Nekʼãrẽ audre diara audre sobiabayi

1, 2. Jeowaba dayirã parãsidera, ¿kʼãrẽa parãsi awurura nekʼãrẽ diabʉrʉdebʉrʉ sobia bʼaita?

JEOWABARA dayirãra parãsi awurura nekʼãrẽ diabʉrʉde sobia panamarẽã awururaba dayirãʼa nekʼãrẽ diabʉira (Hech. 20:35). Wãrĩnubaira awuruba dayirãbari nekʼãrẽ bio obʉrʉdera dayirã mejãcha sobiabʉ. Mamina audre sobiabʉ dayirãba awurura nekʼãrẽ diabʉrʉde. Jipade yibia Jeowaba dayirãta mawũã parãsi baera. ¿Kʼãrẽa mawũã jarapanʉ?

² Jeowaba dayirãta mawũã parãsi baera naʉ̃ba kʼarebabʉ sobia bʼaira dayide bamarẽã, dayareba jʉrʉseabʉ sãwũã audre sobia bʼaita. Dayirãba awururabari nekʼãrẽ bia oita jʉrʉpanʉbʉrʉ naʉ̃ba kʼarebayi audre sobia panaita. Jeowabara dayirãra biʼia parãsi (Sal. 139:14).

3. ¿Daizeze Bedʼeabara kʼãrẽa jarabʉ Jeowara Daizeze sobiata?

³ Daizeze Bedʼeade jarabʉ yi ẽbẽrarã awururabari nekʼãrẽ bia obʉratrʉ sobia panʉta, maʉ̃ kʼarea Daizeze Bedʼeaba jarabʉ Jeowara Daizeze sobiata (1 Tim. 1:11). Jeowabʉrʉ awuru ẽbẽrarãbari nããra nekʼãrẽ bia osi akʉza iya obʉ kĩrãkʼara mia abaʉ ẽbẽraba obe ẽ. Maʉ̃ kʼarea Pabloba naʉ̃ta bʉsi: «Iyideba zokʼaipanʉa, pirabea akʉza panʉa» (Hech. 17:28). «Jõma kʼãrẽ biara akʉza jõma nekʼãrẽ aripe bʉra» Daizezedeba zebʉ (Sant. 1:17).

4. ¿Kʼãrẽba kʼarebai audre sobia bʼaita?

⁴ ¿Kʼãrẽta oseapanʉ audre sobia bʼaita? Naʉ̃ artikulode kʼawuadayi sãwũã Jeowade kĩrãkʼa wuabemarabari nekʼãrẽ bia okĩrãbaibarata (Efes. 5:1). Adewara kʼawuadayi kʼãrẽta oseabʉta krĩchapanʉbʉrʉ wuabemarabara bia akʉ ẽãta dayirãba ãyi kʼarea nekʼãrẽ bia obʉra. Naʉ̃ba kʼarebayi dayirãba awurura kʼarea obʉta idubʉ ẽ baita akʉza mawũã audre sobia bʼaita.

JEOWADE KĨRÃKʼA NEKʼÃRẼ BIATA DIADADRɄ

5. ¿Kʼãrẽ nebiata diabʉ Jeowabara dayirãʼa?

⁵ Akʉdaya Jeowaba dayirãbari kʼãrẽ bia ozebʉrʉta. Bari jaraita iya dayirã diabʉ nekʼãrẽ biata. Edaʉde Jeowaba dayirãʼa dia ẽ nekʼãrẽ biata mejãcha mamina diabʉ dayirãba nesidabʉta. Bari jaraita, iya diabʉ dayirãʼa kʼãrẽ koita, kʼãrẽ wua jʉ̃ita akʉza sama bʼaita (Sal. 4:8; Mat. 6:​31-33; 1 Tim. 6:​6-8). Jeowaba dayirãʼa maʉ̃ra nebiara diabʉ ẽ, maʉ̃ta diaibara baera. Mawũẽra, ¿kʼãrẽa diabʉ iyara?

