Sobiabara Jeowata jʉ̃ãbʉeda

Mawũãsidu, Jeowabara kãgabʉ dayirãba sobiade jʉ̃ãnamarẽã iya nekʼãrẽ jõma ara oita. ¿Jeowabara kʼãrẽa maʉ̃ta odamarẽã kãgabʉ? ¿Kʼãrẽba kʼarebai dayirãba sobiade jʉ̃ãnamarẽã?

¿JEOWABA KʼÃRẼA KÃGABɄ DAYIRÃBA JɄ̃ÃNAMARẼÃ?

Daizeze Bedʼeaba jarabʉ: «Jeowabara jʉ̃ãbʉ mara kʼarebaita akʉza maraʼa so zʉbʉria ũdubiyi, Daizeze Jeowara nekʼãrẽ aripe obʉ baera. Sobiapanʉ iyi jʉ̃ãkĩrã jʉ̃ãpanʉrãra» (Is. 30:18). Maʉ̃ bedʼeara Jeowabara bʉbisi judiora iyi bedʼea ũrĩkĩrã ẽãraita (Is. 30:1). Mamina maʉ̃ra judiorane edabasi ʉ̃kʉrʉ judiora kʼẽrẽpapanʉrata akʉza naʉ̃ bedʼeabara ãyaʼa nebiata jʉ̃ãbibasi. Adewara maʉ̃ iyabaʉ bedʼeaba idi ewade Jeowa ode kʼẽrẽpapanʉra nebiata jʉ̃ãbibʉ.

Dayirãbara sobiade jʉ̃ãibara, Jeowabida sobiade jʉ̃ãbʉ baera. Jeowabara kʼawuabʉ kʼãrẽ ewaride jõbita nekʼãrẽ kayirua naʉ̃ drʉadebʉta, maʉ̃enara iyara sobiade jʉ̃ãbʉ maʉ̃ ewari zeita (Mat. 24:36). Maʉ̃ ewaride, jõmaʉ̃ba kʼawuadayi Diaruba Jeowa ʉ̃rʉ akʉza iyi odepanʉra ʉ̃rʉ jarabʉra sewidata. Maʉ̃ kʼarea Jeowabara Diarura akʉza iyi kʼaidupanʉrãra jõma makenañi, mamina dayirãra so zʉbʉriata ũdubiyi.

Maʉ̃ ewari ze ẽ nããra, Jeowabara dayirã kayiruara jipa jõbi ẽ bayi. Mamina iya jarabʉ dayirãra sobia baseapanʉta maʉ̃ ewari zei jʉ̃ãpanʉena. Dayirãra sobia baseapanʉ nebia berabarita jʉ̃ãpanʉbʉrʉ (Is. 30:18).a ¿Dayirãra sãwũã sobia baseapanʉ maʉ̃ jʉ̃ãbʉedara? Ne kimarebʉ dayirã kʼarebaseabʉta.

SÃWŨÃ SOBIA BASEAPANɄ JɄ̃ÃPANɄENA

Krĩchara bʉa kʼãrẽ nebia ũdubʉ ʉ̃rʉ. Nokʼo Davidbara mejãcha ũdu zebʉrʉbasi yi kayiruara (Sal. 37:35). Mawũãsidu iya jarasi: «Jeowa nãã chupea bara akʉza iyita sobia jʉ̃ãra. Ẽbẽra kayiruaba obʉta bia wã kʼarea kĩrʉrãra» (Sal. 37:7). Davidbara iya jaradara aripe oũdubisi krĩchaside Jeowaba iyi sãwũã ẽdrʉbita jarada ʉ̃rʉ. Adewara iyara mejãcha bigata diabasi Jeowaba, iyi kʼarea nemejãcha ozebʉrʉ baera (Sal. 40:5). Dayirãba kʼãrẽ nebia ũdubʉ ʉ̃rʉ krĩchapanʉbʉrʉ, kʼãrẽ kayirua ũdubʉa yi edebi ẽ bayi. Mawũã odara zare ẽ bayi sobiade jʉ̃ãita.

