Jesús dayirã kʼarea beidaba ¿kʼãrẽta jaradiabʉ?

1. ¿Kʼãrẽa yibia poagaza Jesús beida jẽda kĩrãbeira?

WÃRĨNUBAIRA Jesústa dayirã kʼarea kʼãwũã beidara jipade nebia zroma, dayirãʼa nebia bari diadapeada (2 Cor. 9:15). Jesústa dayirã kʼarea beisi baera dayirãra atiara Jeowa neũdukʼawua baseapanʉ, iyi kʼawa baseapanʉ. Akʉza dayirãba jʉ̃ãpanʉ ewari jõmaʉ̃nẽ panaita. Dayirãbara nekʼãrẽ mejãcha kʼarea biga diaseapanʉ Jeowaʼa iyara yi Warrata diasi baera dayirãta mejãcha kãgabʉ baera (Rom. 5:8). Mamina maʉ̃ta kĩrãdua ẽ baita Jesúsba jara amaesi poagaza kĩrãbeibarata iyi beida ewarita (Luc. 22:​19, 20).

2. ¿Kʼãrẽta kʼawuadai naʉ̃ artikulode?

² Naʉ̃ poagadera Jesús beidara jẽda kĩrãbedayi sabado 12 abril 2025de. Wãrĩnubaira naʉ̃ ewaridera jõmaʉ̃ba nekʼãrẽ okĩrãpanʉ wãita mama. Jipade yibia bayi maʉ̃ ewari zei nãã dayirã jõmaʉ̃ba ewari jʉrʉdaita krĩchaitaa Jeowaba kʼãrẽta ozebʉrʉta akʉza Jesúsba kʼãrẽta ozebʉrʉta dayirãbari. Mamina bari maʉ̃ awa oibara ẽ maʉ̃ berabarida tẽãbida jipade yibia maʉ̃ ʉ̃rʉ krĩchaira. Naʉ̃ artikulode kʼawuadayi Jesús dayirã kʼarea beidadeba kʼãrẽta kʼawuapanʉta Jeowa ʉ̃rʉ akʉza yi warra Jesús ʉ̃rʉ. Yi wuarebema artikulode kʼawuadayi kʼãrẽ nebiata ũdupanʉta Jesústa dayirã kʼarea beisi baera akʉza sãwũã biga diaseapanʉta ãya oda bari.

JESÚS DAYIRÃBARI BEIDABA KʼÃRẼTA JARADIABɄ JEOWA Ʉ̃RɄ

3. ¿Ẽbẽra aba beidadeba sãwũã ẽdrʉseabasi ẽbẽra mejãchaʉta? (Akʉra potota).

³ Jesús dayirãbari beidaba dayirãʼa jaradiabʉ Jeowabara jõma daucha okĩrãta (Deut. 32:4). ¿Sãwũã kʼawuapanʉ dayirãbara maʉ̃ra? Adán Evaʉ̃me nemitia osidera dayirã jõmaʉ̃ta nemitia omiata babisi (Rom. 5:12). Maʉ̃nera Jeowabara ¿kʼãrẽta osi? Iya dayirã diasi yi Warrata dayirãbari beimarẽã mawũã ẽdrʉita nemitiadeba. Mamina daya krĩchaseabʉ sãwũã ẽbẽra aba nemitia oka beidadeba ẽbẽrarã mejãchaʉta ẽdrʉbi maʉ̃ nemitiadebara. Pabloba naʉ̃ta jarasi: «Yumakẽrã abaʉba ũrĩ ẽ basi baera ẽbẽra jõmaʉ̃ta nekayirua omia, maʉ̃ kĩrãkʼa yumakẽrã abaʉba ũrĩsi baera jõmaʉ̃ta ẽbẽra biabayi» (Rom. 5:19; 1 Tim. 2:6). Naʉ̃ba jarakĩrãbʉ Adánʼneba jõmaʉ̃ta nemitia omiabasi baera, abarika Jesúsdeba jõmaʉ̃ta ẽdrʉseabʉ nemitiadeba.

4. ¿Jeowabara kʼãrẽa iduaribi ẽ basi Adán wũãwũãra kʼẽrẽpa panʉrãra ewari jõmaʉ̃nẽ panamarẽã?

