Dayirã nãã edepanʉra biga diadaibara

1. ¿Jesúsbara sãwũã kʼareba zebʉrʉ dayirãra?

JESÚSBARA dayirãʼa nekʼãrẽ mejãcha dia zebʉrʉ, maʉ̃ra mia kʼai ẽbẽraba ãyide kĩrãkʼara oẽ. Jesús nama egorode basidera zokʼasi iyi zareata wuabemara kʼarebaita (Luc. 9:​12-17). Adewara iya audre nebiata osi jõmaʉ̃bari beiside (Juan 15:13). Iyi beidata jẽda piradrʉdadeba dayirãra kʼarebakĩrãne kʼareba zebʉrʉ, yi Zeze Jeowa widibʉ iyi jaure zareadeba dayirã jaradiamarẽã akʉza so zarea diamarẽã (Juan 14:​16, 17; 16:13). Akʉza Jesúsbara kongregasioneba dayirã nekʼãrẽ mejãcha jaradiabʉ, maʉ̃neba dayirãbara wuabema ẽbẽra jaradiamarẽã (Mat. 28:​18-20).

2. ¿Jesúsbara kʼairaneba kʼarebabʉ dayirãra? (Efesios 4:​7, 8).

² Jesúsbara dayirãʼa nekʼãrẽ biata diasi. Apostol Pabloba jarasi Jesús ʉ̃ta wãside jidasita «yumakẽrãrata dayirã diaita» (akʉra Efesios 4:​7, 8). Pablobara jara ũrĩbisi Jesúsbara maʉ̃ra yumakẽrãrãra diasita dayirãta kongregasione nekʼãrẽ biode kʼarebamarẽã (Efes. 1:​22, 23; 4:​11-13). Maʉ̃ra yumakẽrãnebema ʉ̃kʉrʉra zõrãrã kongregasionebema, zõrãrã kʼarebabari, kongregasion akʉbari zõrãrã.a Naʉ̃ra yumakẽrãra nemita omia baera edaʉde jõma aripe oda ẽ (Sant. 3:2). Mamina mawũãsidu Jesúsbara naʉ̃rata zokʼabʉ dayirã kʼarebamarẽã.

3. ¿Dayirãbara sãwũã kʼarebaseapanʉ naʉ̃ra yumakẽrãrãra? Yizata jara ũrĩbira.

³ Jesúsbara naʉ̃ra yumakẽrãrata dayirãʼa diasi kongregasione kʼarebamarẽã (Efes. 4:12). Mawũẽra dayirã jõmaʉ̃ba biode kʼarebaseabʉ audre bia odamarẽã, naʉ̃ bia ũrĩnaita krĩchara mebẽrãba Daizeze de parãbarabʉta, ʉ̃kʉrʉra eda trajabʉ maʉ̃ de parãita, ʉ̃kʉrʉ mebẽrãbara edepanʉ maʉ̃ra mebẽrãita yikota akʉza maʉ̃raba nesidabʉta diapanʉ. Maʉ̃ kĩrãkʼabʉ zõrãrã kongregasionebemata, zõrãrã kʼarebabarita akʉza kongregasionʼra akʉbari zõrãrãta. Kongregasion akʉita mejãcha trajapanʉ, dayirãbara kʼarebaseabʉ dayirã sãwũã panʉneba akʉza sãwũã bedʼeapanʉneba. Atia akʉdayi kʼãrẽta opanʉta naʉ̃ra yumakẽrãraba dayirã kʼarebaita akʉza dayirãba sãwũã Jesúsʼa adewara ãyaʼa biga diaseapanʉta.

