Jeowaba ewari jõmaʉ̃nẽ kãgata ũdubibʉ

1, 2. ¿Kʼãrẽ bedʼea zromata ũdupanʉ mebẽrã mejãchaʉba?

AKɄRA poto pagina13debʉta, maʉ̃ potoba ũdubibʉ barko aba pusa ẽzadrabʉta, nãgʉ zromaba barkota ede ẽ marẽã ne zʉgʉata do ibalbʉepanʉ. Maʉ̃ nekʼãrẽ zʉgʉa trʉ̃ra ankla, maʉ̃ba kʼarebabʉ barko nãgʉba ede ẽ marẽã.

² Dayirãba bedʼea zroma ũdubʉ kʼarea edaʉde maʉ̃ barkode kĩrãkʼa berabariseabʉ. Edaʉde dayirãba ĩjãbʉ Daizezeba dayirã kãgata akʉza kʼarebakĩrãbʉta, mamina tẽã sentiseabʉ Jeowaba akʉ ẽãta dayirã kʼãrẽ berabaribʉra (Sal. 10:1; 13:1). Akʉza neũdukʼawua biaba dayirã so zarea diaseabʉta, mamina maʉ̃ tẽã jẽda krĩchaseabʉ Daizezeba dayirã kãgabʉ kʼawuaita (Prov. 17:17; 25:11). ¿Kʼãrẽta odaibara Daizeze ode kʼẽrẽpa takeraita bedʼea zroma berabaribʉmina? akʉza ¿kʼãrẽta oibara bʉa wãrĩnu ĩjãita Jeowaba bʉra kãgata akʉza kʼarebakĩrãbʉta?

3. Salmo 31:7 akʉza 136:1ba jarabʉdebara, ¿kʼãrẽta jarakĩrãbʉ kãga jõkaba akʉza kʼãrẽa Jeowaba maʉ̃ta audre ũdubibʉ? (Akʉra potota).

³ Jeowa ode kʼẽrẽpa takeraita kĩrãbedaibara Jeowa kãga jõkata (akʉra Salmo 31:7; 136:1). «Kʼãga jõka» bedʼeaba jarakĩrãbʉ ẽbẽra aba kʼãrẽaba kãga ũdubibʉta awurura. Jeowaba audre kãga jõkata ũdubibʉ wuabemaraneira, Daizeze Bedʼeaba jarabʉ iya audre kãga jõkata ũdubibʉta (Éx. 34:​6, 7). Akʉza Daizeze Bedʼeaba jarabʉ: «Bʉ kãga jõkara bʉa yi kʼareba widibʉa jõmaʉ̃ʼa diabʉ» (Sal. 86:5). ¿Naʉ̃ testoba kʼãrẽta jarakĩrãbʉ? Jeowaba iyi odepanʉra doba amae ẽãta, maʉ̃ kĩrãbedaiba kʼarebaseabʉ dayirãra bedʼea zroma ũdubʉrʉde awuantaita (Sal. 23:4).

NEKʼÃRẼ DAYIRÃBA NÃÃ KʼAWUADADEBEMARA NAɄ̃: DAIZEZEBA DAYIRÃ MEJÃCHA KÃGA

4. ¿Saʉ̃ra dayirãba nããra kʼawuadadebemara akʉza kʼãrẽa maʉ̃ta wãrĩnu ĩjãpanʉ?

⁴ Dayirãba aweda Daizeze Bedʼea ʉ̃rʉ kʼawuadara naʉ̃ra: Daizeze trʉ̃ra Jeowa, Jesúsʼra Daizeze warra, beidarãra kʼãrẽ krĩcha ẽ kʼãrẽ oẽ akʉza ʉ̃rabʉrʉ Daizezeba naʉ̃ drʉara ẽjũã bia babiyi, mawũã ẽbẽrarãra ewari jõmaʉ̃nẽ mama bamarẽã (Sal. 83:18; Ecl. 9:5; Juan 3:16; Apoc. 21:​3, 4). Maʉ̃ta bia kʼawuaside, wuabemara yi sewabi ẽ basi. Jeowa kãgarabʉ, za dayirãba nãã kʼawuadade. Ĩjãita Jeowaba dayirã mejãcha kãgabʉta, maʉ̃ba kʼarebayi Jeowaʉ̃me kʼẽrẽpa bʼaita krĩcha ẽã kʼãrẽ berabaribʉta.

