Jeowaba kʼawuabʉ bʉ dauba obʉra

1, 2. ¿Kʼãrẽa jẽgaseabʉ dayirãra?

¿JẼGABARIKA bʉra? Edaʉde dayirãra jẽgaseapanʉ sobiaba. Bari jaraita, dayi wũãwũã tosidade jẽgasi mawũã ẽ bʉrʉ daya jẽda kĩrãbebʉrʉde nekʼãrẽ nãã berabaridata mõbe maʉ̃ta dayi soidu jʉ̃ẽsibʉrʉ jẽgabʉ, mawũã ẽ bʉrʉ dayi neũdukʼawuadebemata aba jẽda ũdubʉrʉde dããrabadata yi ũdu ẽ panʉta.

² Mamina dayirãra mejãcha jẽgabari bedʼea zromata ũdusida baera. Bari jaraita, daya kãgabʉ ẽbẽraba dayita sopʉabisi baera jẽgabʉ mawũã ẽ bʉrʉ mejãcha pʉabʉ baera kaya zromaba mawũã ẽ bʉrʉ dayirã mebẽrãnebemata akʉza dayi neũdukʼawuata aba beisibʉrʉ. Dayirã mawũã berabaribʉrʉdera Jeremías kĩrãkʼa sentipanʉ. Babilonianebemaraba Jerusalén ãrĩsidade. Iya jarasi: «Mʉ̃ daubara mejãcha erozuasi bania kĩrãkʼa [ . . . ]. Mʉ̃ra ewari jõma jẽgabasi diamasi akʉza ewaridebida» (Lam. 3:​48, 49).

3. ¿Sãwũã sentibʉ Jeowara iyi odepanʉra zʉbʉriabʉta ũdubʉrʉdera? (Isaías 63:9).

³ Jeowaba kʼawuabʉ naʉ̃ ewaridʉbayeda kʼãrẽãba jẽga zebʉrʉta dayirãra. Daizeze Bedʼeaba jarabʉ, Jeowabara ũrĩbʉ akʉza akʉbʉ dayirã iyaʼa yiwidʼidibʉrʉde mejãcha zʉbʉriabʉ baera (Sal. 34:15). Mamina Jeowabara bari ũrĩ ẽ mawũã ẽ bʉrʉ bari akʉ ẽ dayirã zʉbʉriara awuarabʉrʉ iyi ode kʼẽrẽpanʉra zʉbʉriabʉrʉdera Jeowara arigʉ sopʉabʉ maʉ̃ kʼarea, iya dayirãra akʉbʉ baera iyi wũãwũãra kĩrãkʼa, maʉ̃ kʼarea iyara aramaʉta kʼarebakĩrãbʉ, dayirãʼa zarea diaita (akʉra Isaías 63:9).

4. ¿Kʼaira yizata akʉdai mõbe kʼãrẽta kʼawuadai Jeowaba ãyi sãwũã edadadeba?

⁴ Daizeze Bedʼeabara jarabʉ Jeowaba kʼãrẽ osita iyi odepanʉra zʉbʉriabʉ ũdui, bedʼeadayi Ana ʉ̃rʉ, David akʉza Ezequías. ¿Kʼãrẽba dauba obisi ãyira? ¿Kʼareta osi Jeowaba ãyi kʼarebaita? ¿Ãyi yizaba sãwũã kʼarebaseabʉ dayirã bedʼea zromaba mejãcha sopʉa sentibʉde mawũã ẽ bʉrʉ dayi dauba obʉde bedʼea zroma kʼarea?

DAUBA OBɄDE MEJÃCHA SOPɄABɄ KʼAREA

5. ¿Sãwũã sentibasi Anara?

