Sãwũã audre biʼia yiwidʼi kʼawuaita

1, 2. (1) ¿Kʼãrẽ kʼarea zare dayirãitara edaʉde dayi sãwũã sentibʉ Jeowaʼa jaraira? (2) ¿Sãwũã kʼawuapanʉ Jeowaba wãrĩnu ũrĩkĩrãbʉta dayirã yiwidʼira?

EDAɄDE bʉa sentibaribaibara bʉara badua iyabaʉta jarabʉta bʉ yiwidʼibʉrʉde. Adewara sentibaribaibara bʉ wãrĩnu sãwũã sentinʉmʉra Jeowaʼa jara ẽã baita. Wãrĩnubaira bʉtrʉ abapai mawũã berabaribʉ ẽ. Nekʼãrẽ mejãcha oibaraba baera mesera yiwidʼibʉ, mawũã ẽ bʉrʉ sentibʉ baera bʉra kʼãrẽ ẽ kĩrãkʼa, maʉ̃ba krĩchabʉ Jeowaba bʉ yiwidʼira bia akʉ ẽãta.

² Daizeze Bedʼeaba jarabʉ Jeowabara ũrĩbʉta ẽbẽrarã bia yiwidʼibʉra (Sal. 10:17). Maʉ̃ba jarakĩrãkʉ dayirã yiwidʼibʉrʉdera Jeowabara akʉ ẽãta daya sõbe bedʼea zokʼabʉta, mawũã ẽ bʉrʉ kʼãrẽ bedʼea kĩrãwãreã zokʼabʉta, awuarabʉrʉ iya ũrĩbʉ iyaʼa soiduba yiwidʼipanʉra bedʼeara. Jeowaba dayirã mejãcha kãga baera ũrĩkĩrãbʉ dayirãba iyaʼa jarapanʉra (Sal. 139:​1-3).

3. ¿Kʼãrẽta panʉnai naʉ̃ artikulodera?

³ Naʉ̃ artikulode naʉ̃ra bedʼeata panʉnañi: ¿Kʼãrẽa pera ẽã jaraibara Jeowaʼa dayirã sãwũã sentibʉra? ¿Dayi yiwidʼibʉdeba sãwũã audre Jeowa neũdukʼawua baseabʉ? Ẽbẽrarã kʼẽrẽpabadara yiwidʼi Daizeze Bedʼeadebʉba, ¿sãwũã kʼarebaseabʉ dayirãbida audre biʼia yiwidʼi kʼawuaita? ¿Kʼãrẽta oseabʉ bedʼea zroma erbʉba Jeowaʼa kʼãrẽ jarai kʼawua ẽãde?

¿KʼÃRẼA PERA ẼÃ YIWIDʼIBARA JEOWAʼA?

4. ¿Kʼãrẽba kʼarebai pera ẽã jaraita Jeowaʼa dayi sãwũã sentibʉra? (Salmo 119:145).

⁴ Daya akʉbʉbʉrʉ Jeowata dayi neũdukʼawuara kĩrãkʼa akʉza iya dayi kʼarebakĩrãbʉta akʉza iyira ẽbẽra biata, maʉ̃nera perada ẽ bayi dayi sãwũã sentibʉ iyaʼa jõma jaraita. Maʉ̃ta osi Salmo 119 bʉdaba, iyira bedʼea zroma ũdubasi ʉ̃kʉrʉ ẽbẽrata kayirua bedʼeasidade iyi ʉ̃rʉ (Sal. 119:​23, 69, 78). Akʉza kayirua omiabasi (Sal. 119:5). Mawũãsidu iyara Jeowaʼa iyi sãwũã sentibʉra jõma jarasi (akʉra Salmo 119:145).

5. ¿Kʼãrẽa daya aña krĩchabʉa yi edebi ẽ baibara dayi Jeowaʼa yiwidʼibʉ idubʉita? Yizata jara ũrĩbira.

