Jeowabʉrʉ dayirãra arigʉ sobia babiseabʉ

1, 2. (1) ¿Ẽbẽrarã mejãchaʉta sãwũã sentipanʉ idi ewadera? (2) ¿Kʼãrẽta akʉdai naʉ̃ artikulodera?

IDI ewadera ẽbẽrarã mejãchaʉta zarea opanʉ sobia bʼaita, nekʼãrẽ baduta opanʉ ãya maʉ̃ ũduita, mamina wãrĩnu bʼaira maʉ̃ra ãya kãgabada kĩrãkʼa berabari ẽ, maʉ̃ba mejãchade sopʉata ũdupanʉ. Akʉza Jeowa odepanʉrasida «naʉ̃ ewari jõbodoare» panʉ baera bedʼea zromata ũdupanʉ, maʉ̃ba zʉbʉriabibʉ baera edaʉde sopʉapanʉ (2 Tim. 3:1).

² Naʉ̃ artikulode akʉdayi kʼãrẽba jãrĩseabʉta dayi sobia baita akʉza sãwũã jẽda sobia baseabʉta, maʉ̃ akʉi nãã kʼawuadayi mamina kʼaibʉrʉ wãrĩnu sobia babiseabʉ dayirãra.

KʼAIBɄRɄ WÃRĨNU SOBIA BABISEABɄ DAYIRÃRA

3. ¿Jeowaba parãnaneba, kʼãrẽta ũdubibʉ iyi ʉ̃rʉ? (Akʉra potorata).

³ Jeowara sobia, maʉ̃ba iyara kãgabʉ dayirãsida sobiapanamarẽã. Bari jaraita, iya parãsi naʉ̃ drʉade, dota, yikota mejãcha, nedʉwʉrʉrata akʉzade kĩrãtana ũdupanʉ dayirãbara, maʉ̃ba ũdubibʉ iya dayirãra mejãcha kãgata akʉza kãgabʉ sobiapanamarẽã.

Cría de elefante: Image © Romi Gamit/Shutterstock; polluelos de pingüino: Vladimir Seliverstov/500px via Getty Images; chivitos: Rita Kochmarjova/stock.adobe.com; dos delfines: georgeclerk/E+ via Getty Images

4. (1) Jeowaba naʉ̃ drʉade zʉbʉrianʉmʉ mejãcha ũdubʉmina, ¿kʼãrẽa mawũãsidu sobiabʉ iyira? (2) ¿Kʼãrẽta obʉ Jeowaba dayirã kʼarea? (Salmo 16:11).

⁴ Jeowabara bia kʼawuabʉ idi ewadera ẽbẽrarã kʼãrẽ bedʼea zromane berabarinʉmʉra, iya kʼawuabʉ dayirãra kʼãrẽaba zʉbʉrianʉmʉta, kʼãrẽne berabarinʉmʉra, maʉ̃ba Jeowasida sopʉabʉ, mawũãsidu iyi sobiara maʉ̃ʼa jãrĩbi ẽ iyara biʼia kʼawuabʉ baera sõbede jõbita dayirã zʉbʉriara (1 Tim. 1:11). Maʉ̃ ewari zei nãã iya dayirãra kʼareba mejãcha diabʉ mawũã sobia panamarẽã (akʉra Salmo 16:11). Akʉdayi Jesús sãwũã sobiabasita yi Zeze ũdukʼawuaiba.

5, 6. ¿Jesúsʼra kʼãrẽa sobiabʉ?

⁵ Jesúsʼsida mejãcha sobiabʉ yi Zeze kĩrãkʼa, ¿maʉ̃ra kʼãrẽa mawũã jarapanʉ? Nããra, Jesúsbara yi Zezeba nebia obʉta iyabida abarika obʉ baera (Col. 1:15; 1 Timoteo 6:15). Yi ũmeta akʉzade iyira dããraba yi Zeze kʼawabʉta, maʉ̃ba iyira mejãchade sobiabʉ.

