¿Sãwũã yi bedʼea panaseabʉ Jeowaba kãgabʉde?

1, 2. ¿Yi bedʼeapanʉra ʉ̃rʉ ʉ̃kʉrʉba kʼãrẽta krĩchapanʉ?

ẼBẼRARÃ yi bedʼea jʉ̃drʉbʉrʉdera mejãcha sobiabʉ, bʉa aranʉwedaʉba ẽbẽrata bedʼea erbʉbʉrʉ bʉa kãgabʉ baibara bia wãmarẽã. Mebẽrã bioʉta mawũã yi bedʼea jʉ̃drʉbʉrʉdera mejãcha sobiabʉ. Mebẽã Tiina,a Etiopíadebemaba naʉ̃ta jarabʉ: «Mʉ̃ kimaʉ̃me dai yi bedʼea jʉ̃drʉda ewarira jipade kĩrãdua ẽ, maʉ̃ba mejãcha sobiabisi baera, bedʼeapanasi baera dai bebʉde kʼãrẽta okĩrãbʉta akʉza mejãcha ipidapanasi. Mejãchade sobiasi mʉ̃ra ũdusi baera ẽbẽra mʉ̃ kãgabʉta akʉza ũdusi baera kʼai kãgaita».

² Alessio, Países Bajosdebemaba jarabʉ: «Sobiasi mʉ̃ kimaʉ̃me bedʼea jʉ̃drʉside, mamina bedʼea zromasi ũdubasi». Naʉ̃ artikulode kʼawuadayi yi bedʼeabʉraba kʼãrẽ bedʼea zroma ũduseabʉta akʉza Daizeze Bedʼearadebemaba ãyi sãwũã kʼarebaseabʉta ãyi yi bedʼeabʉde bia wãmarẽã adewara kʼawuadayi mebẽrã kongregasionebemaraba yi bedʼeapanʉra sãwũã kʼarebaseabʉta.

¿KʼÃRẼ KʼAREA YI BEDʼEAPANɄ?

3. ¿Kʼãrẽ kʼarea yi bedʼeapanʉ? (Proverbios 20:25).

³ Yiya bedʼeapanʉnera maʉ̃ba mejãcha sobiabibʉ. Yumakẽrãta yuwẽrãʉ̃me yi bedʼea jʉ̃drʉbʉrʉdera yi krĩchara baibara juwa jidaita, naʉ̃ra jemene ẽ baera. Yi bedʼeapanʉ juwa jidai ewaridera jarapanʉ yiya kãgapanaita ewari jõmaʉ̃nẽ akʉza ãyirai wawia ũdubidaita, mamina ãya maʉ̃ jarai nãã biʼia krĩchaibara (akʉra Proverbios 20:25). Yiya bedʼeabʉba kʼarebayi audre yi ũdukʼawuadaita, mawũã kʼawuaita juwa jidaita mawũã ẽ bʉrʉ juwa jida ẽãta. Ãya krĩchasibʉrʉ juwa jida ẽ baita maʉ̃ba jarakĩrãkʉ ẽ ãya kayirua osita, mawũã yi bedʼeapanʉba kʼarebasi baera kʼawuaita juwa jidaita mawũã ẽ bʉrʉ juwa jida ẽãta.

4. ¿Kʼãrẽa ʉ̃rabʉrʉ yi bedʼeapanʉra ʉ̃rʉra biʼia krĩchaibara?

⁴ Mebẽrã dobapanʉraba kĩrãbeibara naʉ̃ta, juwa jidakĩrãbʉ ẽ bʉrʉ, kʼãrẽa mebẽã abaʉ̃me yi bedʼea jʉ̃drʉita ne ẽ. Mamina dayirã jõmaʉ̃ba kĩrãbedaibara ẽbẽra ũme yi bedʼeapanʉnera kʼãrẽ kʼarea yi bedʼeapanʉta. Bari jaraita, ʉ̃kʉrʉba krĩchapanʉ ẽbẽra ũme yi bedʼeapanʉnera juwa jidadaita bedʼeapanʉta mamina, ¿yi doba bʉara maʉ̃bara sãwũã krĩchabibʉ? Mebẽã wẽrã dobabʉ Melissaba Estados Unidosdebemaba jarabʉ: «Ẽbẽra ũme yi bedʼeapanʉta ũdubʉdadera wuabema mebẽrãbara krĩchapanʉ maʉ̃rãra juwa jidaibarata, maʉ̃ kʼarea ãyi yi bedʼeapanʉta taʉbidaita krĩcha ẽ wuabemaraba sãwũã krĩchai kʼarea, ãyi bia wã ẽ mina. Maʉ̃ba ʉ̃kʉrʉbara jipa krĩchabʉ kʼaiʉ̃me bedʼea jʉ̃drʉ ẽ baita ãyi ʉ̃rʉ neida bedʼeada ẽ marẽã».

