Sãwũã ũduseabʉ kima biara

1, 2. (1) ¿Kʼaita bʉ nobio bai jʉrʉinara bʉara kʼãrẽta oibara? (2) ¿Kʼãrẽta jarakĩrãbʉ bedʼea nobiobara? (Akʉra «Bedʼea audre yibia jara ũrĩbibʉta»).

¿JUWA jidakĩrãbʉka bʉra? Wãrĩnubaira dayi sobia bʼaira juwa jidaibara ẽ, mawũãsidu ʉ̃kʉrʉ mebẽrã warrara panʉrata akʉza zõrãrã panʉrata doba panʉnera ãyara kima biata ũdukĩrãpanʉ. Kʼaita bʉ nobio bʼaita jʉrʉi nawedara bʉra Jeowa neũdukʼawua bia bʼaibara akʉza bʉyikʉza biʼia ũdukʼawuaibara. Adewara kʼawuabaibara sãwũã biʼia akʉita bʉ kimata mawũã iya nesidabʉ diaitaa (1 Cor. 7:36). Bʉa maʉ̃ta obʉbʉrʉ juwa jidabʉrʉdera sobia bayi.

² Mamina daya kima bia ũduira zareabʉ (Prov. 31:10). Adewara bʉa kãgabʉa, bʉ nobio bamarẽã mawũã ẽ bʉrʉ nobia bamarẽã jaraisida zareabʉ.b Naʉ̃ artikulode kʼawuadayi sãwũã dobabʉba kima bia ũduita mawũã maʉ̃me bedʼea jʉ̃drʉ kʼãrãpe yi nobio ba zemarẽã, tẽã jʉ̃neane ãyi juwa jidadaita. Adewara kʼawuadayi mebẽrã kongregasionebemaba sãwũã kʼarebaseabʉta yi juwa jidakĩrãbʉta.

KʼÃRẼBA KʼAREBASEABɄ KIMA BIA ŨDUITA

3. ¿Doba panʉrabara kʼãrẽ ʉ̃rʉ biʼia krĩchaibara ẽbẽra abaʉ̃me yi bedʼea jʉ̃drʉi nãã?

³ Bʉta juwa jidakĩrãbʉbʉrʉ biʼia kʼawuabaibara sãwũã bamarẽã kãgabʉta ẽbẽra bʉ kima bʼaira. Bʉa maʉ̃ta biʼia kʼawua ẽ bʉrʉ, badu ẽbẽraʉ̃me bedʼea jʉ̃drʉtotoseabʉ, maʉ̃ ẽbẽra bʉita biga ẽ mina. Mamina ẽbẽra bʉ kima bʼaira buru kʼoe bʼaibara (1 Cor. 7:39). Mamina bʉta ẽbẽra abaʉ̃me juwa jidaira maʉ̃ ẽbẽrarã bari buru kʼoe bʼaibara ẽ. Biga bayi bʉa naʉ̃ ʉ̃rʉ bʉyikʉza widita: «¿Mʉ̃ara kʼãrẽta kãgabʉ? ¿Mʉ̃ kima bʼaiba kʼãrẽ nebiata erbamarẽã kãgabʉ? ¿Mʉ̃ara jʉ̃ãbʉka mʉ̃ kima bʼaira aukʼara ẽbẽra bia bamarẽã?».

4. ¿Ʉ̃kʉrʉ mebẽrãbara kʼãrẽta jarapanʉ ãyi Jeowaʼa yiwidʼibʉrʉdera?