⁵ Anara mejãcha jẽgabasi bedʼea zromata bio erbasi baera. Ana kimabara kima ũme erbasi, yi abameba kimara Peninábasi. Peninábara jʉrabasi Anara, Peninára toseabasi mõbe wũãwũãrabarabasi mamina Anara tobe ẽ basi (1 Sam. 1:​1, 2). Maʉ̃ kʼarea Peninábara Anara imitia jarabasi mõbe ipida basi iyi kʼarea, maʉ̃ kʼarea Anara mejãcha zʉbʉriabasi, jẽgabasi akʉza kʼãrẽ ko ẽ basi, ¿bʉta Ana basibʉrʉ sãwũã sentikasi? (1 Sam. 1:​6, 7, 10).

6. ¿Kʼãrẽta osi Anabara iyi bia sentita?

⁶ ¿Kʼãrẽta osi Anabara iyi bia sentita? Anara nããrãra wãsi tabernakuloeda, israelitarãra mama yiwidʼidi panasi Jeowaʼa. Yi ũmera, Anara mama jʉ̃ẽ kʼãrãpe «Jeowaʼa yiwidʼisi akʉza jẽgabʉta taʉ ẽ basi». Anaba Jeowaʼa jarasi: «Akʉra mʉ̃ kʼãrẽaba zʉbʉrianʉmʉta» (1 Sam. 1:10b, 11). Anabara jõma jarasi Jeowaʼa iyi sãwũã sentinʉmʉra. Krĩchara Jeowa sãwũã sentisita iya iyi kau Ana bedʼea zroma kʼarea mejãcha zʉbʉrianʉmʉta akʉside.

7. ¿Sãwũã sentisi Anara iyi sãwũã sentibʉta Jeowa jarada tẽãra?

⁷ Anabara jõma jarasi iyi sãwũã sentibʉra Jeowaʼa, mõbe bia sentisi akʉza sumo saserdote Elíba iyaʼa bedʼea jaradaba. Daizeze Bedʼeaba jarabʉ: «iyira wãsi akʉza nekosi adewara iyi kĩrãne zʉbʉria ũdubadara wua neẽbasi» (1 Sam. 1:​17, 18). Iyi bedʼea zromara amaraʉ̃ta neẽãtoto ẽ basimina iyira so aduʼa besi. Ana bedʼea zromara zʉgʉa zroma daya anʉmʉminabari kĩrãkʼa basi, mamina iya Jeowaʼa jaraside iyi sãwũã sentibʉta jõma maʉ̃ba iyi bedʼea zroma kenetabʉrʉ kĩrãkʼa basi. Jeowaba akʉsi akʉza ũrĩsi iyi bedʼeara maʉ̃ kʼarea iya kʼarebasi Anara. Anara idibʉrʉ toseabasi (1 Sam. 1:​19, 20; 2:21).

8, 9. Hebreos 10:​24, 25de jarabʉdebara, ¿kʼãrẽa zarea odaibara ãba yi jʉrebari eda wãnaita? (Akʉra potota).

⁸ ¿Kʼãrẽta kʼawuapanʉ? ¿Bʉara atiara bedʼea zroma bʉ sopʉabibʉta bʉ jẽgabibʉta ũdunʉmʉka? Bʉ mebẽrãnebemata beisibʉrʉ mawũã ẽ bʉrʉ bʉ neũdukʼawuata maʉ̃ba jẽgabʉbaibara, mamina mawũã berabaribʉrʉdera dayirã abapai bakĩrãbʉ, ¿kʼãrẽta oseabʉpe? Anane kĩrãkʼa oseabʉ, iyi sopʉa basidera iyira wãsi tarbernakuloeda mõbe mama yiwidʼisi akʉza mama iyira zarea jidasi jẽda. Bʉabida abarika oseabʉ, bʉta badua wãbʉbʉrʉ ãba yi jʉrebarieda paebʉmina mawũã ẽ bʉrʉ abapai bakĩrãbʉmina Jeowaba so zarea diayi (akʉra Hebreos 10:​24, 25). Dayirã ãba yi jʉrebarima wãbʉrʉdera mejãcha ũrĩbʉ nebʉra Daizeze Bedʼeadebemata mawũã ẽ bʉrʉ bedʼea biata, maʉ̃ba krĩcha kayirua erbʉde mawũã ẽ bʉrʉ krĩchabʉde jipa zeri ẽãta, abapai bakĩrãbʉta, dayi ãba yi jʉrebarima wãbʉba kʼarebayi dayi jẽda krĩcha bia erbaita, jẽda krĩcha yiwidʼita erbaita akʉza jẽda sobia bʼaita.

