1925​: maʉ̃neba sien poagaba

ÃYA JɄ̃ÃPANANARA BERABARI Ẽ BASI

Daizeze Bedʼea kʼawuabarirabara 1925dera jʉ̃ãpanasi naʉ̃ drʉara ẽjũã kĩrãwãreã bamarẽã, maʉ̃ta jara ũrĩbisi mebẽã Albert Schroederba, Zõrãrã Burubiadebemabasi iyira: «Krĩchapanasi Jesús kʼareba zokʼaira nama waidide udapanʉrãra ʉ̃ta wãita akʉza Abrahánba, Davidba akʉza wuabemara yumakẽrãra kʼẽrẽpa pananaraba zokʼadaibasita kʼareba nama uda Daizeze Nokʼota». Mamina maʉ̃ mawũã berabari ẽ basi baera, mejãchaʉta sopʉasida maʉ̃ba (Prov. 13:12).

Mawũã sopʉasidamina Daizeze Bedʼea kʼawuabarirãra, nekʼãrẽ oẽã ba ẽ basi, awuarabʉrʉ wiña wiñane kʼawuasida ãya, audre yibiata Daizeze Bedʼea jaradiaita mawũã nekʼãrẽ osida maʉ̃ audre oita. Bari jaraita, audre jaradiasida radiodeba ẽbẽra jĩgapanʉa.

AUDRE OSIDA EMISORATA

Poaga 1924de erpanasi emisora WBBRta maʉ̃neba mejãcha jaradiapanasi Daizeze Bedʼeata, maʉ̃ kʼarea tẽã osida awuru emisorata Chicago (Illinois) drʉade bʉesida maʉ̃ra, mõbe trʉ̃gasida WORD. Mebẽã Ralph Lefflerba, emisora kʼareba odaba naʉ̃ta jarasi: «Ẽbẽrarã drʉa kʉrãzade jĩgapanʉrabida ũrĩpanasi». Bari jaraita 5.000 kilometro radiodeba jĩgapanʉra familia abaʉba ũrĩpanasi Daizeze Bedʼeara emisoradeba drʉa Pilot Station (Alaskadebemaba), maʉ̃ jõma ũrĩna tẽã ãyara kartata bʉsida mebẽrã biga diaita Daizeze Bedʼea jaradiadabari.

Naʉ̃ karta inglesdebema 1 diciembre 1925debemaba naʉ̃ta jarasi emisora WORD ʉ̃rʉ: «Emisora trasmisor 5.000 batios erbaera yi señalde jipade yibia, maʉ̃ba Estados Unidos jõmaʉ̃nẽ ũrĩseapanʉ akʉza ũrĩseapanʉ Cubadebemaba adewara Alaskadebemaba, ẽbẽrarã Daizeze ʉ̃rʉ ũrĩkabida atiara audre kʼawuakĩrãpanʉ».

Daizeze Bedʼea kʼawuabarirabara audre zokʼakĩrãpanasi radiota Daizeze Bedʼea jaradiadaita Canadáde, maʉ̃ kʼarea 1924de drʉa Saskatoonʼne (Saskatchewan), osida emisora aba, mõbe trʉ̃gasida CHUC. Maʉ̃ra audre wari wã baera, 1925de Sociedad Watch Towerba edasi teatro Regent Building Saskatoonʼne mõbe maʉ̃ ara oda kʼãrãpe mama edesida.

Naʉ̃ emisoradeba ẽbẽrarã Saskatchewanʼneba jĩgapanʉrabara ũrĩsida Daizeze Bedʼeara, ãyara ũrĩ aduadebasi Daizeze ʉ̃rʉra. Bari jaraita, ẽbẽra wẽrã aba drʉa McKaguede radiodeba 185 kilometro jĩgabʉba bʉsi iya diadamarẽã kartara Daizeze Bedʼeadebemata, maʉ̃ kʼarea mebẽã George Naishba jarasi: «Iya sãwũã wididaba daibara kʼawuasida iyara wãrĩnu kʼawuakĩrãbʉta, maʉ̃ba dia bʉesida Estudios de las Escrituras librorata». Audre ẽãde naʉ̃ ẽbẽra wẽrãbara iya kʼawua wãnata jaradia jʉ̃drʉsi ẽbẽrarã audre jĩgapanʉra Carrot River Valleydebema.

