũã estudiabʉra audre oibarabasi akʉza mʉ̃a Jeowaba omarẽã kãgabʉ sama obʉ krĩcha ẽã sobiabaibarabasi. Jeowabara panʉsi mʉ̃ yiwidʼira, mʉ̃a kãgabʉde panʉ ẽ basimina. Poaga bio berabarisi mʉ̃a ũduita Jeowaba sãwũã panʉsita mʉ̃ bedʼeara, iya mʉ̃ bedʼea sãwũã panʉnara jipade nebia zroma kĩrãkʼabʉ akʉza biga diabʉ iya mʉ̃aʼa sãwũã kãga ũdubidadeba».

15. ¿Kʼãrẽa edaʉde nekʼãrẽ awuruta widibara? (Akʉra potorata).

¹⁵ Yi ũbeata, ‹¿Nekʼãrẽ awuru ʉ̃rʉ yiwidʼiseabʉka mʉ̃ra?›. Dayirã yiwidʼibʉrʉde yibia Jeowa jaraita kʼãrẽta kãgabʉta, mamina edaʉde yibia ne awuruta widita Jeowa, mawũã kʼawuaita iya kʼãrẽta kãgabʉta dayirãita. Krĩchadaya mebẽã wẽrã dobabʉ nãã jarada ʉ̃rʉ. Iya Jeowa widisibasi Eskuela Ebangelizadorʼeda wãita, iyira eskuelaʼeda wãkĩrãbʉ mawũã Daizeze Bedʼea jaradiaita audre nesidabʉma wãita. Iyi eskuelaʼeda wãita trʉ̃i nãã, iya Jeowa widibʉ kʼarebamarẽã ũduita kʼãrẽta audre oseabʉta iyi kʼarea (Hech. 16:​9, 10). Iya widida kĩrãkʼa oita naʉ̃ mebẽãbara kongregasionʼra akʉbari zõrãrã iyibʉmaebema widibara saʉ̃ra kongregasionʼraba nesidabʉta yi nãã edebarirata, mawũã jaradia wãita. Mawũã ẽ bʉrʉ Betelʼa widibara sama audre nesidabʉta Daizeze Bedʼea ʉ̃rʉ jaradiaita.e

16. ¿Kʼãrẽta bia kʼawuapanaibara?

¹⁶ Dayirãba kʼawuatabeda Jeowabara dayirã yiwidʼibʉra kãgade panʉbʉta akʉza iyara kʼawuabʉta dayirãita kʼãrẽta audre yibiata (Sal. 4:3; Is. 30:18). Jeowaba dayirãba widida kĩrãkʼa panʉ ẽ mina, kĩrãbedaibara iya dayirãba widibʉra ewari jõmaʉ̃nẽ ũrĩbʉta. Iya dayirãra mejãcha kãga akʉza doba amae ẽ bayi (Sal. 9:10). Ewari jõmaʉ̃nẽ Jeowa yiwidʼibara akʉza soiduba jarara bʉa kʼãrẽ krĩchabʉta (Sal. 62:8).