⁶ Yi ũbeata, Jesúsʼra sobiabʉ iyara obʉ baera yi Zezeba jarabʉta (Prov. 8:​30, 31; Juan 8:29). Jeowabara Jesúsʼa bia akʉbʉ maʉ̃ kʼarea akʉzade sobiabʉ iya jarabʉta obʉ baera (Mat. 3:17).

7. ¿Kʼãrẽta odaibara arigʉ sobia bʼaita?

⁷ Dayirãsida arigʉ sobia baseapanʉ Jeowa neũdukʼawua biabʉrʉ, ¿sãwũã oseapanʉ maʉ̃ra? Nããra, Jeowata ũdukʼawuadaibara. Yi ũmeta, iyide kĩrãkʼa odaibara. Yi ũbeata, iya jarabʉta odaibara (Sal. 33:12).a Edaʉde dayirãra mejãcha krĩcha zroma obʉ maʉ̃ba sopʉabibare, depresion diabare, nekʼãrẽ biode berabaripanʉ, mamina maʉ̃ba jarakĩrãbʉ ẽ Jeowabara dayirã bia akʉ ẽãta awuarabʉrʉ Jeowabara dayirãra kʼãrẽne berabarinʉmʉra bia kʼawuabʉ (Sal. 103:14). Akʉdayi akʉzade kʼãrẽba jãrĩseabʉta dayirã sobiara akʉza kʼãrẽta oseapanʉ jẽda sobia bʼaita.

JÃRĨBIRÃRA BɄ SOBIATA

8. ¿Kʼãrẽba sãwũãbʉ dayi bedʼea zromane berabarinʉmʉnera?

⁸ Bedʼea zroma dayi bebʉ berabaribʉba. Bari jaraita, kʼãrẽ neẽãba, naʉ̃ drʉade neida berabaribʉba, kayaba akʉza zõnababa, naʉ̃raba zʉbʉriabiseabʉ mejãchade dayirã akʉza jãrĩseabʉ dayi sobiata. Edaʉde daya naʉ̃ranera mia kʼãrẽsi kʼãrẽ obe ẽ, maʉ̃ kʼãrẽa Daizeze Bedʼeaba jarabʉ sopʉabara zarea neẽã babibʉ (Prov. 15:13). Zõrãrã aba kongregasionebemata naʉ̃ta berabarisi, yibarirata akʉza yi mebẽãta beisi ara kʼawa kʼawa, poaga bio berabari ẽãde maʉ̃ba iyira mejãchade sopʉabasi akʉza zarea neẽã sentibasi, iya naʉ̃ta jarasi: «Mʉ̃ra abapai sentibasi, krĩchabasi kʼaiba kʼarebaita neẽãta. Mʉ̃ra mejãchade sopʉabʉ ewari mejãcha berabari ẽ basi baera ãyi bei nãã, ãyibawara». Naʉ̃ba ũdubibʉ bedʼea zroma berabaribʉrʉdera, sopʉa baseabʉta akʉza zarea neẽã.

9. ¿Kʼãrẽta odaibara jẽda sobia bʼaita? (Jeremías 29:​4-7, 10).

⁹ ¿Kʼãrẽta odaibara akʉza jẽda sobia bʼaita? Idi ewadera ẽbẽrarãba krĩchapanʉ dayi sobia bʼaira bedʼea zroma ũdu ẽ baibarata, mamina maʉ̃ra wãrĩnu bʼaira mawũã ẽ. Krĩchadadrʉ judiora kʼãrẽ berabaridata, ãyi Babilonia ena edesidadera mejãchade zʉbʉriasi akʉza mejãcha sopʉapanasi, mamina Jeowaba ãyaʼa jarasi zarea odamarẽã mama kʼawuaita akʉza sobia baita (akʉra Jeremías 29:​4-7, 10). ¿Kʼãrẽta kʼawuapanʉ naʉ̃neba dayirãba? Kʼawuapanʉ ĩjãibarata daya kʼãrẽne berabarinʉmʉta akʉza jʉ̃ã ẽ baibara jõma bia berabarinʉmaita, mia bedʼea zroma ũdu ẽ baita. Krĩchara bʉa kʼãrẽ nebia erbʉta adewara biga diara maʉ̃ kʼarea akʉza kĩrãbedaibara Jeowara dayi kʼawabʉta, mawũã dayi kʼarebaita (Sal. 63:7; 146:5). Mebẽã Effiebara mejãchade biga diabʉ Jeowa iyi sãwũã kʼarebada kʼarea. Iyira asidenta kʼãrãpe wua wãbe ẽ basi iya naʉ̃ta jarabʉ: «Jeowaba, mʉ̃ mebẽrãba akʉza mebẽrã kongregasionebemaraba mejãcha kʼarebasida mʉ̃ra akʉza so zarea diasida, zarea obʉ mʉ̃ra sobia bʼaita mawũã ãya ũdubita biga diabʉta ãya mʉ̃ kʼarea nekʼãrẽ mejãcha obʉ kʼarea».