⁴ ¿Jeowabara yi Warrara dayirãbari beimarẽã zokʼaibarabasika? ¿Kʼãrẽa iduaribi ẽ basi Jeowabara Adánʼneba zeda wũãwũã kʼẽrẽpa panʉrãra bei ẽ panamarẽã? Mawũã krĩchaira dayirã beibari mara biga kĩrãkʼabʉ akʉza maʉ̃ba ara odogo kĩrãkʼabʉ, mamina Jeowaitara mawũã ẽ iyara jõma daucha obʉ baera. Maʉ̃ba Adánta ariwia ewari jõmaʉ̃nẽ baseabasibʉrʉ dayima kayirua okabada kĩrãkʼa bakasi akʉza yi wũãwũãrasida kayirua okabada kĩrãkʼa panakasi. Mamina dayirãbara kʼawuapanʉ maʉ̃ra mawũã ẽãta.

5. ¿Kʼãrẽa kʼawuapanʉ Jeowabara ewari jõmaʉ̃nẽ jõma daucha oita?

⁵ Jeowaba dayirã yi Warrata dia ẽ basibʉrʉ akʉza iduaribisibʉrʉ Adánʼneba zedara kʼẽrẽpa panʉrata ewari jõmaʉ̃nẽ panamarẽã naʉ̃ drʉade mawũãra ũdubikasi iyara nekʼãrẽ jõma daucha obʉ ẽãta. Maʉ̃nera, ¿kʼãrẽta berabarikasi? Ẽbẽrarãba krĩchaseabakasi tẽã Jeowaba nekʼãrẽ oya abʉrʉdera aripe oẽ baita iya naena ũdubi ẽ basi baera daucha obʉta. Bari jaraita, Jeowaba jarabʉ nebiata diaita, maʉ̃nera krĩchaseapanakasi maʉ̃ra dia ẽ baita, mawũã ẽ bʉrʉ aripe oẽ baita. Mamina dayirãbara kʼawuapanʉ Jeowabara jõma daucha obʉta, iya nekʼãrẽ jõma osi baera daucha oita yi Warra iya audre kãgata diaibarabasimina.

6. ¿Akʉza kʼãrẽa zokʼasi Jeowaba yi warrara dayirãbari beimarẽã? (1 Juan 4:​9, 10).

⁶ Jesús dayirãbari beidaba ũdubibʉ Jeowaba nekʼãrẽ jõma daucha obʉta. Mamina bari maʉ̃ awa ũdubi ẽ, ũdubibʉ Jeowabara dayirãra mejãcha kãgata (Juan 3:16; akʉra 1 Juan 4:​9, 10). Jesús dayirãbari beimarẽã zokʼasidera Jeowabara bari kãgaba ẽ basi dayirãra ewari jõmaʉ̃nẽ panamarẽã, awuarabʉrʉ iya kãgabʉ dayirãra iyi mebẽrãne eda panamarẽã. Jeowaba Adán parãsidera Jeowa mebẽrãnebema basi, mamina iya nemitia oside ãĩ wãbʉrʉ kĩrãkʼasi maʉ̃ mebẽrãneba. Maʉ̃ba dayirã jõmaʉ̃ta Jeowa mebẽrãneba jãpe panʉ, mamina Jesústa dayirãbari beisi baera aranʉbai dayirãsida jẽda Jeowa mebẽrãne eda baseapanʉ. Mawũãsidu idi ewadebida Jeowabara iyi ode kʼẽrẽpabʉra akʉza iya jarabʉdebʉra bia akʉbʉ iya nemitia obʉrʉdera kĩrãduabʉ maʉ̃ nemitiara. Maʉ̃ba dayirãra atiara jõmaʉ̃ta Jeowaʉ̃me bia baseapanʉ akʉza dayirã mebẽrãbawarabida. Naʉ̃ba ũdubibʉ Jeowaba dayirãra kʼãrẽãba kãgata (Rom. 5:​10, 11).