⁴ Bʉta juwa jidakĩrãbʉbʉrʉ maʉ̃ kʼarea Jeowaʼa yiwidʼibʉ bʼaibara (Filip. 4:6). Jeowabara dayirã jara ẽ kima diaita, mamina iya biʼia kʼawuabʉ dayirãba kʼãrẽ nesidabʉta akʉza dayirã sãwũã sentibʉra, maʉ̃ba iyara akʉita jarabʉ. Adewara iya kʼarebayi dayirãba kima bia ũduyeda. Maʉ̃ kʼarea bʉa iyaʼa bʉ sãwũã sentibʉta akʉza bʉa kʼãrẽ kãgabʉ ʉ̃rʉ jara ũrĩbibʉta idubʉrãra (Sal. 62:8). Jeowaʼa widira kʼarebamarẽã bʉa jʉ̃ã kʼawuabʉta ũdubita akʉza buru biata diamarẽã (Sant. 1:5). Mebẽã Juanʼrac dobabʉ, iyira Estados Unidosdebema. Iya jara ũrĩbibʉ iya kʼãrẽta jarabʉta Jeowaʼa yiwidʼibʉrʉde: «Mʉ̃a Jeowaʼa jara ũrĩbibʉ sãwũã bamarẽã kãgabʉta mʉ̃ kima ba zeita akʉza widibʉ kʼarebamarẽã ũduita maʉ̃ ẽbẽra wẽrãʉ̃me sãwũã bedʼeaita. Adewara kʼarebamarẽã mʉ̃abida nebiata ũdubita mawũã kima bia bʼaita». Mebẽã Tanya Sri Lankadebemaba jarabʉ: «Mʉ̃a saʉ̃ta mʉ̃ kima bai jʉrʉbʉeda, Jeowaʼa widibʉ kʼarebamarẽã mʉ̃ iyiare kʼẽrẽpa bʼaita, nebia ʉ̃rʉ krĩchaita akʉza sobiababimarẽã». Mawũãsidu bʉa saʉ̃ta bʉ kima bʼaita ũdu ẽ bʉrʉ, Jeowabara jarabʉ iyara kʼareba bʼaita sobia bʼaita akʉza krĩcha bia erbaita (Sal. 55:22).

5. ¿Mebẽrã dobapanʉrabara sãwũã ũdukʼawuaseabʉ mebẽã Jeowa ode kʼẽrẽpabʉra? (1 Corintios 15:58 akʉza akʉra potota).

⁵ Daizeze Bedʼeade jarabʉ zarea odamarẽã ewari jõmaʉ̃nẽ Daizezeba zokʼabʉ oita (akʉra 1 Corintios 15:58). Bʉta ewariza trajabʉbʉrʉ Jeowaba zokʼabʉ oita, mawũãra ãba baseabʉ mebẽrã kʼẽrẽpapanʉme, adewara maʉ̃ra mebẽrãne ũdukʼawuaseabʉ mebẽã aba bʉ kĩrãkʼa krĩchabʉta, ewari jõmaʉ̃nẽ Jeowaba kãgabʉ okĩrãbʉta, mõbe maʉ̃me yi bedʼea jʉ̃drʉseabʉ. Akʉza bʉta zarea obʉbʉrʉ ewari jõmaʉ̃nẽ Jeowata sobiabita naʉ̃ba kʼarebayi bʉ wãrĩnu sobia bʼaita.

6. ¿Mebẽrã juwa jidakĩrãpanʉrãbara kʼãrẽta kĩrãbedaibara?

⁶ Mamina jʉra kʼawua panaibara, aukʼara krĩchada ẽ baibara kʼaiʉ̃me juwa jidai ʉ̃rʉ (Filip. 1:10). Wãrĩnu sobia bʼaira juwa jidachʉaibara ẽ, awuarabʉrʉ, dayi wãrĩnu sobia bʼaira Jeowa neũdukʼawua bia baibara (Mat. 5:3). Mamina bʉ waidide dobabʉedara audre trajaseabʉ Jeowaita (1 Cor. 7:​32, 33). Zarea ora bʉ ewari bia zokʼa kʼawuaita. Mebẽã Jessica Estados Unidosdebemara juwa jidasi 40 poaga babodode. Iya jarabʉ: «Mʉ̃ra mejãcha zarea obasi jaradia wãita, naʉ̃ba kʼarebasi sobia bʼaita waidide juwa jida ẽ nãã».

ZAREA ORA BIʼIA ŨDUKʼAWUAITA BɄ KIMA BʼAIRA

7. Ẽbẽra abaʉa iyi kãgabʉta ñabasea jaraikaʉde, ¿kʼãrẽa yibia bai nãã ũdukʼawuaita maʉ̃ ẽbẽrarã? (Proverbios 13:16).