5. Jara ũrĩbira ẽbẽra abaʉba kʼãrẽta oibarata iya aña jaradiadapeada idubʉita.

⁵ Bʉa Daizeze Bedʼeade wãrĩnu kʼawuaside, ¿kʼãrẽba kʼarebasi bʉa aña ĩjãbada, wua ĩjã ẽ baita? Bʉra kʼarebasibaibara akʉiba bʉ religionba jarabʉra abarikabʉ kʼawuaita Daizeze Bedʼeaba jaradiabʉme. Krĩchara naʉ̃ta, bʉa krĩchabasibaibara Daizeze Bedʼea kʼawuai naenara Jesúsʼra Daizezebasita, mamina bʉa Daizeze Bedʼeade wãrĩnu kʼawua jʉ̃drʉda tẽã, kʼawuasibaibara maʉ̃ra mawũã ẽãta, kʼawuasibaibara bʉa, Jesúsʼra Daizeze warra abapaibʉta (Col. 1:15; Juan 3:18). Dayirãba religion zeri ẽãba jaradiabada ĩjãbʉ idubʉra zare (2 Cor. 10:​4, 5). Mamina bʉa Daizeze Bedʼeadeba wãrĩnuara ʉ̃rʉ kʼawuada tẽã, wua ĩjã ẽ basi maʉ̃ ʉ̃rʉ (Filip. 3:13).

6. ¿Kʼãrẽa wãrĩnu ĩjãibara bʉara Jeowa kãgara ewari jõmaʉ̃nẽ jõ ẽãta?

⁶ Religion zeri ẽãba jaradiada daya ãĩ bʉebari kĩrãkʼa, abarika ãĩ bʉedaibara daya krĩchabʉta Jeowaba dayirã kãga ẽãta, maʉ̃ kʼarea dayikʉza krĩchaibara: «¿Mʉ̃a krĩchabʉra yibiaka?». Idi dayirãba kʼawuabarabʉ Salmo 136:1 ʉ̃rʉ, naʉ̃ Salmone jarabʉ Jeowaba kãga jõka ũdubibʉta 26 bese, ¿kʼãrẽa mejãcha bʉbisi Jeowaba naʉ̃ bedʼeara akʉza kʼãrẽa jarabʉ Daizeze kãgara jõ ẽãta? Atia kʼawuada kĩrãkʼa Jeowabara dayirãra kãga, aweda kʼawuasidadera, maʉ̃ta kʼawuasida dayirãbara. Bʉa krĩchabʉbʉrʉ bʉra Jeowaba kãga ẽãta maʉ̃ra wãrĩnu ẽ, maʉ̃ba ĩjãbeda ẽ maʉ̃ ʉ̃rʉ, dayirãba ĩjãna ẽ kĩrãkʼa religion zeri ẽãraba jaradiapanʉ ʉ̃rʉ.

7. ¿Saʉ̃ra testoba ũdubibʉ Jeowaba dayirãra mejãcha kãgata?

