Yibarira, sãwũã kʼarebaseabʉ mara wũãwũãra Daizeze Bedʼea ʉ̃rʉ audre ĩjãita akʉza Jeowa ʉ̃rʉ

1, 2. ¿Wũãwũãraba ãya ĩjãbʉ ʉ̃rʉ widira yibarirabara kʼãrẽta oibara?

IDI ewade wũãwũãra dapũẽira zare, maʉ̃ kʼarea biga diakĩrãpanʉ maraʼa kʼarebapanʉ baera mara wũãwũãraba Daizeze Bedʼea ʉ̃rʉ ĩjãmarẽã akʉza Jeowa ʉ̃rʉ (Deut. 6:​6, 7). Wũãwũãra waribʉrʉza nekʼãrẽ widiseabʉ dayirãba ĩjãbʉ ʉ̃rʉ bari jaraita, naʉ̃ bedʼeata widiseapanʉ, ¿kʼãrẽa Jeowabara dayirãʼa nekʼãrẽ omarẽã zokʼabʉ?

² Bʉ wũãwũãba maʉ̃ bedʼea widibʉ kʼarea bʉa krĩchaseabʉ Daizeze Bedʼea ʉ̃rʉ akʉza Jeowa ʉ̃rʉ ĩjãbʉta adua wãta. Warrarabara ãyi wari wãbʉrʉza audre bedʼeata widibʉ, mawũã audre zarea ĩjã bʼaita, maʉ̃ba perarãra (1 Cor. 13:11). Wũãwũãraba bedʼea widibʉrʉde aramama mesera kʼarebara audre bia krĩchaita akʉza audre ĩjãita Daizeze Bedʼea ʉ̃rʉ akʉza Jeowa ʉ̃rʉ.

3. ¿Kʼãrẽta kʼawuadai naʉ̃ artikulodera?

³ Naʉ̃ artikulode nekʼãrẽ ũbea kʼawuadayi sãwũã yibariraba kʼarebaseabʉta ãyi wũãwũãrata. Aba, audre ĩjã bamarẽã Jeowa ʉ̃rʉ akʉza Daizeze Bedʼea ʉ̃rʉ. Ũme, yibarirabara ũdubibara ãyi wũãwũãra kʼãrẽa yibiata Daizeze Bedʼeaba jarabʉta ũrĩta. Ũbea, yibaribara sãwũã kʼarebaseabʉ ãyi wũãwũãra ãya ĩjãbʉ ʉ̃rʉ awurua jaradiamarẽã.

KʼAREBAIDUA MARA WŨÃWŨÃRABA AUDRE ĨJÃNAMARẼÃ DAIZEZE BEDʼEA Ʉ̃RɄ AKɄZA JEOWA Ʉ̃RɄ

4. ¿Wũãwũãrabara kʼãrẽ ʉ̃rʉ widiseabʉ akʉza kʼãrẽa?

⁴ Yibarirabara kʼawuapanʉ ãya ĩjãbʉta ũdubibʉ kʼarea ãyi wũãwũãrabida abarika ĩjãpanaita, maʉ̃ kʼarea wũãwũãrabara ãyikʉza widiseapanʉ naʉ̃ bedʼeata: «¿Mʉ̃ara sãwũã kʼawuabʉ Daizezera wãrĩnu bʉta? ¿Mʉ̃ara Daizeze Bedʼeaba jarabʉra ĩjãseabʉka?». Daizeze Bedʼeaba jarabʉ kristianora ãyi dobaʉba kʼawuadamarẽã kʼãrẽta omarẽã kãgabʉta Daizeze Bedʼeaba (Rom. 12:1; 1 Tes. 5:21). Mawũẽra, ¿marabara sãwũã kʼarebaseabʉ mara wũãwũãraba audre ĩjã bamarẽã?

5. ¿Yibarirabara sãwũã kʼarebaseabʉ ãyi wũãwũãra Daizeze Bedʼea ʉ̃rʉ audre ĩjãmarẽã? (Romanos 12:2).