BIʼIA YI ŨDUKʼAWUAIDUA

5, 6. ¿Yi bedʼea panʉrãra kʼãrẽ ʉ̃rʉ bedʼeaibara? (1 Pedro 3:4).

⁵ Bʉa ẽbẽra abaʉta bedʼea erbʉbʉrʉ, ¿kʼãrẽba kʼarebayi bia krĩchaita juwa jidaita, mawũã ẽ bʉrʉ juwa jida ẽãta? Nãã biʼia ũdukʼawuaibara iyita. Nawedara bʉara wiña ũdukʼawuabasibaibara, mamina atiara iyiʉ̃me bedʼeabʉ baera audre ũdukʼawuayi iyi sode sãwũãbʉta (akʉra 1 Pedro 3:4). Adewara bʉra iyiʉ̃me badua bedʼeabʉ baera audre kʼawuayi iya sãwũã krĩchabʉta, iyi sode nekʼãrẽ nebia erbʉta akʉza Jeowaʉ̃me sãwũãbʉta, mawũã ewari berabari wãne bʉa kʼawuayi maʉ̃ra bʉita kima bia baseabʉta mawũã ẽ bʉrʉ kima bia ẽãta (Prov. 31:​26, 27, 30; Efes. 5:33; 1 Tim. 5:8). Adewara ũdukʼawuayi bʉa nesidabʉta diaseabʉ kʼawuaita akʉza bʉabida mawũã oseabʉ kʼawuaita akʉza kʼarebayi bʉyikʉza kʼawuaita bʉ kima bʼaiba nemitia obʉrʉde bʉa maʉ̃ta kĩrãduaseabʉ kʼawuaitab (Rom. 3:23). Mamina kĩrãbedaibara ẽbẽra bʉme bedʼeabʉra bʉ kĩrãkʼa abarika krĩchaba ẽ baibarata ewari jõmaʉ̃nẽ, awuarabʉrʉ akʉibara mara awuara krĩchapanʉmina wãrĩnu sobia baseabʉ kʼawuaita.

⁶ Adewara yi bedʼeapanʉnera, ¿kʼãrẽ ʉ̃rʉ bedʼeaibara? Bʉa ẽbẽra aba audre kãga zei nãã bʉa iyaʼa widiseabʉ iya kʼãrẽta oita krĩchabʉta. Adewara bʉ nekʼãrẽ maʉ̃ ẽbẽra ʉ̃rʉ bʉa wabida kʼawuaibarata. Bari jaraita, debe barabʉ kʼawuaita, kʼãrẽba kayabʉta akʉza iyi warraraena kʼãrẽta sãwũã berabarisita. Mamina yi bedʼea jʉ̃drʉi nãã maʉ̃ ʉ̃rʉ bedʼeaira nesida ẽ (naʉ̃ testoʉ̃me akʉra Juan 16:12). Bʉ ʉ̃rʉ wabida jara ũrĩbi amabʉbʉrʉ bʉme bedʼeabʉa jara ũrĩbira maʉ̃ta, mamina tẽãne maʉ̃ ʉ̃rʉ bedʼeai ewarisida zeyi. Maʉ̃ ewaridera bʉara wãrĩnuta jaraibara.

7. ¿Yi bedʼeapanʉrabara kʼãrẽta oseapanʉ ãyirai bia ũdukʼawuaita? (Akʉra naʉ̃ rekuadrota «Yi bedʼea bʼaita ẽbẽra jĩgabʉme» akʉza akʉra potota).