6. ¿Kʼãrẽta jaradiabʉ Mateo 6:25 akʉza 26ba?

⁶ Jeowabara dayirãba nekʼãrẽ nesidabʉra jõma diabʉ dayirãta kãgabʉ baera. Akʉdaya Jesúsba Mateo 6:​25, 26de jaradata (akʉra). Jesúsba ibana zakera ʉ̃rʉ naʉ̃ta jarasi: « Ãyira ne u ẽ, mia jʉrepe ẽ, mia nekʼãrẽ wuagabarimae wuagada ẽ. Mamina Daizezebara ne diabʉ». Naʉ̃ jarada tẽã Jesúsba widisi: «¿Kõbe marara ibanaira audre yibia ẽka?». Jesúsbara naʉ̃neba jaradiakĩrãbasi Jeowaitara iyi ode panʉrãra audre yibiata nedʉwʉrʉraira. Jeowaba nedʉwʉrʉrata biʼia akʉbʉbʉrʉ dayirãsida biʼia akʉyi. Jeowara Zeze bia baera akʉza dayirãta mejãcha kãgabʉ baera diabʉ dayirãba nekʼãrẽ nesidabʉta (Sal. 145:16; Mat. 6:32).

7. ¿Sãwũã Jeowade kĩrãkʼa wuabemarabari nebia oseapanʉ? (Akʉra potota).

⁷ Jeowade kĩrãkʼa dayirãbida mebẽrãta mejãcha kãgapanʉ baera diapanʉ ãya nekʼãrẽ nesidabʉta. Bari jaraita, ¿bʉara ũdukʼawuabʉka saʉ̃ mebẽãba nesidabʉta yikota akʉza wuata? Jeowabara bʉta zokʼaseabʉ maʉ̃ra mebẽrãba nesidabʉta diamarẽã. Jeowa ode panʉrãbara neida berabaribʉrʉde soiduba kʼarebakĩrãpanʉ. Bari jaradaita, pandemia zesidera mebẽrã mejãchaʉba ãya erbʉta diasida wuabemara. Bari jaraita, yikota, wuata akʉza nekʼãrẽ awuruta. Adewara donasionta diasida mawũã mebẽrã naʉ̃ drʉa jõmaʉ̃nebemata kʼarebadamarẽã. Naʉ̃ra mebẽrã jõmaʉ̃ba osida Hebreos 13:16ba jarabʉ kĩrãkʼa, nama jarabʉ: «Kĩrãduaraidua wuabemaraita nebia oita, mia kĩrãduaraidua maraba erbʉta wuabemarabida diaita, Daizezeba maʉ̃ sakripisiota mejãcha kãgabʉ baera».

8. ¿Sãwũã kʼarebabʉ Jeowaba dayirãʼa zarea diabʉba? (Filipenses 2:13).

⁸ Jeowaba zarea diabʉ dayirãʼa. Jeowa zareara jõka adewara iya maʉ̃ zareara dayirãʼa diakĩrãne diabʉ (akʉra Filipenses 2:13). Bʉ yiwidʼibʉrʉde Jeowaʼa widibarika, kʼarebamarẽã zarea erbaita bedʼea zroma yi edebi ẽ baita, nekʼãrẽ kayirua oita zebʉrʉ yi edebi ẽ baita mawũã ẽ bʉrʉ ewariza nekʼãrẽ oibara kʼarea. Jeowaba maʉ̃ tẽã bʉaʼa zarea diasidera bʉra apostol Pablo kĩrãkʼa sentisibaibara. Iya naʉ̃ta jarasi: «Nekʼãrẽ jõmaʉ̃ita zarea erbʉ, mʉ̃aʼa zarea diabʉdeba» (Filip. 4:13).

9. ¿Sãwũã zokʼaseapanʉ dayirã zareata wuabemara kʼarebaita? (Akʉra potota).

