Jeowa yi jaradiabibara

1. ¿Kʼãrẽa nesidapanʉ Jeowaba dayirãʼa jaradiamarẽã? Yizata jara ũrĩbira.

KRĨCHARA bʉ oide aduasita. Bʉa mamara nekʼãrẽ mejãcha ũduseabʉ, oiderabʉ baera nedʉwʉrʉ zromarata akʉza chirua kayiruarata. Mamina bʉa ũdura ẽbẽra aba maʉ̃ o biʼia ũdukʼawuabʉta akʉza bʉaʼa jaradiaseabʉta kʼãrẽta oibarata, maʉ̃ra bʉitara jipade yibiabayi. Naʉ̃ drʉara maʉ̃ oi kĩrãkʼabʉ. Naʉ̃ drʉadera mejãchabʉ yi kayiruata dayirã neida oseabʉta, Jeowadeba jĩga babisebʉta. Mamina dayirãba erpanʉ kʼaiba kʼarebaseabʉta: iyira Jeowa. Iya dayirãra yi kayiruadeba jĩga babibʉ, adewara jaradiabʉ ẽjũã biaidu sãwũã jʉ̃ẽita.

2. ¿Jeowaba dayirãra sãwũã jaradiabʉ kʼãrẽta oibarata?

² ¿Jeowaba dayirãra sãwũã jaradiabʉ kʼãrẽta oibarata? Nããrãra iya dayirã jaradiabʉ Daizeze Bedʼeadeba, mawũãsidu iya zokʼabʉ ẽbẽrarã nama egorodebemara. Bari jaraita, iya jaradiabʉ dayirã Zõrãrã Burubiaraneba, ãyita zokʼabʉ dayirãʼa yiko jauredebema diaita. Maʉ̃ba kʼarebabʉ dayirãba nekʼãrẽ oita jidabʉrʉde bia jidamarẽã (Mat. 24:45). Jeowabara adewara zokʼabʉ awuru mebẽrãsida dayirãʼa jaradiaita. Bari jaraita, zokʼabʉ kongregasionʼra akʉbari zõrãrãta akʉza zõrãrã kongregasionebemarata. Ãya so zarea diabʉ akʉza jaradiaseabʉ dayirãba bedʼea zroma ũdubʉrʉde kʼãrẽta oseabʉta. Idi ewade dayirãra ewari jõbodoarepanʉ baera, mejãchade biga diapanʉ kʼãwũã dayirã jaradiapanʉ baera. Naʉ̃ba kʼarebabʉ ewari jõmaʉ̃nẽ Jeowaba kãgabʉde bʼaita akʉza idi ewade sobia bʼaita, adewara ʉ̃ra zeidebida sobia bʼaita ewari jõmaʉ̃nẽ.

3. ¿Kʼãrẽta kʼawuadai naʉ̃ artikulodera?

³ Edaʉde dayirãitara zarea baseabʉ Jeowaba jaradiabʉ ũrĩra, audre naʉ̃ta ẽbẽrarã nama egorodebemaneba zebʉbʉrʉ, ¿kʼãrẽa? Edaʉde krĩchaseapanʉ mebẽrãba daya ũrãgʼa diabʉra dayita ẽ basita, mawũã ẽ bʉrʉ ãya nei omarẽã jarabʉra biga ẽãta, maʉ̃ra Jeowadeba zebʉ ẽ baera. Maʉ̃ mawũã berabaribʉrʉdera dayirãbara nesidapanʉ ĩjãita mebẽrãba jarapanʉra Jeowadeba zebʉta akʉza ãya ũrãgʼa diabʉta ũrĩpanʉbʉrʉ, naʉ̃neba nebiata ũdudaita. Dayirãba ĩjãbʉ audre zarea erbaita naʉ̃ artikulode akʉdayi naʉ̃ra bedʼeata: Yi nããrabemata, Jeowaba iyi pʉwʉrʉ nawedabema sãwũã jaradiasita. Yi ũmeta, idi ewade Jeowaba dayirã sãwũã jaradiabʉta. Yi ũbeata, iya dayirã jaradiabʉde opanʉbʉrʉ kʼãrẽ nebiata ũdudaita.

