Wuabemarabari yiwidʼidadrʉ

1. ¿Sãwũã ũdubibʉ Jeowabara dayi yiwidʼira ũrĩkĩrãbʉta?

YIWIDʼIRA Jeowaba nebia zroma diada, krĩchara naʉ̃ta: Jeowaba nekʼãrẽ mejãcha omarẽã diasi angeleraba akʉza Jesúsʼabida nekʼãrẽ biata omarẽã diasi (Sal. 91:11; Mat. 28:18). Mamina Jeowa abapaibʉrʉ ũrĩbʉ dayirã yiwidʼira (Sal. 65:2). Maʉ̃ba Jeowabara dayirã yiwidʼibʉrʉdera ũrĩkĩrãbʉ.

2. ¿Kʼãrẽ yiza biata amaesi Pablobara?

² Dayirãra yiwidʼipanʉmina dayi bedʼea zromane berabarinʉmʉ kʼarea, yibia kĩrãbedaita wuabema kʼareabida yiwidʼidaita, maʉ̃ta osi apostol Pabloba. Bari jaraita Pabloba jarasi mebẽrã Éfesodebema, iyira yiwidʼibʉta ãyibari (Efes. 1:16). Maʉ̃ awa ẽ, iyira ẽbẽra aba abakaʉbaribida yiwidʼisi. Bari jaraita iya Timoteoʼa jarasi iyara biga diabasita Daizezeʼa akʉza yiwidʼibasita iyi kʼarea nrʉemaza (2 Tim. 1:3). Pablora bedʼea zroma mejãcha erbasimina iyira ewari jʉrʉsi mawũãsidu wuabema kʼarea yiwidʼita (2 Cor. 11:23; 12:​7, 8).

3. ¿Kʼãrẽa edaʉde kĩrãduapanʉ wuabema kʼarea yiwidʼita?

³ Idi ewadera dayitara zare wuabemara kʼarea yiwidʼita. ¿kʼãrẽa? Maʉ̃ta jarabʉ mebẽã wẽrã abaʉba yi trʉ̃ Sabrina.a Iya jarabʉ: «Idi ewadera nekʼãrẽ mejãcha oibara baera, yiwidʼibʉ daya kʼãrẽ nesidabʉ kʼareabʉrʉ, maʉ̃ba kĩrãduabʉ wuabemara kʼarea yiwidʼira». Bʉta mawũã berabarinʉmʉbʉrʉ, naʉ̃ artikuloba mejãcha kʼarebayi. Atia kʼawuadayi kʼarea yiwidʼibarata wuabema kʼarea akʉza sãwũã oita maʉ̃ta.

¿KʼÃRẼA YIBIA WUABEMA KʼAREA YIWIDʼIRA?

4, 5. ¿Sãwũã «zarea barabʉ» dayi wuabema kʼarea yiwidʼibʉra? (Santiago 5:16).

⁴ Wuabemarabari yiwidʼira «zarea mejãcha erbʉ» (akʉra Santiago 5:16). ¿Sãwũã mawũã zarea barabʉ wuabema kʼarea dayi yiwidʼira? Maʉ̃neba Jeowabara wuabemarãra kʼarebaseabʉ. Bari jaraita, Jesúsba kʼawuabaside Pedroba iyi ũduadua aita, iya maʉ̃ne jarasi Pedroʼa: Mʉ̃ra bʉbari Daizezeʼa yiwidʼisi bʉa «ĩjã bʼʉta kenabʼari ẽbamarẽã» (Luc. 22:32). Pablobida kʼawuabasi yiwidʼira mejãcha zarea barabʉta. Maʉ̃ kʼarea iya iyi Romane deda jida erpanaside Pabloba jarasi Filemónʼa jʉ̃ãbasita mebẽrãbawara ãba bʼaita ãyi yiwidʼipanʉneba (Filem. 22). Dããra ẽãne iyira ãĩ bʉesida, mawũã jẽda jaradia wãseabasi akʉzade iyara.