ZÕRÃRÃ KʼAREBABARIRABARA KʼÃRẼTA OBɄ

4. Nããbema siglodera zõrãrã kʼarebabarirabara, ¿kʼãrẽta opanasi?

⁴ Nããbema siglodera ʉ̃kʉrʉ mebẽrãra zõrãrãra kʼarebabari babipanasi (1 Tim. 3:8). Pabloba jarasi yumakẽrãra wuabema kʼarebabari ʉ̃rʉ, maʉ̃bara jarakĩrãkʉasi baibara ẽbẽrarã zõrãrã kʼarebabarirata (1 Cor. 12:28). Naʉ̃ra yumakẽrãrabara biode kʼarebabasi zõrãrãta, naʉ̃ba karebabasi zõrãrãba ewari erbamarẽã wuabemara jaradiaita akʉza mebẽrãta akʉdamarẽã so zarea diadaita. Mawũẽra naʉ̃ra zõrãrã kʼarebabarirabara kʼarebabasi baibara Daizeze Bedʼeadebema kopia oita, maʉ̃ta neẽ bʉrʉ maʉ̃ kopia oita nekʼãrẽ nesidabʉ edadaita.

5. ¿Idi ewadera kʼãrẽta opanʉ zõrãrã kʼarebabarirabara?

⁵ Idi ewadera, ¿kʼãrẽta opanʉ zõrãrã kʼarebabarirabara? (1 Ped. 4:10). Naʉ̃ra yumakẽrãrabara kʼarebapanʉ naʉ̃ne: Kongregasione plata bʉ bia zokʼaita, akʉbʉ kongregasionba sama jaradia wãita, kartara kongregasionebemata akʉbʉ, bideorata akʉza audiorata bʉebʉ, ʉ̃kʉrʉra akomodadordebʉ, mawũã ẽ bʉrʉ salon ara oita kʼarebabʉ. Mawũã naʉ̃rabara kʼarebabʉ kongregasione jõma bia wãmarẽã (1 Cor. 14:40). Zõrãrã kʼarebabarirãra ãba yi jʉrebʉrʉde nekʼãrẽta jaradiamarẽã zokʼapanʉ akʉza diskursota diamarẽã jarapanʉ adewara zõrãrã abaʉba ãyaʼa kʼareba widibʉ iyiʉ̃meba akʉ wãita mebẽrã kongregasionebema abaʉʼa so zarea diaita.

6. ¿Kʼãrẽa biga diadaibara zõrãrã kʼarebabarira?

⁶ ¿Kʼãrẽta jarapanʉ ʉ̃kʉrʉbara zõrãrã kʼarebabari ʉ̃rʉra? Mebẽã wẽrã Beberlyb Boliviadebemaba jarabʉ naʉ̃ta: «Ãba yi jʉrebaridera mʉ̃ra aduʼabʉ, mʉ̃a bia akʉbʉ bideorata, bia komentabʉ, trãbʉ akʉza bia ũrĩbʉ diskursorata, maʉ̃ta jõma obʉ zõrãrã kʼarebabariraba bia opanʉ baera ãyi trajota. Adewara ãyara kʼarebabʉ salone neida berabari ẽ marẽã akʉza mebẽã dedapanʉba zoomneba akʉdamarẽã adewara ãba yi jʉre berabarida tẽãra, kʼarebabʉ de imaita, donasion diapanʉ akʉita akʉza mebẽrãba kartara nesidabʉ diaita. Mʉ̃a maʉ̃ kʼarea ãya mejãcha biga diabʉ». Lesliera Colombiadebʉ, yi kimara zõrãrã kongregasionebema, iya jarabʉ: «Mʉ̃ kimara zõrãrã kʼarebabariraba mejãcha kʼarebapanʉ ãyi trajota bia opanʉ baera, naʉ̃ba kʼarebabʉ mʉ̃ kimabida aukʼara trajo erba ẽ baita, mʉ̃ara ãyaʼa maʉ̃ kʼarea biga diakĩrãbʉ kʼãwũã kʼarebabʉ baera». Dayirã jõmaʉ̃ba biga diakĩrãbʉ baibara zõrãrã kʼarebabarira ãyi trajota bia opanʉ baera (1 Tim. 3:13).

7. ¿Sãwũã biga diabʉta ũdubiseapanʉ zõrãrã kʼarebabarira? (Akʉra potota).