⁷ Bʉa ũdusibʉrʉ ẽbẽra aba bʉmabʉta, ¿ñabasea jara wãibaraka bʉa iyira kãgata? Daizeze Bedʼeaba jarabʉ yi buru biabara naena bia krĩchabʉta kʼãrẽ oita (akʉra Proverbios 13:16). Bʉa ẽbẽra abaʉta ũdukʼawuakĩrãbʉrʉ iyiʉ̃me bedʼeaibara ẽ, mawũã ẽ bʉrʉ ãba bʼaibara ẽ. Awuarabʉrʉ jĩgaʉba ũdukʼawuaseabʉ. Bari jaraita, akʉseabʉ iyi sãwũã bʉta, iya wuabemara sãwũã edabʉta ãba yi jʉrebʉde mawũã ẽ bʉrʉ nekʼãrẽ awuru obʉde. Albert Países Bajosdebemaba jarabʉ: «Jʉra kʼawuabaibara ẽbẽra daya ũdudogoʉ̃me bedʼea jʉ̃drʉtoto ẽ baita, awuarabʉrʉ zarea oibara maʉ̃ ẽbẽra nãã bia ũdukʼawuaita». Adewara bʉa ẽbẽra aba jĩgaʉba akʉbʉba kʼarebaseabʉ ũduita maʉ̃ ẽbẽrarã bʉita ẽ basita.

8. ¿Ẽbẽra dobabʉbara sãwũã jĩgaʉba ũdukʼawuaseabʉ iyi kima bʼaira? (Akʉra potota).

⁸ ¿Kʼãrẽta oseabʉ bʉa maʉ̃ ẽbẽra jĩgaʉba ũdukʼawuaira? Ãba yi jʉrebarima wãbʉrʉde mawũã ẽ bʉrʉ mebẽrã kongregasionebemarabawara ãbabʉde, maʉ̃ ẽbẽraba nekʼãrẽ obʉdeba bʉa kʼawuaseabʉ iyi Jeowaʉ̃me sãwũã bʉta, iyi sode iya kʼãrẽ nebia erbʉta, adewara iyi sãwũãchʉta. Maʉ̃ awuara, bʉa ũdu kʼawuaseabʉ maʉ̃ ẽbẽra neũdukʼawuara saʉ̃rasida akʉza ãyi kʼãrẽ ʉ̃rʉ bedʼabʉta (Luc. 6:45). Bʉa ẽbẽra ũdukʼawuakĩrãbʉbara, ¿nekʼãrẽ bʉa okĩrãta abarika okĩrãbʉka? Zõrãrã iyi kongregasionebema widiseabʉ iyi ʉ̃rʉ, mawũã ẽ bʉrʉ mebẽã maʉ̃ ẽbẽra biʼia ũdukʼawuabʉa widiseabʉ (Prov. 20:18). Adewara widiseabʉ iya kʼãrẽ nebia erbʉta akʉza wuabemaraba iyi sãwũã akʉbʉta (Rut 2:11). Mamina bʉa maʉ̃ ẽbẽra jĩgaʉba ũdukʼawuanʉmʉnera, zarea ora ewari jõmaʉ̃nẽ iyi kʼawuachʉa ẽ bʼaita mawũã ẽ bʉrʉ iyi ʉ̃rʉ jõma widinʉmaita maʉ̃bara mitia sentibiseabʉ baera maʉ̃ ẽbẽrata.

9. ¿Ẽbẽra abaʉme bedʼea jʉ̃drʉkĩrãbʉbʉrʉ kʼãrẽta kʼawuabaibara?