⁹ Dayirã ãba yi jʉrebʉdera mebẽrãba dayirãʼa ũdubibʉ mejãcha kãgabʉta naʉ̃ba mejãcha so zarea diabu (1 Tes. 5:​11, 14). Mebẽã yi nãã edebari 100 ora diabʉba yi kima beiside jarasi naʉ̃ta: «Idi basidu jẽkabʉ mʉ̃ra iyi beida kʼarea, edaude jipa abapai bakĩrãbʉ jẽgaita mamina ãba yi jʉrebarima wãbʉrʉba mejãcha so zarea diabʉ mʉ̃aʼa, mebẽrãba mʉ̃aʼa mejãcha bedʼea biata jarapanʉ baera mʉ̃ jẽda sobiabidaita. Ãba yi jʉrebari eda jʉ̃ẽbʉrʉdera mʉ̃ra sopʉa jʉ̃ẽbʉ mamina jẽda deda jʉ̃ẽbʉrʉdera audre bia sentibʉ». Dayirã ãba yi jʉrebari eda jʉ̃ẽbʉrʉdera Jeowabara zokʼaseabʉ dayirã mebẽrã wẽrãta mawũã ẽ bʉrʉ dayirã mebẽrã yumakẽrãrata.

10. ¿Sãwũã oseapanʉ Anane kĩrãkʼa dayirã mejãcha sopʉabʉde?

¹⁰ Anara bia sentisi iya jõma jaraside Jeowa iyi sãwũã sentibʉta. Edaʉde dayisida mawũã berabariseabʉ, ¿maʉ̃ne kʼãrẽba kʼarebaseabʉpe? 1 Pedro 5:7de jarabʉba, nama jarabʉ dayirãba jõma jaradamarẽã Jeowaʼa dayi sãwũã sentibʉra, dayirã bedʼea zromata, iyara ũrĩbʉ baera dayirã bedʼeara. Mebẽã wẽrã abaʉ kimara nezrʉgamiaraba beasida, maʉ̃ne iya jarasi: «Arigʉ sopʉa taibasi mʉ̃ra, mõbe krĩchasi jipa wua sobia ba ẽ baita mʉ̃ra». ¿Kʼãrẽba kʼarebasi iyira? «Aramaʉ̃ta Jeowaʼa yiwidʼisi. Mʉ̃ara edaʉde kʼawua ẽ basi sãwũã jaraisi jõma mʉ̃ sãwũã sentibʉra, mamina mʉ̃a kʼawuabasi Jeowaba kʼawuabʉta mʉ̃ sãwũã sentibʉra, maʉ̃ba mʉ̃ mejãcha sopʉa basidera iya kʼarebasi iya adʼua babisi mʉ̃ sora, mõbe aramaʉ̃ta mʉ̃a sentibasi mʉ̃ra aduʼabʉta akʉza kʼarebasi mʉ̃ mapae ẽ baita». Bʉa jõma Jeowaʼa jarabʉrʉde bʉ sãwũã sentibʉta, iya sentibʉ dayi pʉara, kʼawuabʉ dayi sãwũã sentibʉta, dayi bedʼea zroma aramaʉ̃ta jõtoto ẽ mina Jeowaba kʼarebaseabʉ dayi aduʼa bʼaita daya nesidabʉde (Sal. 94:19; Filip. 4:​6, 7). Akʉza Jeowabara kʼarebayi bʉa awuantabʉ baera (Heb. 11:6).

JẼGABɄ SEWASIDA BAERA

11. ¿Davidʼra sãwũã sentisi wuabemaraba bia edada ẽ baside?