⁵ Krĩchada ẽ baibara Jeowaba daya widibʉrʉra iya panʉibarata. Jeowabara ũrĩkĩrãbʉ dayirã yiwidʼibʉra akʉza kʼawuabʉ sõbede panʉita. Naʉ̃ kʼawuabʉrʉba kʼarebabʉ mawũã dayi krĩcha zroma obʉde Jeowaʼa soiduba yiwidʼita. Akʉza naʉ̃ba kʼawuabibʉ Jeowabʉrʉ kʼawuabʉta sõbede panʉita akʉza kʼãrẽta oita (Sal. 37:5; akʉra 2 Corintios 1:11 akʉza notas de estudio).

6. ¿Wuabema kʼarea yiwidʼibʉrʉdera, dayirã maʉ̃nera sãwũã sentibʉ? (1 Pedro 3:8).

⁶ Wuabema kʼarea yiwidʼiba dayirã so borekea babiseabʉ (akʉra 1 Pedro 3:8). Ẽbẽra so borekeabʉbara akʉbʉ wuabemara zʉbʉriata akʉza kʼarebabʉ (Mar. 1:​40, 41). Zõrãrã abaʉba yi trʉ̃ Michaelba jarabʉ: «Mʉ̃ wuabemaraba nesidabʉ kʼarea yiwidʼibʉrʉdera, kʼawuabʉ ãyi kʼãrẽaba zarea obʉta, maʉ̃ba audre kãgabibʉ ãyita, ãya kʼawuada ẽ mina ãyi kʼawabʉ kĩrãkʼa sentibʉ». Zõrãrã aba yi trʉ̃ Richardba jarabʉ: «Wuabema kʼarea yiwidʼibʉrʉdera dayara kʼarebakĩrãbʉ. Akʉza mʉ̃a yiwidʼidade obʉrʉde wuabemara kʼarebaita, mʉ̃neba panʉbʉ kĩrãkʼabʉ Jeowaba mʉ̃a wididara».

7. ¿Wuabema kʼarea yiwidʼiba sãwũã kʼarebabʉ dayi bedʼea zroma ʉ̃rʉbʉrʉ krĩcha ẽ baita? (Filipenses 2:​3, 4; akʉra potorata).

⁷ Wuabema kʼarea yiwidʼiba kʼarebabʉ krĩcha ẽ baita dayi bedʼea zroma ʉ̃rʉbʉrʉ (akʉra Filipenses 2:​3, 4). Dayirãra naʉ̃ drʉa jõma yi kayirua juwa edrebʉde panʉ baera, jõmaʉ̃ta bedʼea zromata ũdupanʉ (1 Juan 5:19; Apoc. 12:12). Adewara dayi wuabema kʼarea yiwidʼibʉde kĩrãbepanʉ dayirã mebẽrã iyaba zʉbʉria berabarinʉmʉta naʉ̃ drʉa jõmaʉ̃nẽ (1 Ped. 5:9). Prekursora aba yi trʉ̃ Katherineba jarabʉ: «Wuabema kʼarea yiwidʼiba mʉ̃aʼa kĩrãbebibʉ mʉ̃trʉ abapai kʼãwũã zʉbʉria berabarinʉmʉ ẽãta, maʉ̃ba kʼarebabʉ mʉ̃a krĩcha ẽ baita mʉ̃ bedʼea zroma ʉ̃rʉbʉrʉ».

¿KʼAIRABARI YIWIDʼIBARA?

8. ¿Kʼairabari yiwidʼiseapanʉ?

⁸ Dayirãra yiwidʼiseapanʉ mebẽrã kayapanʉ kʼarea, warrara bedʼea zroma ũdupanʉ kʼarea kolegiode akʉza mebẽrãra nokʼoraba pẽwãpanʉta Jeowa ʉ̃rʉ Kʼawuabipanʉrã baera (Mat. 10:​18, 36; Hech. 12:5). Ʉ̃kʉrʉ mebẽrãra mesera aña wãibara nekʼãrẽ berabaribʉba, awururata drʉade nekʼãrẽ berabaribʉrʉba zʉbʉria berabaripanʉ, dayirãba naʉ̃ra mebẽrãra ũduaduamina, ãyibari yiwidʼiba kãgata ũdubipanʉ, Jesúsba naʉ̃ta omarẽã jara amaesi baera. Mebẽrã zõnapanʉra kʼareabida yiwidʼidaibara (Juan 13:34).