⁹ Ẽbẽra aba bʉma chʉta ũdura, ¿ewari sõbe bayeda jĩgaʉba akʉibara bʉa maʉ̃ ẽbẽrarã mawũã iyaʼa jara ũrĩbita bʉa iyira kãgachʉta? Bʉa maʉ̃ ẽbẽraʼa ñabasea jarara iyi kãgachʉta, maʉ̃ ẽbẽrabara krĩchaseabʉ bʉara nekʼãrẽ oita jidai nãã bia krĩcha ẽãta (Prov. 29:20). Mamina bʉa maʉ̃ ẽbẽraʼa iyi kãgachʉta jaraita ewari bio berabaribira akʉza aukʼara krĩchabʉbʉrʉ maʉ̃ jaraita, adewara maʉ̃ ẽbẽraba kʼawuara bʉa iyi kãgachʉta mawũãra krĩchaseabʉ bʉara bia kʼawua ẽãta kʼãrẽta okĩrãbʉta (Ecl. 11:4). Ẽbẽra abaʉ̃me iyi bedʼea jʉ̃drʉi nããra bʉa biʼia kʼawuabaibara bʉra wãrĩnu juwa jidakĩrãbʉta akʉza biʼia kʼawuabaibara maʉ̃ ẽbẽrarã wãrĩnu bʉma bʉta. Mamina kĩrãbeibara maʉ̃ba jarakĩrãkʉ ẽãta bʉra maʉ̃ ẽbẽraʉ̃me juwa jidaibarata.

10. ¿Kʼãrẽta oi bʉa kʼawuara ẽbẽra abaʉba bʉ kãgachʉta, mamina bʉa iyita kãga ẽ bʉrʉ?

¹⁰ Bʉa kʼawuara ẽbẽra abaʉba bʉ kãgachʉta ¿Kʼãrẽta oi maʉ̃ne? Maʉ̃ ẽbẽrata bʉa kãgachʉ ẽ bʉrʉ zarea ora bʉa nekʼãrẽ obʉdeba ũdubita iyira kãga ẽãta. Jipade mitia ũduchʉayi bʉa ẽbẽra aba kãga ẽãta, maʉ̃a ũdubira iya kãgachʉ kĩrãkʼa (1 Cor. 10:24; Efes. 4:25).

11. Ʉ̃kʉrʉ drʉadera awururaba kima jʉrʉ diapanʉ ẽbẽrarã dobapanʉrãra. Ãyara maʉ̃nera, ¿kʼãrẽ ʉ̃rʉ krĩchaibara?

¹¹ Ʉ̃kʉrʉ drʉadera yibariraba mawũã ẽ bʉrʉ awuru zõrãrã ãyi mebẽrãnebemaba kima jʉrʉbʉ yi doba panʉraita. Adewara awuru drʉade yi mebẽrãba mawũã ẽ bʉrʉ yi neũdukʼawuaraba jʉrʉbʉ saʉ̃ta kima bia ba zeseabʉta yi doba bʉita. Mõbe ãya jʉrʉbʉ sãwũã yumakẽrã doba bʉta yi yuwẽrã dobabʉme yi ũdumarẽã, ãya kʼawuadamarẽã maʉ̃ne yi bedʼea jʉ̃drʉseabʉ kʼawuaita. Bʉaʼa jaradara bʉ neũdukʼawuaita kima biata jʉrʉmarẽã, bʉara bia krĩchaibara bʉ neũdukʼawuaba akʉza yi ababema ẽbẽraba kʼãrẽta nesidabʉta akʉza kʼãrẽta kãgabʉta. Maʉ̃ne bʉa ũdura ẽbẽra aba bʉ neũdukʼawuaita kima bia ba zeseabʉta, ũdukʼawuara maʉ̃ ẽbẽra sãwũãchʉta akʉza akʉra maʉ̃ ẽbẽrarã Jeowa neũdukʼawua bia kʼawuaita. Wãrĩnu bʼaira, audre yibia Jeowa neũdukʼawua bʼaita plata mejãcha erbaira, estudio bia erbaira akʉza nebia mejãcha erbaira. Mawũãsidu kĩrãbedaibara yi yumakẽrã doba bʉbʉrʉ akʉza yuwẽrã doba bʉbʉrʉ kʼawua jidaita iyira maʉ̃ ẽbẽraʉ̃me juwa jidakĩrãbʉ kʼawuaita (Gál. 6:5).

SÃWŨÃ ẼBẼRA ABAɄME YI BEDʼEA JɄ̃DRɄITA

12. ¿Bʉa ẽbẽra aba kãgabʉbʉrʉ kʼãrẽta oseabʉ iyiʉ̃me bedʼea jʉ̃drʉita?