⁷ Edaʉde dayirãbara zõrãrã kʼarebabariraʼa dayi sode biga diabʉ, mamina Daizeze Bedʼeaba jarabʉ maʉ̃ awuara dayirãba nekʼãrẽ obʉdeba ũdubibarata biga diabʉta ãyaʼa (Col. 3:15). Mebẽã Finlandiadebema yi trʉ̃ Daavidba jara ũrĩbibʉ kʼãrẽta obʉta biga diabʉ ũdubita, iya jarabʉ: «Naʉ̃ra mebẽrãba ãyi trajo bia obʉ kʼarea biga diaira mʉ̃a kartade ãya jara ũrĩbibʉ kʼãrẽta biʼia osita akʉza maʉ̃ba sãwũã so zarea diasita mʉ̃aʼa». Pascal akʉza Jaelʼʉ̃mera, Nueva Caledonianebema, ãyira zõrãrãra kʼarebabarira bari yiwidʼipanʉ. Pascalba jara ũrĩbibʉ: «Dai Jeowa yiwidʼibʉrʉdera biga diapanʉ Jeowaʼa zõrãrã kʼarebabarira kʼarea adewara widipanʉ kʼarebamarẽã naʉ̃ra mebẽrãta akʉza biʼia akʉmarẽã». Naʉ̃ mebẽrã mawũã yiwidʼibʉra Jeowabara ũrĩbʉ, maʉ̃ba kʼarebabʉ kongregasionebemarabida nebiata ũdudamarẽã (2 Cor. 1:11).

ZÕRÃRÃ KONGREGASIONEBEMARABARA KʼÃRẼTA OBɄ

8. ¿Kʼãrẽa jarasi Pablobara nããbema siglodebema zõrãrãra mejãcha trajabasita? (1 Tesalonicenses 5:​12, 13).

⁸ Nããbema siglodera zõrãrã kongregasionebemarãra zarea trajapanasi mebẽrã kongregasionebemara kʼarea (akʉra 1 Tesalonicenses 5:​12, 13; 1 Tim. 5:17). Naʉ̃ra zõrãrãbara ãba yi jʉrebari mae jaradiapanasi adewara kongregasione kʼãrẽ oibara ʉ̃rʉ jidaibarabʉrʉ bia krĩcha kʼãrãpe jidapanasi adewara mebẽrã ibiade ũrãgʼata diapanasi mawũã kʼẽrẽpapanamarẽã Jeowa ode (1 Tes. 2:​11, 12; 2 Tim. 4:2). Adewara zarea opanasi ãyi audre Jeowa kʼawapanaita adewara ãyi mebẽrãsida akʉita (1 Tim. 3:​2, 4; Tito 1:​6-9).

9. ¿Kʼãrẽta opanʉ idi ewadebema zõrãrãbara?

⁹ Idi ewadebema zõrãrã kongregasionebemabara nekʼãrẽ mejãcha obʉ, ãyara Daizeze Bedʼeata jaradia wãpanʉ. Ãyira yiza bia mebẽrãita jaradia wãpanʉ baera (2 Tim. 4:5). Mebẽrã jaradiapanʉ sama jaradia wãibarata akʉza jaradiapanʉ sãwũã jaradiaibarata ẽbẽrarã. Zõrãrã kongregasionebemabara jõma daucha kʼawua opanʉ. Bari jaraita, mebẽã abaʉba nemitiata ora ãyara ibiade ũrãgʼapanʉ, mawũã Jeowadeba jĩga wã ẽ marẽã, mamina maʉ̃ba idubʉ ẽ bʉrʉ iya nemitia obʉta kongregasioneba ãĩbʉeseapanʉ, mawũã kongregasion neneẽã erbaita (1 Cor. 5:​12, 13; Gál. 6:1). Adewara zarea opanʉ mebẽrã kongregasionebema bia akʉita (1 Ped. 5:​1-3). Diskurso biata diapanʉ, zarea opanʉ mebẽrãta biʼia ũdukʼawuaita akʉza mebẽrãta akʉ wãpanʉ ãyaʼa so zarea diaita. Ʉ̃kʉrʉ zõrãrãbara kʼarebabʉ ãba yi jʉrebari de ara parãita akʉza Daizeze de oide, asamblea regional opanʉ ewaride bia berabarimarẽã kʼarebapanʉ akʉza bedʼeapanʉ mebẽrã bari medikobawara akʉza ʉ̃kʉrʉ zõrãrãra trajapanʉ mebẽrã ospitalde kayabʉ akʉpanʉne akʉza nekʼãrẽ awurude.

