Nekʼãrẽ jidabʉde Jeowaba kãgabʉde ora

1. ¿Jõmaʉ̃ba ewariza kʼãrẽta oibara mamina edaʉde kʼãrẽa zare maʉ̃ ʉ̃rʉ oira?

EWARIZA dayirã jõmaʉ̃ba nekʼãrẽ oita jidaibara. Maʉ̃ranebemara ʉ̃kʉrʉ kʼãrẽ oita jidaidera mejãcha krĩchaibara ẽ zare ẽ baera. Bari jaraita, daya mejãcha krĩcha ẽ diapedare kʼãrẽ kʼoibarata mawũã ẽ bʉrʉ kʼãrẽ ũmadaʉde kʼãĩ wãibarata. Mamina bʉ ʉ̃kʉrʉra kʼãrẽ oita jidabʉdade bia krĩchaibarata. Bari jaraita, dayi kayabʉde, sãwũã sobia bʼai ʉ̃rʉ, dayi mebẽrã ʉ̃rʉ krĩchabʉrʉde. Wãrĩnubaira, dayirãbara kãgabʉ baera dayirãba kʼãrẽ oita jidabʉrʉba dayirã mebẽrãsida sobia bamarẽã dayirãsida bia bʼaita. Mamina audrera kãgapanʉ dayirãba nekʼãrẽ oita jidabʉrʉde maʉ̃ba Jeowata sobiabimarẽã (Rom. 12:​1, 2).

2. ¿Kʼãrẽba kʼarebai bia jidaita?

² Naʉ̃ artikulode nekʼãrẽ ũbea kʼawuadayi dayirã kʼarebabʉta nekʼãrẽ oita jidabʉrʉde bia krĩcha kʼãrãpe jidaita. Aba, dayirãba kʼãrẽ okĩrãbʉ ʉ̃rʉ audre kʼawuaibara. Ũme, kʼawuaibara Jeowaba kʼãrẽta krĩchabʉta dayirãba nekʼãrẽ oita bʉ ʉ̃rʉ. Ũbea, kʼawuaibara dayirãba oita krĩchabʉdebemara saʉ̃ta audre yibiata. Adewara kʼawuadayi dayirãba kʼãrẽta oseabʉta bia kʼawuaita saʉ̃ta bigata akʉza saʉ̃ta zeri ẽãta (Prov. 2:11).

DAYIRÃBA KʼÃRẼ OKĨRÃBɄ Ʉ̃RɄ AUDRE KʼAWUAIBARA

3. ¿Kʼãrẽa yibia nekʼãrẽ oita jidai nãã bia kʼawuaita kʼãrẽ okĩrãbʉ ʉ̃rʉ? Yizata jara ũrĩbira.

³ Krĩchadaya naʉ̃ ʉ̃rʉ. Mediko abaʉba ẽbẽra kayabʉta ũdubʉrʉdera iyara aramaʉ̃ta diadogo ẽ badu remediota. Iya kʼawuaita maʉ̃ ẽbẽraʼa kʼãrẽ remedio diaira, nãã bia kʼawuaibara maʉ̃ ẽbẽra sama pʉakʉta, kʼãrẽba sãwũã nʉmʉta iya nesidabʉta diaita. Maʉ̃ kĩrãkʼa dayirãba nekʼãrẽ oita jidabʉrʉdera nãã bia kʼawuabaibara dayirãba kʼãrẽ okĩrãbʉ ʉ̃rʉ, mawũãtrʉ bia kʼawuadai baera kʼãrẽta oita. ¿Sãwũã oseabʉ maʉ̃ra?