¹² Bʉa ẽbẽra abaʉa jarakĩrãbʉbʉrʉ bʉra iyiʉ̃me bedʼea jʉ̃drʉkĩrãbʉta, ¿kʼãrẽta oseabʉ?d Jʉrʉseabʉ sãwũã bedʼeaita maʉ̃ ẽbẽraʉ̃me selulardeba, mawũã ẽ bʉrʉ ẽbẽra bio bʉmae. Biʼia jara ũrĩbira maʉ̃ ẽbẽraʼa bʉa iyira kãgabʉta akʉza audre ũdukʼawuakĩrãbʉta (1 Cor. 14:9). Adewara jʉ̃ãrãra maʉ̃ ẽbẽraba mesera panʉmarẽã bʉa widikʉta (Prov. 15:28). Akʉza iya bʉaʼa jarara iyara bʉra kãga ẽãta wua bedʼearãra iyiʉ̃me maʉ̃ ʉ̃rʉ.

13. ¿Ẽbẽra abaʉba jarara bʉ kãgabʉta kʼãrẽta oi bʉara? (Colosenses 4:6).

¹³ ¿Kʼãrẽta oi ẽbẽra abaʉba bʉaʼa jarara iya bʉ kãgachʉta? Naʉ̃ mebẽãba bʉaʼa maʉ̃ jaraira zowaĩnĩgʉata nesidabasi bʼaibara, maʉ̃ kʼarea ibiade panʉra akʉza wawia ũdubira iyaʼa (akʉra Colosenses 4:6). Mamina bʉa maʉ̃ ʉ̃rʉ mebẽã mesera panʉ be ẽ bʉrʉ, iyaʼa widira jʉ̃ãmarẽã bʉa bia krĩchaita mawũã panʉita. Mamina ewari bio berabaribirãra iya widida panʉita, meserabai panʉra (Prov. 13:12). Mamina bʉa maʉ̃ ẽbẽrata kãga ẽ bʉrʉ ibiade jara ũrĩbira bʉara kãga ẽãta iyira. Akʉdaya mebẽã Hans Austriadebemaba kʼãrẽta osita mebẽã wẽrã abaʉba iyi kãgabʉ jaraside. Iya jarabʉ: «Iya mʉ̃aʼa maʉ̃ jarasidera, mʉ̃ara ibiade jara ũrĩbisi mʉ̃a iyira kãgabʉ ẽãta. Adewara mesera panʉsi mʉ̃a. Mawũã iya krĩcha ẽ marẽã mʉ̃a iyira kãga zeseabʉta, maʉ̃ kʼarea mʉ̃a kʼãrẽ obʉdeba akʉza kʼãrẽ jarabʉdeba ũdubisi jipa krĩcha ẽãta iyi kãgaita». Mamina bʉa iyita kãgabʉbʉrʉ, iyaʼa jarada bʉra iyiʉ̃me bedʼea jʉ̃drʉkĩrãbʉta akʉza jara ũrĩbira bʉa kʼãrẽta kãgabʉta akʉza mara bedʼea bʉeda kʼãrẽta berabarimarẽã kãgabʉta. Edaʉde mara yi bedʼea jʉ̃drʉbʉrʉde kʼãrẽ berabarimarẽã kãgabʉdera mãyi ũmeba awuara krĩchabaseabʉ mãyi ũmena awuara dapʉẽsida baera akʉza awuru kulturadebema baera.

SÃWŨÃ KʼAREBASEAPANɄ YI DOBA BɄRA

14. ¿Kʼãrẽ bedʼea biata jaraibara mebẽrã doba panʉra kʼarebaita?