⁵ Jeowabara kãgabʉ ẽbẽrarã yi kayirua zroma odarasida yiwidʼidamarẽã (Is. 55:​6, 7). Maʉ̃ kʼarea nekʼãrẽ badua Jeowaʼa yiwidʼibʉta idubʉda ẽ badrʉ. Bari jaraita, krĩchara bʉ oi zromane aduasita, maʉ̃ne bʉa ũduyi ẽbẽra mamabemata, mawũẽra bʉara ¿iyaʼa kʼareba widi ẽ baika perabiba, maʉ̃ba krĩchai baera bʉra aduasita? Mawũã ẽ, jaraibara iyaʼa bʉra aduasita, mawũã iya kʼarebamarẽã. Abarikabʉ Jeowaʉ̃mebida, Jeowabara ũrĩbʉ ẽbẽrarã kayirua odara yiwidʼisida. Maʉ̃ba idubʉda ẽ baibara dayi yiwidʼibʉra Jeowaʼa. Dayirãba kayirua obʉrʉdera perabʉ Jeowa yiwidʼita, mamina Jeowabara kãgabʉ iyaʼa yiwidʼidamarẽã soiduba, iya kʼarebai baera (Sal. 119:​25, 176).

¿KʼÃRẼTA OIBARA AUDRE JEOWA NEŨDUKʼAWUA BʼAITA DAYIRÃ YIWIDʼIBɄDEBA?

6, 7. ¿Kʼãrẽba kʼarebai dayi sãwũã sentibʉ Jeowaʼa jõma jaraita? Yizata jara ũrĩbira (akʉra notata).

⁶ Daya dayi Jeowa yiwidʼibʉde jarabʉbʉrʉ dayi sãwũã sentibʉta, kʼãrẽne berabarinʉmʉta, mawũãra audre iyi neũdukʼawuabayi. Mawũẽra, ¿kʼãrẽta oibara audre biʼia yiwidʼi kʼawuadaita dayirãra?

⁷ Krĩchaibara Jeowara kʼãrẽaba zeze biata.a Naʉ̃ ʉ̃rʉ krĩchabʉrʉba kʼarebayi daya Jeowaʼa soiduba jaraita dayi sãwũã sentibʉta, kʼãrẽ bedʼea zromane berabaribʉta (Sal. 145:​8, 9, 18). Akʉdaya yiza aba mebẽã Kristineʼneta, iyi zezera jipade mia pomiabasi. Kristineʼba naʉ̃ta jarabʉ: «Mʉ̃itara zarebasi Jeowaʉ̃me bedʼeaita akʉza akʉita zeze bia kĩrãkʼa mʉ̃ sãwũã berabarida kʼarea. Adewara mʉ̃a krĩchabasi mʉ̃ra ẽbẽra bia ẽ basi baera Jeowabara mʉ̃ra bia akʉ ẽ baita». ¿Kʼãrẽba kʼarebasi iyira maʉ̃ mawũã krĩchabʉ idubʉita? Iya jarabʉ: «Mʉ̃a krĩchasi Jeowaba kãga ũdubibada ʉ̃rʉ, maʉ̃ba kʼarebasi mʉ̃ra aduʼa sentita akʉza kʼawuaita Jeowaba mʉ̃ra mejãcha kãgata. Mʉ̃a kʼawuabʉ Jeowaba mʉ̃ra ewari jõmaʉ̃nẽ kʼarebaita akʉza mʉ̃ kʼawa bʼaita. Naʉ̃ kʼawuaiba kʼarebabʉ mʉ̃a Jeowaʼa jaraita mʉ̃ sobiabʉde kʼãrẽa sobiabʉta akʉza mʉ̃ sopʉabʉde jaraita kʼãrẽa sopʉabʉta».

8, 9. ¿Yiwidʼi nãã krĩchara, kʼãrẽ nebiata ũduseapanʉ? Jara ũrĩbira.