Ewari jõmaʉ̃nẽ Jeowa ʉ̃rʉ ibia bedʼeara. Davidba bʉsibaibara Salmo 71ra, iya Jeowaʼa naʉ̃ta jarasi: «Mamina mʉ̃ara jʉ̃ãbayi; ewariza bʉ ʉ̃rʉ audre ibia bedʼeayi» (Sal. 71:14). ¿Sãwũã Jeowa ʉ̃rʉ ibia bedʼeaseabasi iyara? Iyara ibia bedʼeaseabasi awuru ẽbẽrarã akʉza iyi trãbirane Jeowa ʉ̃rʉ ibia bedʼeaseabasi (Sal. 71:​16, 23). Davidʼde kĩrãkʼa dayirãbara Jeowata sobiade jʉ̃ãseapanʉ. Dayirãba iyi ʉ̃rʉ ibia bedʼeaseapanʉ Daizeze Bedʼea jaradia wãbʉrʉde, ewariza dayirã mebẽrãbawara, mawũã ẽ bʉrʉ neũdukʼawuarabawara bedʼeabʉde akʉza ãba yi jʉrebarimae trãbʉde. Tẽã dayirã trãbira ũrĩbʉrʉde, kĩrãkita ũrĩra naʉ̃ba kʼãrẽ jarabʉta akʉza krĩchara maʉ̃ra trãbiraba jarabʉba sãwũã bʉaʼa nebiata jʉ̃ãbibʉta.

Mebẽrãba so zarea diabʉrʉde idu yi kʼarebabira. Davidba bedʼea zroma ũduside naʉ̃ta jarasi Jeowaʼa: «Bʉme kʼẽrẽpapanʉra kĩrãbita bʉ trʉ̃ ʉ̃rʉ jʉ̃ãñi mʉ̃ara, maʉ̃ra yibia baera» (Sal. 52:9). Mebẽrãba dayirã so zarea diaseapanʉ ãyibawara ãbabʉde ãba yi jʉrebarimae, Daizeze Bedʼea jaradia wãbʉrʉmae, mawũã ẽ bʉrʉ nekʼãrẽ awuru obʉde (Rom. 1:​11, 12).

Bʉa jʉ̃ãbʉ ʉ̃rʉ audre ĩjãra. Salmo 62:5​ba jarabʉ: «Wãrĩnu Daizezeta chupea jʉ̃ãbʉ Mʉ̃ara mʉ̃a jʉ̃ãbʉra iyideba zebʉ baera». Dayirãba jʉ̃ãbʉ ʉ̃rʉ audre ĩjãira yibia, audre naʉ̃ ewari jõita dayirãba jʉ̃ãbʉde ze ẽ bʉrʉ. Ĩjãibara Jeowaba jarabʉra aripe berabarita krĩcha ẽã poaga bio jʉ̃ãibarata maʉ̃ aripe berabarimarẽã. Dayirãba jʉ̃ãbʉ audre ĩjãira Daizeze Bedʼeata estudiaibara, bari jaraita kʼawuaseapanʉ propesiara ʉ̃rʉ akʉza Daizeze Bedʼea sãwũã bedʼea abarikabʉta, adewara sãwũã Jeowaba iyi ʉ̃rʉ jara ũrĩbibʉta (Sal. 1:​2, 3). Adewara dayirãbara nesidapanʉ yiwidʼi bʼaita, mawũã audre Jeowa kʼawa bʼaita akʉza iya nebia weya abʉta sobiade jʉ̃ãita (Jud. 20, 21).

Davidʼde kĩrãkʼa, dayirãba ĩjãnaibara Jeowabara akʉbʉta dayirãra akʉza iyiare kʼẽrẽpapanʉra kãga ũdubibʉta (Sal. 33:​18, 22). Jeowata sobiade jʉ̃ãpanadrʉ: nebia ʉ̃rʉ krĩchabʉdeba, yiwidʼibʉdeba, dayirãi so zarea diabʉdeba akʉza daya jʉ̃ãbʉta audre ĩjãbʉdeba.