Sadoc kĩrãkʼa zowaĩnĩgʉa bara

1, 2. ¿Kʼai basi Sadocʼra? (1 Crónicas 12:​22, 26-28).

KRĨCHARA naʉ̃ta, 340.000 ẽbẽrarã ãba yi jʉrepanʉ David nokʼo babidaita. Yumakẽrãra katuma Hebrón kʼawa bʉmae panasi ewari ũbeabayeda, mama ãyira ipidapanasi, bedʼeapanasi akʉza trãpanasi trãbira Jeowa ʉ̃rʉ ibia bedʼeabʉta (1 Crón. 12:39). Maʉ̃rane eda basi yumakẽrã warrarata, iyira Sadoc basi. Ẽbẽrarã mejãchaʉba ũdʉadʉa basi iyira, mawũãsidu Jeowaba kãgabasi iyira wuabemarabida ũdukʼawuadamarẽã (akʉra 1 Crónicas 12:​22, 26-28). Mamina, ¿kʼai basi Sadocʼra?

² Sadocʼra saserdote basi, iyira ãba trajabasi sumo saserdote Abiatarʼʉ̃me. Jeowabara Sadocʼara buru biata diasi mawũã iya bia ũrĩmarẽã Jeowaba kʼãrẽta oita krĩchabʉta (2 Sam. 15:27). Ẽbẽra mejãchaʉta iyidʉ jʉ̃ẽpanasi mawũã ũrãgʼa biata diamarẽã ãyaʼa. Adewara iyira zowaĩnĩgʉa basi. Naʉ̃ artikulode bedʼeadayi zowaĩnĩgʉa bʼai ʉ̃rʉ.

3. (1) ¿Kʼãrẽa zowaĩnĩgʉa panaibara? (2) ¿Kʼãrẽta akʉdai naʉ̃ artikulode?

³ Naʉ̃ ewari jõbodoarera Diarubara audre jʉrʉbʉ sãwũã zʉbʉria oita Jeowa ode panʉrãra (1 Ped. 5:8). Jeowaba Diaru beaita akʉza nekʼãrẽ kayiruara naʉ̃ drʉade bʉ jõbita jʉ̃ãpanʉenara, dayirãbara nesidayi zowaĩnĩgʉa erbʉ ũdubita (Sal. 31:24). Naʉ̃ artikulode akʉdayi sãwũã Sadocde kĩrãkʼa zowaĩnĩgʉa erbʉta ũdubiseapanʉta nekʼãrẽ ũbeade.

JEOWA NOKʼOARE BARA

4. ¿Kʼãrẽa zowaĩnĩgʉa bʼaita nesidapanʉ Daizeze Nokʼoare bʼaira? (Akʉra potota).

⁴ Jeowa ode panʉra jõmaʉ̃ta Daizeze Nokʼoare bakĩrãpanʉ, mamina maʉ̃itara jõmaʉ̃ba nesidapanʉ zowaĩnĩgʉa bʼaita (Mat. 6:33). Bari jaraita, naʉ̃ drʉadera yi kayiruata audre eaba wã baera Jeowa ode panʉrabara zowaĩnĩgʉa ũdubita nesidapanʉ Jeowaba kãgabʉde bʼaita akʉza Daizeze Nokʼo ʉ̃rʉ jaradiaita (1 Tes. 2:2). Idi ewadera ẽbẽrarã aba abakaʉba jidabʉ ãyi politikade kʼaiare bʼaita, maʉ̃ba Jeowa ode panʉraitara zarea baseabʉ kʼaiare bʉ ẽãta ũdubira (Juan 18:36). Mejãcha mebẽrã Jeowa ode panʉraba ĩjãna ẽ baera politikade eda wãita, mawũã ẽ bʉrʉ gorogororane eda wãita maʉ̃ kʼarea nokʼrabara plata diada ẽ ãya, zʉbʉria opanʉ adewara karsel eda edepanʉ.

5. ¿Kʼãrẽa Sadocʼra zowaĩnĩgʉa baibarabasi Davidʼare bʼaira?

⁵ Sadoc Hebrónʼena jʉ̃ẽsidera bari David nokʼo babibarabʉta akʉ jʉ̃ẽ ẽ basi, iyi wãsidera nekʼãrẽ yõena edebarisida edesi akʉza yõibarabasibʉrʉ yõña awa wãsi (1 Crón. 12:38). Davidta yõena wãibarabasibʉrʉ Sadocʼra mama wãña awa basi akʉza Israelta iyi nejʉradeba ẽdrʉbiya awa basi. Iyira mejãcha yõ kʼawua ba ẽ basibaibara, mamina zowaĩnĩgʉata mejãcha erbasi.