10. ¿Kʼãrẽa sobia baseapanʉ dayirãra bedʼea zroma ũdupanʉmina?

¹⁰ Dayirãra bedʼea zromane berabaribʉmina dayita mawũã ẽ bʉrʉ dayirã mebẽrãta, mawũãsidu sobia baseapanʉ (Sal. 126:5).b ¿Kʼãrẽa mawũã sobiabaibara? Dayirã sobia bʼaira nesida ẽ baera jõma bia baita. Prekursora aba, yi trʉ̃ Maríaba jarabʉ: «Dai bedʼea zroma berabaribʉrʉdera daira sobiapanʉ, krĩchapanʉ baera Jeowaba nebia diaya abʉ ʉ̃rʉ, mamina maʉ̃bara jarakĩrãbʉ ẽ dayirã jẽga ẽ baibarata, mawũã kʼãrẽ berabarinʉmʉ ẽ kĩrãkʼa ba ẽ baibarata, awuarabʉrʉ kʼawuapanʉ Jeowaba kʼarebaita dayi sobia bʼaita, krĩcha ẽã kʼãrẽ berabarinʉmʉta». Bʉita zaremina bʉa bedʼea zroma ũdunʉmʉra, kĩrãbera maʉ̃ra ewari jõmaʉ̃nẽ mawũã ba ẽ baita, Jeowabara jõma ãĩ bʉeyi kayirua idi dayirãba ũdupanʉra akʉza dayirã sopʉabibʉra.

11. ¿Sãwũã so zarea diabʉ bʉra apostol Pablo yizaba?

¹¹ Edaʉde daya krĩchaseabʉ bedʼea zroma ũdunʉmʉba Jeowaba dayirã bia akʉ ẽãta, mawũã krĩchapanʉbʉrʉ mejãchade kʼarebayi ẽbẽrarã Daizeze ode pananara yizaba. Bari jaraita, krĩchadrʉ Pablo yizata, Jesúsba iyaʼa diasi nekʼãrẽ biata omarẽã: bedʼea biata jaradiaita israelitara, ẽbẽra drʉa jãpebema akʉza nokʼora (Hech. 9:15). Mamina Pablobara mejãchade ũdusi bedʼea zromata (2 Cor. 11:​23-27). Iyi mawũã bedʼea zromane berabaridaba ¿jarakĩrãbasika iyira Jeowaba bia akʉ ẽ basita? Mawũã ẽ, awuarabʉrʉ iya awuantabʉba ũdubisi Jeowaba iyira kʼarebanʉmʉta akʉza iyiʉ̃mebasita (Rom. 5:​3-5). Bʉsida bedʼea zromane berabarinʉmʉmina kʼẽrẽpa awuantabʉbʉrʉ, ĩjãra Jeowara bʉ kʼawabʉta akʉza iya bʉra bia akʉbʉta.

12. ¿Kʼãrẽa sopʉaseapanʉ dayirãba Jeowaita audre okĩrãbʉde aripe berabari ẽãde?