JEOWABARA ISRAELITARÃRA SÃWŨÃ JARADIASI KʼÃRẼTA OIBARATA

4, 5. ¿Jeowaba sãwũã zokʼasi Moisésta iyi pʉwʉrʉ Israel jaradiaita kʼãrẽta oibarata? (Akʉra poto yi nããrabemata).

⁴ Jeowaba jidasi Moisésta israelitara Egiptodeba ẽdrʉbita akʉza ãyaʼa ũdubisi iyara ãyaʼa jaradiabʉta kʼãrẽta oita Moisésdeba. Bari jaraita, Jeowaba ãyi ewaridera diabasi jãrãrata, naʉ̃ jãrãra ʉ̃tʉba baebasi. Abarika diamasiare pʉreata mawũã diabasi (Éx. 13:21). Moisésʼra maʉ̃ pʉrea kʼaidu akʉza jãrãra kʼaidu wãsi. Maʉ̃bara israelitarãra Mar Rojoidu erjʉ̃ẽsi. Ãyi mainʉ jʉ̃ẽbʉrʉde gorogorora Egiptodebemaraba pẽwãsida. Maʉ̃ kʼarea israelitarãra mejãcha perasida krĩchasida baera ãyira mama beadaita. Maʉ̃ba ãya krĩchasida Moisésba ãyi Mar Rojoeda edeira biga ẽ basita, aña osita. Mamina maʉ̃ra mawũã ẽ basi. Jeowaba zokʼasi Moisésta mawũã iyi pʉwʉrʉ mainʉ erjʉ̃ẽmarẽã (Éx. 14:2). Mamina ãyara jʉ̃ã ẽ basi Jeowaba ãyi biʼia ẽdrʉbira (Éx. 14:​26-28).

⁵ 40 poagabayeda, Moisésbara Jeowa pʉwʉrʉʼa jaradiasi saʉ̃ ode wãibarata drʉa ibʉawabʉmaera Jeowa kʼarebadeba, maʉ̃ jãrãraneba akʉza pʉreadeba.a Jeowabara naʉ̃ jãrãra akʉza naʉ̃ pʉreara, Moisés de karpa ʉ̃rʉ bʉesi israelitaraba ũdudamarẽã, mamina maʉ̃ra ewari biobayeda mawũã bʉe ẽ basi (Éx. 33:​7, 9, 10). Jeowara Moisésʼa bedʼeabasi maʉ̃ jãrãraneba akʉza pʉreadeba. Iya jara ũrĩbibasi kʼãrẽta oibarata iyi pʉwʉrʉ akʉita (Sal. 99:7). Maʉ̃neba israelitarabara ũdusida Jeowaba Moisésta zokʼabasita mawũã ãyaʼa jaradiaita.

6. Jeowaba kʼãrẽta oita jaradiasidera, ¿kʼãrẽta osida israelitarabara? (Números 14:​2, 10, 11).

⁶ Israelitara mejãchaʉba ĩjãna ẽ basi Jeowaba Moisésta zokʼabʉta mawũã ãyaʼa jaradiaita kʼãrẽta oita (akʉra Números 14:​2, 10, 11). Maʉ̃ kʼarea israelitara maʉ̃ ewaridebemara Jeowabara iya ẽjũã bia diaya adamara jʉ̃ẽbi ẽ basi, ode makenasi (Núm. 14:30).

7. Jara ũrĩbira kʼairaba ũrĩsita Jeowaba jaradara (Números 14:24 akʉza akʉra potota).

⁷ Mamina ʉ̃kʉrʉ israelitarabara idu Jeowa yi jaradiabisida. Bari jaraita Jeowaba jarasi Calebʼbara soiduba obasita iyaʼa jarabʉra (akʉra Números 14:24). Jeowabara nebiata diasi Calebʼara. Iya iduaribisi Calebʼba jidamarẽã sama bakĩrãbʉta ẽjũã kĩrãwãreã iya diaya adamae (Jos. 14:​12-14). Israelitara Jeowaba drʉa bia diaya adamae badarabara yiza biata ũdubisida, ãyara Jeowa idu yi jaradiabisida baera. Moisés beida tẽã Josuéba israelitara akʉsidera ãyara wawiata ũdubisida Josuéʼara (Jos. 4:14). Maʉ̃ kʼarea Jeowaba ãyaʼa nebiata diasi, adewara iya ẽjũã bia diaya adama erjʉ̃ẽsi (Jos. 21:​43, 44).