9. ¿Kʼãrẽa yiwidʼidaibara dayirãra mebẽrã yi nãã edepanʉra kʼarea akʉza ãyi kimara kʼarea?

⁹ Adewara dayirãra yiwidʼiseapanʉ mebẽrã kongregasione nekʼãrẽ oibara erpanʉra kʼareabida (2 Cor. 12:15). Bari jaraita Zõrãrã Burubia kʼarea, ãyi kʼarebabari kʼarea, Betel akʉbari kʼarea, kongregasionʼra zõrãrã akʉbari kʼarea, zõrãrã kongregasionebema kʼarea akʉza ãyi kʼarebabari kʼarea. Ãyisida mejãchade bedʼea zromane berabaripanʉ baera. Adewara yiwidʼiseapanʉ naʉ̃ra mebẽrã kimara kʼareabida, ãyara mejãchade kʼarebapanʉ baera ãyi kimara, mebẽrã kʼarea trajadamarẽã. Bari jaraita Markʼra kongregasionʼra zõrãrã akʉbari, iya naʉ̃ta jarabʉ: «Mʉ̃itara audre zarera mʉ̃ yibariraneba jĩga bʼaita. Mʉ̃a ãyitara nekʼãrẽ mejãcha okĩrãbʉ akʉza ãyira zõna ba wãna, maʉ̃ba mejãchade kayapanʉ. Mʉ̃a kʼawuabʉ mʉ̃ mebẽãba yi kimaʉ̃meba bia akʉbʉta, mamina mʉ̃ara ãyi kʼarea mejãcha okĩrãbʉmina obe ẽ» (1 Tes. 5:​12, 13). Dayirãbara kʼawuada ẽ mebẽrã yi nãã edepanʉrãra kʼãrẽ bedʼea zromane berabarinʉmʉra, maʉ̃ kʼarea yibia dayirãra ãyibari yiwidʼita.

10, 11. ¿Jeowabara ũrĩkĩrãbʉka dayirãba mebẽrã jõmaʉ̃bari yiwidʼibʉra? Jara ũrĩbira.

¹⁰ Dayirãra mebẽrã mejãchaʉbari yiwidʼipanʉ, maʉ̃ba edaʉde krĩcha ẽ ãyi aba abakaʉbari yiwidʼita. Bari jaraita, mebẽrã naʉ̃ drʉa jõmaʉ̃nẽ karselde edepanʉrabari, mawũã ẽ bʉrʉ mebẽrã jõma ãyi mebẽrã beipanʉbari. Kongregasionebema zõrãrã yi trʉ̃ Donaldba jarabʉ: «Dayirãra mejãchade yiwidʼipanʉ mebẽrã jõmaʉ̃ra kʼarea, ãyi bedʼea zromane berabarinʉmʉ kʼarea».

¹¹ Mawũẽra, ¿Jeowabara ũrĩbʉka naʉ̃ra yiwidʼi dayirãba jõmaʉ̃rabari obʉra? Ũrĩkĩrã iyara. Wãrĩnubaira dayirãbara kʼawua ẽ baera mebẽrã kʼãrẽne berabarinʉmʉta, maʉ̃ba yibia dayirãba mebẽrã naʉ̃ drʉa jõmaʉ̃nẽ kʼãrẽ berabarinʉmʉbari yiwidʼira (Juan 17:20; Efes. 6:18). Mama ũdubipanʉ baera «mebẽrã jõmaʉ̃ʼa kãgata» (1 Ped. 2:17).

¿SÃWŨA YIWIDʼIBARA MEBẼRÃ ABA ABAKAɄBARI?

