¿Kʼãrẽba kʼarebai semanaza estudiaita?
¿BɄITARA zareabʉka semanaza doba estudiaira? ¿Masẽdogoka? Dayirãnebema mejãchaʉta mawũã berabaribʉ. Bʉ nekʼãrẽ dayirãba nrʉemaza oibarata, bari jaraita kʉita. Maʉ̃ oira ewari jʉrʉibara akʉza edaʉde oamabʉmina zarea oibara maʉ̃ oita, mamina dayirã kʉi berabarida tẽãra jipade bia sentipanʉ, abarika dayirãba Daizeze Bedʼea akʉda tẽãra jipade bia sentipanʉ (Efes. 5:26). Akʉdaya kʼãrẽba kʼarebaseabʉta semanaza doba estudiaita:
Krĩchara kʼãrẽ ewaride oseabʉta. Dayirãba kʼawuapanʉ dobaʉba Daizeze Bedʼea estudiaira jipade yibiata, maʉ̃ kʼarea maʉ̃ obʉta idubʉda ẽ baibara (Filip. 1:10). Bʉa kʼãrẽ ewaride estudiaita jidadata kĩrãdua ẽ baita kartade bʉ kʼãrãpe bʉa ũduseabʉmae bʉera mawũã ẽ bʉrʉ selularde alarmata bʉera bʉ estudiai nãã kĩrãbebimarẽã.
Jʉrʉda bʉita sãwũã audre yibiata estudiaita. ¿Bʉra sãwũã estudiakĩrã? ¿Bʉitara audre yibiaka semanane ewari aba dããra estudiaita? mawũã ẽ bʉrʉ ¿audre bigaka semanane ewari bio jidaita mamina wiña estudiaita? Bʉabʉrʉ kʼawuabʉ bʉita saʉ̃ta audre yibiata, maʉ̃ba maʉ̃ ʉ̃rʉ bia krĩcha kʼãrãpe jidara sãwũã estudiaita. Bʉ estudiai ewari zebʉrʉde estudia amabʉbʉrʉ zarea ora 10 minuto estudiaita, maʉ̃ra wiñabʉmina bigabayi. Bʉ mawũã estudianʉmʉne audre kʼawuakĩrãtotoseabʉ, mawũãbʉrʉdera audre estudiara (Filip. 2:13).
Nãã biʼia krĩchara kʼãrẽ ʉ̃rʉ estudiaita. Bʉ estudiai ewaridebʉrʉ krĩchara kʼãrẽ ʉ̃rʉ estudiaita bʉ ewarira bia zokʼa ẽ bayi (Efes. 5:16). Kartade bʉra kʼãrẽ bedʼea ʉ̃rʉ kʼawuakĩrãbʉta. Bʉa bedʼea aba bia kʼawua ẽ bʉrʉ mamina bʉa audre kʼawuakĩrãbʉbʉrʉ, kartade bʉra maʉ̃ ʉ̃rʉ audre bia kʼawuaita. Adewara bʉa estudianʉmʉne ũdura nekʼãrẽ awuru ʉ̃rʉ kʼawuakĩrãbʉta maʉ̃sida bʉra kartade.
Awuara oya awa bara. Audre yibia semanaza estudia bʼaita. Maʉ̃ba bʉa jʉrʉda ewaride estudia be ẽ bʉrʉ jʉrʉseabʉ awuru ewarita mawũã ẽ bʉrʉ awuru ũmadaʉta. Adewara awuru ʉ̃rʉ kʼawuaita jidaseabʉ. Audre biga bayi semana ababida estudia ẽã berabari ẽ baita.
Semanaza estudiabʉbʉrʉ nebiata ũdudayi bari jarita, audre Jeowa kʼawa bayi, krĩchabiata jidadayi akʉza so zarea panañi (Jos. 1:8).