⁷ ¿Bʉara sãwũã kʼawuaseabʉ bʉme bedʼeabʉba sãwũã krĩchabʉra? Mara bedʼeabʉdadera wãrĩnuta jaraibara adewara ũrĩbara ababemaba kʼãrẽta jarabʉta akʉza bedʼeata widiseabʉ, adewara jaraibara mayi ũmeba mayi sode sãwũã krĩchabʉta (Prov. 20:5; Sant. 1:19). Adewara mayi ũmeba nekʼãrẽ oseapanʉ ãbaʉba akʉza maʉ̃ne bedʼeaseapanʉ maraba kʼawuakĩrãbʉ ʉ̃rʉ, bari jaraita, ewara eda ãba wãseapanʉ ẽbẽrarã biobʉmae nekode mawũã ẽ bʉrʉ bari ode bedʼea wãita adewara ãbaʉba Daizeze bedʼea jaradia wãseapanʉ. Adewara bʉa iyi sãwũã bʉra kʼawuaseabʉ mara mebẽrãbawara ãbabʉde akʉza mara neũdukʼawuarabawara ãbabʉde. Marabara nekĩrã bio ãbaʉba oseapanʉ, mawũã kʼawuaita sãwũãbʉta akʉza wuabemarabawara ãba baseabʉ, kʼawuaita wuabemara aba abaka sãwũã edabʉta. Akʉdaya Albert, Países Bajosdebemaba kʼãrẽta osita iyi Aliciaʉ̃me yi bedʼea jʉ̃drʉside, iya jarabʉ: «Daibara ãbaʉba nekʼãrẽ opanasi mawũã audre bia ũdukʼawuaita ababema sãwũãbʉta bari jaraita, ãba neopanasi. Dai mawũã ãbapanʉne ũdupanasi ababemaba kʼãrẽ nebia erbʉta akʉza kʼãrẽta aña obʉta».

8. Mebẽrã ʉ̃rabʉrʉ yi bedʼea panʉraba ãbaʉba Daizeze Bedʼea ʉ̃rʉ kʼawuara, ¿naʉ̃ba sãwũã kʼarebaseabʉ?

⁸ Adewara marabara ãbaʉba kʼawuaseabʉ nekʼãrẽ Daizeze Bedʼeadebema ʉ̃rʉ. Marata juwa jidaita krĩchabʉbʉrʉ maʉ̃ba kʼarebayi juwa jidabʉrʉde ewari jʉrʉdamarẽã semanaza Daizeze Bedʼea ʉ̃rʉ kʼawuaita, mawũã marabara ũdubidayi audre yibiata Jeowa neũdukʼawua bia bʼaita (Ecl. 4:12). Marata waidide juwa jida ẽ nara yumakẽrãra waidide yuwẽrã buru ẽ, mamina kʼãwũãena ãbaʉba Daizeze Bedʼeata kʼawuapanʉbʉrʉ naʉ̃ba kʼarebayi kʼawuaita aba abaka kʼãrẽãba neũdukʼawua biata Jeowaʉ̃me. Max akʉza Laysaʉ̃mera Estados Unidosdebemara, ãya jara ũrĩbipanʉ Daizeze Bedʼea ãbaʉba akʉiba sãwũã kʼarebasita. Maxba jarabʉ: «Ʉ̃rabʉrʉ yi bedʼeai ʉ̃rʉ, juwa jidai ʉ̃rʉ akʉza mebẽrãbawara sãwũã bʼai ʉ̃rʉ bedʼeaira zarea baseabʉ, mamina dai kʼãwũã ʉ̃rabʉrʉ yi bedʼea jʉ̃drʉsidade dayirã kartarane maʉ̃ ʉ̃rʉ kʼawuaiba mejãcha kʼarebasi audre biʼia bedʼeaita maʉ̃ ʉ̃rʉ».

ADEWARA KʼÃRẼ Ʉ̃RɄ BEDʼEAIBARA

9. ¿Kʼãrẽba kʼarebaseabʉ yi bedʼeapanʉraba kʼawuaita kʼaia jara ũrĩbita?

⁹ ¿Kʼaia jara ũrĩbiseabʉ yi bedʼeapanʉta? Yi bedʼeapanʉrabʉrʉ kʼawua jidaseabʉ kʼaia jaraita. Mara ʉ̃rabʉrʉ yi bedʼea jʉ̃drʉbʉrʉdera krĩchaseapanʉ ẽbẽra bioa jara ũrĩbi ẽ baita maʉ̃ ʉ̃rʉ (Prov. 17:27). Mawũã opanʉbʉrʉ naʉ̃ba kʼarebayi wuabemaraba maraʼa bedʼea bio widida ẽ marẽã adewara widida ẽ marẽã sõbede juwa jidaita. Mamina maraba mara yi bedʼeapanʉta miõʼa jara ẽ bʉrʉ naʉ̃bara wuabemaraneba jĩga wãbiseabʉ mamina kĩrãbeibara biga ẽãta ũmepai panaira, naʉ̃ba kayiruata obiseabʉ baera, mamina yibia bayi maraba mara yi bedʼeabʉ ʉ̃rʉ mebẽã abaʉa jara ũrĩbita, mawũã ũrãgʼa biata diadamarẽã maraʼa akʉza kʼarebadamarẽã (Prov. 15:22). Bari jaraita, jaraseabʉ mara mebẽrãnebema abaʉa, mara neũdukʼawua Daizeze Bedʼeadebema sãwũã oi biʼia kʼawuabʉa akʉza zõrãrã abaʉa.