¹⁴ Dayirãbara, ¿sãwũã kʼarebaseapanʉ mebẽrã dobabʉ mia kʼãĩkĩrãbʉra? Maʉ̃itara dayirãra jʉra kʼawua bedʼeaibara (Efes. 4:29). Dayirãbara naʉ̃ ʉ̃rʉ krĩchaibara, ¿mʉ̃a ijaramia jarabʉdeba mawũã ẽ bʉrʉ mʉ̃a bedʼea jarabʉdeba sopʉa sentibibʉka maʉ̃ mebẽãra, mawũã ẽ bʉrʉ mʉ̃a jarabʉdeba ãyaʼa krĩchabibʉka ãyira juwa jidaibarata? Mʉ̃a ũdubʉrʉde mebẽrã doba panʉrata yiya bedʼeakʉanʉta maʉ̃nera, ¿krĩchadogoka ãyira yi kãgakʉ panʉta? (1 Tim. 5:13). Adewara zarea odaibara mebẽrã doba panʉra krĩchabi ẽ baita biga ẽãta ãyi waidide doba bʼaira. Hansba naʉ̃ta jarabʉ: «Ʉ̃kʉrʉ mebẽrãba jaraseabʉ ‹bʉra kʼãrẽa waidide mia kʼãĩ ẽ, bʉra warrara ẽ›, naʉ̃ra bedʼeara mawũã jarabʉba sopʉa sentibiseabʉ mebẽrãra, mawũã ẽ bʉrʉ ãyaʼa krĩchabiseabʉ ãyira juwa jidaibarata». Mawũã jaraikaʉde zarea odaibara mebẽrã doba panʉra biga diaita ãyi kʼãwũã zarea obʉ baera doba bʼaita (1 Tes. 5:11).

15. (1) Romanos 15:2ba jarabʉdebara, ¿kʼãrẽ ʉ̃rʉ krĩchaibara mebẽrã kima jʉrʉ diai nãã? (Akʉra potota). (2) Bideode ũdudadera ¿bʉitara kʼãrẽta audre yibia basi?

¹⁵ Dayirãba krĩchapanʉbʉrʉ mebẽã aba kima bia ba zeseabʉta mebẽã wẽrã abaʉita maʉ̃nera, ¿kʼãrẽta oi? Daizeze Bedʼeaba jarabʉ dayirãbara krĩchaibarata awuru ẽbẽrasida sãwũã sentibʉ ʉ̃rʉ (akʉra Romanos 15:2). Ʉ̃kʉrʉ mebẽrã doba panʉrabara kãga ẽ ãyaʼa kima jʉrʉ diadamarẽãra. Maʉ̃ kʼarea wawiaibara ãya kʼãrẽ oi jidabʉra (2 Tes. 3:11). Edaʉde ʉ̃kʉrʉ mebẽrãbara kãga ãyaʼa kima jʉrʉ diadamarẽãra, mamina ãya dayirãʼa kʼarebamarẽã jara ẽ nebara, jara ẽ baibara kʼaiʉ̃me mia kʼãĩbaratae (Prov. 3:27). Ʉ̃kʉrʉ mebẽrãbara kãga ãyi kʼarebadaira mamina kãga ẽ mebẽã doba bʉʼa jaramarẽã ãyira juwa jidakĩrãbʉta. Mebẽã Lydia Alemanianebemaba jarabʉ: «Bʉa trʉ̃seabʉ mebẽã yumakẽrãta akʉza yuwẽrãta bʉ deda awuru mebẽrãbawara neko jʉ̃ẽmarẽã, maʉ̃ne ãyira yi ũdukʼawuaseabʉ akʉza tẽã krĩchaseapanʉ yi bedʼea jʉ̃drʉita mawũã ẽ bʉrʉ yi bedʼea jʉ̃drʉda ẽ baita».

16. Mebẽrã doba panʉrabara, ¿kʼãrẽta kĩrãbeibara?

¹⁶ Dayirã juwa jidapanʉta mawũã ẽ bʉrʉ doba panʉta jõmaʉ̃ta sobia baseapanʉ (Sal. 128:1). Bʉta juwa jidakĩrãbʉbʉrʉ mamina waidide ũdu ẽ bʉrʉ kʼaiʉ̃me juwa jidaita, zarea ora ewariza trajaita Daizezeita. Sin Yi Macaodebemaba jarabʉ: «Idi bʉ kʼãwũã doba bʉeda bia zokʼara bʉ ewarira, ẽjũã kĩrãwãreã zebʉrʉdera audre ewari erbai baera bʉ kimaʉ̃me ãba bʼaita idi bʉira». Mamina bʉa ũdusibʉrʉ kʼaita bʉ kima baseabʉta akʉza maʉ̃me yi bedʼea jʉ̃drʉsibʉrʉ, wuarebema artikuloba kʼarebayi. Namara jara ũrĩbi baera kʼãrẽta oibarata yi bedʼea panʉne mawũã Jeowaba kãgabʉde oita.