10. ¿Kʼãrẽa kãgapanʉ zõrãrã kongregasionebemara?

¹⁰ Jeowabara jarasi zõrãrã kongregasionebemabara bia akʉibasita mebẽrã kongregasionebemara, maʉ̃ba ãyira wua perada ẽ baibasita (Jer. 23:4). Mebẽã Johanna Finlandiadebemaba jarabʉ zõrãrã abaʉba sãwũã kʼarebasita yi papa mejãcha kayabaside. Iya jarabʉ: «Mʉ̃ara mʉ̃ sãwũã berabarinʉmʉra wuabemara jarakĩrã ẽ basi, mamina zõrãrã abaʉta mʉ̃me bedʼeasi, iya ũrĩsi mʉ̃a jarakĩrãbʉra akʉza mʉ̃me yiwidʼisi adewara jarasi Jeowabara mʉ̃ra kʼãrẽãba kãgabʉta. Mʉ̃ara jipa kĩrãbe ẽ iya jaradara, mamina iyiʉ̃me bedʼeada tẽãra mʉ̃ra aduʼa besi, mawũẽra Jeowabara mʉ̃ra maʉ̃ zõrãrãneba kʼarebasi mʉ̃a kʼareba nesidabʉde». Bʉra mebẽrã zõrãrã kongregasionebemabara, ¿sãwũã kʼarebabada?

11. ¿Dayirãbara sãwũã ũdubiseabʉ zõrãrãba obʉra yibiata? (Akʉra potota).

¹¹ Dayirãbara zõrãrã kongregasionebemaraba nekʼãrẽ mejãcha obʉ baera kãga ãyira, mamina Jeowabara kãgabʉ dayirãba nekʼãrẽ obʉdeba ũdubidamarẽã maʉ̃ kãgata (1 Tes. 5:​12, 13). Henrietta Finlandiadebemaba naʉ̃ta jarabʉ: «zõrãra kongregasionebemarabara kʼarebakĩrã awururata mamina maʉ̃ba jarakĩrãbʉ ẽ naʉ̃ra zõrãrãra baribʉta, kʼãrẽ oi neẽãta akʉza bedʼea zroma neẽãta. Maʉ̃ kʼarea mʉ̃a ãyi orrape kʼãwũã jarabʉ ‹bʉa obʉra jipade yibia›». Mebẽã wẽrã Turquíadebema yi trʉ̃ Seraba naʉ̃ta jarabʉ: «Zõrãrãbara awurura so zarea diapanʉ, mamina ãyabida nesidapanʉ ãyaʼa so zarea diadamarẽã, maʉ̃ kʼarea mʉ̃a bedʼea biata diabʉebʉ ãyaʼa akʉza mʉ̃ deda neko jʉ̃ẽmarẽã trʉ̃bʉ adewara ãyibawara Daizeze Bedʼea jaradia wãbʉ». ¿Bʉka zõrãrã aba iyi trajo bia obʉ kʼarea bʉa biga diakĩrãbʉta? Mawũãbʉbʉrʉ jʉrʉda iyaʼa sãwũã ũdubita biga diabʉta (1 Cor. 16:18).

KONGREGASIONʼRA AKɄBARI ZÕRÃRÃBARA KʼÃRẼTA OBɄ

12. ¿Nããbema siglodera Jesúsbara kʼairata diasi kongregasion zarea erbamarẽã? (1 Tesalonicenses 2:​7, 8).