8. Jara ũrĩbira Jeowaba sãwũã jaradiabasita iyi pʉwʉrʉʼa nokʼora ewaride (akʉra potota).

⁸ Poaga bio berabarida tẽã Jeowabara juezʼrata bʉesi, mawũã iyi pʉwʉrʉʼa jaraita kʼãrẽta oibarata. Adewara tẽã, nokʼora ewaridera zokʼasi propetarata, mawũã naʉ̃raba pʉwʉrʉʼa jara ũrĩbimarẽã kʼãrẽta oibarata. Nokʼora kʼẽrẽpapanʉrabara ũrĩsida propetaraba ãyaʼa jara ũrĩbibʉra. Bari jaraita propeta Natánba nokʼo Davidʼa jara ũrĩbiside iya kʼãrẽ kayirua odata, Davidbara ũrĩsi naʉ̃ propetaba jaradara (2 Sam. 12:​7, 13; 1 Crón. 17:​3, 4). Nokʼo Jehosafatbara ĩjãsi propeta Jahazielba jara ũrĩbibʉra akʉza kʼarebasi pʉwʉrʉ Judádebemarabida propetara ʉ̃rʉ ĩjãmarẽã (2 Crón. 20:​14, 15, 20). Nokʼo Ezequías krĩcha zroma obasidera propeta Isaías kʼarebata jʉrʉsi (Is. 37:​1-6). Nokʼoraba Jeowaba jarabʉde opanasidera Jeowaba ãyaʼa nebiata diabasi akʉza pʉwʉrʉsida akʉbasi (2 Crón. 20:​29, 30; 32:22). Naʉ̃ba ũdubibasi propetarãra Jeowaba zokʼabasita iyi pʉwʉrʉʼa jaradiaita kʼãrẽta oita. Mamina nokʼora mejãchaʉba akʉza pʉwʉrʉdebemara mejãchaʉba ũrĩna ẽ basi naʉ̃ra propetaraba jarabʉra (Jer. 35:​12-15).

KRISTIANORA SIGLO NÃÃRADEBEMARA JEOWABARA SÃWŨÃ JARADIASI KʼÃRẼTA OIBARATA

9. ¿Kʼairata zokʼasi Jeowaba mebẽrã siglo nããradebemara jara ũrĩbimarẽã kʼãrẽta oita? (Akʉra potota).

⁹ Jesu jẽda piradrʉda tẽã, Jeowaba ʉ̃tʉ zebisi kongregasion aba kristianoraneta, ¿sãwũã akʉsi Jeowaba maʉ̃ra kristianora? Iyara Jesuta kongregasion buru babisi (Efes. 5:23). Mamina Jesubara iyi kʼaidubemara aba abakaʉʼa jara ũrĩbi ẽ basi kʼãrẽta oibarata, awuarabʉrʉ zõrãrã akʉza iyi kʼaidubemara Jerusalénʼne bʉrata zokʼasi, mawũã maʉ̃raba jara ũrĩbimarẽã kʼãrẽta oita (Hech. 15:​1, 2). Adewara zõrãrãta trʉ̃gasida mawũã naʉ̃raba jaramarẽã kongregasionʼra kʼãrẽta oibarata (1 Tes. 5:12; Tito 1:5).

10. (1) ¿Kristianora siglo nããradebemarabara ũrĩsidaka ãyaʼa jaradapeadara? (Hechos 15:​30, 31). (2) Daizeze Bedʼeaba jara ũrĩbibʉ ʉ̃kʉrʉ ẽbẽrarãba ũrĩna ẽ basita Jeowaba ẽbẽrarã jʉrʉda bedʼeara. ¿Ãyara kʼãrẽa mawũã ũrĩna ẽ basi? (Akʉra rekuadro «Kʼãrẽa ʉ̃kʉrʉbara ĩjãna ẽ basi ãyaʼa omarẽã jaradapeadara»).