AUDRE BIA ŨRĨSIDA DAYIRÃBA ĨJÃBɄTA

Daizeze Bedʼea kʼawuabarirabara kʼawuapanasi Diarubara organizasionta erbʉta, maʉ̃rane edabʉta politikarata, religion zeri ẽãrata, ne nẽdobarirata, adewara angelera kayiruarata. Mamina naʉ̃ karta 1 marzo 1925debemaba, osi artikulo aba inglesde, yi trʉ̃ «Nacimiento de la nación». Maʉ̃neba nezokʼa jipabʉbara jara ũrĩbisida mebẽrã, Jeowabida erbʉta organizasionʼra, maʉ̃rane edapanʉ angelera biarata ʉ̃tʉ akʉza ẽbẽra biara nama udapanʉta, maʉ̃rãra jipa jĩgapanʉta Diarudeba (Mat. 24:45). Adewara maʉ̃ne jara ũrĩbibasi Daizeze Nokʼoba zokʼa jʉ̃drʉsita 1914de akʉza Jesúsʼra yõsita ʉ̃tʉ Diaruʼʉ̃me, maʉ̃ne Diarura «jʉretasida naʉ̃ drʉa eda angelera iyi kʼaidupanʉrabawara» (Apoc. 12:​7-9).

Ʉ̃kʉrʉ Daizeze Bedʼea kʼawuabariraitara zarebasi ĩj̈ãita naʉ̃ kʼãwũã jaradapeadara, maʉ̃ba iyabaʉ artikuloba ũrãgʼata diasi: «Maranebemaba ĩjãita zareabʉbʉrʉ nama jarabʉta, jarakĩrãpanʉ jʉ̃ã kʼawuabʉta ũdubidamarẽã akʉza ĩj̈ãta ũdubidamarẽã Jeowa ʉ̃rʉ, adewara audre nekʼãrẽ odamarẽã Jeowaita soiduba».

Tom Eyre, colportor (maʉ̃ra idira ũdukʼaude prekursor) Gran Bretañanebemaba jara ũrĩbisi mebẽrã abaʉba sãwũã akʉsidata ãya kʼawuasidade naʉ̃ ʉ̃rʉ: «Mebẽrãba bia ũrĩsidade Apocalipsis 12de kʼãrẽta jarabʉta mejãchade sobiasida, ãya kʼawuasidade Daizeze Nokʼobara ʉ̃tʉ zokʼa jʉ̃drʉsita mejãcha sobiasida, maʉ̃ba ẽbẽrarã jaradia jʉ̃drʉsida soiduba akʉza ũdusida Jeowaba sãwũã kʼarebanʉmʉta iyi organizasionba nekʼãrẽ awuara obʉdade ĩjãita».

KʼAWUASIDA KʼÃRẼA YIBIATA JEOWA Ʉ̃RɄ JARADIADAITA

Idi ewade dayirã Jeowa ʉ̃rʉ Kʼawuabipanʉrãbara, biʼia kʼawuapanʉ Isaías 43:10ba jarabʉra, maʉ̃ne jarabʉ: «Marara mʉ̃ ʉ̃rʉ kʼawuabipanʉrã, (mawũã jarabʉ Jeowaba), jidasi kʼawuapanamarẽã». Mamina 1925 nããra, dayirã kartaranera maʉ̃ ʉ̃rʉra mejãcha bedʼeada ẽ basi, mamina maʉ̃ra tẽã awuara jʉ̃drʉsi. Naʉ̃ra kartaranebema 11 ingles bedʼeade, mejãcha bedʼeasi Isaías 43:​10, 12 ʉ̃rʉ.

Agosto 1925de, Daizeze Bedʼea kʼawuabarirabara Indianápolisde (Indiana) osida asambleata. Maʉ̃ne mebẽã Joseph Rutherfordba bedʼeata bʉesi programane, jarabasi: «Zesida naʉ̃ asamblea eda zarea jidaita mawũã zokea jaradiadaita ẽbẽrarã Jeowa ʉ̃rʉ». Naʉ̃ asambleara 8 ewaribayeda osida, maʉ̃nera so zarea diasida mebẽrã, mawũã ãya badumae jaradiadamarẽã Daizeze ʉ̃rʉ.

Sábado 29 agostode, mebẽã Rutherfordba diskursota diasi, yi trʉ̃ra «Una llamada a la acción», maʉ̃ne jara ũrĩbisi kʼãrẽaba yibiata jaradiaita iya jarasi: «Jeowaba jarabʉ iyi nezokʼara ‹Marara mʉ̃ ʉ̃rʉ Kʼawuabipanʉrã (mawũã jarabʉ Jeowaba), mʉ̃ra mara Zeze›. Akʉza iya tẽã jarasi: ‹Nekʼãrẽ oidua pʉwʉrʉraba maʉ̃ta kʼawuadamarẽã ẽbẽrarã Jeowaba jidadabʉrʉ jaradiaseapanʉ iyi ʉ̃rʉra, iya jidasi baera iyi jauredeba, maʉ̃rãra iyi ʉ̃rʉ kʼawuabibarira baera›» (Is. 43:12; 62:10).