⁸ Krĩchara kʼãrẽta jaraita Jeowaʼa. Yiwidʼi nãã dayikʉza widita oseabʉ. Bari jaraita: ‹¿Kʼãrẽ bedʼea zromane berabarinʉmʉ mʉ̃ra atiara? ¿Mʉ̃ara ẽbẽra abaʉba mʉ̃ta zʉbʉriabisi baera kĩrãduaibaraka iyi kayiruara? ¿Mʉ̃ bebʉde nekʼãrẽ berabarisika akʉza mʉ̃a maʉ̃ne nesidabʉka Jeowa kʼarebata?› (2 Rey. 19:​15-19). Akʉza Jesúsba jaradiasi kʼãrẽ ʉ̃rʉ yiwidʼidaibarata. Iya jarasi yiwidʼidamarẽã Jeowa trʉ̃ neneẽã bamarẽã, Daizeze Nokʼota zemarẽã akʉza Jeowaba kãgabʉta berabarimarẽã (Mat. 6:​9, 10).

⁹ Mebẽã Aliskaba kʼawuaside yi kima kanser burude baribʉba beibasita, maʉ̃ne iyira mejãcha krĩcha osi, maʉ̃ba kʼawua ẽ basi sãwũã Jeowaʼa yiwidʼita. Iya jarabʉ: «Mʉ̃itara zarebasi biʼia krĩchaita, maʉ̃ba kʼawua ẽ basi mʉ̃ yiwidʼibʉrʉde kʼãrẽ jaraira Jeowaʼa». ¿Kʼãrẽba kʼarebasi iyira? Iya jarabʉ: «Mamina tẽã mʉ̃ara yiwidʼi nãã biʼia krĩchasi arare arare kʼãrẽ jaraita Jeowa, maʉ̃ba kʼarebasi mawũã mʉ̃trʉ krĩcha ẽ baita akʉza aduʼa bʼaita, adewara aukʼara sopʉa ba ẽ baita».

10. ¿Kʼãrẽa zarea odaibara Jeowaʼa dããra yiwidʼidaita? (Akʉra potorata).

¹⁰ Mesera yiwidʼirãra. Wika yiwidʼiba Jeowa kʼawa babibʉmina, audre yibia dããra yiwidʼita, maʉ̃ba kʼarebai baera dayi sãwũã sentibʉ jõma jaraita Jeowaʼa.b Mebẽã Elijah, Aliska kimaba naʉ̃ta jarabʉ: «Mʉ̃ra ewaride mejãcha yiwidʼibʉ, mamina mʉ̃ra audre Jeowa kʼawa babibʉ mʉ̃ dããrabayeda yiwidʼibʉde. Jeowabara jʉ̃ã ẽ dayirãra mawũã mesera yiwidʼidamarẽã, awuarabʉrʉ kãgabʉ dããra yiwidʼidamarẽã iyaʼa». Naʉ̃ta oita krĩchara: ewarita jʉrʉda mawũã bʉ Jeowaʼa aduʼa yiwidʼita akʉza dããra iyiʉ̃me bedʼeaita nemi jĩgʉa akʉza tẽã zarea ora mawũã badua yiwidʼi bʼaita.

KRĨCHADADRɄ ẼBẼRARÃ DAIZEZE BEDʼEADE JARABɄRA YIWIDʼIDA Ʉ̃RɄ

11. ¿Sãwũã kʼarebaseabʉ bʉra Daizeze Bedʼeade jarabʉba ẽbẽrarã kʼẽrẽpa pananara yiwidʼidaba? (Akʉra rekuadro «¿Bʉsida ãyi kĩrãkʼa sentibarika?»).

¹¹ Krĩchaiba sãwũã Daizeze Bedʼearadebemara ẽbẽrarã sãwũã yiwidʼidaba akʉza ãyi trãbirane kʼãrẽ jarabadaba, mejãchade kʼarebaseabʉ dayirãsida idi ewade, kʼawuai baera ãya kʼãrẽ bedʼea zokʼadata akʉza sãwũã yiwidʼidata, maʉ̃ba dayirãsi kʼarebayi ãyi yiwidʼida kĩrãkʼa yiwidʼidaita soiduba Jeowaʼa. Bʉa Daizeze Bedʼea akʉbʉde ũduseabʉ ãya jaradara abarikabʉta bʉ sãwũã sentibʉme, mamina bʉa kʼawua ẽ bʉrʉ maʉ̃ sãwũã jaraita Jeowaʼa, maʉ̃ kʼawuabʉrʉba bʉra mejãchade kʼarebaseabʉ.