¹⁰ ¿Kristianora siglo nããradebemarabara ũrĩsidaka ãyaʼa jaradapeadara? Ãyidebema mejãchaʉta sobiapanasi ãyaʼa jaradiapanasi baera kʼãrẽta oita. Adewara ãyaʼa jaradapeadade opanasi (akʉra Hechos 15:​30, 31). Mamina idi ewadera Jeowabara, ¿sãwũã jaradiabʉ iyi pʉwʉrʉʼa kʼãrẽta oibarata?

IDI EWADERA JEOWABARA SÃWŨÃ JARADIABɄ IYI PɄWɄRɄʼA KʼÃRẼTA OITA

11. Yizata jara ũrĩbira Jeowaba sãwũã jaradia zebʉrʉta ẽbẽrarã iyi pʉwʉrʉ nãã panʉra.

¹¹ Idi ewade Jeowabara iyi pʉwʉrʉʼa kʼãrẽta oira jaradiabʉ iyi Bedʼeadeba akʉza yi warra Jesudeba. Adewara Jeowabara yi pʉwʉrʉʼa kʼãrẽta oita jaradiabʉ ẽbẽrarãneba, akʉdaya ʉ̃kʉrʉ yizarata. 1870 tẽã Charles Russellba akʉza iyiʉ̃me ãba badaraba kʼawuasida Daizeze Nokʼobara zokʼa jʉ̃drʉita 1914de (Dan. 4:​25, 26). Ãya maʉ̃ra kʼawuasida Daizeze Bedʼeade propesiarabʉdeba akʉza Jeowaba kʼarebasi baera maʉ̃ta biʼia ũrĩnamarẽã. Poaga 1914de kʼãrẽ berabaridaba ũdubisi wãrĩnu Daizeze Nokʼoba zokʼa jʉ̃drʉsita maʉ̃ poagade: maʉ̃ne berabarisi Primera Guerra Mundialta, zesi kaya zromata, jarrabata akʉza drʉa ureta (Luc. 21:​10, 11). Jeowaba maʉ̃ra kristianora kʼẽrẽpapanʉrata zokʼasi iyi pʉwʉrʉʼa jaradiaita kʼãrẽta oita.

12, 13. Mebẽrã Jeowa pʉwʉrʉ nãã edebarirabara, ¿kʼãrẽta osida Segunda Guerra Mundial zeside Daizeze bedʼea ʉ̃rʉ audre jaradiaita?

¹² Akʉdaya kʼãrẽta berabarisita Segunda Guerra Mundialde. Apocalipsis 17:8 estudiada tẽã, mebẽrã Sentral Mundialdebemaraba kʼawuasida naʉ̃ yõ berabarida tẽãra waidide ze ẽ baibasita Armagedón yõra, awuarabʉrʉ yõ wua neẽbasi baera kʼawuasida maʉ̃ne jaradiadaibarabasita Daizeze Bedʼeata. Maʉ̃ kʼarea osida eskuela Galaadʼdeta mebẽrã jaradiaita sãwũã misionerora bʼaita, mawũã ãya awuru drʉade jaradiadamarẽã. Akʉza naʉ̃ra misionerorãra zokʼa bʉesida Daizeze Bedʼea jaradiade ãyi bʉmae yõne basimina. Adewara Zõrãrã Burubiadebemarabara kongregasionʼra jõmaʉ̃nẽ ojʉ̃drʉsida Curso en el Ministerio Teocrático,b mawũã mebẽrãta nejaradiabarira bia bamarẽã. Mawũã Daizeze Bedʼea jaradiadakamae jaradiadamarẽã.