10. ¿Mebẽrã yi bedʼeapanʉrabara kʼãrẽta oibara Jeowaba kãgabʉde panaita? (Proverbios 22:3).

¹⁰ ¿Mara yi bedʼeapanʉnera sãwũã Jeowaba kãgabʉde baseapanʉ? Marara mayirai audre yi ũdukʼawua wãne audre yi kãgadayi mamina, ¿kʼãrẽba kʼarebai maraba Jeowa nãã kayirua oda ẽ marẽã? (1 Cor. 6:18). Marara ũmepai doba pana ẽ baibara, ituata aukʼara doda ẽ baibara akʉza bedʼea ẽ baibara mia erkʼãĩ ʉ̃rʉ (Efes. 5:3). Maʉ̃ba audre krĩchabiseabʉ baera ãba kʼãĩta adewara zarea baseabʉ Jeowaba kãgabʉ oita, marara bedʼeaseapanʉ sãwũã mayirai yiya wawia ũdubita akʉza sãwũã oita Jeowaba kãgabʉta (akʉra Proverbios 22:3). Dawit akʉza Almazʼʉ̃mera Etiopíadebema, ãya naʉ̃ta jarabʉ: «Daira ũmepai pana ẽ basi, dai ãba wãbʉrʉdera wãpanasi ẽbẽra biobʉmae mawũã ẽ bʉrʉ dai neũdukʼawuarabawara. Mia karrode, mia dedabida ũmepai doba pana ẽ basi, naʉ̃ba kʼarebasi daiba kayirua oẽ baita».

11. ¿Adewara yi bedʼeapanʉrãra kʼãrẽ ʉ̃rʉ bedʼeaibara?

¹¹ ¿Yi bedʼeapanʉrabara ãyirai kãga ũdubiseapanʉka? Mayirai audre yi kãga wãne audre ũdubikĩrã wãñi sãwũã yi kãgapanʉta, mamina maraba aukʼara krĩchapanʉbʉrʉ ãba yi erkʼãĩ ʉ̃rʉ maʉ̃bara kʼareba ẽ bayi maraba krĩcha biata jidadamarẽã (Cant. 1:2; 2:6). Edaʉde maraba mayirai yiya kãga ũdubibʉdera nekʼãrẽ Jeowaba kãga ẽãta oseapanʉ (Prov. 6:27). Mayirai ʉ̃rabʉrʉ bedʼea jʉ̃drʉbʉrʉdera jara ũrĩbidua sãwũã yi kãga ũdubidaita Daizeze Bedʼearadebemaba jarabʉ kĩrãkʼac (1 Tes. 4:​3-7). Mayikʉza krĩchaidua naʉ̃ ʉ̃rʉ: «¿Dai sãwũã yi kãga ũdubipanʉta wuabemaraba ũdudara kʼãrẽta krĩchadai? ¿Mawũã yi kãga ũdubibʉba audre krĩchabibʉka ãba yi erkʼãĩta?».

