Ewariza nebiata kʼawuabasi

Mʉ̃ra tosida poaga 1927de pʉwʉrʉ Chicagode, Illinois, Estados Unidosde. Mʉ̃ zezeba mʉ̃ papaʉ̃mebara wũãwũãra juesoma erpanasi: mʉ̃ mebẽã Jethata, Donta, mʉ̃ta, Karlʼta akʉza Joyʼta. Daibara nekʼãrẽ audre okĩrãpanasi Jeowaita bari jaraita, mʉ̃ mebẽã Jethara wãsi Eskuela Galaadʼeda 1943de, yi klase ũmene. Waya mʉ̃ mebẽrã Don, Karl akʉza Joyra wãsida Betelʼeda trajaita Brooklyn, Nueva Yorkde, yi nããbemata 1944de, yi tẽãbemata 1947, yi ababemata 1951ne. Mʉ̃ mebẽrãba akʉza mʉ̃ yibariraba mʉ̃aʼa yiza biata diasida, kʼarebasida audre okĩrãmarẽã Jeowadeta.

JEOWABA WÃRĨNUTA JARADIABɄ MɄ̃ MEBẼRÃ

Mʉ̃ yibarirabara Daizeze Bedʼeata ewariza akʉkĩrãbasi akʉza ãyara kãgabasi Daizezera, maʉ̃ta daia jaradiasida ãyara. Mamina mʉ̃ zezebara religionʼra ʉ̃rʉra awuara krĩcha besi, iyi Primera Guerra Mundialde yõena jʉ̃ẽside. Iyi yõneba deda zebʉrʉdera mʉ̃ papaba iyaʼa jarasi: «Karl, wãna iglesiaeda daya nãã obada kĩrãkʼa». Aramaʉ̃ta mʉ̃ zezeba iyaʼa jarasi: «Mʉ̃a bʉra kopaya wãñi mamina mʉ̃ra eda jʉ̃ẽ». Aramaʉ̃ta mʉ̃ papaba widisi: «¿Kʼãrẽa?». Mʉ̃ zezeba jarasi: «Dai yõnebʉde mʉ̃a ũdusi sãwũã saserdotera Daizezeʼa kʼareba widibasita ãyi nejʉrara beamarẽã mamina ababemarabida iyaba obasi maʉ̃nera, ¿Daizezebara kʼaita kʼarebaibasi?».

Tẽã, mʉ̃ papa iglesiade bʉeda Jeowa ʉ̃rʉ Kʼawuabipanʉrãta jʉ̃ẽsida dai deidʉ, ãya ũdubisida libro ũme yi trʉ̃ Luz, maʉ̃ne audre jara ũrĩbibasi Apocalipsis libro ʉ̃rʉ. Mʉ̃ zezeba audre kʼawuakĩrãbasi baera jidasi maʉ̃ librota. Mʉ̃ papa deda jʉ̃ẽbʉrʉde ũdusi maʉ̃ra librota mõbe audre lekĩrãsi. Tẽã, mʉ̃ papaba ũdusi periodikode jarabʉta kʼairaba audre kʼawuakĩrãbʉta Daizeze Bedʼea ʉ̃rʉ maʉ̃ra librodeba. Iyi mainʉ jʉ̃ẽbʉrʉde ẽbẽra wẽrã yõdra kiruta ũdusi, aramaʉ̃ta iya maʉ̃ ẽbẽra wẽrã ũdubisi yi librota, mõbe jarasi: «¿Nama jaradiapanʉka naʉ̃ libro ʉ̃rʉ?». Yi ẽbẽra wẽrãba jarasi: «Mawũã yi kau, eda zera». Tẽã wãbʉrʉdera daibawara wãsi. Mamaʉ̃ba yeta maʉ̃ta opanasi badua.

Ewari aba, dai ãba yi jʉrenʉmʉne mebẽã abaʉba jarasi mʉ̃a lemarẽã Salmo 144:15ta, nama jarabʉ Jeowa ode panʉrãra sobiapanʉta. Mʉ̃a kãgasi naʉ̃ testora. Mamina basi awurura testora mʉ̃ma yibia badata, bari jaraita 1 Timoteo 1:11ta, nama jarabʉ Jeowara Daizeze sobiata akʉza Efesios 5:1ba jarabʉ Jeowa kĩrãkʼa bʼaibarata dayirãra. Naʉ̃raba nekʼãrẽ ũme jaradiasi mʉ̃a, dayirã sobia bʼaibarata Jeowaita nekʼãrẽ obʉdera akʉza biga diaibarata iyi pʉwʉrʉde bʉ kʼarea.