¹² Bʉ akʉza dayi sobia jãrĩseabʉta, maʉ̃ra daya krĩchabʉ aripe berabari ẽãne (Prov. 13:12). Dayirã Jeowa ʉ̃rʉ kʼawuabibarirabara mejãchade nekʼãrẽ okĩrãpanʉ Jeowa kãga ũdubidaita, mawũã audre odaita Jeowaita, mamina dayirãba oita krĩchabʉ aripe berabari ẽãnera mejãchade sopʉapanʉ (Prov. 17:22). Mebẽã wẽrã aba propesora iyi trʉ̃ Hollyba naʉ̃ta jarabʉ: «Mʉ̃ra wãkĩrãbasi Escuela de Evangelizadorerama mawũã drʉa aña wãita akʉzade mʉ̃ara kʼarebakĩrãbasi Ramapodebida, mamina mʉ̃a kʼawuaside mʉ̃a naʉ̃ra obe ẽãta maʉ̃ba mʉ̃ra mejãcha sopʉasi, mʉ̃itara jipade zarebasi mʉ̃a okĩrãbadata obe ẽ basi baera». Mebẽrã mejãchaʉta abarika berabaripanʉ.

13. Ʉ̃kʉrʉ pribilegio erbabe ẽ mina, ¿daya kʼãrẽta oseabʉ?

¹³ ¿Kʼãrẽta odaibara akʉza jẽda sobia bʼaita? Kĩrãbedaibara Jeowabara widi ẽãta dayirãba obe ẽãra awuarabʉrʉ iyara kãgabʉ soiduba odamarẽã. Jeowabara dayirãra bari bia akʉbʉ ẽ dayirãba pribilegio erbʉ kʼarea, awuarabʉrʉ iyara kãgabʉ dayirãra kʼẽrẽpa badamarẽã, edabʉta ũdubidamarẽã akʉza iyi ode kʼẽrẽpa takeradamarẽã (Miq. 6:8; 1 Cor. 4:2). Jeowaba widi ẽ bʉrʉ dayirãba obe ẽãsita odamarẽã, ¿mawũẽra maʉ̃ra odaibaraka?c Mawũã ẽ, awuarabʉrʉ daya oseabʉta odaibara, akʉibara kʼãrẽne kʼarebaseabʉta mebẽrãta. Bari jaraita, bʉa kʼarebaseabʉ warrara kongregasionebemara audre Jeowa neũdukʼawua bamarẽã, mawũã ẽ bʉrʉ mebẽrã kongregasione zõnapanʉrata kʼarebaseabʉ ãya nesidabʉde akʉza ʉ̃kʉrʉ mebẽrãsida kʼarebaseabʉ so zarea diaita selulardeba, mawũã ẽ bʉrʉ mensajedeba. Bʉa akʉbʉbʉrʉ bʉa kʼãrẽne kʼarebaseabʉta wuabemarata, mawũãra Jeowabara bʉra kʼarebayi akʉza bʉsida sobiabayi. Akʉza krĩchadaibara idi daya nekʼãrẽ mejãcha obe ẽãra ẽjũã kĩrãwãreãnẽ osea bʼaita audre Jeowaita. Hollyba akʉza naʉ̃ta jarabʉ: «Mʉ̃ mejãcha krĩcha obʉdera akʉza sopʉabʉdera mʉ̃ra piradrʉ kʼãrãpe krĩchabʉ ẽjũã kĩrãwãreãnẽ mʉ̃a nekʼãrẽ osea bʼaita Jeowa kʼarebadeba, mawũã iyita audre nekʼãrẽ oita».

14. ¿Adewara, kʼãrẽba jãrĩseabʉ dayi sobiara?

¹⁴ Jeowaba dayirãra sobiapanamarẽã osi. Mamina ʉ̃kʉrʉ ẽbẽraba ũdubipanʉ selulardeba dayi sobia bʼaira drʉa bio ũdukʼawuabaibarata, daya kãga erbaita, yiko mejãcha erbaita, platata, mamina wãrĩnu bʼaira, daya kãgabʉtrʉ jʉrʉira biga ẽ maʉ̃ba sobiabi ẽ baera. Prekursora aba yi trʉ̃ Evaba naʉ̃ta jarabʉ: «Daya jʉrʉbʉbʉrʉ daya kãgabʉtrʉ maʉ̃bara sobiabi ẽ bayi, awuarabʉrʉ audre jʉrʉyi nekʼãrẽ awuruta».