⁵ Kʼarebara mara wũãwũãra Daizeze Bedʼeaba jarabʉta ãyi dabʉba akʉmarẽã wãrĩnuta (akʉra Romanos 12:2). Mara wũãwũãraba bedʼea widibʉrʉde kʼarebara ãyi dobaʉba jʉrʉ kʼawuamarẽã, kʼarebara mara wũãwũãra eda wãmarẽa dayirã pagina internetʼne, jw.org de. Bari jaraita, kʼarebara akʉmadamarẽã kartaraba akʉza bideoraba ũdubibʉta Daizeze Bedʼeara ẽbẽrarãba oẽbasita (1 Tes. 2:13). Bari jaraita, jʉrʉseabʉ dayirã kartarane Nínive ʉ̃rʉ bedʼeabʉta. Naweda jarabarisida ẽbẽrarã Daizeze Bedʼea ʉ̃rʉ mejãcha kʼawuabʉba maʉ̃ pʉwʉrʉra neẽbasita. Mamina 1850de ũdusida Nínive pʉwʉrʉ ãrĩmata, maʉ̃ba ũdubisi Daizeze Bedʼeaba Nínive ʉ̃rʉ jarabʉra wãrĩnubasita (Sof. 2:​13-15). Akʉza akʉseabʉ karta Jarakabʉ noviembre 2021nebemata, «¿Kʼawuabasika?» abʉmae akʉseabʉ propesiara sãwũã Nínive ãrĩna ʉ̃rʉ bedꞌeabʉta. Adewara kʼarebara bʉ wũãwũãra akʉmarẽã Daizeze Bedʼeata akʉza ensiklopedia ẽbẽrarãba odaʉ̃me, mawũã kʼawua zemarẽã Daizeze Bedʼeaba jarabʉra wãrĩnuta.

6. ¿Yibarirabara sãwũã jaradiaseabʉ ãyi wũãwũãra Daizeze Bedʼeaba jarabʉra wãrĩnuta? Yiza aba jara ũrĩbira (akʉra potota).

⁶ Bʉ wũãwũãra kʼarebara jʉrʉmarẽã Daizeze Bedʼeaba jarabʉra wãrĩnuta. Yibarirabara mejãcha ewari erbʉ ãyi wũãwũãrabawara bedʼeaita Daizeze Bedʼea ʉ̃rʉ akʉza Jeowa ʉ̃rʉ. Bari jaraita, edeseabʉ ãyi wũãwũãrãra museoeda mawũã ẽ bʉrʉ parkeʼeda, adewara edeseabʉ Betelʼeda mamabema museo akʉbita. Bari jaraita, mara museoeda wãbʉrʉde mara wũãwũãra ũdubiseabʉ nekʼãrẽ bʉta, mawũã ũdubita sãwũã Daizeze Bedʼeaba jarabʉra wãrĩnuta. Bari jaraita, jaradiaseabʉ La piedra moabita ʉ̃rʉ, maʉ̃ mõgarãra 3.000 poaga berabaridatabʉ, maʉ̃ne eda bʉchu Jeowa trʉ̃ta, maʉ̃ mõgarara chu Museo del Louvre, Parísde. Mawũã ẽ bʉrʉ akʉseabʉ maʉ̃ poto mõgaradebemata internetʼne mawũã ẽ bʉrʉ dayirã kartarane. Betel Warwick, Nueva Yorkde, mamabida chu museota, maʉ̃ museo trʉ̃ra «La Biblia y el nombre divino», maʉ̃ museodebida maʉ̃ mõgara kopiata bʉ, maʉ̃ mõgarade eda jarabasi nokʼo Mesá, Moabdebemara Israel ʉ̃rʉ basita akʉza Daizeze Bedʼeabara jarabʉ maʉ̃ra mawũã berabarisita (2 Rey. 3:​4, 5). Mara wũãwũãraba ũdubʉrʉde Daizeze Bedʼeaba jarabʉra wãrĩnuta ãya ĩjãbʉra audre wari wãñi (naʉ̃ testoʉ̃me akʉra 2 Crónicas 9:6).

7, 8. (1) ¿Nekʼãrẽ naʉ̃ drʉadebemaba kʼãrẽta ũdubibʉ? Yiza aba jara ũrĩbira (akʉra potota). (2) ¿Wũãwũãraba audre ĩjãmarẽã wãrĩnu Daizezeba jõma parãsita kʼãrẽ widiba kʼarebaseabʉ?