6. ¿Kʼãrẽ yiza biata diasi Davidbara Sadocʼa? (Salmo 138:3).

⁶ ¿Kʼãrẽba kʼarebasi Sadoc mawũã zowaĩnĩgʉa bamarẽãra? Iyira mejãcha kʼarebasibaibara awuru ẽbẽrarã iyi ewaridebemara zarea pananaba akʉza zowaĩnĩgʉa pananaraba. Maʉ̃ra yiza biadebemara Davidbasi. Israel pʉwʉrʉ yõena wãnera Davidba nãã jʉre edebasi, mõbe iyara zowaĩnĩgʉata ũdubibasi. Maʉ̃ kʼarea jõmaʉ̃ba nokʼo babikĩrãbasi (1 Crón. 11:​1, 2). Davidbara Jeowa ʉ̃rʉ ĩjãbasi, maʉ̃ba iyi nejʉraraba pẽwãbʉdadera Jeowaʼa kʼareba widibasi (Sal. 28:7; akʉra Salmo 138:3). Adewara Sadocbara erbasi awuru yiza biarata, maʉ̃rãra Jehoiadá basi akʉza yi warra Benayata. Adewara panasi 22 gorogorora nokʼora Davidʼare wãnarata (1 Crón. 11:​22-25; 12:​26-28). Maʉ̃ra ẽbẽrarã jõmaʉ̃ba ũdubikĩrãpanasi ãyira Davidʼare panʉta.

7. (1) ¿Idi ewadera kʼairaba ũdubipanʉ zowaĩnĩgʉapanʉta? (2) Mebẽã Nsilu bideoba, ¿kʼãrẽta jaradiabʉ?

⁷ Dayirãba akʉdara sãwũã Jeowa ode panʉraba ũdubi zebʉdata ãyi Daizeze Nokʼoare panʉta, naʉ̃ba zowaĩnĩgʉa babiyi dayirãra. Jesús nama egorode basidera politikade eda ba ẽ basi, maʉ̃ra Diarude baera (Mat. 4:​8-11; Juan 6:​14, 15). Iyi so zarea erbaira Jeowaʼa kʼareba widibasi. Adewara idi ewadebida bʉ yizara biata, ʉ̃kʉrʉ warraraba zowaĩnĩgʉa erbʉta ũdubi zebʉda ãyi politikade eda wãi ĩjã ẽãne akʉza gorogoro bʼai ĩjã ẽãne. Yibia bayi bʉa jw.org de maʉ̃ra nebʉra ʉ̃rʉ bedʼeabʉta jʉrʉra.a

KʼAREBARA MEBẼRÃTA

8. ¿Zõrãrãbara sõbede nesida zowaĩnĩgʉa erbʉ ũdubita?

⁸ Jeowa ode panʉrãra ãyirai yiya kʼarebakĩrã (2 Cor. 8:4). Mamina ãya maʉ̃ oira zowaĩnĩgʉa bʉta ũdubidaibara. Bari jaradaita, yõbarabʉdera, zõrãrãbara kʼawuapanʉ mebẽrãbara nesidapanʉta ãyaʼa zowaĩnĩgʉa diadamarẽã, adewara naʉ̃ra mebẽrãbara nesidaseapanʉ diamarẽã Daizeze Bedʼeata, kartarata adewara yikota, wuata akʉza ãyi sama bʼaita. Ãya mebẽrã Jeowa ode panʉta mejãcha kãgapanʉ baera nekʼãrẽ jõma opanʉ diaita naʉ̃ra mebẽrãba nesidapanʉta, maʉ̃ oira ãyi bebʉde baimina (Juan 15:​12, 13). Mawũã ũdubipanʉ Sadoc kĩrãkʼa zowaĩnĩgʉa panʉta.

9. ¿Kʼãrẽta omarẽã jarasi Davidba Sadocʼa? (2 Samuel 15:​27-29 akʉza akʉra potota).