Mebẽã Rutherfordʼba iyi diskurso jõna tẽã lesi kartata, yi trʉ̃ra «Mensaje de esperanza», maʉ̃ne jarabasi Daizeze Nokʼobʉrʉ nebiata diaseabʉta mawũã aduʼa bʼaita, zroga bʼaita, krĩcha oẽ baita akʉza ewari jõmaʉ̃nẽ sobia bʼaita. Maʉ̃ ũrĩsidadera jõmaʉ̃ta bedʼea abarikapanasi. Maʉ̃ba maʉ̃ kartara tẽã bedʼea awuara awuarakade tradusisida akʉza naʉ̃ kartara 40 millones dedekasida.

Maʉ̃ ewaridera wabide trʉ̃gada ẽ basimina Jeowa ʉ̃rʉ Kʼawuabibarira, mawũãsidu naʉ̃ra mebẽrãbara biʼia kʼawua wãsida kʼãrẽaba yibiata Jeowa ʉ̃rʉ jaradiaira.

ZAREA OSIDA ẼBẼRARÃ JẼDA AKɄDE JɄ̃ẼITA

Drʉa jõmaʉ̃nẽ Daizeze pʉwʉrʉra eaba wãsi baera, Jeowa organizasionba jarasi zarea odamarẽã ẽbẽrarã Daizeze Bedʼea kʼawuakĩrãpanʉrata jẽda akʉde jʉ̃ẽnamarẽã. Naʉ̃ karta «Mensaje de esperanza» dedekada tẽã Bulletina kartaba jarasi: «Zarea oidua naʉ̃ra karta jidadara ẽbẽrarã jẽda akʉ jʉ̃ẽita».

Bulletin kartaba enero 1925debemaba naʉ̃ta eda jarabasi mebẽã abaʉba jaradata, iyira Plano, Texasdebema: «Daya jaradiada ʉ̃rʉ jaradiabʉrʉdera, ẽbẽrabara audre ũrĩkĩrãpanʉ daya aweda jaradia jʉ̃ẽnaira. Daiba jaradiapanʉmae bʉ pʉwʉrʉ zake aba, mamara daibara 5 bese pai jaradia jʉ̃ẽsida 10 poagade, aranʉeda mebẽã Hendrixta akʉza mʉ̃ papata jʉ̃ẽsida mama jẽda jaradiade, maʉ̃ne ãyara mejãcha dedekasida librorata aweda jʉ̃ẽsida dedekadaira».

Prekursor aba Panamánebemaba bʉsi: «Mʉ̃a jaradiabʉde ẽbẽrarã mejãchaʉba ũrĩkĩrãde ẽ basi, mamina mʉ̃a tẽã akʉ jʉ̃ẽside audre ũrĩkĩrãpanasi ãyara. Naʉ̃ poagadera mʉ̃ra audre zarea obʉ ẽbẽrarã jẽda akʉde jʉ̃ẽita, maʉ̃ obʉrʉde edaʉde ʉ̃kʉrʉba ũrĩpanʉ maʉ̃ba bia wã mʉ̃ra».

NEKʼÃRẼ MEJÃCHA OIBARA

Karta poagaza prekursorera diapanʉne, mebẽã Rutherfordba jara ũrĩbisi poaga berabariside kʼãrẽta osidata ãya akʉza kʼãrẽta oibarata naʉ̃ poagade. Iya bʉsi: «Poaga berabarisidera marabara ẽbẽrarã sopʉabʉrãra so zarea diasida, maʉ̃ba marara mejãcha sobiasida akʉza naʉ̃ poagade maraba ũdubidayi kʼairabʉrʉ wãrĩnu Daizeze ʉ̃rʉ jaradiapanʉta, zarea odadrʉ ãbaʉba Daizeze ʉ̃rʉ ibia bedʼeabidaita».

Poaga 1925 jõbodoare, mebẽrãbara ũdusida Betel Brooklynʼnebemara (Nueva York), audre yi zroma babidaibarata. Akʉza poaga 1926de maʉ̃ra ojʉ̃drʉdaibasi dayirã organizasionbara maʉ̃ra nããra okabasi.