Kongregasion dai kʼawabadara Chicagode chuasi, maʉ̃ra daibʉmaeba wiña jĩga chuasi, 32 kilometro. Mawũãsidu daira badua wãpanasi ãba yi jʉrebarieda akʉza Daizeze Bedʼea ʉ̃rʉ audre kʼawua wãsida. Mʉ̃a kĩrãbebʉ ewari aba mebẽã abaʉba komentario diasita mʉ̃ mebẽã Jethaʼa. Iya panʉbʉrʉde mʉ̃a maʉ̃ta ũrĩ, mʉ̃yikʉza jarasi: «Mʉ̃a kʼauchuasi kaʉ̃ra. ¿Kʼãrẽa juwa wa ẽ basi mʉ̃ra?». Maʉ̃neba ya mʉ̃a kʼawuasi ãba yi jʉrebari eda wãi nãã estudiaibarata akʉza mʉyikʉza komentario dia jʉ̃drʉsi. Audre yibiara daira jõmaʉ̃ta audre Jeowa kʼawa panasi. Mʉ̃ra poaga 1941ne buru kʼoesi.

JEOWABA MɄ̃AʼA JARADIABɄ ASAMBLEARANEBA

Mʉ̃a kĩrãbebʉ asamblea Cleveland, Ohiode odapeadata poaga 1942de. Maʉ̃nera wãsi mʉ̃ta mʉ̃ mebẽrãbawara akʉza awuru mebẽrãta akʉza ãyi mebẽrãbawara. Maʉ̃nera daira asamblea oda kʼawa panasi de karpade adewara 50 pʉwʉrʉra Estados Unidosdebemane mebẽrãbara asambleara ũrĩpanasi telepononeba. Maʉ̃nera Segunda Guerra Mundialʼra waidide jõ ẽ basi adewara Jeowa ʉ̃rʉ Kʼawuabipanʉrã pẽwãpanʉra audre pẽwãpanasi. Maʉ̃ kʼarea, mebẽrãbara dai ewarade kʼãĩpanʉnera dai kʼãrẽ neida berabari ẽ marẽã krĩchasida karrurata bʉeita mõbe oeda ũnabidaita mawũã ẽbẽra abaʉba neida okĩrãbasibʉrʉ ãyara karru pokoba ũnabipanasi mõbe yi karruta biabipanasi, mawũã ẽbẽra kʼãĩpanʉrata mĩrʉ wãseabamarẽã. Maʉ̃ne mʉ̃a krĩchasi Jeowa pʉwʉrʉbara naena biʼia kʼawuabʉta kʼãrẽta oita neida berabari ẽ baita. Maʉ̃ kʼarea, mʉ̃ra pera ẽ basi akʉza kʼãĩsi.

Poaga berabarida tẽã, mʉ̃a maʉ̃ asamblea ʉ̃rʉ jẽda krĩchanʉmʉne kĩrãbesi maʉ̃ ewaridera mʉ̃ papara mia kʼãrẽsi pera ba ẽ basita. Iyira mawũã pera ba ẽ basi ĩjãbasi baera Jeowa ʉ̃rʉ akʉza iyi organizasion ʉ̃rʉ. Naʉ̃ba mʉ̃a jipade yiza biata diasi.