⁹ Akʉdayi sãwũã Sadocba ũdubisita mebẽrã kʼarebakĩrãbʉta iyi bebʉde basimina. Absalón David warrabara beakĩrãbasi yi zeze Davidta mawũã iyita nokʼo bʼaita (2 Sam. 15:​12, 13). Maʉ̃ba Davidʼra mesera mĩrʉ wãibarabasi Jerusalénʼneba. Davidba iyi nezokʼara jarasi Jerusalénʼneba mesera mĩrʉ wãibarabasita Absalónba beaseabasi baera ãyira (2 Sam. 15:14). Ãyi ode wãne Davidba kʼawuasi Absalónba kʼãrẽ oita krĩchabʉ kʼawuaira ãyidebema aba Jerusalénʼne baibarabasita, maʉ̃ kʼarea jẽda wãmarẽã zokʼasi Sadocta akʉza awuru saserdoterata (akʉra 2 Samuel 15:​27-29). Ãya maʉ̃ oira mejãcha jʉra kʼawuabaibarabasi Davidba ãyaʼa omarẽã jaradabara ãyira bebʉde babibasi baera. Absalónʼra jipade ẽbẽra kayiruabasi mamina krĩchaidua, ¿kʼãrẽta berabarikasita Absalónba kʼawuasibʉrʉ Sadocta akʉza wuabemara ẽbẽrarãta iyiare bʉ ẽãta awuarabʉrʉ Davidʼare panʉta?

10. ¿Sãwũã kʼarebasida Sadocba akʉza yi wuabemaraba Davidʼra?

¹⁰ Davidba nei oita krĩchabasi, maʉ̃ kʼarea Sadocʼa akʉza iyi neũdukʼawua Husáiʼa widisi kʼarebadamarẽã maʉ̃ oita (2 Sam. 15:​32-37). Husáibara krĩña ũdubisi iyira Absalónʼarebʉ kĩrãkʼa mõbe jara ũrĩbisi kʼãrẽta oseabʉta David beaita, mamina wãrĩnubaira Husáira Davidʼarebasi. Adewara iya Absalónʼa jaradabara kʼarebabasi Davidba ewari erbamarẽã Absalónʼʉ̃me yõ wãita. Tẽã Husáiba maʉ̃ ʉ̃rʉ jara ũrĩbisi Abiatarʼa akʉza Sadocʼa (2 Sam. 17:​8-16). Aramaʉ̃ta Sadocba Abiatarʼʉ̃meba maʉ̃ta jara ũrĩbisida Davidʼa (2 Sam. 17:17). Jeowaba kʼarebasi Sadocba akʉza yi wuabemaraba kʼarebadamarẽã Davidta beada ẽ marẽã (2 Sam. 17:​21, 22).

11. Mebẽrãta kʼarebamarẽã jaradara, ¿sãwũã ũdubiseapanʉ Sadoc kĩrãkʼa zowaĩnĩgʉa panʉta?

¹¹ Mebẽrã neida berabaribʉrʉde dayirãʼa jaradara maʉ̃ra mebẽrãta kʼarebamarẽã dayirãbara, ¿sãwũã ũdubidai Sadoc kĩrãkʼa zowaĩnĩgʉa panʉta? Nããra, dayirãʼa nekʼãrẽ omarẽã jarapanʉta aripe odadrʉ. Maʉ̃ mawũã berabaribʉrʉdera dayirãbara nesidayi Betelba omarẽã jarabʉta aripe odaita, mawũã mebẽrãbawara ãba panaita (Heb. 13:17). Zõrãrã diapanʉ kartata ãya kʼawuamarẽã kʼãrẽta oibarata drʉade neida berabari nãã akʉza berabaribʉrʉde, zõrãrãbara naʉ̃ta badua akʉpanaibara (1 Cor. 14:​33, 40). Yi ũmeta, zowaĩnĩgʉa bʉta ũdubidaibara mamina jʉra kʼawuapanaibara (Prov. 22:3). Nekʼãrẽ oi nãã biʼia krĩchara adewara jʉra kʼawuabara. Yi ũbeata, ĩjãnadrʉ Jeowa ʉ̃rʉ. Jeowabara krĩchabʉ dayirã aba abakaʉ ʉ̃rʉ akʉza iyara kãgabʉ dayirãra aduʼa panamarẽã, maʉ̃ kʼarea iya kʼarebabʉ dayirãba awuru mebẽrãta kʼarebabʉrʉde neida berabari ẽ marẽã.

12, 13. ¿Kʼãrẽta jaradiabʉ Víktor akʉza Vitali nebʉraba? (Akʉra potota).