12. Mebẽrã kĩrãkita akʉbʉba, ¿sãwũã kʼarebabʉ dayita ãyi aba abakaʉbari ʉ̃rʉ yiwidʼita?

¹² Kĩrãkita akʉdadrʉ. Dayirãra yiwidʼibara mebẽrã aba abakaʉbari, maʉ̃ba biʼia akʉibara mebẽrã kongregasione kʼãrẽ berabarinʉmʉta. Bari jaraita, bʉ kʼawuaita zõnababa zʉbʉriapanʉrata, warrara kolegiodepanʉrane kĩrãkʼa oda ẽ baita akʉza akʉibara kongregasionebʉ kʼawuaita zeze abaʉba mawũã ẽ bʉrʉ papa abaʉba dobaʉba dapʉẽbʉta yi wũãwũãta Jeowa ode (Efes. 6:4). Dayirãba kĩrãkita akʉpanʉbʉrʉ maʉ̃ra mebẽrãta, mawũã ãyibari yiwidʼiseapanʉ (Rom. 12:15).b

13. ¿Yiwidʼiseapanʉka dayirãra mebẽrã dayirãba ũduaduara kʼareabida?

¹³ Ãyi trʉ̃ta jaraibara. Mebẽrã trʉ̃ta zokʼaseapanʉ yiwidʼibʉdade ãyi ũduaduamina. Bari jaraita, mebẽrã ʉ̃kʉrʉta edapanʉ karsel Crimeane, Eritreade, Rusiade akʉza Singapurde. ¿sama ũdui dayirãba ãyi trʉ̃ra? Ũduseapanʉ jw.org de.c Kongregasionʼra zõrãrã akʉbariba yi trʉ̃ Brianba jarabʉ: «Mʉ̃ara mebẽrã karselde edapanʉra trʉ̃ta bʉbʉ, mõbe nemi jĩgʉa jarabʉ, mawũã mʉ̃ yiwidʼibʉrʉde jẽda kĩrãbeita mawũã ãyi aba abakaʉbari yiwidʼita».

14, 15. ¿Kʼãrẽba kʼarebai kʼawuaita kʼãrẽta jaraita yiwidʼibʉrʉde Jeowaʼa mebẽrãbari?

¹⁴ Yiwidʼidua mebẽrã kʼãrẽ berabarinʉmʉ ʉ̃rʉ. Parrapo 6de kʼawuasida dayirãba mebẽã Michael ʉ̃rʉ akʉza iya naʉ̃ta jarabʉ: «Mʉ̃a ũdubʉrʉde jw.org de mebẽrã karselde kʼãrẽ berabarinʉmʉ ʉ̃rʉ, mʉ̃a maʉ̃ne krĩchabʉ mʉ̃ta mama edabasibʉrʉ kʼãrẽta okasita, kʼãrẽba krĩcha obikasita. Akʉza mʉ̃a krĩchabʉ mʉ̃ kimara kʼãrẽaba krĩcha okasita mʉ̃ta mama edabasibʉrʉ. Naʉ̃ krĩchaiba mejãchade kʼarebabʉ mʉ̃ra, mawũã mʉ̃ Jeowaʼa yiwidʼibʉrʉde za mʉ̃a krĩchadata, jõma jaraita Jeowa mebẽrãbari» (Heb. 13:3).

¹⁵ Dayirãba krĩchabʉdade mebẽrã karselde edapanʉra kʼãrẽaba zʉbʉrianʉmʉ ʉ̃rʉ, ãyi kʼãrẽta sentipanʉta akʉza ãyi kʼãrẽ berabarinʉmʉ ʉ̃rʉ krĩchabʉrʉde, naʉ̃ba kʼarebaseabʉ dayi yiwidʼibʉrʉde Jeowaʼa kʼãrẽta jaraita ãyi kʼarea. Bari jaraita, karseldebema geneneba bia edamarẽã akʉza nokʼoraba so borekea akʉdamarẽã, mawũã Jeowaba kãgabʉta odamarẽã ãya (1 Tim. 2:​1, 2). Akʉzade yiwidʼiseapanʉ naʉ̃ra mebẽrã yiza biaba kʼarebamarẽã, kongregasionebemarasi kʼẽrẽpa takeraita akʉza Daizeze odepanʉra ẽãsida Jeowata ũdukʼawuadamarẽã (1 Ped. 2:12). Kʼawuasida ne kĩrã ũbea ʉ̃rʉ, mebẽrã kĩrãkita akʉita, mebẽrã trʉ̃neba jaraita akʉza mebẽrã kʼãrẽ berabarinʉmʉ ʉ̃rʉ widita dayi yiwidʼibʉrʉde. Naʉ̃ra oseapanʉ mebẽrã karselde panʉita akʉza mebẽrã naʉ̃ drʉa jõmaʉ̃nẽ panʉraitabida. Mawũã ũdubipanʉ dayirãbara mejãcha kãgapanʉta (1 Tes. 3:12).