¹¹ Davidʼtara jipa zare basi ariwia ʉ̃kʉrʉ iyi mebẽrãnebemaba akʉza neudukʼawuaraba iyi sewasidade. Maʉ̃ra iyitara jipa zare basi, ãyara jʉrasida baera Davidʼra akʉza edaʉde iyira beakĩrãpanasi (1 Sam. 19:​10, 11; 2 Sam. 15:​10-14, 30). Maʉ̃ba iyira mejãcha sopuabasi, mejãcha zarebasi iyita. Maʉ̃ kʼarea iya jarasi: «Zarea neẽ mejãcha sopʉabʉba, diamasiza mʉ̃ kʼãĩbarira daubaba sʉrrʉabʉ, mʉ̃ daubaba birabibʉ mʉ̃ kꞌãĩbʉmae». ¿Kʼãrẽã mawũã sentibasi iyira? «ẽbẽraba pẽwãbʉ kꞌarea» (Sal. 6:​6, 7). Davidʼra mejãcha zʉbʉriabisida baera jipa zare basi iyi jẽga ẽ baira.

12. Salmo 56:8de jarabʉbara, ¿kʼãrẽta biʼia kʼawuabasi Davidbara?

¹² David mejãcha zʉbʉriasimina iya biʼia kʼawuabasi Jeowaba kãgabʉta iyira. Maʉ̃ kʼarea iya jaraseabasi Jeowaba ũrĩbasita iyi jẽgabadara (Sal. 6:8). Maʉ̃ tẽã bʉsi bedʼea jipa kĩrãwãreãta. Dayirãba maʉ̃ bedʼeara ũduseabʉ Salmo 56:8de (akʉra). Naʉ̃ bedʼeaba biʼia jarabʉ Jeowaba dayirã kʼãrẽãma kãgabʉta akʉza iya kʼawuabʉta biʼia dayirã sãwũã sentibʉra. Maʉ̃ kʼarea Davidba jaraseabasi Jeowaba iyi daʉbara bʉbʉ kĩrãkʼa basita libro abaʉde. Maʉ̃ kʼarea Davidba biʼia kʼawuabasi Jeowabara akʉbasita iya bedʼea zroma erbʉra mamina akʉza biʼia kʼawuabasi Jeowabida akʉbasita iyi wuabemaraba sãwũã sentibipanʉta.

13. ¿Kʼãrẽba kʼarebaseabʉ dayita sewasidabʉrʉ mawũã ẽ bʉrʉ zʉbʉriabisidabʉrʉ? (Akʉra potota).

¹³ ¿Kʼãrẽta kʼawuapanʉ? ¿Neũdukʼawua abaʉba sewasika bʉra? ¿Bʉra sopʉabʉka bʉ kimaba idubʉsi baera? ¿Sopʉabʉka ẽbẽra bʉme bedʼea abadaʉ̃me yi ũdubʉsida baera? ¿Sopʉabʉka bʉ mebẽrãnebemaba mawũã ẽ bʉrʉ neũdukʼawuaba Jeowata idubʉsi baera? Akʉdayi dayi kʼãwũãne wãrĩnu berabaridata. Mebẽã abaʉba jarasi iyi sãwũã sentisita iyi kima ãĩbaside: «Arigʉ pʉbasi iya mʉ̃ kʼãwũã sewaside. Jipa krĩcha kʼabasi mʉ̃a, mejãcha kĩrʉ̃si mʉ̃ra, jipa zeri ẽ kĩrãkʼa sentibasi mʉ̃ra». ¿Kʼãrẽba kʼarebaseabʉ bʉta sewasidabʉrʉ mawũã ẽ bʉrʉ jipa sopʉabisidabʉrʉ? Biʼia kʼawua bʼaibara Jeowabara dayirãra idubʉ ẽãta. Mebẽãba jarasi: «Mʉ̃a kʼawuasi dayi abari ẽbẽrabara sewaseabʉta mamina Jeowara mawũã bʉ ẽ. Jeowaba kʼarebabʉ dayirãra, iyiʉ̃me kʼẽrẽpabʉrãra kʼãrẽ bedʼea zroma krĩcha ẽã kʼarebayi» (Sal. 37:28). Kĩrãbera mia abaʉba Jeowade kĩrãkʼa kãgada ẽ baita bʉra. Bʉ mejãcha zʉbʉriabisidamina maʉ̃ba krĩcharãra Jeowasida abarika bʉta awuarabʉrʉ akʉra Jeowaba kãgata bʉra (Rom. 8:​38, 39). Ẽbẽra abaʉba bʉta zʉbʉriabisimina biʼia kʼawuabara Jeowabara bʉra kãgabʉta.