Maʉ̃ asamblea zei nãã, mʉ̃ papabara yi nãã edebarita ojʉ̃drʉsi. Maʉ̃ kʼarea, maʉ̃ asambleadera iyara kĩrãkita ũrĩbasi diskursora ewari jõmaʉ̃nẽ Jeowaita trajai ʉ̃rʉ bedʼeabʉta. Maʉ̃ tẽã, dai deda jʉ̃ẽbʉrʉde mʉ̃ papaba daiʼa jarasi: «Mʉ̃ara idubʉ amabʉ yi nãã edebari obʉra mamina, ¿sãwũã oseabʉ mʉ̃a nekʼãrẽ mejãcha oibarabʉrʉ dedabida?». Aramaʉ̃ta iya daiʼa widisi daiba kʼarebaseabʉ kʼawuaita deda nekʼãrẽ oide. Daiba jarasi kʼarebaseabʉta. Maʉ̃ kʼarea iya jarasi diapeda nekʼoi nãã iyita kʼarebadamarẽã dai aba abakaʉba kuarto aba mawũã ẽ bʉrʉ ũme imaita. Dai kolegioeda wãna tẽã mʉ̃ papaba akʉbasi jõma biʼia imabʉ kʼawuaita mawũã Daizeze Bedʼea jaradia wãita. Mʉ̃ papabara ewariza nekʼãrẽ mejãcha oibarabasimina iyara kĩrãdua ẽ basi yi wũãwũãrãra, biʼia akʉ erbasi, dai kolegiodeba zebʉrʉdera iyira daiʉ̃me ãba basi. Edaʉde dai kolegiodeba ẽdrʉda tẽã daiba kopayabasi mʉ̃ papara Daizeze bedʼea jaradiaita. Naʉ̃ba kʼarebasi daiba kʼawuaita kʼãrẽta oibarata yi nãã edebari bʼaita.

YI NÃÃ EDEBARITA OJɄ̃DRɄSI

Mʉ̃ara yi nãã edebarita ojʉ̃drʉsi 16 poagabʉde. Maʉ̃nera mʉ̃ zezera waidide Jeowa ode ba ẽ basi mawũãsidu iya kʼawuakĩrãbasi mʉ̃ sãwũã wãta yi nãã edebaride. Ewari aba, mʉ̃a iyaʼa jarasi mʉ̃ra zarea obʉta ũduita ẽbẽrarã Daizeze ʉ̃rʉ kʼawuakĩrãbʉta mamina ũdu ẽ basita. Mʉ̃a maʉ̃ jarabʉrʉdera mʉ̃ zezebara kʼãrẽ jara ẽ basi. Aramaʉ̃ta mʉ̃a iyaʼa widisi: «¿Mʉ̃a bʉaʼa jaradiaseabʉka Daizeze Bedʼea ʉ̃rʉ?». Maʉ̃nera mʉ̃ zezebara wiña krĩchanʉmaedasi, maʉ̃ tẽã jarasi jaradiaseabʉta. Mawũã maʉ̃neba ʉ̃ta mʉ̃a Daizeze Bedʼeata jaradia jʉ̃drʉsi mʉ̃ zezeʼa, maʉ̃ra jipade yibia basi.

Maʉ̃neba ʉ̃ta daibara ãbaʉba estudia jʉ̃drʉsida libro «La verdad os hará libres». Dai estudia wãne mʉ̃a ũdu wãsi mʉ̃ zezeba mʉ̃ mejãcha kʼarebasita audre estudiaita Daizeze Bedʼea ʉ̃rʉ akʉza awurura audre jaradiai kʼawuaita. Ewari aba, iya parrapo aba le berabarida tẽã mʉ̃aʼa jarasi: «Maʉ̃ta jarabʉ yi libroba mamina, ¿bʉara sãwũã kʼawuabʉ maʉ̃ra wãrĩnuta?». Maʉ̃nera mʉ̃ara kʼawua ẽ basi sãwũã panʉira. Mʉ̃a iyaʼa jarasi: «Bʉa kãgabʉrʉ mʉ̃a tẽã jʉ̃neane panʉseabʉ maʉ̃ ʉ̃rʉ bia estudia kʼãrãpe». Maʉ̃ne mʉ̃a Daizeze Bedʼea ʉ̃rʉ audre kʼawuasi akʉza ũdusi ʉ̃kʉrʉ testora maʉ̃ ʉ̃rʉ bedʼeabʉta. Dai tẽã estudiabʉrʉde mʉ̃a iyaʼa maʉ̃ta ũdubisi. Naʉ̃ oiba mejãcha kʼarebasi dai ũmena audre Jeowa kʼawa panamarẽã akʉza maʉ̃nera mʉ̃ zezebara Daizeze Bedʼeaba jarabʉde ojʉ̃drʉsi. Maʉ̃ta, poaga 1952de buru kʼoesi.