¹² Akʉdaya Víktor akʉza Vitali nebʉrata. Ucraniane yõ baesidera, ãya kʼarebasida mebẽrãba baniata erbamarẽã akʉza yikota erbamarẽã. Víktorba jarabʉ: «Daiba badu mae jʉrʉsida yikota. Mebẽã abaʉba iya yiko wuaga erbadata diasi, maʉ̃ba kʼarebasi mebẽrãba yiko erbamarẽã ewari biobayeda. Mʉ̃a kĩrãbebʉ ewari aba daiba yiko karrude eda bʉebʉrʉde misilta dai kʼawa baesita (20 metro). Maʉ̃nera mʉ̃ara Jeowaʼa kʼareba widi kiʉsi zowaĩnĩgʉata diamarẽã mawũã mebẽrã kʼarebaita».

¹³ Vitaliba jarabʉ: «Maʉ̃itara daibara zowaĩnĩgʉata erbaibarabasi. Mʉ̃a nããra yiko diabari jʉ̃ẽsidera ode 12 ora wãibarabasi, maʉ̃ jõmaʉ̃nẽ mʉ̃ra badua yiwidʼibasi Jeowaba kʼarebamarẽã. Badua widibasi Jeowaʼa zowaĩnĩgʉata diamarẽã akʉza kʼawuabimarẽã sainʉ oseabʉta. Mʉ̃ra nokʼoraba wãseabʉ abʉmaebʉrʉ wãbasi. Mʉ̃a ĩjãbʉra audre zarea besi ũdubʉrʉde mebẽrã sãwũã ãyirai yi kʼarebapanʉta. Mebẽrãbara ode kʼãrẽ tabera ãĩ bʉepanasi mawũã dai neneẽã berabarimarẽã, adewara mebẽrãba karrude eda bʉesida yikota, wuata akʉza nekʼãrẽ awuruta akʉza Víktorʼa akʉza mʉ̃aʼa yikota diapanasi, adewara dai sama kʼãĩta». Vitalibara zowaĩnĩgʉbʉta ũdubisi mamina maʉ̃ awuara iyira jʉra kʼawua basi.

JEOWARE KʼẼRẼPA BARA

14. Dayirã mebẽrãnebema mawũã ẽ bʉrʉ dayi neũdukʼawuata Jeowadeba jĩga wãra, ¿sãwũã sentibʉ dayirã?

¹⁴ Dayirã mebẽrãnebema abaʉta mawũã ẽ bʉrʉ dayi neũdukʼawuata Jeowadeba jĩga wãbʉrʉdera maʉ̃ra jipade pʉ (Sal. 78:40; Prov. 24:10). Dayirãba maʉ̃ ẽbẽrata mejãcha kãgabasibʉrʉ, mawũãra audre pʉ bayi dayirãitara. Bʉta mawũã berabaribaribʉrʉ kĩrãbera Sadoc yizaba kʼarebaseabʉta.

15. ¿Sadoc bara kʼãrẽa zowaĩnĩgʉata nesidasi Jeoware kʼẽrẽpa bʼaita? (1 Reyes 1:5-8).

¹⁵ David beibodoare Abiatarba ũdubisi iyira Davidʼare bʉ ẽãta, mawũãsidu Sadocʼra Jeoware kʼẽrẽpabasi. Davidʼra zõnabasi baera beibodo basi, maʉ̃ne yi warra Adoníasba yi zeze bari zokʼakĩrãbasi, iya kʼawuabasimina Jeowaba Salomónta jidasita nokʼo bamarẽã (1 Crón. 22:​9, 10). Abiatarʼra Adoníasʼarebasi (akʉra 1 Reyes 1:​5-8). Iyi mawũã bʉrʉba Abiatarbara ũdubisi Davidʼare ba ẽ basita akʉza mia Jeoware ba ẽ basita. Krĩchara kʼãrẽãba sopʉasita Sadocba kʼawuaside iyi neũdukʼawua biaba maʉ̃ta osita. Abiatarʼra Sadocʼʉ̃mera 40 poagabayeda ãba trajasida saserdotede Jeowaita (2 Sam. 8:17). Ãyi ũmeba akʉsida arka bedʼea abarika zedadebemata (2 Sam. 15:29). Ãyira Davidʼare panasi akʉza poaga biobayeda ãbaʉba opanasi Daizezeba jarabʉta (2 Sam. 19:​11-14).

16. ¿Kʼãrẽba kʼarebasi Sadoc Jeoware kʼẽrẽpa bʼaita?