7. Jesúsʼra dayirã ẽdrʉbita mejãcha zʉbʉria kʼãrãpe beisi, ¿kʼãrẽta jaradiabʉ naʉ̃ba Jeowaba dayirã sãwũã kãgabʉ ʉ̃rʉ?

⁷ Jeowaba dayirã kʼãrẽãba kãgabʉta kʼawuaira biga bayi krĩchaita iya kʼãrẽta osita dayirãbari akʉza iyi kʼãrẽ puade berabarisita. Yi Warrata diasi dayirãbari beimarẽã, naʉ̃ra jipade zare basi. Diaruba jarabʉ mia abaʉ ẽbẽrata Jeoware kʼẽrẽpa babe ẽãta bedʼea zroma ũdubʉrʉ. Mamina Jeowaba kʼãrẽta osi ũdubita Diaruba jaradara sewida basita. Iya zokʼasi yi Warrata zʉbʉria kʼãrãpe beimarẽã nama egorode (Job 2:​1-5; 1 Ped. 2:21). Jesús iyi nejʉraraba zʉbʉria osidadera akʉza iyi kʼarea ipidasidadera akʉza iyi bakurude ʉ̃tʉ jirabʉsidadera Jeowabara jõma ũdusi maʉ̃ra. Mamina bari maʉ̃ awa ũdu ẽ basi, ũdusi sãwũã zʉbʉria beasidasidata (Mat. 27:​28-31, 39). Maʉ̃nera Jeowabara Jesúsʼra ẽdrʉbiseabasi Jeowara zarea barabʉ baera. ¿Sõbeda oseabasi Jeowabara maʉ̃ta? Ẽbẽrarãba jarasidade «Daizezeba kãgabʉbʉrʉ kʼarebayi». Maʉ̃nera Jeowabara iyi zareata zokʼaseabasi Jesús ẽdrʉbita (Mat. 27:​42, 43). Mamina Jeowaba Jesústa maʉ̃ zʉbʉriadeba ẽdrʉbisibʉrʉ atiara ẽbẽrarãba jʉ̃ãpana ẽ bakasi ʉ̃ra zeide nebia jʉ̃ãpanʉra akʉza Jesúsʼra bei ẽ bakasi dayirã nemitia kʼarea. Maʉ̃ kʼarea Jeowaba iduaribisi yi Warrara zʉbʉria kʼãrãpe beimarẽã.

8. ¿Sãwũã kʼawuapanʉ Jeowara mejãcha sopʉasita yi warra zʉbʉriabipanʉ ũdusidera? (Akʉra potota).

⁸ Mamina dayirãbara krĩchabeda ẽ Jeowaba yi Warra zʉbʉrianʉmʉ ũduside kʼareba ẽ basi baera iyira kãga neẽãta. Wãrĩnubaira Jeowaba dayirã parãsidera jarachu iyi kĩrãkʼa parãsita. Dayirãra edaʉde sopʉa sentipanʉ mawũã ẽ bʉrʉ sobiabʉ. Naʉ̃ba ũdubibʉ dayirãta Jeowaba iyi kĩrãkʼa parãsi baera iyisida edaʉde sopʉabarita. Adewara Daizeze Bedʼeade ũdubibʉ ʉ̃kʉrʉ ẽbẽrarãba Jeowara mejãcha sopʉabisidata (Sal. 78:​40, 41). Atia kʼawuadaya Abrahán ʉ̃rʉ, iyi sãwũã berabaridata. Jeowaba Abrahánʼa jarasi yi warrata sakripisiode diamarẽã (Gén. 22:​9-12; Heb. 11:​17-19). Jeowaba Abrahánʼa maʉ̃ jarasidera Abrahánʼra mejãcha krĩcha osibaibara, iya okĩrãbasi baera Jeowaba kãgabʉta mamina sopʉabasi yi warra kʼareabida. Maʉ̃ra Abrahánʼitara jipade zarea basibaibara. Naʉ̃neba biʼia kʼawuaseapanʉ Jeowa sãwũã sentisita yi Warra iya kãgata zʉbʉria osidade akʉza beasidade, maʉ̃nera mejãcha sopʉasibaibara Jeowara (Akʉra jw.org de bideo Iyide kĩrãkʼa ĩjãta erbara Abrahán, Yi 2).