12. Yi bedʼeapanʉrata bedʼea zroma erpanʉbʉrʉ, ¿kʼãrẽ ʉ̃rʉ wididaibara?

¹² ¿Kʼãrẽta oseapanʉ bedʼea zromata erpanʉnera? ¿Marata edaʉde yi bʉepanʉbʉrʉ maʉ̃ba jarakĩrãbʉka marara bia wã ẽãta? Maʉ̃ta jarakĩrãbʉ ẽ, edaʉde yi ʉ̃rabʉrʉ bedʼeapanʉraba akʉza juwa jidapanʉraba bedʼea zromata ũduseapanʉ baera. Juwa jidapanʉrãra biapanʉ ãyirai wawia ũdubibʉde akʉza ãyi krĩcha abarika bʉ ẽ mina jʉrʉpanʉne sãwũã bedʼea abarika zeita. Maraba kʼãwũãena bedʼea zroma ũdubʉrʉde sãwũã ara obʉba ũdubiyi mayi juwa jidabʉrʉdebida sãwũã bʼaita. Bari jaraita, ¿bedʼea abarika zeda ẽãnera ibiade bedʼeapanʉka? ¿Nemitia obʉrʉdera jarabʉka mʉ̃a osita akʉza zarea obʉka maʉ̃ta wua oẽ baita? ¿Mʉ̃a nemitia obʉrʉdera mesera widibʉka maʉ̃ta kĩrãduamarẽã akʉza maʉ̃sida kĩrãduabʉka? akʉza ¿kĩrãduabʉka ababemaba nemitia odara? (Efes. 4:​31, 32). Mara ʉ̃rabʉrʉ yi bedʼeapanʉne bedʼea abarika zeda ẽ bʉrʉ akʉza badua yi bʉepanʉbʉrʉ maʉ̃ba jarakĩrãbʉ ẽ juwa jidabʉrʉde maʉ̃ bedʼea zromara ara odaita. Mawũã yi bedʼeapanʉne ũdura maʉ̃ ẽbẽrarã bʉita ẽ basita, bʉa krĩchaseabʉ mamapai jõbita, maʉ̃ra yibia bʉita akʉza ababema ẽbẽraitabida.d

13. ¿Yi bedʼeapanʉrabara kʼãrẽ ʉ̃rʉ krĩchadaibara kʼawuaita ewari sõbe bayeda yi bedʼeapanaita?

¹³ ¿Ewari sõbe bayeda yi bedʼeapanaibara? Mesera nekʼãrẽ oita krĩchadara mawũãra bia wã ẽ bayi (Prov. 21:5). Biga bayi dããrabayeda yi bedʼeapanaita mawũã audre yi ũdukʼawuadaita, mamina biga ẽ bayi aukʼara ewari bio berabaribira. Daizeze Bedʼeaba jarabʉ: «Dayirãba jʉ̃ãbʉta mesera berabari ẽ bʉrʉ, dayi sota kayabibʉ» (Prov. 13:12). Mara audre ãbapanʉne audre krĩchadayi ãba yi erkʼãĩta akʉza maʉ̃ oẽ baira zareabayi (1 Cor. 7:9). Krĩchada ẽ baibara ewari sõbebayeda yi ũdukʼawuaita maʉ̃ ẽbẽraʉ̃me, awuarabʉrʉ krĩchaibara kʼãrẽta ũdukʼawuaita waebʉta maʉ̃ ẽbẽra ʉ̃rʉ, mawũã bia krĩchaita maʉ̃me juwa jidaita mawũã ẽ bʉrʉ juwa jida ẽãta.

¿WUABEMARABARA SÃWŨÃ KʼAREBASEAPANɄ YI BEDʼEAPANɄRÃRA?

14. ¿Wuabemarabara sãwũã kʼarebaseapanʉ yi bedʼeapanʉrãra? (Akʉra potota).

¹⁴ Dayirãba ũdukʼawuapanʉbʉrʉ mebẽrã ũme yi bedʼeapanʉta, ¿dayirãbara sãwũã kʼarebaseabʉ? Dayirãbara trʉ̃seabʉ dayirã deidu neko zemarẽã, semanaza mebẽrãbawara Jeowa ʉ̃rʉ kʼawuapanʉne ãyisida edapanamarẽã, mawũã ẽ bʉrʉ ãyibawara jemenene wãseapanʉ (Rom. 12:13). Mawũã odara kʼarebadayi ãyirai audre yi ũdukʼawuadamarẽã. Ãya bʉ kʼarebata nesidabʉbʉrʉ ãyi doba pana ẽ baita, bʉra ãyibawara wãseabʉ ewara eda wãbʉrʉde akʉza ãyibawara wãseabʉ karrode akʉza bʉ deda jʉ̃ẽmarẽã trʉ̃seabʉ mawũã ũmepai pana ẽ marẽã (Gál. 6:10). Aliciaba jara ũrĩbibʉ iyi Albertʼʉ̃me sãwũã berabaridata, iya jarabʉ: «Daira mejãcha sobiabasi ʉ̃kʉrʉ mebẽrãba jarasidade ãyi deidu jʉ̃ẽseabasita mawũã audre yi ũdukʼawuadaita akʉza doba pana ẽ marẽã». Yi bedʼeapanʉba bʉaʼa jarara ãyibawara wãmarẽã mawũã ãyi doba ama ẽ baita, bʉta ãyibawara wãra bʉara ãyita mejãcha kʼarebayi audre yi ũdukʼawuadamarẽã. Mamina jʉra kʼawuabara ãyi ũmepai amae ẽ baita, mamina maʉ̃ daucha aukʼara ewari jõmaʉ̃nẽ ãyi kʼawa barãra mawũã iduaribita ãyirai bedʼeadamarẽã audre yi ũdukʼawuadaita (Filip. 2:4).