⁷ Daizeze Bedʼeade ũdubibʉ Jeowabara mejãcha kãgata dayirãra. Bari jaraita, Jesúsba jarasi iyi kʼaidubemaraʼa: «Daizezema marã audre vale bʼea ibana zaketa bio kʼãñabara» (Mat. 10:31). Iyara mawũã jara ẽ basi: ‹Marara balebʉbaibara ibanaira audre›. Akʉza Jeowabida jarasi iyi pʉwʉrʉʼa: «Mʉ̃a zarea diayi. Wãrĩnu, mʉ̃a kʼarebayi. Mʉ̃ juwara aripe obʉba, wãrĩnu kʼarebayi» (Is. 41:10). Iyara mawũã jara ẽ basi: ‹Mʉ̃a edaʉde kʼarebayi›. Naʉ̃ra testoba ũdubibʉ Jeowabara dayirãra mejãcha kãgata aba abaka. Bʉa edaʉde krĩchabʉbʉrʉ Jeowabara bʉra kãga ẽãta ñabaseabai akʉra naʉ̃ testorata, naʉ̃ba kʼarebai baera bʉa kʼawuaita Jeowaba bʉra wãrĩnu kãgata. Mawũã opanʉbʉrʉ kristiano siglo nããrabemaraba jarada kĩrãkʼa jaraseapanʉ, «daibara ũdu zebʉda Daizezeba daira mejãcha kãgata akʉza maʉ̃ kãga ʉ̃rʉ ĩjãpanʉ» (1 Juan 4:16).a

8. ¿Kʼãrẽta oibara bʉita zarebʉbʉrʉ ĩjãita Jeowaba bʉra wãrĩnu kãgabʉ kʼawuaita?

⁸ Mawũãmina bʉita zarebʉbʉrʉ ĩjãita Daizezeba bʉ kãgabʉ ʉ̃rʉ, krĩchaseabʉ naʉ̃ ʉ̃rʉ: bʉa sentibʉta abarikabʉ kʼawuaita Daizeze Bedʼeaba jarabʉme, bʉa sentibʉra edaʉde awuara totobʉ baera, mamina Daizeze Bedʼeaba jarabʉra mawũã awuarabʉ ẽ, awuarabʉrʉ ewari jõmaʉ̃nẽ aripe jarabʉ. Mawũãsidu bʉa ĩjãbʉbʉrʉ bʉa sãwũã sentibʉ ʉ̃rʉbʉrʉ, maʉ̃ba ũdubibʉ bʉara ĩjã ẽãta Jeowaba kãga ũdubibʉ ʉ̃rʉra (1 Juan 4:8).

KRĨCHADRɄ KʼÃRẼTA JARAKĨRÃKɄTA MARARA MEJÃCHA KÃGATA

9, 10. ¿Kʼãrẽa jarasi Jesúsbara naʉ̃ bedʼeata iyi kʼaidubemara «Zezebara marara mejãcha kãgabʉ»? (Juan 16:​26, 27; akʉra potota).

⁹ Adewara kʼawuadayi kʼãrẽba audre kʼarebaseabʉta ĩjãita Jeowaba dayirãra wãrĩnu kãgabʉta. Jesúsba iyi kʼaidubemara jarasi: «Zezebara marara mejãcha kãgabʉ» (akʉra Juan 16:​26, 27). ¿Kʼãrẽa jarasi Jesúsba maʉ̃ bedʼeara? Jesúsbara naʉ̃ bedʼeara jara ẽ basi ãyi bia sentibita, awuarabʉrʉ Jesúsʼra naʉ̃ra bersikulodera bedʼeabasi nekʼãrẽ awuru ʉ̃rʉ, maʉ̃ra yiwidʼi.