⁹ Dayirãba zarea erbʉra jõbari. Adewara dayirã zareara Jeowade kĩrãkʼa dayirãbara awurura diabe ẽ. Mamina dayirãba nekʼãrẽ oseapanʉ kʼarebaita awuru mebẽrã zarea nesidapanʉrata. Bari jaraita, mebẽã abaʉta zõrãyirʉbʉrʉ mawũã ẽ bʉrʉ kayabʉbʉrʉ dayirãbara kʼarebaseabʉ iyi de imabʉde, mawũã ẽ bʉrʉ iyita ne eda wãbʉrʉde. Dayirãba oseabʉbʉrʉ jaraseabʉ kʼarebakĩrãpanʉta ãba yi jʉrebari de ara oita. Adewara kʼarebaseabʉ ãba yi jʉrebari de imaita. Dayirãba naʉ̃ jõma opanʉbʉrʉ mejãcha kʼarebaseapanʉ mebẽrãta.

10. ¿Dayirãba jarabʉdeba sãwũã so zarea diaseapanʉ wuabemara?

¹⁰ Kĩrãbedaibara dayirãba kʼãrẽ jarabʉba so zarea diaseabʉta wuabemara, mawũẽra dayirãbara mebẽrã so zarea diaseapanʉ. ¿Bʉara kʼawuabʉka saʉ̃ mebẽãba so zarea diamarẽã nesidabʉta? Kʼawuabʉbʉrʉ trʉ̃seabʉ selulardeba iyaʼa so zarea diaita, mawũã ẽ bʉrʉ kartata zokʼa bʉeseabʉ adewara akʉ wãseabʉ iyi deidu. Edaʉde krĩchaseapanʉ awurura so zarea diaira nekʼãrẽ mejãcha jaraibarata, mamina wãrĩnubaira daya mebẽã abaʉa ibiade bedʼeabʉrʉba akʉza dayi sodebʉta jarabʉrʉba kʼarebaseabʉ. Maʉ̃ kʼarea mejãcha krĩcha oda ẽ baibara mebẽã abaʉa kʼãrẽ jarai kʼarea. Edaʉde bʉa mawũã bedʼea wiña jarasimina mejãcha kʼarebaseabʉ mebẽrãra bʉa iya nesidakʉta jarasi baera, maʉ̃ba mejãcha kʼarebabʉ maʉ̃ ewaride iyi bia bʼaita (Prov. 12:25; Efes. 4:29).

11. Jeowaba iyi buru bia diabʉrʉdera, ¿sãwũã obʉ?

¹¹ Jeowabara buru biata diabʉ dayirãʼa. Santiagoba naʉ̃ta jarasi: «Maranebemata burubia erbaita waebʉbʉrʉ, Daizezeʼa badua wididua, mawũã iya diaya, iya jõma diabʉ baera» (Sant. 1:5). Naʉ̃ba ũdubibʉ Jeowabara iyi buru biara wãga ẽãta, awuarabʉrʉ diakĩrãne diabʉta awururabida. Adewara Jeowabara kãgabʉ dayirãba maʉ̃ta iyaʼa wididamarẽã, iyaʼa kʼareba widibʉra mitia akʉ ẽ baera (Prov. 2:​1-6).

12. ¿Jara ũrĩbira kʼãrẽta jaradiaseabʉta dayirãba wuabemara?

¹² Dayirãbida Jeowade kĩrãkʼa dayirãba kʼawuapanʉta awurura jaradiaseapanʉ (Sal. 32:8). Bari jaradaita, dayirãba kʼawuabʉta jaradiaseapanʉ yi ʉ̃ra bʉrʉ Daizeze Bedʼea jaradia jʉ̃drʉpanʉra, ãyabida kʼawuamarẽã sãwũã biʼia jaradia wãita Daizeze Bedʼeata. Adewara zõrãrãbara kʼarebaseabʉ zõrãrã kʼarebabarirata akʉza awuru mebẽrã yumakẽrãrata jaradiapanʉne kʼãrẽta oibarata kongregasione. Adewara ʉ̃kʉrʉ mebẽrã de parãpanʉraba akʉza Daizeze de ara opanʉraba, ãya kʼawuabʉta jaradiapanʉ awuru mebẽrã naʉ̃raba maʉ̃ oita kʼarebadamarẽã.