¹⁶ Sadocʼra Jeoware kʼẽrẽpabasi Abiatarba maʉ̃ta ũdubi ẽ basimina. Davidbara kʼawuabasi iyara Sadoc ʉ̃rʉ ĩjãseabasita, maʉ̃ kʼarea iya kʼawuaside Adoníasba kʼãrẽta oita krĩchabʉta Sadocʼa, Benayaʼa akʉza Natánʼa jarasi Salomónta nokʼo babidamarẽã (1 Rey. 1:​32-34). Sadocʼra awuru ẽbẽrarã Jeowa ode kʼẽrẽpa panʉra yizaba kʼarebasibaibara, bari jaraita, Natán yizaba. Iyira Jeoware kʼẽrẽpabasi akʉza Davidʼarebasi (1 Rey. 1:​38, 39). Salomón nokʼo basidera Abiatarba obadata saserdote Sadocʼa obisi (1 Rey. 2:35).

17. Dayirã mebẽrãnebema abaʉba mawũã ẽ bʉrʉ bʉ neũdukʼawuaba Jeowata idubʉra, ¿sãwũã Sadocde kĩrãkʼa oseapanʉ?

¹⁷ ¿Bʉra sãwũã Sadoc kĩrãkʼa baseabʉ bʉ mebẽrãnebema abaʉba mawũã ẽ bʉrʉ bʉ neũdukʼawuaba Jeowata idubʉra? Ũdubira Jeowaʼa bʉra iyiare kʼẽrẽpa bakĩrãbʉta (Jos. 24:15). Jeowaba bʉaʼa zarea diayi akʉza zowaĩnĩgʉata. Jeowaʼa yiwidʼibara akʉza ewari jõmaʉ̃nẽ iyi ode kʼẽrẽpa panʉra kʼawa bara. Jeowaba bia akʉbʉ bʉ kʼãwũã iyare kʼẽrẽpa bʉra, maʉ̃ kʼarea nebiata diayi (2 Sam. 22:26).

18. ¿Kʼãrẽta jaradiabʉ Marco akʉza Sidse nebʉraba?

¹⁸ Akʉdaya Marco akʉza Sidse nebʉrata. Ãyara kau ũme erpanasi, ãyi waribʉrʉdera Jeowa odeba jĩga wãsida. Marcoba jarabʉ: «Bʉ wũãwũãra barabʉrʉdera bʉra mejãcha sobiabʉ, maʉ̃ba bʉa nekʼãrẽ jõma obʉ ãyi bia akʉita, ãyi kʼarebaita, mamina ãyi Jeowadeba jĩga wãbʉrʉdera arigʉ pʉ. Jeowaba daira kʼareba zebʉrʉ maʉ̃ bedʼea zroma awuantaita. Mʉ̃ mejãcha sopʉanʉmʉnera Jeowaba kʼarebabʉ mʉ̃ kima Sidseta so zarea bamarẽã, mamina iyi mejãcha sopʉabʉde kʼarebabʉ mʉ̃ta so zarea bamarẽã». Sidseba jarabʉ: «Daiba bedʼea zroma awuanta zebʉrʉ Jeowaba kʼarebabʉ baera. Mʉ̃ra mejãcha sopʉa basi krĩchabasi baera mʉ̃ kaurabara Jeowa ode bʉta idubʉsidata mʉ̃a ãyita bia akʉ ẽ basi baera. Mamina tẽã mebẽã wẽrã aba mʉ̃a ũdu ẽ dããrãbaba iyi juwa mʉ̃ okiwa ʉ̃rʉ kʉ kʼãrãpe mʉ̃ dabʉma akʉ kʼãrãpe jarasi: ‹Kĩrãbera, naʉ̃ra kʼãwũã berabaribʉ ẽãta bʉ kʼarea›. Mʉ̃ra Jeoware kʼẽrẽpa bʉ akʉza sobiabʉ Jeowaba mawũã kʼareba zebʉrʉ baera».

19. ¿Bʉara kʼãrẽta oita krĩchabʉ?

¹⁹ Jeowaba kãgabʉ iyi ode panʉra jõmaʉ̃ta zowaĩnĩgʉa panamarẽã Sadoc kĩrãkʼa (2 Tim. 1:7). Mamina Jeowabara kãga ẽ dayikʉzabʉrʉ ĩjãmarẽã zarea barabʉta, awuarabʉrʉ iyara kãgabʉ iyi ʉ̃rʉ ĩjãnamarẽã, maʉ̃ba bʉa nekʼãrẽ obʉrʉde zowaĩnĩgʉabʉta ũdubibarabʉrʉ Jeowaʼa kʼareba widira. Bʉara ĩjãseabʉ Jeowaba kʼarebaita Sadoc kĩrãkʼa zowaĩnĩgʉa bʼaita (1 Ped. 5:10).