4. Proverbios 18:13ba jarabʉdebara, ¿bʉara kʼãrẽta oseabʉ kʼãrẽta okĩrãbʉta bia kʼawua ẽ bʉrʉ? (Akʉra potota).

⁴ Bʉa kʼãrẽta oita jidaide bia kʼawua ẽ bʉrʉ kʼãrẽta okĩrãbʉ ʉ̃rʉ, bedʼea widibʉba mejãcha kʼarebayi. Bari jaraita, bʉta piesta eda wãmarẽã jaradara maʉ̃nera bʉara, ¿kʼãrẽta oi? Maʉ̃ piesta kʼaiba onʉmʉta kʼawua ẽ bʉrʉ akʉza kʼãrẽta oita bia kʼawua ẽ bʉrʉ widiseabʉ: ¿Sama akʉza sõbede odai maʉ̃ piestara? ¿Mawũã ẽ bʉrʉ ẽbẽrarã sõbe jʉ̃ẽi maʉ̃ piesta edara? ¿Kʼaiba akʉi mama jʉ̃ẽbʉrʉdera? ¿Kʼairata wãita mamara? ¿Kʼãrẽta odai? akʉza ¿mamara itua diabarabaika? Maʉ̃ra bedʼea panʉbʉba mejãcha kʼarebayi bʉa kʼawuaita kʼãrẽta oita (akʉra Proverbios 18:13).

5. ¿Bʉa kʼãrẽ okĩrãbʉ ʉ̃rʉ bia kʼawuada tẽãra kʼãrẽta oibara?

⁵ Bʉa naʉ̃ra widibʉrʉdera, kʼawuadogo kʼãrẽta okĩrãbʉ ʉ̃rʉ. Mamina atiara yibia bayi krĩchaita kʼãrẽta berabariseabʉta bʉa maʉ̃ta oita jidara. Bari jaraita, maʉ̃ piesta eda wãra ẽbẽrarã Jeowa ode panʉ ẽãta, Jeowa wawia ũdubi ẽãta, mawũã ẽ bʉrʉ mama ituata diadara, mamina kʼaiba kʼãrẽãba doibara jara ẽ bʉrʉ, mawũã ẽ bʉrʉ kʼaiba akʉita neẽbʉrʉ, ¿kʼãrẽta oi? (1 Ped. 4:3). Mawũã ẽ bʉrʉ bʉ piesta eda wãbʉ kʼarea ãba yi jʉrebarieda wãbʉta aduaibarabʉrʉ, mawũã ẽ bʉrʉ jaradia wã ẽ bʉrʉ, bʉa kʼawuabʉ saʉ̃ta audre bigata. Bʉa naʉ̃ ʉ̃rʉ krĩchabʉrʉde kʼawuadogo kʼãrẽta oseabʉta. Mamina bʉa bʉyibitabaiba kʼawuadogo maʉ̃ra, waya ¿kʼãrẽta krĩchabʉ Jeowaba maʉ̃ ʉ̃rʉra? (Prov. 2:6).

KʼAWUARA JEOWABA SÃWŨÃ KRĨCHABɄ Ʉ̃RɄ

6. Santiago 1:5ba jarabʉbara, ¿kʼãrẽa Jeowaʼa widibara kʼarebamarẽã?

⁶ Jeowaʼa widira kʼarebamarẽã bʉa kʼawuaita iya kʼãrẽta krĩchabʉta. Jeowabara jarabʉ dayirã jõmaʉ̃a buru biata diakĩrãne diaita. Maʉ̃ buru biaba kʼarebayi dayirãba nekʼãrẽ oita jidabʉrʉde jidaita nekʼãrẽ Jeowaʼa sobiabibʉta (akʉra Santiago 1:5).

7. ¿Sãwũã kʼawuaseabʉ bʉa Jeowaba kʼãrẽta krĩchabʉra? Yizata jara ũrĩbira.