13. ¿Sãwũã Jeowade kĩrãkʼa oseapanʉ wuabemara jaradiabʉrʉde?

¹³ Dayirãba wuabema ẽbẽrarã jaradiabʉrʉdera Jeowade kĩrãkʼa odaibara. Daizeze Bedʼeaba jarabʉ Jeowabara iya kʼawuabʉra wuabemara jaradiakĩrãne jaradiabʉta. Abarika dayirãba kʼawuabʉra wuabemara jaradiapanʉ. Jara ẽ: ‹mʉ̃yi dobaʉba kʼawuasi mʉ̃ara, iyabida abarika kʼawuaibara›. Adewara perada ẽ wuabemara jaradiaita, krĩchada ẽ maʉ̃ba daya obʉ kĩrãkʼa obʉrʉ baera jãrĩta daya obʉta. Daizeze ode panʉraba mawũã krĩchaira biga ẽ, awurabʉrʉ soiduba jaradiakĩrãne jaradiapanʉ iya biʼia okʼawuamarẽã (1 Tes. 2:8). Daizeze Bedʼeaba jarabʉ: «Mawũã ãyabida bia jaradiaseabayi wuabemara» (2 Tim. 2:​1, 2). Dayirãba wuabemara sobiade jaradiapanʉbʉrʉ dayirãba kʼawuapanʉta mawũãra dayirãta akʉza wuabemarata buru bia bayi, maʉ̃ daucha sobia panañi.

KRĨCHAPANɄNE WUABEMARABA BIA AKɄ ẼÃTA DAYIRÃBA OBɄTA

14. ¿Wuabemarabara kʼãrẽta obʉ dayirãba ãyi kʼarea nebia obʉrʉdera?

¹⁴ Dayirãba awurura kʼarea nebia obʉrʉdera ãyara biga diapanʉ maʉ̃ kʼarea, audre mebẽrã kongregasionebemarabʉrʉ. Ãya dayirãʼa biga diaya kartata bʉ dia bʉebʉ, mawũã ẽ bʉrʉ nekʼãrẽ awuruta opanʉ (Col. 3:15). Dayirãʼa mawũã biga diabʉdadera mejãcha sobia panʉ dayirãba ãyi kʼarea nekʼãrẽ osi baera.

15. Dayirãba nebia obʉ kʼarea awuruba biga dia ẽ bʉrʉ, ¿kʼãrẽ ʉ̃rʉ krĩchadaibara?

¹⁵ Mamina wãrĩnubaira edaʉde jõmaʉ̃ba biga dia ẽ dayirãba ãyi kʼarea nebia obʉrʉdera. Edaʉde krĩchaseapanʉ dayirãba awuru kʼarea nebia obʉrʉdera maʉ̃ra ãyitara kʼãrẽ ẽ kĩrãkʼabʉta, krĩchada ẽãta dayirã kʼãrẽãba zarea osita maʉ̃ oita, mawũã ẽ bʉrʉ kʼãrẽãba plata gastasita maʉ̃ diaita. Mawũã berabaribʉrʉdera kʼãrẽba kʼarebaseabʉ dayirã sopʉa ẽ baita akʉza awurura kʼarea nebia obʉta idubʉ ẽ baita. Kĩrãbedaibara Hechos 20:35ba jarabʉta, dayirã sobia bʼaira awurura kʼarea nebia oibarata. Maʉ̃ kʼarea mebẽrãba dayirãba ãyi kʼarea nebia obʉrʉde biga diada ẽ bʉrʉ sopʉada ẽ baibara, dayi sobia bʼaira maʉ̃ne chu ẽ baera. Akʉdaya kʼãrẽba kʼarebaseabʉta maʉ̃ oita.