BETELDE NEBIATA KʼAWUA JɄ̃DRɄSI

Mʉ̃ra dedaʉba wãsi 17 poagabʉde. Mʉ̃ mawũã wãsi ewaride mʉ̃ mebẽã Jethasidaa trʉ̃sida misionera bʼaita. Adewara mʉ̃ mebẽã Donʼra wãsi trajade Betelʼeda. Mʉ̃a ũdubasi ãyira sobiade trajapanʉta Jeowaita, maʉ̃ba mʉ̃abida okĩrãsi ãyide kĩrãkʼa. Maʉ̃ kʼarea, solisitu birasi Betelde trajaita akʉza Eskuela Galaadʼeda wãita, mõbe iduaribisi Jeowaba kʼawua jidamarẽã sama trajabikĩrãbʉta. Maʉ̃ta poaga 1946de mʉ̃ra trʉ̃sida Betelde trajamarẽã.

Mʉ̃ra Betelde trajabʉta 75 poagaba. Naʉ̃ra poagarane nemejãcha kʼawua zebʉrʉ mʉ̃a nama bʉde. Bari jaraita, kʼawuasi sãwũã imprimita librorata akʉza plata sãwũã zokʼaita adewara kʼarebaita Betelba nekʼãrẽ nesidabʉ edaita akʉza nekʼãrẽ awuru drʉaeda zokʼa bʉeita. Mamina mʉ̃a audrera kãgabʉ daiba ewariza diapedare ãba yi jʉrebʉrʉde Daizeze ʉ̃rʉ kʼawuabʉta adewara diskurso daia so zarea diabʉta jaradiapanʉrata.

Poaga 1947de mʉ̃ mebẽã Karlʼra trʉ̃sida Betelde trajamarẽã. Mʉ̃ mebẽãbara jipade estudiakĩrãbasi Daizeze Bedʼeara akʉza iyira nejaradiabari biabasi. Ewari aba, mʉ̃a jarasida diskursota diamarẽã, aramaʉ̃ta mʉ̃a maʉ̃ ʉ̃rʉ nemejãcha estudiasi mamina kʼawua ẽ basi saʉ̃ta zokʼaita. Aramaʉ̃ta mʉ̃ mebẽã jarasi: «Mʉ̃a nekʼãrẽ ũdusimina kʼawua ẽ kʼãrẽta zokʼaita». Mʉ̃ mebẽãba maʉ̃ne mʉ̃aʼa jarasi: «Joel, ¿audrera kʼãrẽ ʉ̃rʉ bedʼeakĩrãbʉ bʉra?». Maʉ̃ne mʉ̃a kʼawuasi kʼãrẽta zokʼaibarata, audrera mʉ̃ara jʉrʉibarabasita yi mʉ̃a jaradiakĩrãbʉ ʉ̃rʉ bedʼeabʉta, yi wuabemara kʼãrẽa jaraira nẽẽãta. Maʉ̃ne kʼawuadara jipade yibiabasi mʉ̃itara.

Dayi Betelde sobia trajaita jipade yibia Daizeze bedʼea jaradia wãita, nama nebiata ũduseabʉ baera. Bari jaraita, mʉ̃a kĩrãbebʉ ewari aba mʉ̃ta mebẽã abaʉ̃me Daizeze bedʼea jaradia wãnata diamasiare. Daiba ũdusida ẽbẽra wẽrã aba mõbe iya karta La Atalaya akʉza ¡Despertad! diasida. Tẽã daiba akʉ jʉ̃ẽbʉrʉde naʉ̃ ẽbẽra wẽrã jarasida daiba ẽbẽrarã jaradiapanʉta Daizeze Bedʼeaba nebia jaradiabʉ ʉ̃rʉ. Aramaʉ̃ta naʉ̃ ẽbẽra wẽrãba jarasi: «Daizeze Bedʼea ʉ̃rʉ jaradiadaibʉrʉ eda zeidua». Maʉ̃ne daiba iyaʼa ũdubisida testora Daizeze Nokʼo ʉ̃rʉ bedʼeabʉta akʉza ẽjũã kĩrãwãreã ʉ̃rʉ. Ũdusida naʉ̃ ẽbẽra wẽrãbara mejãchade kãgasita daiba jaradiadara. Tẽã jʉ̃nea daiba iyi akʉ jʉ̃ẽbʉrʉdera naʉ̃ ẽbẽra wẽrãbara iyi neũdukʼawuarata jõma ãba jʉre erbasi Daizeze ʉ̃rʉ kʼawuaita. Atiara maʉ̃ ẽbẽra wẽrãra akʉza yi kimaʉ̃me Jeowa odepanʉ.