¹² Adewara Jesúsbara kongregasionʼra akʉbari zõrãrãta diasi dayirãʼa. Nããbema siglodera kongregasion akʉbari zõrãrãne diabʉesida Pablota, Bernabéta akʉza wuabema mẽbẽrata kʼarebadamarẽã kongregasionta audre zarea bʼaita (Hech. 11:22; 15:​40, 41). Naʉ̃ra mebẽrãra mejãcha zarea osida mebẽrã kongregasionebema bia akʉita ãyi bebʉidu basidu (akʉra 1 Tesalonicenses 2:​7, 8).

13. Kongregasionʼra akʉbari zõrãrãbara, ¿kʼãrẽta opanʉ?

¹³ Kongregasion akʉbari zõrãrãra badua aña wã panaibara ãya akʉpanʉ baera kongregasionʼrata. Edaʉde awuru kongregasion akʉ wãira jĩgara wãibara. Semanaza ãyara diskursota diabʉ, mebẽrã kongregasione panʉta akʉ wãpanʉ mawũã so zarea diaita, ãba yi jʉrebʉ yi nãã edebarirabawara akʉza zõrãrãbawara, Daizeze Bedʼea jaradia wãi nãã bedʼea biata jaradiabʉ adewara zarea obʉ jõma daucha erbaita asamblea regionalʼita adewara asamblea sirkuitodebemata mawũã mebẽrãba jõma bia ũrĩnamarẽã adewara ãyira zarea opanʉ eskuela yi nãã edebariraita oita, poagaza ãba yi jʉreita yi nãã edebarirabawara akʉza Betelba nekʼãrẽ awuru omarẽã zokʼabʉta opanʉ.

14. ¿Kʼãrẽa kãgapanʉ kongregasionʼra akʉbari zõrãrãra?

¹⁴ Kongregasionʼra akʉbari zõrãrãba trajo bia obʉba, ¿sãwũã kʼarebabʉ mebẽrã kongregasionebemata? Mebẽã Turquíadebemaba naʉ̃ta jarabʉ: «Ãya kʼãwũã akʉ zebʉba kʼarebabʉ mebẽrãbawara audre ãba bʼaita akʉza audre kʼarebakĩrãita awururata adewara kongregasionʼra akʉbari zõrãrãta mʉ̃a bio ũdukʼawua zebʉrʉdera ãyidebema mia abaʉba mʉ̃aʼa jaraka ewari neẽãta mʉ̃me bedʼeaira». Johannara ewari aba kongregasion akʉbari zõrãrãʉ̃me Daizeze Bedʼea jaradia wãsi, iya maʉ̃ ewarira kĩrãdua ẽ basi, iya jarabʉ: «Mʉ̃ara maʉ̃ ewarira kĩrãdua ẽ basi, maʉ̃ ewaridera mʉ̃ mebẽãra ũme dedaʉba aña wãnata dããraba ẽ basi baera akʉza mʉ̃ara mejãcha krĩchabasi ãyita. Naʉ̃ zõrãrãba mʉ̃aʼa kʼawuabisi dayi mebẽrãneba jĩga bʼaira atia edabʉrʉ kʼãwũãbʉta mamina ẽjũã kĩrãwãreã zebʉrʉdera ewari mejãcha erpanaita dayirã mebẽrãbawara ãba bʼaita». Kongregasionʼra akʉbari mejãchaʉba kʼãwũã kʼareba zebʉrʉ mebẽrãra, maʉ̃ba mebẽrãbara ãyira mejãcha kãga (Hech. 20:37–21:1).

15. (1) 3 Juan 5-8ba jarabʉdera, ¿sãwũã biga diaseapanʉ kongregasionʼra akʉbari zõrãrãra? (Akʉra potota). (2) ¿Sãwũã kãga ũdubiseapanʉ mebẽrã kongregasione zarea trajapanʉra kimara? (Akʉra rekuadro «Kĩrãbeidua ãyi kimasida»).