12. ¿Daizeze Bedʼeade ũdubʉrʉde yiwidʼirata kʼãrẽta widibara dayikʉza?

¹² Daizeze Bedʼeade yiwidʼirabʉra ʉ̃rʉ kʼawuabʉrʉde, naʉ̃ta widiseabʉ bʉyikʉza: ‹¿Kʼaiba jarasi naʉ̃ bedʼeara? akʉza ¿iyira sãwũãbasi? ¿Kʼãrẽa iya naʉ̃ bedʼeata jarasi? ¿Mʉ̃ra iyi berabarida kĩrãkʼa berabarinʉmʉka? akʉzade ¿kʼãrẽta kʼawuaseabʉ mʉ̃a maʉ̃neba?›. Bʉa naʉ̃ krĩchanʉmʉena yibiabayi bʉa naʉ̃ ʉ̃rʉ audre estudiaita, maʉ̃ kʼarea akʉdrʉ ʉ̃kʉrʉ yizata.

13. ¿Dayirãbara kʼãrẽta kʼawuaseapanʉ Ana yiwidʼidadeba? (1 Samuel 1:​10, 11, akʉra potota).

¹³ (Akʉra 1 Samuel 1:​10, 11). Anara bedʼea zroma ũme erbasi, iyira tobe ẽ basi akʉza mejãchade zʉbʉria obasi iyira, yi kima kimaba (1 Sam. 1:​4-7). Dayirãsida iyi kĩrãkʼa bedʼea zromane berabaribʉbʉrʉ, ¿sãwũã kʼarebaseabʉ Ana yiwidʼidaba? Ana yiwidʼisidera dããra yiwidʼisi akʉza Jeowaʼa jõma jarasi iyi kʼãrẽne berabarinʉmʉta (1 Sam. 1:​12, 18). Abarika iyide kĩrãkʼa dayirãbida jõma jaradaibara Jeowaʼa akʉza dããra yiwidʼidaibara, mawũã so aduʼa sentita (Sal. 55:22).

14. (1) ¿Adewara kʼãrẽta kʼawuaseapanʉ Ana yiwidʼidadeba? (2) ¿Sãwũã Daizeze Bedʼea ʉ̃rʉ krĩchabʉrʉba kʼarebaseabʉ audre bia yiwidʼi kʼawuaita? (Akʉra notata).

¹⁴ Iyi toda tẽã Anaba edesi yi wũãwũã Samuelʼra sumo saserdote Elíma (1 Sam. 1:​24-28). Tẽã Ana iyi jẽda yiwidʼidade iya Jeowaʼa jarasi Jeowabara akʉbʉta iyi ode kʼẽrẽpapanʉrãra (1 Sam. 2:​1, 8, 9).c Ana bedʼea zroma erbʉra jõ ẽ basibaibara, mamina iyara awuarabʉrʉ audrera akʉsi Jeowaba iyi sãwũã kʼarebanʉmʉtrʉ. Naʉ̃neba ¿kʼãrẽta kʼawuaseapanʉ dayirãba? Kʼawuapanʉ dayirãta bedʼea zromane berabarinʉmʉmina akʉdara Jeowaba dayi sãwũã maʉ̃ne kʼarebanʉmʉta, maʉ̃ba kʼarebaita daya awuantaita, ʉ̃ra bedʼea zroma ũduidebida.

15. ¿Dayirãra sãwũã kʼarebaseabʉ Jeremías yizaba bia edada ẽãde? (Jeremías 12:1).