⁷ Kʼarebaidua mara wũãwũãraba akʉdamarẽã nekʼãrẽ naʉ̃ drʉadebʉta. Mara wũãwũãrabawara oide wãne kʼarebaidua mara wũãwũãba ũdumarẽã Jeowaba naʉ̃ drʉa sãwũã parãnata. Mõbe kʼarebara bʉ wũãwũãba ũrĩmarẽã maʉ̃ nekʼãrẽ parãnara jipa bʉrʉ biata. Bari jaraita, nekʼãrẽ mejãcha naʉ̃ drʉadebʉra bʉrrʉbʉrrʉabʉ. Sientipikorabara maʉ̃ ʉ̃rʉ mejãcha estudiapanʉ. Nicola Fameliba jarasi maʉ̃ nekʼãrẽ bʉrrʉbʉrrʉabʉra juachaseabʉta, maʉ̃ juachaira trʉ̃gapanʉ sucesíon de Fibonacci.a Maʉ̃ bʉrrʉbʉrrʉachura ũduseabʉ korogo dede, ʉ̃kʉrʉ chiruade, nepono girasolde, galasiade akʉza nekʼãrẽ awurude.

⁸ Kolegiodera wũãwũãrabara kʼawuaseabʉ edaude naʉ̃ drʉade nekʼãrẽ ʉ̃tʉ zebʉra abarika ʉ̃tʉ zebʉta. Bari jaraita, bakuruta: bakuru borrogoabara erbʉ yi juwata, maʉ̃ juwade ʉ̃tʉ zebʉ awuru bakuru juwa zakerata, mawũã wã yi kĩbʉidubayeda, maʉ̃ mawũãbʉra trʉ̃gapanʉ fractales. Nekʼãrẽ mejãchaʉde ũduseabʉ mawũã chura. Adewara ãyira daucha mawũãbʉ wiña aña chue mamina, ¿kʼaiba osi mawũã bamarẽã? Mara wũãwũãraba maʉ̃ ʉ̃rʉ widibʉbʉrʉ Daizezeba nekʼãrẽ oda ʉ̃rʉra wãrĩnu ĩjãñi (Heb. 3:4). Maʉ̃are ãyaʼa naʉ̃ta jaraseabʉ: «Warrara, dayirãsida Jeowaba parãsi baera, ¿mara mara Iya dayirã jarasi ẽka kʼãrẽta oibarata akʉza sãwũã baibarata sobia bʼaita?». Maʉ̃ tẽã jaraseabʉ maʉ̃ ũrãgʼara ũduseabʉta Daizeze Bedʼeade.

NASA, ESA, and the Hubble Heritage (STScl/AURA)-ESA/Hubble Collaboration

BɄ WŨÃWŨÃRA KʼAWUABIRA KʼÃRẼÃ YIBIATA DAIZEZE BEDʼEABA JARABɄ ŨRĨTA

9. ¿Kʼãrẽa ʉ̃kʉrʉ wũãwũãraitara zareabʉ Daizeze Bedʼeaba jarabʉ ũrĩra?

⁹ Daizeze Bedʼeaba jarabʉ bʉta nekʼãrẽ dayirãba obe ẽãta maʉ̃ra nekayirua baera. Maʉ̃ kʼarea wũãwũãrabara edaude widiseapanʉ kʼãrẽa Daizeze Bedʼeabara mawũã jarabʉ, ãya naʉ̃ ũme kʼarea maʉ̃ta jaraseabʉ: ĩjã ẽ baera Daizeze Bedʼeaba jarabʉra wãrĩnuta mawũã ẽ bʉrʉ bia jaradiaʉ ẽ baera ãya ĩjãbʉ ʉ̃rʉ. Mara wũãwũãraba bia kawuamarẽã kʼãrẽa yibiata Daizeze Bedʼeaba jarabʉ ũrĩra, naʉ̃ librota akʉseabʉ ãyibawaraʉba Bʉra ewari jõmaʉ̃nẽ sobia baseabʉ.b

10. ¿Sãwũã kʼarebaseabʉ wũãwũãrãra audre Jeowa neũdukʼawua bamarẽã?