9. Romanos 8:​32, 38, 39ba jarabʉdebara, ¿kʼãrẽta kʼawuapanʉ Jeowaba iyi odepanʉra kãga ũdubibʉ ʉ̃rʉ?

⁹ Jesús dayirã kʼarea beidaba ũdubibʉ Jeowaba dayirãra mejãcha kãgata. Jeowaba dayirã kãgabʉ kĩrãkʼara mia abaʉ ẽbẽraba kãga ẽ dayirãra, mia dayirã neũdukʼawua biaba mia dayirã mebẽrã daya audre kãgaba, kãga ze ẽ dayirãra Jeowaba kãgabʉ kĩrãkʼara (akʉra Romanos 8:​32, 38, 39). Mia dayikʉza mejãcha kãga ze ẽ Jeowaba dayirã kãgabʉ kĩrãkʼara, dayirãra ewari jõmaʉ̃nẽ bakĩrãpanʉ, mamina Jeowabara audre kãgabʉ dayirãra ewari jõmaʉ̃nẽ panamarẽã. Daya nemitia obʉrʉdera daya kãgabʉ Jeowaba kĩrãduamarẽã maʉ̃ta, mamina Jeowabara audre soiduba kĩraduakĩrãbʉ maʉ̃ra. Jeowaba dayirãʼa nekʼãrẽ mejãcha widi ẽ, iya dayirãʼa jarabʉ yi Warra dayirã kʼarea beida ʉ̃rʉ soiduba ĩjãnamarẽã akʉza iya jarabʉde odamarẽã. Jipade yibia kʼawuapanʉ baera Jesús dayirã kʼarea kʼãwũã beidaba Jeowaba dayirã kʼãrẽãba kãgata. Jipade yibia ẽjũã kĩrãwãreã zebʉrʉdera dayirãba audre kʼawuai baera Jeowaba dayirã kʼãrẽãba kãgabʉ ʉ̃rʉ (Ecl. 3:11).

JESÚS DAYIRÃ KʼAREA BEIDABA, ¿KʼÃRẼTA JARADIABɄ IYI Ʉ̃RɄ?

10. (1) ¿Jesúsʼra iyi bei nããra kʼãrẽ kʼãrẽa krĩcha obasi? (2) ¿Jesúsbara sãwũã ibia bedʼeabisi Jeowa trʉ̃ ʉ̃rʉ? (Akʉra rekuadro «Jesús kʼẽrẽpabʉba Jeowa trʉ̃ ʉ̃rʉ ibia bedʼeabisi»).

¹⁰ Jesúsʼitara audre yi biabasi yi Zeze trʉ̃ ʉ̃rʉ ibia bedʼeabita (Juan 14:31). Ẽbẽrarãba iyi ʉ̃rʉ sewidata jarasidera Jesúsʼra mejãcha krĩcha zroma obasi maʉ̃neba yi Zeze trʉ̃ ʉ̃rʉ imitia bedʼedai kʼarea, maʉ̃ kʼarea iya jarasi: «Mʉ̃ Zeze, bʉma bigabʉrʉ zʉbʉriabirãra» (Mat. 26:39). Mamina Jesúsba iyi beiyeda kʼẽrẽpabʉta ũdubisi baera naʉ̃ba kʼarebasi Jeowa trʉ̃ ʉ̃rʉ ibia bedʼeabita.

11. ¿Sãwũã ũdubisi Jesúsbara ẽbẽrarã mejãcha kãgata? (Juan 13:1).

¹¹ Jesús dayirã kʼarea beidaba jaradiabʉ iyara ẽbẽrarãra mejãcha kãgata akʉza ãyi ʉ̃rʉ wãrĩnu krĩchabʉta, mamina audre kãgata akʉza audre krĩchabʉta iyi kʼaidubemarata (Prov. 8:31; akʉra Juan 13:1). Wãrĩnubaira Jesúsbara biʼia kʼawuabasi iyira zʉbʉriade berabaribasita akʉza zʉbʉria beadaibasita, mawũãsidu iyara maʉ̃ra oẽ basi bari Jeowaba mawũã omarẽã zokʼasi baera, awuarabʉrʉ soiduba osi, iyi bebʉta diakĩrãne diasi, maʉ̃ta ũdubisi iya jaradiaside, ẽbẽrarã kʼarebaside soiduba osi baera adewara iyi bei ewaride Jesúsba iyi kʼaidubemara jĩrʉta zʉgʉsi adewara ãyaʼa so zarea diasi akʉza jaradiasi (Juan 13:​12-15). Mamina bari maʉ̃ awa ẽ, Jesús iyi ʉ̃tʉ bakurude kachi jirabaside iyi maʉ̃ pʉade nʉmasimina Jesúsba ẽbẽra kayirua iyi kʼawa jirabʉa jarasi nebiata ũduita adewara Juanʼa jarasi yi papata bia akʉmarẽã (Luc. 23:​42, 43; Juan 19:​26, 27). Jesúsba Daizeze Bedʼea jaradiabaside ũdubisi ẽbẽrarãta wãrĩnu mejãcha kãgata iya jõma soiduba osi baera, iya iyi bebʉsida diasi ẽbẽrarã kʼarea.

12. ¿Idi ewadera Jesúsbara sãwũã kʼarebabʉ dayirãra?