¹⁵ (Akʉra Jeremías 12:1). Propeta Jeremíasʼra krĩcha obasi iya ũdubasi baera ẽbẽra kayirua sãwũã bia wãta akʉza iyisida bia edada ẽ basi baera iyi mebẽrãba (Jer. 20:​7, 8). Iya iyi sãwũã sentibʉra Jeowaʼa jarasi, mamina maʉ̃nera Jeowaʼa jara ẽ basi iya kʼãrẽa mawũã obʉta, awuarabʉrʉ iyi kʼãrẽ berabarinʉmʉtrʉ jarasi. Jeowaba maʉ̃ra ẽbẽra kʼawua oside Jeremíasba ĩjãbʉra audre warisi (Jer. 32:19). ¿Dayirãbara sãwũã iyide kĩrãkʼa oseapanʉ? Idi ewadebida dayirãbara ũdupanʉ ẽbẽrarã kayiruara bia wãta akʉza dayirãsida bia edada ẽ. Maʉ̃ mawũãbʉrʉdera, Jeowaʼa jaraibara dayi kʼãrẽba krĩcha obibʉta, mamina ĩjãnaibara Jeowaba kʼawua oita ẽbẽrarã so kayiruara.

16. Nekʼãrẽ mejãcha obe ẽ bʉrʉ dayirã kʼãrẽ berabarinʉmʉ kʼarea, ¿sãwũã kʼarebaseabʉ lebita yizaba? (Salmo 42:​1-4, akʉra potorata).

¹⁶ (Akʉra Salmo 42:​1-4). Naʉ̃ra bʉsi lebita iyi drʉadeba jĩga ededapeadaba akʉza iyara iyi mebẽrãbawaraʉba Jeowaʼa yiwidʼibe ẽ basi, maʉ̃ba krĩcha obasi iyira. Naʉ̃ Salmone jarabʉ iyi sãwũã sentibadata, mamina iyara krĩchasi maʉ̃ne Jeowaba iyi sãwũã akʉnʉmʉta (Sal. 42:8). Adewara naʉ̃ jʉrʉsi iya nekʼãrẽ oita Jeowaita (Sal. 42:5). Dayirãsi naʉ̃ lebitade kĩrãkʼa sentiseapanʉ dedaʉba aña wãbe ẽãde kaya kʼarea, mawũã ẽ bʉrʉ karselde eda bʉebʉdade dayirãba ĩjãbʉ kʼarea. Maʉ̃ba dayirã edaʉde bia sentiseapanʉ edaʉde sopʉa. Maʉ̃ mawũã sentibʉrʉdera yibia dayirã sãwũã sentinʉmʉta jõma Jeowaʼa jaraita, naʉ̃ba kʼarebai baera dayi wãrĩnu kʼãrẽba mawũã sentinʉmʉ jaraita akʉza kĩrãbeita audre yibiata Jeowaba jarabʉta akʉza aukʼara krĩcha ẽ baita dayirã bedʼea zromane berabarinʉmʉ ʉ̃rʉ.

17. (1) ¿Dayirãbara kʼãrẽta kʼawuaseapanʉ Jonás yiwidʼidadeba? (Jonás 2:​1, 2). (2) ¿Bedʼea Salmosdebʉba sãwũã kʼarebaseabʉ dayirã bedʼea zromane berabarinʉmʉne? (Akʉra notata).

¹⁷ (Akʉra Jonás 2:​1, 2). Propeta Jonásʼra iyi beda bide bʉeda yiwidʼisi Jeowaʼa. Iya biʼia kʼawuabasi Jeowaba iyi bedʼeara ũrĩta, iya Jeowaba jaradata ũrĩ ẽ basimina. Jonás yiwidʼisidera iyara zokʼasi bedʼea Salmosdebemarata.d Iyara biʼia ũdukʼawuabasibaibara Salmosde jarabʉra. Iya maʉ̃ra Salmosʼra krĩchaside wãrĩnu ĩjãsi Jeowaba iyira kʼarebaita. Abarika Jonásde kĩrãkʼa dayirãbida kʼawuapanʉbʉrʉ testorata burude, maʉ̃ba kʼarebayi dayirã bedʼea zromane berabaribʉrʉde, mawũã aduʼa bʼaita.

JEOWA KʼAWA BARA YIWIDʼIBɄDEBA

18, 19. Edaʉde daya kʼawua ẽ bʉrʉ Jeowaʼa sãwũã jaraita dayi kʼãrẽne berabarinʉmʉta, ¿sãwũã so zarea diabʉ Romanos 8:​26, 27? Yizata jara ũrĩbira.