⁷ Bʉ yiwidʼida tẽãra bʉara kĩrãkita ũrĩbara Jeowaba kʼãrẽta jarabʉta bʉaʼa. Maʉ̃ ʉ̃rʉ bia ũrĩnaita krĩchadaya naʉ̃ ʉ̃rʉ. Bʉta ode wãta pasiade, mamina ode aduayi bʉra. Maʉ̃nera bʉara ẽbẽrarã ara mama bʉra widiyi kʼãrẽta oseabʉta, widiyi saʉ̃ ode wãita. Mamina bʉa widida tẽãra bʉra tẽĩtoto ẽ bayi awuarabʉrʉ bʉara kĩrãkita ũrĩñi maʉ̃ ẽbẽraba bʉaʼa kʼãrẽta jaraita. Maʉ̃ kĩrãkʼabʉ dayirãta Jeowaʉ̃me. Dayirã yiwidʼida tẽãra kʼawuaibara Jeowaba kʼãrẽta jarasita, kʼãrẽta panʉsita. Maʉ̃itara nesidapanʉ Daizeze Bedʼeade akʉita wãrĩnuara Daizeze Bedʼeadebemata. Akʉseabʉ dayirãba kʼãrẽ oita krĩchabʉ ʉ̃rʉ. Bari jaraita, krĩchadaya piesta ʉ̃rʉ dayirãba nãã jaradata, dayirãta maʉ̃ piesta eda wãita jidaidera jʉrʉseabʉ Daizeze Bedʼeade piesta jʉra kʼawua akʉ ẽã ʉ̃rʉ bedʼeabʉta akʉza neũdukʼawua zeri ẽã ʉ̃rʉ bedʼeabʉta akʉza Daizeze Nokʼo nãã bʉei ʉ̃rʉ bedʼeabʉta (Mat. 6:33; Rom. 13:13; 1 Cor. 15:33).

8. Bʉa kʼãrẽ oita krĩchabʉ ʉ̃rʉ audre jʉrʉkĩrãbʉbʉrʉ, ¿kʼãrẽba kʼarebaseabʉ? (Akʉra potota).

⁸ Edaʉde bʉa nesidabʉbaibara kʼaiba kʼarebaita bʉa kʼãrẽta krĩchabʉ ʉ̃rʉ bedʼeabʉta ũduita. Bʉara kʼareba widiseabʉ mebẽrã Daizeze Bedʼeadebema sãwũã oita bia kʼawuabʉa, ãya ũrãgʼamarẽã akʉza jaradiamarẽã mamina jipade yibia bayi bʉa bʉyikʉzaʉba jʉrʉita bʉa kʼãrẽ oita krĩchabʉ ʉ̃rʉ. ¿Sãwũã oseabʉ maʉ̃ra? Dayirã organizasionba mejãcha diabʉ nekʼãrẽ Daizezedebemata dayirãba audre jʉrʉ kʼawuadamarẽã. Bari jaraita, jʉrʉseabʉ Guía de estudio para los testigos de Jehová abʉmae. Akʉza Textos bíblicos para la vida cristiana abʉmae. Akʉza audrera kĩrãduarãra bʉara nekʼãrẽ oita jidabʉrʉdera jidakĩrãbʉta nekʼãrẽ Jeowaʼa sobiabibʉta.

9. ¿Sãwũã kʼawuapanʉ dayirãba jidabʉrʉra Jeowaba kãgaita? (Efesios 5:17).

⁹ Mamina bʉara, ¿sãwũã kʼawuai bʉa nekʼãrẽ oita jidabʉrʉdera maʉ̃ra Jeowaba kãgabʉde jidasita? Maʉ̃itara yibia bayi bʉa Jeowata ũdukʼawuaita. Proverbios 9:10ba jarabʉ «Jeowaʼa wawia ũdubibʉdeba zebʉ buru biara». Naʉ̃ba jarakĩrãbʉ dayirãba biʼia ũrĩ kʼawuabaira akʉza kʼawuabaibarata Jeowaba kʼãrẽ nebiata erbʉta iyi sode, iya kʼãrẽta oita krĩchabʉta akʉza iya kʼãrẽta kãgata, mawũã ẽ bʉrʉ kʼãrẽta jʉrata. Bʉara mawũã jõma kʼawuada tẽã, bʉyikʉza krĩchaseabʉ, mʉ̃ara kʼawuabʉ Jeowa sãwũã krĩchabʉra, maʉ̃ba atiara ¿kʼãrẽta oita jidayi mawũã iyi sobiabita? (akʉra Efesios 5:17).