15. ¿Kʼãrẽta oseabʉ wuabemarabara yi bedʼeapanʉra barira? (Proverbios 12:18).

¹⁵ Yi yi bedʼeapanʉrãra dayirãbara kʼarebaseabʉ bia krĩcha kʼãrãpe ãyaʼa kʼãrẽ jarabʉrʉde. Edaʉde biga bayi daya kʼãrẽ jara ẽ baita, mawũã oira biga bayi dayi kakua bia zokʼaita (akʉra Proverbios 12:18). Dayirãba kʼawuabʉrʉde ẽbẽra ũme yi bedʼeapanʉta edaʉde dayirãbara wuabema ẽbẽrarã jarakĩrãbʉ maʉ̃ta, mamina yibia bayi mawũã oẽ baita iduaribidaibara ãyareba jaradamarẽã, adewara wuabemara ãyi ʉ̃rʉ imitia bedʼea ẽ baibara akʉza sewa nebʉrata jara ẽ baibara (Prov. 20:19; Rom. 14:10; 1 Tes. 4:11). Akʉza bʉa kʼãrẽ jarabʉdeba adewara kʼãrẽ widibʉdeba krĩchabirãra yi ʉ̃rabʉrʉ bedʼeapanʉra ãyira juwa jidaibarata. Mebẽã Eliseba yi kimaʉ̃meba naʉ̃ta jarabʉ: «Daira mejãcha so perapanasi wuabemaraba daiʼa widipanaside dai sõbede juwa jidaita, daira maʉ̃ ʉ̃rʉra mia kʼãrẽsida bedʼeada ẽ basi baera».

16. Yi ʉ̃rabʉrʉ bedʼeapanʉrata wua yi bedʼeada ẽ bʉrʉ, ¿kʼãrẽta krĩchada ẽ baibara dayirãbara?

¹⁶ Ʉ̃rabʉrʉ yi bedʼeapanʉta wua yi bedʼeada ẽ bʉrʉ maʉ̃ kʼarea ãyaʼa widida ẽ baibara kʼãrẽa yi idubʉsidata, mawũã ẽ bʉrʉ jara ẽ baibara abaʉdebemaba aña osi baera mawũã berabarisita (1 Ped. 4:15). Mebẽã Leaba naʉ̃ta jarabʉ: «Mʉ̃a ũrĩsi awururaba mʉ̃ ʉ̃rʉ jarapanʉta kʼãrẽa mʉ̃me bedʼeabʉme yi idubʉsidata, maʉ̃ kʼarea mʉ̃ra mejãcha sopʉabasi». Ʉ̃rabʉrʉ yi bedʼea panʉnebemata wua yi bedʼeada ẽ bʉrʉ, maʉ̃ kʼarea krĩchabeda ẽ dayirãbara ãyara bia krĩcha kʼãrãpe yi bedʼea jʉ̃drʉda ẽ basita, awuarabʉrʉ kĩrãbedaibara ʉ̃rabʉrʉ yi bedʼeabʉbara kʼarebabʉta mebẽrãba kʼawuaita maʉ̃ ẽbẽrãʉ̃me juwa jidaita mawũã ẽ bʉrʉ juwa jida ẽãta. Mawũã yi bedʼeapanʉnebemata wua bedʼeada ẽãnera naʉ̃ba ãyira mejãcha sopʉabiseabʉ akʉza abapaibʉta krĩchabibʉ, maʉ̃ kʼarea dayirãbara jʉrʉdaibara ãyi sãwũã kʼarebadaita (Prov. 17:17).

17. ¿Kʼãrẽta oita krĩchapanaibara yi bedʼeapanʉrãra?

¹⁷ Dayirãba kʼawua zebʉrʉ kĩrãkʼa yi bedʼeapanʉrabara ũduseabʉ bedʼea zromata, mamina maʉ̃ daucha mejãcha sobiapanaseabʉ. Jessicaba jarabʉ: «Yi bedʼea jʉ̃drʉbʉrʉdera bedʼea zroma ũdubʉmina daira mejãcha sobiapanʉ ewari bio berabaribisi baera dai bia yi ũdukʼawuadaita». Bʉta ẽbẽra abaʉme bedʼeabʉbʉrʉ zarea ora audre bia ũdukʼawuaita, mawũã odara bia krĩchada kʼãrãpe jidadayi.