BIʼIA KRĨCHADRɄ DAYI YIWIDʼI NÃÃ

16. ¿Kʼãrẽa jʉra kʼawuadaibara yiwidʼibʉrʉdera? (Mateo 6:8).

¹⁶ Naʉ̃ artikulode kʼawuasida dayi yiwidʼira mejãchade zarea barabʉta, mamina jʉra kʼawuapanaibara, daya dayi bedʼea zroma Jeowaʼa jarabʉrʉdera, jarabe ẽ sõbede ara omarẽã akʉza sãwũã ara oita, Jeowabara kʼawuabʉ baera dayi kʼãrẽne berabarinʉmʉra daya jarai nãã (akʉra Mateo 6:8). Jeowaba mawũã kʼawuabʉbʉrʉ, ¿mõbera kʼãrẽa yiwidʼipanʉ wuabemara kʼarea? Naʉ̃ artikulode kʼawuasida maʉ̃ra ʉ̃rʉ, mamina nekʼãrẽ awurutabʉ, dayirã wuabemara kʼarea yiwidʼibʉrʉdera ũdubipanʉ dayirãba kʼãrẽaba kãgata mebẽrãra. Jeowaba maʉ̃ ũdubʉdera mejãcha sobiapanʉ iyide kĩrãkʼa opanʉ baera.

17, 18. Yizadeba jara ũrĩbira sãwũã Jeowaba ũrĩbʉta dayi yiwidʼira.

¹⁷ Dayirã mebẽrã kʼarea yiwidʼidata mawũãsidu ãyi bedʼea zroma dayima ara wã ẽ kĩrãkʼabʉmina, maʉ̃ba ũdubibʉ dayirãbara ãyira mejãchade kãgata akʉza Jeowabida maʉ̃ra bia akʉbʉ. Krĩchadadrʉ yi mebẽrã zake ũme ʉ̃rʉ, ãyidebema aba kayabʉta, maʉ̃ kʼarea ababemaba jarayi yi zezeʼa nekʼãrẽ omarẽã yi mebẽã bemarẽã. Yi zezebara yi wũãwũã bemarẽãra nekʼãrẽ bio osimina bia akʉbʉ yi mebẽã kaya ẽãbʉba kʼãrẽ jaradara, maʉ̃ne kãgata ũdubibʉ baera yi mebẽã kayabʉa.

¹⁸ Naʉ̃ yiza kĩrãkʼa Jeowabara kãgabʉ ũdubidamarẽã krĩchapanʉta wuabemarata akʉza mebẽrãbari yiwidʼidamarẽã. Maʉ̃ kʼarea zarea odadrʉ wuabemara ʉ̃rʉ krĩchaita dayi abapai ʉ̃rʉbʉrʉ krĩchai kaude, maʉ̃ta opanʉbʉrʉ Jeowabara bia akʉyi (2 Tes. 1:3; Heb. 6:10). Dayirãba idi kʼawuada kĩrãkʼa dayi mebẽrãbari yiwidʼibʉba kʼarebaseabʉ ãyi bedʼea zroma berabarinʉmʉne, maʉ̃ kʼarea kĩrãduada ẽ badrʉ dayirã mebẽrãbari yiwidʼipanʉta.