¹⁰ Kʼarebara mara wũãwũãrãra audre Jeowa neũdukʼawua bʼaita. Bʉ wũãwũãrabawaraʉba Daizeze Bedʼea akʉbʉrʉde akʉra libro Bʉra ewari jõmaʉ̃nẽ sobia baseabʉ, mama widiseabʉ bedʼea edabʉta akʉza yizarata ũdubiseabʉ, mawũã kʼawuaita ãya kʼãrẽ krĩchabʉta akʉza kʼãrẽ okĩrãbʉta (Prov. 20:5). Bari jaraita, libro yi 8de jarabʉ Jeowara dayirã neũdukʼawua biata, adewara dayirãʼa jaradiabʉ kʼãrẽta oibarata bia wãita. Akʉza ãyiʉ̃meba akʉseapanʉ 1 Juan 5:3ta, maʉ̃ akʉda tẽã naʉ̃ta widiseabʉ: «¿Jeowata dayirã neũdukʼawua biabʉrʉ iya dayirãʼa jaradiabʉra sãwũã akʉibara?». Maʉ̃ bedʼeata widibʉbʉrʉ mama ũduyi Jeowabara mawũã jarabʉta dayirãta kãgabʉ baera (Is. 48:​17, 18).

11. ¿Kʼãrẽta oseapanʉ mara wũãwũãraba Daizeze Bedʼeaba jarabʉta okĩrãnamarẽã? (Proverbios 2:​10, 11).

¹¹ Jara ũrĩbira Daizeze Bedʼeata ũrĩbʉdera kʼãrẽ nebiata ũduseabʉta. Bʉ wũãwũãʉ̃meba Daizeze Bedʼea akʉbʉrʉde akʉza testo ewarizadebema akʉbʉrʉde jara ũrĩbira sãwũã Daizeze Bedʼeaba kʼarebabʉta bʉ mebẽrãbawara audre bia wãita. Bari jaraita, ãyibawaraʉba Daizeze Bedʼea akʉbʉde jaradiara kʼãrẽa yibiata wãrĩnu jaraira (Heb. 13:18). Adewara jaradiseabʉ sãwũã Daizeze Bedʼeaba kʼarebaseabʉta zroga bʼaita akʉza aduʼa bʼaita (Prov. 14:​29, 30). Bʉ wũãwũãraba bia kʼawuabʉbʉrʉ kʼãrẽa yibiata Daizeze Bedʼeaba jarabʉ ũrĩta mawũãra ãya ũrĩkĩrãbayi (akʉra Proverbios 2:​10, 11).

12. ¿Sãwũã kʼarebabʉ zeze abaʉba yi wũãwũãba Daizeze Bedʼeaba jarabʉta ũrĩmarẽã?

¹² Steve, iyira Franciadebema, iya erbʉ yi kimaʉ̃meba wũãwũã kʉ̃rata, iyi trʉ̃ra Ethan. Ãya ãyi wũãwũã ũdubibʉ Jeowabara dayirãʼa ũrãgʼata diabʉ kʼãrẽta dayirãta kãgabʉ baera. Naʉ̃ta widipanʉ: «¿Jeowabara kʼãrẽa kãgabʉ ũrĩmarẽã iya ũrãgʼa diabʉra? ¿Naʉ̃ ũrãgʼaba sãwũã ũdubibʉ Jeowabara dayirãra kãgãbʉta? ¿Kʼãrẽta berabariseabʉ Jeowaba ũrãgʼa diabʉta ũrĩ ẽ bʉrʉ?». Naʉ̃ra bedʼea kʼãwũãbʉba Ethanʼa ĩjãbibʉ Jeowaba ũrãgʼadiabʉra wãrĩnuta. Yi zezeba jarabʉ: «Daibara kãgabʉ Ethanba bia ũrĩmarẽã Daizeze Bedʼeaba jarabʉra yibiata ẽbẽrarãba jarabʉira».

13. ¿Yibarirabara sãwũã kʼarebaseabʉ yi wũãwũãraba odamarẽã Daizeze Bedʼeaba jarabʉde? Yizata jara ũrĩbira.

