Lepanʉraba widipanʉta

2 Tesalonicenses 3:14de jarabʉdebara kʼaiba jaraseabʉ saʉ̃ ẽbẽraʉ̃me jʉra kʼawuabaibarata, ¿zõrãrãba mawũã ẽ bʉrʉ kongregasionebema aba abakaʉba?

Apostol Pabloba kristianora Tesalónicadebema jarasi: «Maranebema abaʉba naʉ̃ kartade jarabʉ kĩrãkʼa oẽ bʉrʉ jʉra kʼawua bʼaidua maʉ̃ ẽbẽraʉ̃me» (2 Tes. 3:14). Nawedara, ẽbẽra abaʉba ũrĩ ẽ basibʉrʉ Daizeze Bedʼeaba zokʼabʉta zõrãrãba kongregasionʼa diskurso diabasi maʉ̃ ʉ̃rʉ bedʼeabʉta. Maʉ̃ diskurso ũrĩna tẽãra mebẽrã kongregasionebemara maʉ̃ mebẽãʉ̃me bari ãbabasi jaradia wãbʉrʉdebʉrʉ akʉza ãba yi jʉrebʉrʉdebʉrʉ mamina nekʼãrẽ awuru oidera iyiʉ̃me ãba ba ẽ basi.

Mamina atiara awuara krĩchapanʉ. Atiara kʼawuapanʉ Pabloba ũrãgʼa diadabara jarakĩrãbasita kristiano aba abakaʉta jʉra kʼawua bʼaibarata kʼawuabʉrʉde kristiano abaʉta Daizeze Bedʼeaba zokʼabʉde bʉ ẽãta. Maʉ̃ba atiara nesida ẽ zõrãrãba kongregasionʼa diskursode jara ũrĩbita kʼãrẽne jʉra kʼawua bʼaibarata. ¿Kʼãrẽa mawũã jarapanʉ? Akʉdaya Pablora kʼãrẽ ʉ̃rʉ bedʼeanʉmasita maʉ̃ ũrãgʼa diaside.

Pabloba kʼawuasi ʉ̃kʉrʉ mebẽrã kongregasionebemaraba aña onʉmasita. Pablobara Daizeze Bedʼeadeba ãya ũrãgʼa diasi mamina ãyara ũrĩna ẽ basi mama jarabʉta. Pabloba ãyi nãã akʉ jʉ̃ẽside jarasi ẽbẽra abaʉta trajamabʉbʉrʉ biga bayi neko ẽ baita. Pabloba mawũã ũrãgʼa diasidu ʉ̃kʉrʉbara ũrĩna ẽ basi maʉ̃ ũrãgʼara, maʉ̃ba trajada ẽ basi ãyi trajaseabasimina. Adewara wuabemaba kʼãrẽ obʉta ewariza kʼawuakĩrã basi. ¿Kristianorabara maʉ̃ra ẽbẽra mawũãbʉra sãwũã edadaibarabasi? (2 Tes. 3:​6, 10-12).

Pabloba jarasi maʉ̃ra ẽbẽraʉ̃me jʉra kʼawuapanamarẽã. Griego bedʼeadera maʉ̃bara jarakĩrãbʉ kʼawuaibarata kʼaiba nemitia obʉta akʉza zarea oibarata maʉ̃ba obʉ kĩrãkʼa oẽ baita. Pablobara naʉ̃ ũrãgʼara diasi kongregasionebemara jõmaʉ̃a, mawũã bari zõrãrã jara ẽ basi (2 Tes. 1:1; 3:6). Mawũẽra kristiano aba abakaʉba kʼawuara kʼai mebẽãba onʉmʉ ẽãta Daizeze Bedʼeaba zokʼabʉta, jipa krĩchaibara maʉ̃ ẽbẽraʉ̃me wua ãba ba ẽ baita.

¿Maʉ̃ba jarakĩrãbʉka akʉibarata kongregasioneba ãĩ wãna kĩrãkʼa? Mawũã ẽ, Pabloba jarasi maʉ̃ ẽbẽrarã dayi mebẽã kĩrãkʼa ũrãgʼa diaibarata. Mawũẽra kristiano aba abaka ãba baseabʉ maʉ̃ ẽbẽraʉ̃me ãba yi jʉrebʉde akʉza jaradia wãbʉrʉde mamina kongregasionba nekʼãrẽ awuru obʉrʉdera maʉ̃ ẽbẽraʉ̃mera ãba babe ẽ mia dayirãba nekʼãrẽ awuru obʉrʉdebida maʉ̃ ẽbẽraʉ̃me ãba babe ẽ. ¿Kʼãrẽa? Pabloba jarasi iyisida «peramarẽã». Dayirãta maʉ̃ ẽbẽraʉ̃me ãbabʉ ẽ bʉrʉ iyira peraseabʉ iya obʉ kʼarea akʉza krĩchaseabʉ idubʉita iya obʉra (2 Tes. 3:​14, 15).

¿Idi ewadera kristianorabara sãwũã kʼawuai kʼai ẽbẽraʉ̃me jʉra kʼawuabaibarata? Nããrãra, Pabloba jarada kĩrãkʼa kʼawuaibara kʼaiba Daizeze Bedʼeaba zokʼabʉde obʉ ẽãta. Mamina Pablobara jarakĩrãkʉa ẽ basi bʉ krĩchaba iduaribi ẽãta obʉ baera jʉra kʼawua bʼaibarata maʉ̃ ẽbẽraʉ̃me, maʉ̃ ẽbẽrabara Daizeze Bedʼeade kayirua abʉta onʉmʉ ẽ baera. Adewara jarakĩrãkʉa ẽ basi jʉra kʼawua bʼaibarata dayimabʉta oẽ basi baera dayi sopʉabidaʉ̃me. Awuarabʉrʉ Pabloba jarakĩrãbasi jʉra kʼawuabamarẽã jari ẽbẽra Daizeze Bedʼeadeba ũrãgʼa diasidaidu mama jarabʉta oẽ badaʉ̃me.

Dayirãba ũdudara ẽbẽra abaʉba ariwia obʉta Daizeze Bedʼeaba zokʼabʉ ẽãta,a krĩchaseapanʉ maʉ̃ ẽbẽraʉ̃me ãba ba ẽ baita kongregasioba nekʼãrẽ awuru obʉrʉde akʉza dayirãba nekʼãrẽ awuru obʉrʉde. Naʉ̃ra, kristianora aba abakaʉba jidaibara baera jõmaʉ̃a jaraka ẽ baibara awuarabʉrʉ dayirã mebẽrã bitabaiba kʼawuabaibara. Mamina kĩrãbedaibara maʉ̃ ẽbẽraʉ̃me ãba baseabʉta ãba yi jʉrebʉrʉde akʉza jaradia wãbʉrʉde adewara maʉ̃ ẽbẽraba iya obʉta idubʉra dayirãra jẽda ãba baseabʉ iyiʉ̃me kongregasionba nekʼãrẽ awuru obʉrʉde akʉza dayirãba nekʼãrẽ awuru obʉrʉde.