10. ¿Kʼãrẽa audre yibia wãrĩnu Daizeze Bedʼeadebemaba jarabʉta oita dayirã kulturadebemaraba jarabʉ oi kaude?

¹⁰ Edaʉde dayirãba nekʼãrẽ oita jidabʉrʉdera maʉ̃bara Jeowata sobiabibʉ, mamina dayirã mebẽrãra sobiabi ẽ. Krĩchadaya naʉ̃ ʉ̃rʉ. Yibariraba kãgapanʉ ãyi kauta juwa jidamarẽã yumakẽrã plata erbʉme, mawũã ẽ bʉrʉ ãyaʼa dote biata diaseabʉme, maʉ̃ yumakẽrã Jeowa ode bia bʉ ẽ mina. Maʉ̃nera yibia bayi yuwẽrãba iyikʉza krĩchaita: ¿Naʉ̃ yumakẽrãbara kʼarebaseabʉka mʉ̃ra Jeowaʉ̃me bia bʼaita? Naʉ̃ yuwẽrãba Jeowaba kʼãrẽta krĩchabʉ kʼawuaira akʉibara Mateo 6:33ba jarabʉta, nama jarabʉ Jeowa ode panʉrabara jõmaʉ̃ba nããra bʉeibarata Jeowa Nokʼota. Wãrĩnubaira, dayirã jõmaʉ̃ba kãga akʉza wawiapanʉ dayirã yibarirãra akʉza ẽbẽra komunidadebemarasida wawia ũdubipanʉ. Mamina dayirãitara audre yibia Jeowata sobiabita.

BɄA OITA KRĨCHABɄDEBEMARA ¿SAɄ̃TA AUDRE YIBIA?

11. Filipenses 1:​9, 10ba jarabʉdebara, ¿kʼãrẽba kʼarebaseabʉ bʉa kʼawuaita bʉita saʉ̃ta audre yibiata?

¹¹ Bʉa wãrĩnu Daizeze Bedʼeadebemaba kʼãrẽ jarabʉ ʉ̃rʉ kʼawuada tẽãra yibia bayi akʉita bʉa nekʼãrẽ oita krĩchabʉdebemara saʉ̃ta audre yibiata (akʉra Filipenses 1:​9, 10). Mamina, ¿sãwũã kʼawuai bʉa maʉ̃ra? Maʉ̃itara yibia kʼawuabaita saʉ̃ta bigata akʉza saʉ̃ta zeri ẽãta, ¿kʼãrẽa? Naʉ̃ba kʼarebayi nekʼãrẽ oita jidabʉrʉde krĩchaita mʉ̃a naʉ̃ta ora kʼãrẽta berabariseabʉta. Edaʉde nekʼãrẽ oita jidaidera daya aukʼara krĩchaira nesida ẽ, ʉ̃kʉrʉra dajada jarachu baera kʼãrẽta oseabʉta. Mamina edaʉde bʉ nekʼãrẽ oita jidabʉrʉde bia krĩchaibarata, dajada jara ẽ baera saʉ̃ta oibarata. ¿Maʉ̃nera kʼãrẽta oita yibia? Daya dayi krĩcha bia zokʼa kʼawuaita, maʉ̃nera yibia bayi krĩchaita saʉ̃ta biga akʉza saʉ̃ta zeri ẽãta. Naʉ̃ba kʼarebayi bia jida kʼawuaita.

12, 13. Saʉ̃ta bigabʉta akʉza saʉ̃ta zeri ẽã kʼawuaiba, ¿sãwũã kʼarebai trajo bʉita bigabʉta ũduita?