¹³ Jaradiaidua Daizeze Bedʼeaba jarabʉta oibarata. Bari jaraita, mara wũãwũãra jaraseabʉ kolegiode librota lemarẽã, maʉ̃ librodera edabʉ nekayiruata. Bari jaraita, maʉ̃ librora bedʼeabayi mia erkʼãĩ ʉ̃rʉ akʉza yõ ʉ̃rʉ mamina maʉ̃nera ũdubibʉ kʼãrẽ ẽ kĩrãkʼa maʉ̃ra. Bʉ wũãwũã jarada Jeowaba kʼãrẽta krĩchabʉta ẽbẽrarã mia erkʼãĩbʉrʉde akʉza yõbʉrʉde (Prov. 22:​24, 25; 1 Cor. 15:33; Filip. 4:8). Naʉ̃ba kʼarebayi bʉ wũãwũãba kʼawuamarẽã kʼãrẽa yibiata Jeowa bedʼea ũrĩra adewara propesorba akʉza yi kopaeroraba widira maʉ̃ libro ʉ̃rʉ wũãwũãrabara jara ũrĩbiseabʉ iya ĩjãbʉ ʉ̃rʉ.

KʼAREBARA ÃYA AWURURA JARADIAMARẼÃ ÃYA ĨJÃBɄ Ʉ̃RɄ

14. ¿Kʼãrẽ bedʼeaba peraseabʉ wũãwũãrãra akʉza kʼãrẽa?

¹⁴ Edaʉde ʉ̃kʉrʉ wũãwũãraitara zare ãya ĩjãbʉta wuabemara jaradiaita. Bari jaraita, ʉ̃kʉrʉba jaradara kolegiode naʉ̃ drʉade nekʼãrẽbʉra iyi doba zesita, mama wũãwũãrara peraseabʉ ãya ĩjãbʉ ʉ̃rʉ jaraita. Propesorera mejãchaʉta maʉ̃ ʉ̃rʉ bedʼeabʉrʉdera ãyara maʉ̃ra wãrĩnu kĩrãkʼa jarabʉ. ¿Sãwũã kʼarebaseabʉ yibarirabara ãyi wũãwũãra ãya ĩjãbʉ ʉ̃rʉ pera ẽã jaradiamarẽã?

15. ¿Wũãwũãrãra kʼãrẽba kʼarebaseabʉ ãya ĩjãbʉta zarea erbaita?

¹⁵ Kʼarebaidua mara wũãwũãra ãya ĩjãbʉ zarea erbamarẽã. Wũawũãrãra kʼãrẽa peraira neẽ Jeowa ʉ̃rʉ ĩjãbʉ baera (2 Tim. 1:8). Adewara sientipikora bioʉba jarapanʉ naʉ̃ drʉade nekʼãrẽ ũdupanʉra iyi doba ze ẽ basita, ãya ũdubʉrʉ baera jõma nekʼãrẽ naʉ̃ drʉadebʉba wãrĩnu ũdubibʉta kʼaiba parãnata, maʉ̃ba ãya ĩjã ẽ jõma iyi doba zedara kolegiode jaradiapanʉ kĩrãkʼa. Wũãwũãraba ãya ĩjãbʉ zarea erbaira, widiseapanʉ awuru mebẽrã kʼãrẽba kʼarebasita ãya ĩjãita naʉ̃ drʉa parãnara wãrĩnu bʉta.c

16. ¿Wũãwũãrãra sãwũã kʼarebaseabʉ ãya ĩjãbʉare bedʼeamarẽã naʉ̃ drʉa parãna ʉ̃rʉ? (1 Pedro 3:15 akʉza akʉra potota).

¹⁶ Kʼarebara mara wũãwũãra wuabemara jaradiaita kʼãrẽa ĩjãbʉta Jeowa ʉ̃rʉ (akʉra 1 Pedro 3:15). Pagina jw.org de bʉ artikulo «¿Iyidoba zesika mawũã ẽ bʉrʉ parãnaka?» abʉta, maʉ̃ta biga bayi ãbaʉba akʉdara, maʉ̃ akʉda tẽã widira saʉ̃ba audre bia jara ũrĩbiseabʉta naʉ̃ drʉa parãnara wãrĩnu bʉta. Akʉza kĩrãbebira kʼãrẽa bedʼeakʼaira neẽãta iyi kopaerobawara, ãya ũrĩkĩrãbʉbʉrʉ jara ũrĩbiseabʉ yiza bara. Bari jaraita, iyi kopaeroba naʉ̃ta jaraseabʉ: «Mʉ̃ara ĩjãbʉ mʉ̃a ũdubʉtrʉ mamina Daizezera mʉ̃ara ũduka». Bʉ wũãwũãba naʉ̃ta panʉseabʉ: «Krĩchara naʉ̃ta, bʉa oide de parãnʉmʉta ũdura, ¿bʉara krĩchaika maʉ̃ra iyi doba parãnʉma zesita? mawũẽ ẽ bʉrʉ ¿krĩchaika ẽbẽra abaʉba parãsita? Maʉ̃ de parãmata ẽbẽraba mawũã osibʉrʉ, ¿bʉmabida bʉ naʉ̃ drʉa kʼaiba parãnara?».