¹⁵ Apostol Juanba Gayoʼa jarasi mebẽrã kongregasion akʉ wãpanʉrãra bia edamarẽã, Juanba jarasi naʉ̃ta: «Ãyi wãne kʼarebara ãyi kʼãrẽ waebʉde akʉza Daizezeba kãgabʉde orua» (akʉra 3 Juan 5-8). ¿Dayirãbara sãwũã oseabʉ Gayode kĩrãkʼa? Kongregasionʼra akʉbari zõrãrãta trʉ̃seabʉ dayirã deda neko jʉ̃ẽmarẽã adewara jaradiade wãibara iya ũrãgʼa diabʉ ũrĩta. Akʉdaya mebẽã Leslieba kʼãrẽta obʉta kongregasionʼra akʉbari zõrãrãʼa biga diaita, iya jarabʉ: «Daibara Jeowaʼa widipanʉ naʉ̃ra mebẽrãba nesidabʉta jõma diamarẽã adewara ãyaʼa bʉ diabʉebʉ kartata, mõbe jarapanʉ kʼãrẽaba kʼarebabʉta ãya kʼãwũã dai akʉ zebʉ baera». Kĩrãbedaibara kongregasionʼra akʉbari zõrãrãra dayirã kĩrãkʼabʉta, ãyisida edaʉde kayabarita akʉza ãya bida bedʼea zroma erbʉta adewara maʉ̃ kʼarea krĩcha zroma opanʉ mawũã ẽ bʉrʉ zarea neẽã sentipanʉ edaʉde, maʉ̃ba dayirãba ãyaʼa bedʼea bia jarabʉrʉdera naʉ̃bara mejãcha kʼarebabʉ ãyira. Edaʉde Jeowabara dayirãneba panʉbʉ ãya wididata (Prov. 12:25).

DAYIRÃBARA NESIDAPANɄ NAɄ̃RA YUMAKẼRÃRÃRA

16. Mebẽrã yumakẽrãrabara, ¿kʼãrẽ ʉ̃rʉ krĩchaibara ãyikʉza? (Proverbios 3:27).

¹⁶ Kongregasionʼra naʉ̃ drʉa jõmaʉ̃nẽbemaba nesidapanʉ yumakẽrãra Daizezeba nebia kĩrãkʼa diabʉrata. Bʉta yumakẽrãbʉrʉ akʉza yi buru kʼoemabʉrʉ, ¿maʉ̃ne kʼarebaseabʉka bʉara? (akʉra Proverbios 3:27). ¿Bʉara nekʼãrẽ jõma obʉka zõrãrã kʼarebabari bʼaita? Mawũã ẽ bʉrʉ zõrãrã kʼarebabaribʉrʉ, ¿nekʼãrẽ jõma obʉka zõrãrã kongregasionebema bʼaita?c Adewara, ¿zarea obʉka nekʼãrẽ awuara oita Eskuela Ebangelizadorʼeda wãita? Naʉ̃ eskuelade nemejãcha kʼawuayi bʉara akʉza kongregasione audre zokʼadayi bʉra. Bʉita naʉ̃ jõma oita zareabʉbʉrʉ Jeowaʼa widira kʼarebamarẽã maʉ̃nebemata aba oita (Luc. 11:13; Hech. 20:28).

17. Yumakẽrãra kongregasionebemaba obʉba, ¿kʼãrẽta ũdubibʉ?

¹⁷ Naʉ̃ra yumakẽrãraba kongregasione trajo bia obʉba ũdubibʉ ãyira Jesúsba zokʼanʉmʉta (Mat. 28:20). Mejãchade sobiapanʉ dayirã Nokʼo Jesúsba dayirãta mejãcha kãga baera akʉza biʼia kʼawuabʉ baera dayirãba kʼãrẽta nesidabʉta adewara mebẽrã yumakẽrãrata diasi baera dayirã kʼarebamarẽã, mamina kĩrãduada ẽ baibara Jeowaʼa biga diaita iyabʉrʉ diabʉ baera nekʼãrẽ bia jõma (Sant. 1:17).