16. ¿Kʼãrẽba kʼarebai awurura kʼarea nebia obʉta idubʉ ẽ baita?

¹⁶ Kĩrãbedaibara dayirãba awurura nebia diabʉrʉdera ũdubipanʉta Jeowade kĩrãkʼa opanʉta. Iyara ẽbẽra jõmaʉ̃a nebiata diabʉ ʉ̃kʉrʉba maʉ̃ kʼarea biga diada ẽ mina (Mat. 5:​43-48). Jeowaba iyi ode panʉra jarabʉ ãya awurabari nebia obʉrʉde jʉ̃ãna ẽ bʉrʉ maʉ̃rabida ãyaʼa nebia diaita, mawũãra nebia zromata diaita (Luc. 6:35). Bʉa awurura kʼarea nebia obʉrʉde maʉ̃ kʼarea biga diada ẽ bʉrʉ sopʉarãra, kĩrãbera Jeowabara bʉaʼa nebia diaita awururabari nebiata obʉ baera, adewara bʉa diabʉrʉde soiduba diabʉ baera (Prov. 19:17; 2 Cor. 9:7).

17. Jesúsba ũrãgʼa jaradaba, ¿sãwũã kʼarebabʉ Jeowa kĩrãkʼa bʼaita? (Lucas 14:​12-14).

¹⁷ Adewara dayirãba Jeowade kĩrãkʼa awurura kʼarea nebia oira oibara Jesúsba Lucas 14:​12-14 bayeda jaradata (akʉra). Maʉ̃ba jarakĩrãbʉ ẽ dayirãba awuru kʼarea nebia obʉrʉdera nebia dia ẽ baibarata jari dayi jẽda kʼareabaseabʉa. Awuarabʉrʉ jʉra kʼawuabaibara dayirãba nebia obʉrʉde jʉrʉ ẽ baita saʉ̃ ẽbẽraba dayaʼa nebia jẽda diaseabʉta. Dayi sode mawũã krĩchabʉbʉrʉ biga bayi Jesúsba ũrãgʼada kĩrãkʼa oũdubita, kʼarebaita ẽbẽrarã dayaʼa nekʼãrẽ bia jẽda diabe ẽãrata. Dayirãba mawũã odara Jeowade kĩrãkʼa obʉta ũdubidayi, adewara sobiade nebia okĩrãñi wuabemara kʼarea, ãya maʉ̃ kʼarea biga diada ẽ mina.

18. ¿Kʼãrẽba kʼarebai wuabemara ʉ̃rʉ aña krĩcha ẽ baita?

¹⁸ Wuabemara ʉ̃rʉ aña krĩcharãra (1 Cor. 13:7). Dayirãba awuru kʼarea nebia obʉrʉde biga diada ẽ bʉrʉ dayikʉza naʉ̃ta widiseabʉ, ¿iyara wãrĩnu bia akʉ ẽ ka mʉ̃a iyi kʼarea nebia odara? mawũã ẽ bʉrʉ ¿kĩrãduasika biga diaita? Mawũã ẽ bʉrʉ nekʼãrẽ awuru kʼarea biga dia ẽ basi. Edaʉde ʉ̃kʉrʉbara biga diakĩrãbʉmina zareabʉ jaraita iya kʼãrẽ krĩchabʉta, mawũã ẽ bʉrʉ ʉ̃kʉrʉra mejãcha perabʉ awururaba ãyi kʼarebabʉrʉdera, audre ãya nãã awururata kʼareba bari basibʉrʉ akʉza idi ewade maʉ̃ta obe ẽ baera. Mamina dayirãba mebẽrãta mejãcha kãgapanʉbʉrʉ ãyi ʉ̃rʉ aña krĩcha ẽ bayi akʉza ãyi kʼarea nekʼãrẽ bia obʉta sobiade obayi (Efes. 4:2).