¹⁸ (Akʉra Romanos 8:​26, 27). Edaʉde dayirãra mejãcha krĩcha obʉba, dayi yiwidʼibʉrʉdera kʼawua ẽ Jeowaʼa kʼãrẽ jaraisida, mamina kʼarebata erpanʉ. Jeowa jaure zareaba kʼarebabʉ dayirãra, mamina ¿sãwũã mawũã kʼarebabʉ? Jeowabara iyi jaure zareadeba bʉbisi iyi bedʼeade yiwidʼira mejãcha. Daya Jeowaʼa jara au ẽ bʉrʉ yiwidʼibʉde dayi kʼãrẽne berabarinʉmʉta, Jeowabara ũrĩseabʉ ʉ̃kʉrʉ yiwidʼi iyi bedʼeadebʉ daya zokʼabʉrʉdera akʉza iya maʉ̃neba dayirã kʼarebaseabʉ akʉza panʉseabʉ.

¹⁹ Mebẽã wẽrã aba Rusiadebema, yi trʉ Yelenara, karselde eda bʉesida Jeowaʼa yiwidʼibʉ kʼarea akʉza Daizeze Bedʼea lebʉ kʼarea. Iya jarabʉ iyitara mejãchade zarebasita yiwidʼira, mejãchade krĩcha zroma obasi baera. Iya maʉ̃ta jarabʉ: «Mʉ̃a kĩrãbesi mejãcha krĩcha zroma obʉrʉde akʉza kʼawua ẽãde Jeowaʼa kʼãrẽ jaraita, Jeowabara ũrĩbʉta yiwidʼira Daizeze Bedʼeadebʉta daya zokʼabʉrʉdebida. Naʉ̃ra yiwidʼira kĩrãkʼabʉta widikĩrãbʉ baera mʉ̃a Jeowaʼa. Mʉ̃ra naʉ̃raba mejãcha kʼarebasi mʉ̃ bedʼea zromane berabarinʉmaside».

20. ¿Bʉara kʼãrẽta oseabʉ bʉ krĩcha zroma obʉrʉde Jeowaʼa aduʼa yiwidʼita?

²⁰ Dayi krĩcha zroma onʉmʉnera edaʉde zare daya Jeowaʼa jaraita dayi kʼãrẽne berabarinʉmʉta. Dayi yiwidʼibʉeda aña krĩchanʉmaseabʉ baera. ¿Dayi yiwidʼibʉeda kʼãrẽba kʼarebaseabʉ kĩrãkita kʼawuaita daya kʼãrẽ jarabʉta? Ũrĩseapanʉ audiora Salmosdebemata akʉza bʉseapanʉ daya kʼãrẽ sentibʉta, nokʼo Davidba oda kĩrãkʼa (Sal. 18, 34, 142; encabezamiento). Neẽ ley dayirãba Jeowaʼa sãwũã yiwidʼibara ʉ̃rʉra, awuarabʉrʉ oseabʉ bʉma audre bigade (Sal. 141:2).

21. ¿Kʼãrẽa soiduba yiwidʼiseapanʉ?

²¹ Dayirãra mejãcha sobiapanʉ Jeowabara kʼawuabʉ baera dayi iyaʼa yiwidʼi naena daya kʼãrẽ jaraira (Sal. 139:4). Akʉza iyara ũrĩkĩrã dayirã yiwidʼibʉrʉdera akʉza daya jõma jarabʉrʉde dayi sãwũãbʉta iyaʼa. Bʉ yiwidʼibʉta idubʉrãra. Bʉa kʼawua ẽ bʉrʉ sãwũã yiwidʼita Jeowaʼa akʉseabʉ yizara Daizeze Bedʼeadebʉta, mawũã iyaʼa yiwidʼita. Soiduba yiwidʼira, jarada bʉ kʼãrẽba sobiabibʉta akʉza kʼãrẽba sopʉabibʉta. Jeowara bʉ neũdukʼawuara baera iyira bʉme bayi, bʉ kʼarebaita.