¹² Krĩchadaya naʉ̃ ʉ̃rʉ. Bʉa trajota jʉrʉnʉmʉta bʉ mebẽrã akʉita ãya nesidabʉ diaita. Maʉ̃ne bʉa ũduyi trajo ũme. Aramaʉ̃ta bʉa krĩchayi maʉ̃ra trajo ʉ̃rʉ saʉ̃ta audre bigata, maʉ̃ kʼarea akʉyi yi ewarita akʉza kʼãrẽãba jĩgachubʉta bʉ dedaʉba. Mamina maʉ̃ra trajodebemara mia abaʉta kayirua ẽ, ãyi ũmena biga bʉ Jeowa ode bʉba oita. Adewara maʉ̃ra trajodebema aba bʉa audre okĩrãbʉbaibara, audre pagapanʉ baera mawũã ẽ bʉrʉ bʉa okĩrãta oi baera maʉ̃ trajode. Yibia maʉ̃ra ʉ̃rʉ krĩchaira, mamina bʉ nekʼãrẽ awuru ʉ̃rʉ audre bia krĩchaibarata.

¹³ Wãrĩnubaira, maʉ̃ra trajodebema abaʉba iduaribi ẽ bayi bʉ badua wãmarẽã ãba yi jʉrebari eda, mawũã ẽ bʉrʉ bʉra ewari neẽ baseabʉ bʉ mebẽrã akʉita akʉza kʼarebaita ãyi aduʼa panamarẽã, sobia panamarẽã akʉza audre Jeowa kʼawa panamarẽã. Maʉ̃ba yibia bayi bʉa nããra bʉeita yi audre yibiata. ¿Saʉ̃ maʉ̃ra? Bʉ Jeowa neũdukʼawua bia bʼaita akʉza bʉ mebẽrã kʼarebaita, bʉa mawũã ora jidayi nekʼãrẽ Jeowaʼa sobiabibʉta.

14. Saʉ̃ta bigata akʉza saʉ̃ta zeri ẽã kʼawuaiba akʉza kãgaba, ¿sãwũã kʼarebai wuabemara baebi ẽ baita?

¹⁴ Saʉ̃ta biga akʉza saʉ̃ta zeri ẽã kʼawuaiba mejãchade kʼarebabʉ, krĩchaita wuabemara sãwũã sentibʉta daya nekʼãrẽ obʉdeba, mawũã ẽ bʉrʉ, krĩchaita baebi ẽ baita wuabemarata daya obʉdeba (Filip. 1:10). Bari jaradaita, dayi sãwũã wua jʉ̃bʉta akʉza yobʉta. Edaʉde dayi sãwũã wua jʉ̃bʉra dayima kʼãrẽ ẽ kĩrãkʼabʉ, mawũã ẽ bʉrʉ dayi yobʉsida. Mamina dayi yobʉba mawũã ẽ bʉrʉ dayi sãwũã wua jʉ̃bʉba wuabemarata kĩrʉbibʉbʉrʉ mawũã ẽ bʉrʉ aña krĩchabibʉbʉrʉ, biga ẽ bayi. Maʉ̃ba saʉ̃ta bigata akʉza saʉ̃ta zeri ẽãta kʼawuabʉba kʼarebayi bʉa wawia ũdubimarẽã mebẽrã kongregasionebemara akʉza wuabema ẽbẽrarã. Adewara bʉa ãyita kãga baera bʉyitrʉ krĩcha ẽ bayi awuarabʉrʉ nãã krĩchayi wuabemara sãwũã sentiseabʉta akʉza kʼawuayi sainʉ oseabʉta (1 Cor. 10:​23, 24, 32; 1 Tim. 2:​9, 10). Bʉa maʉ̃ne nekʼãrẽ oita jidabʉba ũdubibʉ wuabemara kãgata akʉza wawiabʉta.