NEKʼÃRẼ MEJÃCHA KʼAWUABɄ MɄ̃ KIMANEBA

Mʉ̃ra juwa jidakĩrãbasi mamina 10 poaga jʉ̃ãibarabasi kima bia ũduita. Mamina, ¿kʼãrẽba kʼarebasi mʉ̃a kima bia ũduira? Mʉ̃ra Jeowaʼa yiwidʼisi kʼarebamarẽã akʉza mʉ̃yikʉza krĩchasi: «¿Mʉ̃ra juwa jidada tẽãra kʼãrẽta okĩrãbʉ?».

Poaga 1953de Estadio de los Yankeesde asamblea oda tẽã, mʉ̃a ũdukʼawuasi mebẽã Mary Aniolta. Iyira mʉ̃ mebẽã Jethaʉ̃me Eskuela Galaadʼeda jʉ̃ẽsibasi. Maryra mʉ̃ mebẽãʉ̃me Daizeze Bedʼea jaradia wãbasi. Maryba mʉ̃aʼa sobia jara ũrĩbibasi Caribede sãwũã jaradiapanʉta akʉza sãwũã poaga berabari wãne mejãcha ẽbẽrarã Daizeze Bedʼea ʉ̃rʉ kʼawuabisita. Dai audre yi ũdukʼawua wãne kʼawuasida dai ũmena mejãcha zarea opanʉta Jeowaba kãgabʉta oita akʉza ewari jõmaʉ̃nẽ Jeowaita trajaita. Maʉ̃ta daira audre yi kãga wãsida. Poaga 1955de abrilde juwa jidasida daira. Mʉ̃mara Maryra Jeowaba nebia diada kĩrãkʼabʉ akʉza jipade yiza bia basi mʉ̃ita. Iyara mejãchade kãgabasi Jeowaita trajaira, krĩcha ẽã kʼãrẽne trajaibarata akʉza iyira zarea trajabasi, adewara ẽbẽrarã wuabemarasida bia edabasi akʉza zarea obasi nããra bʉeita Jeowadeta (Mat. 6:33). Daira sirkuitodebʉta 3 poaga berabarisi. Maʉ̃ta 1958de trʉ̃sida Betelʼeda traja wãmarẽã.

Mʉ̃ara nekʼãrẽ mejãcha kʼawuasi mʉ̃ kima Marydeba. Bari jaraita, daiba juwa jidada tẽã, krĩchasida Daizeze Bedʼeata ãbaʉba akʉ jʉ̃drʉita, daibara 15 bersikulo lepanasi ãbaʉba. Maʉ̃ le berabarida tẽã, bedʼeapanasi daiba kʼãrẽ kʼawuada ʉ̃rʉ akʉza sãwũã oũdubita mama jarabʉta. Adewara Maryba mejãcha jara ũrĩbibasi iyi Eskuela Galaadʼeda wãside kʼãrẽ kʼawuadata akʉza iyi misionera baside kʼãrẽ kʼawuadata. Naʉ̃ba mejãcha kʼarebasi mʉ̃a diskurso diabʉrʉde audre bia okʼawua wãita akʉza mebẽrã wẽrãra so zarea diabʉrʉde bia oita (Prov. 25:11).

Mʉ̃ kima zake Maryra beisi poaga 2013de. Maʉ̃neba ya mʉ̃a sobiade jʉ̃ãbʉ ẽjũã kĩrãwãreã zeita. Maʉ̃enara, mʉ̃ra zarea obʉ nekʼãrẽ yiwidi kʼawuaita akʉza soiduba ĩjãita Jeowa ʉ̃rʉ (Prov. 3:​5, 6). Mʉ̃a krĩchabʉ ẽjũã kĩrãwãreã zebʉrʉde Jeowa pʉwʉrʉ sãwũã bʼai ʉ̃rʉ, naʉ̃ba mejãchade so zarea diabʉ mʉ̃a. Maʉ̃ ewadedera, dayirã parãnabara nekʼãrẽ yiwidita mejãcha jaradiayi dayirã adewara iyisida audre ũdukʼawuadayi dayirãbara. Wãrĩnu, Jeowabara mʉ̃ara nekʼãrẽ biata mejãcha dia zebʉrʉ, mejãcha kãgata ũdubi zebʉrʉ maʉ̃ba mʉ̃a neẽ sãwũã pagaita iya mʉ̃ kʼarea kʼãrẽ ozebʉrʉta.