17. ¿Yibarirabara sãwũã kʼarebaseabʉ ãyi wũãwũã ãya ĩjãbʉ ʉ̃rʉ wuabema jaradiamarẽã?

¹⁷ Kʼarebara bʉ wũãwũãba badu ewaride jaradiamarẽã Daizeze Bedʼea ʉ̃rʉ (Rom. 10:10). Plauta zaira nãã wiña wiñane owã mawũã tẽã bia za kʼawuaita, maʉ̃ kĩrãkʼa berabariseabʉ dayirãba ĩjãbʉ ʉ̃rʉ bedʼea jʉ̃drʉbʉrʉde. Maʉ̃ ʉ̃rʉ bedʼeabʉrʉdera bedʼeaseabʉ bedʼea zareabʉ ẽãra ʉ̃rʉ. Bari jaraita, wũãwũãra Jeowa ʉ̃rʉ Kʼawuabipanʉrãbara, naʉ̃ta widiseabʉ iyi kopaero kolegiodebema: «¿Bʉara kʼawuabasika sientipikoraba ãya kʼãrẽ oi nããra akʉbʉta naʉ̃ drʉade nekʼãrẽ bʉta, mawũã naʉ̃neba parãita? Akʉra naʉ̃ bideo maʉ̃ ʉ̃rʉ bedʼeabʉta». Dai pagina internetʼne jʉrʉda «Kʼaiba parãsi» abʉmae adewara ũdubira bideo mama edabʉta. Naʉ̃ bideo akʉbida tẽã naʉ̃ta widira: «Sientipikoraba ãya nekʼãrẽ parãi kʼarea naʉ̃ drʉadebemata akʉpanʉ akʉza ãya parãbʉrʉdera ãyi ʉ̃rʉ ibia bedʼeapanʉ mamina, ¿kʼai ʉ̃rʉbʉrʉ ibia bedʼeaseabʉ kʼãwũã jõma parãna kʼarea?». Mawũã obʉba kʼarebaseabʉ ãyi kopaeroraba audre kʼawuakĩrãnamarẽã.

KʼAREBARA AUDRE ĨJÃTA ERBAMARẼÃ

18. ¿Adewara kʼareta oseabʉ kʼarebaita bʉ wũãwũãraba audre ĩjã bamarẽã?

¹⁸ Idi ewadera ẽbẽrarã mejãchaʉba ĩjãna ẽ Jeowa ʉ̃rʉra (2 Ped. 3:3). Maʉ̃ kʼarea yibarira, maraba mayi wũãwũãrabawaraʉba Daizeze Bedʼea akʉbʉrʉdera kʼarebara ãya Daizeze Bedʼeata ũrĩmarẽã. Yibarirabara kʼarebaseabʉ ãyi wũãwũãra naʉ̃ drʉa parãna ʉ̃rʉ bedʼeabʉde mawũã ãya ĩjãbʉta zareabamarẽã. Kʼarebara mara wũãwũãrãra ũrĩnamarẽã ʉ̃kʉrʉ propesia Daizeze Bedʼeade eda jarabʉra aripe berabarisita. Zarea ora ãyibawara audre yiwidʼi bʼaita akʉza zarea ora bʉta bʉ wũãwũãrabari yiwidʼita. Bʉta zarea obʉbʉrʉ mawũã bʉ wũãwũãba ĩjãbʉta zarea erbamarẽã mawũãra Jeowaba bʉa nebiata diayi (2 Crón. 15:7).