14. Salmo 34:18deba, ¿kʼãrẽta biʼia kʼawuapanʉ?

¹⁴ Bʉta sewasidabʉrʉ kʼarebaseabʉ bedʼea bia Davidba jaradaba Salmo 34:18de (akʉra). Libro abaʉba jarabʉ yi mejãcha zʉbʉriabʉrãra abarikabʉta kʼãrẽ bia jʉ̃ã ẽ bai kĩrãkʼa. ¿Jeowaba sãwũã kʼarebabʉ yi mawũã sentipanʉrãra? Kʼaʉ̃ bersikuloba jarabʉ Jeowara kʼawabʉta yi sopʉabʉrabawara, yi zʉbʉriabʉrãra ẽbẽra abaʉba mawũã osi baera. Jeowara Zeze bia kĩrãkʼabʉ. Jari yi zezeba yi wũãwũã jẽganʉmʉ ũdui, jira edape kʉrʉgabidabari kĩrãkʼa. Dayirã zʉbʉrianʉmʉta ũdui Jeowabara aramaʉ̃ta kʼarebabʉ. Iya dayirã sora aduʼa babi kĩrãbʉ mawũã aukʼara zʉbʉria ẽ baita. Mamina dayirãbara jʉ̃ãpanʉ nebia zeita, maʉ̃ kʼarea awuantaseapanʉ badu bedʼea zromata (Is. 65:17).

YI SÃWŨÃ ARA OITA KʼAWUA Ẽ KʼAREA DAUBA OBɄDE

15. ¿Kʼãrẽ bedʼea zromaba mejãcha jẽgabisi Ezequíasʼra?

¹⁵ Nokʼo Ezequías 39 poaga baside, iyira mejãcha kayasi. Maʉ̃ne Jeowaba jarasi propeta Isaíasdeba iyira maʉ̃ kayaba beibasita, jipa kʼãrẽ obe ẽ basita (2 Rey. 20:1). Maʉ̃ kʼarea Ezequíasʼra mejãcha zʉbʉriasi, mejãcha sopʉa kʼãrãpe widisi Jeowaʼa kʼarebamarẽã iyi mawũã zʉbʉria ẽ baita (2 Rey. 20:​2, 3).

16. ¿Jeowaba Ezequías jẽganʉmʉta ũdui kʼãrẽta sentisi akʉza kʼãrẽta osi maʉ̃ kʼarea?

¹⁶ Jeowaba ũduside Ezequías jẽganʉmʉta maʉ̃ bedʼea pʉa kʼarea mejãcha sopʉasi. Aramaʉ̃ta propeta Isaíasdeba jarabʉesi ũrĩsita iyi yiwidʼira akʉza ũdusita iyi jẽgabadara. Maʉ̃ kʼarea jarasi iyira bebibasita. Jeowaba iyira so zʉbʉria akʉsi baera jarasi dããrabaibasita akʉza Jeowaba jarasi Jerusalénʼra ẽdrʉbibasita asiriorã juwadeba (2 Rey. 20:​4-6).

17. ¿Jeowaba sãwũã kʼarebabʉ dayirã kayabʉdera? (Salmo 41:3 akʉza akʉra potota).