19, 20. ¿Kʼãrẽa jʉ̃ã kʼawuabʉta ũdubidaibara? (Akʉra potota.)

¹⁹ Jʉ̃ã kʼawuabada. Nokʼo Salomónba jarasi dayirãba awuru kʼarea nebia obʉrʉdera ewari mejãcha berabarida tẽã nebia ũduseabʉta maʉ̃neba dayirãba jʉ̃ã ẽ basimina (Ecl. 11:1). Naʉ̃ba jarakĩrãbʉ edaʉde ʉ̃kʉrʉbara dayirãba ãyi kʼarea nebia odara ewari mejãcha berabarida tẽãbʉrʉ biga diaseabʉta. Atia akʉdayi nebʉra maʉ̃ ʉ̃rʉ bedʼeabʉta.

²⁰ Dããrabade kongregasionʼra akʉbari zõrãrã kimaba, kartata diasi ẽbẽra wẽrã ʉ̃ra bʉrʉ buru kʼoeda, maʉ̃ kartade ũrãgʼasi Daizeze ode kʼẽrẽpa bamarẽã. Naʉ̃ mebẽã wẽrã ʉ̃ra bʉrʉ buru kʼoedabara tẽã naʉ̃ta bʉ diabʉesi mebẽã, iya jarasi: «Mʉ̃a naʉ̃ karta bʉ diabʉebʉ bʉaʼa jaraita kʼãrẽaba kʼarebabʉrʉta bʉa jaradaba bʉa kʼawua ẽãne. Adewara bʉa mʉ̃aʼa bedʼea jaradara jipade yibia basi, mamina audrera mejãcha kʼarebasi bʉa testo bʉdabaa. Edaʉde mʉ̃a krĩchabasi jõma idubʉita Jeowa ode bʉta mʉ̃a kʼãrẽ obʉta. Mamina kaʉ̃ testo jẽda kĩrãbebʉba kʼarebasi mʉ̃ so zarea bʼaita. Naʉ̃ ocho poaga bade bʉa jaradaba akʉza bʉa testo bʉdaba mejãcha kʼareba zebʉrʉ mʉ̃ra». Kongregasionʼra akʉbari zõrãrã kimara maʉ̃ karta lesidera mejãcha sobiasibaibara. Dayirãsida abarika berabariseabʉ, dayirãba awuru kʼarea nebia obʉrʉde ewari mejãcha berabarida tẽãbʉrʉ biga diaseapanʉ.

21. ¿Bʉmara kʼãrẽa yibia bai Jeowade kĩrãkʼa diakĩrã bʼaita?

²¹ Dayirãba kʼawuasida Jeowabara dayirã parãsidera parãsita audre sobia panamarẽã awurura nekʼãrẽ diabʉrʉde ãya dayirãʼa nekʼãrẽ diabʉira. Dayirãba mebẽrã kʼarebabʉrʉdera mejãchade sobiapanʉ akʉza kãga ãya dayirãʼa biga diamarẽã. Mamina ãya dayirãʼa biga diasita, biga dia ẽãta sobiapanʉ dayirãba oibarata osida baera. Krĩcha ẽã dayirãba kʼãrẽ nebia obʉta, kĩrãbedadrʉ Daizeze Bedʼeaba jarabʉta: «Jeowabara kaʉ̃ ʉ̃ta diaseabʉ» (2 Cron. 25:9). Mia kʼai ẽbẽraba Jeowade kĩrãkʼara dia ẽ nebiara. Maʉ̃ kʼarea dayirãra mejãcha sobia panʉ jʉ̃ãpanʉ baera Jeowaba nebia diaita. Biga bayi zarea odaita Jeowaba nekʼãrẽ diakĩrãne diabʉ kĩrãkʼa diapanaita.