¹⁰ Jesús iyi kʼaidubemabawara bedʼeabʉde jarasi yiwidʼidamarẽã Daizezeʼa iyi trʉ̃neba, mawũã jara ẽ basi iyaʼa yiwidʼidamarẽã (Juan 16:​23, 24). Jesúsbara kãgabasi ãya naʉ̃ ʉ̃rʉ bia kʼawuadamarẽã. Iyi kʼaidubemaraba krĩchaseabasi baera Jesúsʼra ãyi neũdukʼawua baera, iyaʼa yiwidʼidaita. Akʉza ãya krĩchaseapanasi Jesúsʼra jẽda piradrʉsi baera iyaʼa yiwidʼiseabasita, maʉ̃ba Jesúsba jarakĩrãkʉasi Jeowaʼabʉrʉ yiwidʼibarata. Jesúsba naʉ̃ bedʼea jaraside: «Zezebara marara mejãcha kãgabʉ», Jesúsba ãyaʼa naʉ̃ bedʼea jarabʉrʉ kĩrãkʼasi: ‹Mʉ̃ Zezeʼa yiwidʼidua iya marara mejãchade kãga baera›. Krĩchara naʉ̃ bedʼea bʉita kʼãrẽaba yibiata, bʉa Daizeze Bedʼeadeba kʼawuasi Jesús ʉ̃rʉ akʉza kãga zesi abarika Jesúsbida bʉta kãga (Juan 14:21). Mamina maʉ̃ awa ẽ, bʉabida kristianora siglo nããbemane kĩrãkʼa abarika kãga zesi Jeowabida bʉra mejãcha kãgata, maʉ̃ra dayirãbara soiduba ĩjãpanʉ dayirã yiwidʼibʉrʉdera Jeowaba wãrĩnu ũrĩbʉta (1 Juan 5:14).

¿KʼÃRẼA KRĨCHAPANɄ JEOWABA KÃGA ẼÃTA DAYIRÃRA?

11. ¿Kʼãrẽa sobiabʉ Diarura dayirãba krĩchapanʉbʉrʉ Jeowaba dayirã kãga ẽãta?

¹¹ ¿Kʼãrẽa edaʉde dayirãba krĩchapanʉ Jeowaba dayirãra kãga ẽãta? Diaruba mawũã krĩchabikĩrãbʉ baera. Daizeze Bedʼeaba jarabʉ iyira «leon kĩrãkʼa» dayirã audu wãbarita, maʉ̃ba iyara kãgabʉ dayirãba krĩchadamarẽã Jeowaba dayirãra kãga ẽãta (1 Ped. 5:8). Adewara iya kãgabʉ dayirãba krĩchadamarẽã dayirãra mejãcha kayirua omia baera Jesús dayirãbari beidaba kʼareba ẽãta (Heb. 2:9). Mamina dayirãba bia krĩchara ¿kʼaita kãga ẽ Jeowabara? Diaruta. Akʉza ¿kʼaita ẽdrʉbi ẽ Jesús beidabara? Diaruta. Iya kãgabʉ dayirãba krĩchadamarẽã dayirãsida iyi kĩrãkʼabʉta, mamina maʉ̃ra jipade sewida. Diarubara naʉ̃ta zokʼabʉ dayirã sewaita (Efes. 6:11). Dayirãba kʼawuapanʉ baera Diarubara kãgabʉta dayirãba maʉ̃ra eda baedamarẽã, dayirãra zarea odaibara maʉ̃ne eda bae ẽ baita (Sant. 4:7).

12, 13. ¿Dayirãra Adánʼneba zesi baera naʉ̃ba sãwũã krĩchabiseabʉ dayirãra Jeowaba kãga ẽãta?

¹² Adewarabʉ nekʼãrẽ awuruba dayi aña krĩchabiseabʉta Jeowaba kãga ʉ̃rʉ, maʉ̃ra dayirãra Adán akʉza Evadeba zesi baera kayirua omiara, mawũã Jeowadeba jĩga wãsi (Sal. 51:5; Rom. 5:12). Dayirãra kayirua omia baera dayi krĩchara akʉza dayi sora biabʉ ẽ, mia dayi kakuata.