¹³ Idi ewade dayirãra naʉ̃ ewari jõbodoarepanʉmina ũdupanʉ Jeowaba sãwũã jaradiabʉta iyi pʉwʉrʉʼa kʼãrẽta oibarata. Segunda Guerra Mundialdeba Daizeze odepanʉrabara pʉwʉrʉ mejãchaʉmae jaradia zebʉda Daizeze Bedʼeara. Maʉ̃ba ẽbẽra mejãchaʉba Jeowa ʉ̃rʉ ũdukʼawuabʉda akʉza iyi ʉ̃rʉ jaradiapanʉrasida.

14. ¿Kʼãrẽa ĩjãseapanʉ Jeowaba kʼãrẽ omarẽã jarabʉ ʉ̃rʉ akʉza mebẽrã Jeowa pʉwʉrʉ nãã edepanʉraba jarabʉ ʉ̃rʉra? (Apocalipsis 2:1 akʉza akʉra potota).

¹⁴ Zõrãrã Burubiadebemarabara Jesu kʼarebata jʉrʉpanʉ. Ãyara kãgapanʉ mebẽrã kʼãrẽ oita jarabʉrʉde, naʉ̃raba ũdudamarẽã ãya jarabʉra Jeowaba kãgabʉdebʉta. Adewara ãyara zokʼapanʉ Kongregasionʼra akʉbari zõrãrãta akʉza zõrãrãta, mawũã mebẽrã jaradiaita kʼãrẽta oibarata.c Zõrãrã ʉ̃ta wãirãra Jesu juwararepanʉ (akʉra Apocalipsis 2:1). Mamina naʉ̃ra zõrãrãra kayirua obarira, maʉ̃ba ãyara edaʉde nekʼãrẽ aña opanʉ. Moisésba, Josuéba akʉza ʉ̃kʉrʉ Jesu kʼaidubemarabara edaʉde osida kayiruata (Núm. 20:12; Jos. 9:​14, 15; Rom. 3:23). Mawũãsidu Jesubara Zõrãrã Burubiadebema akʉza zõrãrã, jaradiabʉ kʼãrẽta oibarata. Iya maʉ̃ mawũã jaradiabʉra naʉ̃ drʉadebʉ jõñiena mawũã oyi (Mat. 28:20). Maʉ̃ba dayirãbara naʉ̃ra mebẽrã Jeowa pʉwʉrʉ nãã edepanʉraba jarabʉ ʉ̃rʉra ĩjãseapanʉ.

JEOWABA NEKʼÃRẼ OMARẼÃ JARABɄTA DAYIRÃBA ŨRĨPANɄBɄRɄ NEBIATA ŨDUDAYI

15, 16. ¿Mebẽrãba Jeowaba jarabʉde odadeba, kʼãrẽta kʼawuapanʉ dayirãbara?

¹⁵ Dayirãba Jeowaba jaradiabʉde opanʉbʉrʉ, nebiata ũdudayi. Bari jaradaita, Andy akʉza Robynʼʉ̃mebara osida Zõrãrã Burubiadebemaba ũrãgʼa diabʉ kĩrãkʼa, nekʼãrẽ bia mejãcha erba ẽ baita (Heb. 13:5). Ãya maʉ̃ta osida baera kʼarebasida Daizeze de parãita akʉza awuru dera Jeowa ʉ̃rʉ Kʼawuabipanʉrãneta parãita. Robynba jarabʉ: «Edaʉde daira de wikakirude bʼaibarabasi. Maʉ̃ba sama neoisida neẽbasi. Mʉ̃ara poto sakakĩrãbasi, maʉ̃ba nekʼãrẽ maʉ̃ obarita erbasi, mamina maʉ̃ra jõma nẽdoibarabasi. Mʉ̃a maʉ̃ osidera jẽgasi. Mamina mʉ̃ara Sarade kĩrãkʼa oita krĩchasi, sopʉa ẽ baita nekʼãrẽ mʉ̃a idubʉi kʼarea, awuarabʉrʉ sobiaita mʉ̃a Jeowa kʼarea, nekʼãrẽ oseabʉ kʼarea» (Heb. 11:15). Andyba Robynʼʉ̃mebara, ¿kʼãrẽ nebiata ũdusida ãya mawũã odadeba? Robynba jarabʉ: «Daira mejãcha sobiapanʉ kʼawuapanʉ baera daiba oseabʉta opanʉta Jeowa kʼarea. Daiba nekʼãrẽ Jeowaba omarẽã jarabʉta opanʉnera, krĩchapanʉ ẽjũã biade sãwũã panai ʉ̃rʉ». Andyba jarabʉ: «Daira mejãcha sobiapanʉ dai ewarita akʉza dai zareata zokʼapanʉ baera Jeowaba nekʼãrẽ omarẽã jarabʉ oita».