15. Bʉa kʼãrẽ oita jidai nãã, ¿kʼãrẽ ʉ̃rʉ krĩchaibara?

¹⁵ Bʉa nekʼãrẽ oita jidabʉrʉdera krĩchaibara kʼãrẽta oibarata naʉ̃ jõma aribaeita. Jesúsba jarasi dayirãbara naena akʉibarata sõbe gastaita (Luc. 14:28). Maʉ̃itara bʉa akʉibara bʉ kʼãrẽãba ewari jʉrʉibarata, kʼãrẽãba zarea oibarata akʉza kʼãrẽãba plata gastaita bʉa oita krĩchabʉ jõma aribaeita. Adewara edaʉde biga bayi bʉ mebẽrã jara ũrĩbita kʼãrẽta oita krĩchabʉta akʉza ãyi aba abakaʉba kʼãrẽta oibarata mawũã jõma bia aribaeita. Mamina, ¿kʼãrẽa yibia maʉ̃ jõma oira? Naʉ̃ jõma oiba kʼarebayi bʉa akʉita nekʼãrẽ waidide ara oitabʉta, mawũã ẽ bʉrʉ nekʼãrẽ awuara oseabʉta bʉa krĩchabʉ aribaeita. Bʉa bʉ mebẽrã jarara naʉ̃ ʉ̃rʉ akʉza bʉa ũrĩra ãya kʼãrẽ jaraitabʉta naʉ̃ba kʼarebayi bʉa oita krĩchabʉta ãya kʼarebadamarẽã jõma aribaeita (Prov. 15:22).

KRĨCHA BIA JIDARA MAWŨÃ BIA WÃITA

16. ¿Kʼãrẽba kʼarebai nekʼãrẽ oita jidabʉrʉde Jeowaba kãgabʉde oita? (Akʉra rekuadro «Sãwũã krĩcha bia jida kʼawuaita»).

¹⁶ Bʉa atia ũrãgʼa kʼawuadata jõma osibʉrʉ, mawũãra jidaseabʉ nekʼãrẽ Jeowaʼa sobiabiseabʉta bʉa nekʼãrẽ oita krĩchabʉ ʉ̃rʉ jõma jʉrʉsi baera mawũã bia kʼawuaita. Adewara Daizeze Bedʼeadebemane akʉsi mawũã kʼawuaita Jeowaita kʼãrẽta audre yibiata. Bʉa naʉ̃ta jõma osibʉrʉ, waya atiara widiseabʉ Jeowaʼa kʼarebamarẽã bʉa oita krĩchabʉ jõma aribaeita.

17. ¿Kʼãrẽta oibara krĩcha bia jidaita?

¹⁷ Edaʉde berabariseabʉ daya nawedaʉba nekʼãrẽ oita jidabʉrʉde jõma bia obʉta, maʉ̃ba krĩchaseabʉ Jeowa kʼareba jʉrʉira nesida ẽãta akʉza krĩchaseabʉ bʉta burubia baera mawũã biʼia osita, mawũã ẽ bʉrʉ bʉa maʉ̃ta ozebʉrʉta dããraba baera ewariza audre bia obʉta. Mamina jipade yibia dayirãba Jeowa kʼarebata jʉrʉita nekʼãrẽ oita jidai nãã, Jeowabʉrʉ kʼarebaseabʉ baera dayirãba bia oita. ¿Sãwũã kʼarebabʉ iya? Iya dayirã diabʉ iyi ʉ̃rʉ kʼawuaita, kʼarebabʉ ũrĩ kʼawuabamarẽã akʉza kʼawuabamarẽã saʉ̃ta bigata akʉza saʉ̃ta zeri ẽãta (Prov. 2:​1-5). Maʉ̃ba dayirãba Jeowa kʼarebata jʉrʉpanʉbʉrʉ iya kʼarebayi dayirãba nekʼãrẽ oita jidabʉrʉde iya kãgabʉde jidaita (Sal. 23:​2, 3).