¹³ Dayirãra kayirua omia baera sentipanʉ sopʉa, kʼãrẽta zeri ẽãta, ansiedata, perabʉ akʉza maʉ̃ra mawũã sentipanʉ kayirua obʉdade, mamina kayirua oẽãdebida mawũã sentipanʉ dayirãra Adán akʉza Evadeba zesi baera. Mamina Jeowaba dayirã parãsidera, maʉ̃ta sentidamarẽã oẽ basi (Rom. 8:​20, 21). Bari jaraita, krĩchadrʉ naʉ̃ yiza ʉ̃rʉ, moto yantata pinchabʉbʉrʉ iyira wãbʉmina bia wã ẽ. Dayirãsida maʉ̃ kĩrãkʼabʉ, dayirãba nekʼãrẽ opanʉra jõma bia oda ẽ, Jeowaba dayirã aweda opanana kĩrãkʼa, maʉ̃ba edaʉde aña krĩchaseapanʉ Jeowaba dayirãra kãga ẽãta, maʉ̃ krĩchabʉdade kĩrãbedadrʉ Jeowabara «kãga jõkata ũdubibʉ yi kãgapanʉra akʉza iya zokʼabʉ ũrĩpanʉra» (Neh. 1:5).

14. ¿Jesús beidaba sãwũã kʼarebaseabʉ ĩjãita Jeowaba dayirã kãgata? (Romanos 5:​8, akʉra rekuadro «Jʉra kʼawuabara kayiruade eda bae ẽ baita»).

¹⁴ Edaʉde dayirãba krĩchaseabʉ Jeowaba neẽãta kʼãrẽa kãgaita dayirã kayirua omia baera, mamina Jeowabara nawedaʉba ũdubisi iyi kãgara dayirã iyi warra diaside dayirãbari, mawũã kĩrãduaita dayirãba kayirua obʉta (1 Juan 4:10). Adewara kĩrãbedadrʉ Jesúsʼra ze ẽ basita beita ẽbẽrarã kayirua okarabari, awuarabʉrʉ iyira zesi beita ẽbẽrarã kayirua opanʉrabari (akʉra Romanos 5:8). Dayirãbara nekʼãrẽ jõma aripe obeda ẽ, mia Jeowabida jʉ̃ã ẽ dayirãba nekʼãrẽ jõma aripe odamarẽã. Kʼawuasida edaʉde daya kʼãrẽa krĩchabʉta Jeowaba dayirã kãga ẽãta. Maʉ̃ kʼarea zarea odadrʉ maʉ̃ʼa yi edebida ẽ baita (Rom. 7:​24, 25).

KʼẼRẼPA BADRɄ SOIDUBA

15, 16. Dayirãta Jeowaʉ̃me kʼẽrẽpabʉbʉrʉ, ¿iyara kʼãrẽta oi? (2 Samuel 22:26).

¹⁵ Jeowabara kãgabʉ dayirã bedʼea zroma ũdubʉrʉde iyiʉ̃me kʼẽrẽpa badamarẽã (Deut. 30:​19, 20). Mawũã odara Jeowabara dayirãra amae ẽ bayi (akʉra 2 Samuel 22:26). Akʉza kĩrãbedaibara dayirãba bedʼea zroma ũdubʉrʉdera iya wãrĩnu kʼarebaita dayirãra.

¹⁶ Nãgʉ zromaba barko zʉbʉria obari kĩrãkʼa, maʉ̃ne yi ẽbẽraba ankla do ibalbʉe kĩrãkʼabʉ Jeowa kãgata dayirãita, dayirã bedʼea zroma ũdubʉrʉdera Jeowabara kʼarebabʉ. Edaʉde daya bedʼea zroma ũdunʉmʉba sentibʉ Jeowabara kãga ẽãta mamina krĩchaibara daya sentibʉta abarikabʉ kʼawuaita Daizeze Bedʼeaba jarabʉme. Daya Daizeze Bedʼeade kʼawuadata maʉ̃ ʉ̃rʉ bia krĩchara, maʉ̃ba kʼarebayi ĩjãita Jeowabara dayirãra ewari jõmaʉ̃nẽ kãgabʉta.