¹⁷ ¿Kʼãrẽta kʼawuapanʉ? ¿Kʼãrẽta oseabʉ bʉa bʉ kayata jipa taʉ ẽ kĩrãkʼabʉbʉrʉ? Jõma jarada Jeowaʼa bʉ sãwũã sentibʉta mejãcha jẽgaibaramina. Daizeze Bedʼeaba jarabʉ Daizezeba dayirãra kãga akʉbʉta akʉza dayirãʼa so zarea diabʉta mejãcha kayabʉmina (2 Cor. 1:​3, 4). Kʼawuapanʉ Jeowaba naʉ̃ ewade dayirã kayara neẽã totobi ẽãta, mamina iya dayirã diaseabʉ zareata maʉ̃ awuantaita (akʉra Salmo 41:3). Jeowaba kʼarebabʉ iyi jaure zareadeba, mawũã zarea erbaita, so aduʼa bʼaita akʉza krĩcha bia erbaita (Prov. 18:14; Filip. 4:13). Adewara Jeowaba jarabʉ kayara wua neẽ baita aranʉbaira (Is. 33:24).

18. ¿Kʼãrẽ testo Daizeze Bedʼeadebemaba kʼarebabari bʉra aduʼa bʼaita bedʼea zroma berabarinʉmʉne? (Akʉra rekuadro «Jeowaba bedʼea jarabʉba dayirã daʉba jareseabʉta»).

¹⁸ Ezequíasʼra kʼarebasi Jeowaba iyaʼa bedʼea jaradaba. Idibida dayirãsida Jeowa bedʼeaba kʼarebabʉ. Maʉ̃ kʼarea iya iyi bedʼeade bʉ amaesi bedʼeara dayirã kʼarebabʉta bedʼea zroma berabarinʉmʉne (Rom. 15:4). Atia akʉdayi mebẽã África Occidentaldebemata kʼãrẽta berabarisita iyaʼa jarasidade kanserba baribʉta. Iya jarabʉ: «Isaías 26:3ba mejãcha kʼarebabasi. Dayirãba nekʼãrẽ obe ẽ dayi nekʼãrẽ berabaribʉrʉdera. Mamina Jeowaba kʼarebaseabʉ dayi sãwũã bʼaita akʉza sãwũã krĩchaita maʉ̃ mawũã berabaribʉrʉde». ¿Kĩrãbebʉka testo aba bʉ kʼarebadata bʉa mejãcha bedʼea zroma ũdubaside?

19. ¿Kʼãrẽ ewarita jʉ̃ãpanʉ?

¹⁹ Naʉ̃ ewari jõbodoare panʉ baera dayirãba mejãcha ũdu wãnañi audre bedʼea zroma dayi zʉbʉriabibʉta akʉza jẽgabibʉta. Mamina dayirãba akʉda kĩrãkʼa Ana yizade, David akʉza Ezequías, maʉ̃ba kʼawuapanʉ Jeowaba akʉbʉta dayirã zʉbʉriara akʉza kʼawuabʉta dayirã sãwũã sentibʉta maʉ̃ne. Iyara bia kĩrãbebʉ dayirã kʼãrẽãba jẽgabʉra. ¿Kʼãrẽta oseabʉpe dayirãba bedʼea zroma ũdubʉ kʼarea jẽgabʉbʉrʉ? Nããra, jõma jaraseabʉ Jeowaʼa dayirã sãwũã sentibʉta. Yi ʉ̃mera, idubʉda ẽ baibara ãba yi jʉrebarieda wãpanʉta mebẽrãbawara ãba bʼaita, mebẽrãba kʼarebaseapanʉ baera. Yi ũbeara, Daizeze Bedʼeade jʉrʉra yizara bʉ kʼarebaseabʉta. Zeyi ewarita dayirã wua zʉbʉria ẽ baita pʉa kʼarea, mia jẽga ẽ baita maʉ̃ kʼarea. Awuarabʉrʉ, jẽgadayi mejãcha bai baera sobiata ẽjũã kĩrãwãreãnẽra (Apoc. 21:4).