15. ¿Kʼãrẽta kʼawuapanʉ nokʼo Salomón berabaridadeba?

¹⁵ Nããbema parrapo bia kʼawuadaita akʉdaya nokʼo Salomónba odata. Iyara jidasi iyi sobia bʼaita, mawũã jʉrʉsi yiko biata mejãcha, musika ũrĩta akʉza iyi ewaride nekʼãrẽ bia bada jõma oita, mamina iya maʉ̃ jõma oda tẽã kʼawuasi maʉ̃bara sobiabi ẽãta maʉ̃ kʼarea iyara sopʉa kʼãrãpe bʉsi naʉ̃ta: «Maʉ̃ra jipa zeri ẽ basi [ . . . ] mʉ̃ra bari zarea obasi pʉãdrʉ jidaita zarea oi kĩrãkʼa» (Ecl. 1:8; 2:​1-11). Billete falsora balor barabʉ kĩrãkʼabʉmina wãrĩnubaira mia kʼãrẽita zeri ẽ maʉ̃ kĩrãkʼabʉ ẽbẽrarãba krĩchabʉta sobia bʼai ʉ̃rʉ, ãya nekʼãrẽ kãgabʉba sobiabi ẽ baera.

16. ¿Kʼãrẽa sobiabibʉ wuabemara kʼarebaiba? (Akʉra potorata).

¹⁶ ¿Kʼãrẽta odaibara akʉza jẽda sobia bʼaita? Jesúsba dayirã jaradiasi «audre sobiabʉ daya diabʉde dayaʼa diapanʉira» (Hech. 20:35). Maʉ̃ta obʉ zõrãrã kongregasionebema abaʉba, yi trʉ̃ Alekosba, iya jarabʉ: «Mʉ̃ara wuabemarãra kʼarebakĩrã, mʉ̃itara maʉ̃ra zare ẽ, maʉ̃ba kʼarebabʉ baera mʉ̃trʉ krĩcha ẽ baita. Maʉ̃ba mʉ̃ra mejãchade sobiabʉ». Kõbe, ¿bʉara kʼãrẽta oseabʉ wuabemarabari? Bʉa kʼawuabʉbʉrʉ mebẽã aba zʉbʉria berabarinʉmʉta, zarea ora iyi kʼarebaita mawũã ũrĩta iyi kʼãrẽne berabarinʉmʉta bʉa ara obe ẽ mina iyi bedʼea zromara, kãgata ũdubira akʉza kʼawuabira Jeowara iyiʉ̃mebʉta (Sal. 37:28; Is. 59:1). Akʉza kĩrãbebira Jeowa yiwidʼibarata iyira (Sal. 55:22; 68:19). Adewara bʉra trʉ̃seabʉ ãba nekoita, mawũã ẽ bʉrʉ ode ãba wãita. Adewara ãbaʉba jaradia wãita. Dayitrʉ krĩchabʉ ẽ bʉrʉ Jeowaba zokʼayi dayirãra wuabemara kʼarebaita, maʉ̃ba sobiabiyi dayirãra (Prov. 11:25).

17. Dayirãra sobia bakĩrãpanʉbʉrʉ, ¿kʼãrẽta oibara? (Salmo 43:4).

¹⁷ Idi ewadera bedʼea zroma mejãcha ũdupanʉmina akʉza maʉ̃ne berabaripanʉmina, kʼẽrẽpa takeraibara Jeowa ode, iya kʼarebai baera dayirãra sobiapanamarẽã ewari jõmaʉ̃nẽ. Maʉ̃ta jarabʉ iyi bedʼeade, Jeowabʉrʉ dayirãra arigʉ sobia babiseabʉ (akʉra Salmo 43:4; Sal. 144:15).