¹⁶ Adewara ¿kʼãrẽ awuru nebiata ũduseapanʉ Jeowaba jaradiabʉde opanʉbʉrʉ? Bari jaradaita, Marciaʼa ũrãgʼata diasida dayi nãã edebari bʼai ʉ̃rʉ. Iyi kolegiodeba ẽdrʉda tẽã maʉ̃ta oũdubikĩrãbasi (Mat. 6:33; Rom. 12:11). Iya jarabʉ: «Mʉ̃ra unibersidade poaga kimarebayeda bari estudiaseabasi. Mamina mʉ̃a Jeowadeta audre okĩrãbasi baera, krĩchasi unibersidade estudia ẽ baita, awuarabʉrʉ nekʼãrẽ awuruta okʼawuaita, mawũã trajo ũduita akʉza yi nãã edebari bʼaita. Maʉ̃ba mʉ̃ra atiara sobiabʉ yi nãã edebari obʉde akʉza mʉ̃yidobaʉba kʼawua jidaseabʉ baera kʼãrẽ ewaride trajaita, kʼarebaseabʉ Betelde akʉza nekʼãrẽ awuru Jeowaba omarẽã kãgabʉde».

17. ¿Kʼãrẽ nebiata ũdupanʉ dayirãba Jeowaba jaradiabʉde opanʉbʉrʉ? (Isaías 48:​17, 18).

¹⁷ Jeowa organizasionba dayirã ũrãgʼa diabʉbara mejãcha kʼarebabʉ. Bari jaraita dayirã jara ũrĩbipanʉ plata aukʼara kãga ẽ baibarata akʉza jara ũrĩbipanʉ kʼãrẽta oẽ baibarata mawũã Jeowaba kãgabʉ obʉta idubʉ ẽ baita. Maʉ̃ne dayirãba Jeowaba jaradiabʉta ũrĩpanʉbʉrʉ nebiata ũdudayi. Bari jaraita dayirã krĩcha aduʼa erpanañi akʉza bedʼea zromata mejãcha erpana ẽ bayi (1 Tim. 6:​9, 10). Dayirãba naʉ̃ jõma opanʉbʉrʉ, Jeowaba zokʼabʉta soiduba odayi akʉza sobiapanañi (akʉra Isaías 48:​17, 18).

18. ¿Kʼãrẽa Jeowaba jaradiabʉde okĩrãpanʉ?

¹⁸ Jeowabara ẽbẽrarãta zokʼayi dayirã jaradiaita kʼãrẽta oita zʉbʉria zroma zebʉrʉde akʉza 1.000 poagabayeda bʼaidebida (Sal 45:16). Naʉ̃ra ẽbẽrarãba dayirã nekʼãrẽ omarẽã jarabʉrʉdera, dayirãba nekʼãrẽ awuara okĩrãbʉmina, ¿ũrĩka ãya omarẽã jarabʉra? Dayirãba idiwedaʉba Jeowaba jarabʉde opanʉbʉrʉ, maʉ̃ ewaride maʉ̃ra ẽbẽrarãba jarabʉde oira zare ẽ bayi. Dayirãbara ewari jõmaʉ̃nẽ Jeowaba jaradiabʉde obʼaibara adewara Jeowa pʉwʉrʉ nãã edepanʉraba jarabʉde opanaibara (Is. 32:​1, 2; Heb. 13:17). Dayirãbara ĩjãseapanʉ Jeowa ʉ̃rʉ. Iyara dayirãra jĩga babibʉ nekʼãrẽ kayirua oideba akʉza jaradiabʉ kʼãrẽta oibarata ewari jõmaʉ̃nẽ bʼaita.