¹² Jesúsʼra dayirã bari beisi, mamina iyira maʉ̃ tẽãra wuara bei ẽ basi dayirã bari maʉ̃ra abapai osi akʉza maʉ̃neba wuara oẽ basi (Rom. 6:10). Mawũãsidu Jesúsbara atiara nekʼãrẽ mejãcha obʉ dayirã bari, atiara iyi zarea trajabʉ dayirãʼa nebiata mejãcha diaita, dayirãba maʉ̃ nebiara ũduseabʉ iyita dayirã bari beisi baera atiara, ¿kʼãrẽta obʉ Jesúsba? Iyira atiara Nokʼo, saserdote akʉza kongregasion buru (1 Cor. 15:25; Efes. 5:23; Heb. 2:17). Akʉza Jesúsbara ãba jʉredabʉ ʉ̃ta wãirata adewara ẽbẽrarã mejãchabʉra naʉ̃ egorode bʼairata b (Mat. 25:32; Mar. 13:27). Mamina atiara dayirãra naʉ̃ ewari jõbodoarepanʉ baera Jesúsba Zõrãrã Burubiadeba diabʉ nekʼãrẽ dayirãba nesidabʉta mawũã Jeowa ode kʼẽrẽpapanamarẽã (Mat. 24:45). Mamina maʉ̃ awa ẽ, ẽjũã kĩrãwãreã zebʉrʉdebida Jesúsba mil poaga bayeda zokʼabʉrʉdera iyara nekʼãrẽ biara mejãcha oyi dayirãbari. Naʉ̃ jõmaʉ̃ba ũdubibʉ Jeowabara Jesúsʼra zokʼa bʉe ẽ basita bari iyi bebʉta dayirãbari diamarẽã, awuarabʉrʉ zokʼabʉesi dayirã kʼarea nekʼãrẽ biata mejãcha omarẽã.

AUDRE KʼAWUA WÃRA

13. ¿Biʼia krĩchaiba sãwũã kʼarebabʉ audre kʼawuaita Jeowaba Jesúsʼʉ̃meba dayirã kãgabʉta?

¹³ Jeowaba akʉza Jesúsba kʼãrẽ obʉ ʉ̃rʉ bia krĩchaiba kʼarebayi kʼawuaita ãya dayirãta kʼãrẽãba kãgabʉta. Jesús beida jẽda kĩrãbepanʉ ewari zei nãã Jesús beida jẽda kĩrãbeita semana aba waebʉde leseabʉ ebangeliorata aba mawũã ẽ bʉrʉ ũme akʉza Jesús beida jẽda kĩrãbe berabarida tẽãbida leseabʉ, mamina kĩrãbera jõma Jesús ʉ̃rʉ kʼawuaira wãña jõma kʼawua ẽ baita awuarabʉrʉ wiña wiñane kʼawuaita bʉya audre kʼawuakĩrãbʉta, jʉrʉda audre kʼãrẽa kãgaibarata Jeowata Jesúsʼʉ̃me adewara bʉya kʼawuadata wuabemara jaradiara.

14. Salmo 119:97de jarabʉdera, ¿kʼãrẽta oseabʉ audre kʼawuaita dayirã ẽdrʉbibʉ ʉ̃rʉ akʉza wuabemara nekʼãrẽ ʉ̃rʉ? (Akʉra potota).

¹⁴ Jeowa odebʉta dããrababʉrʉ krĩchaseabʉ nekʼãrẽ wuara kʼawuaira neẽãta Daizeze Jeowaba aripe obʉ ʉ̃rʉ, kãga ũdubibʉ ʉ̃rʉ akʉza dayirã ẽdrʉbida ʉ̃rʉ, mamina wãrĩnubaira naʉ̃ ʉ̃rʉ kʼawuaira mejãchabʉ kʼãrẽba kʼarebaseabʉta. Akʉza dayirã kartarane ũdura testo aba daya bia ũrĩ ẽãta audre jʉrʉseabʉ bia kʼawuaita, tẽã nei ewarita krĩcha kiuibara dayirãba Jeowa akʉza Jesús ʉ̃rʉ kʼawuadata akʉza ãya dayirã mejãcha kãga ũdubibʉ ʉ̃rʉ (akʉra Salmo 119:97 akʉza nota).

15. ¿Kʼãrẽa audre jʉrʉibara Daizeze Bedʼeade nebia jarabʉ ʉ̃rʉ?

¹⁵ Bʉa Daizeze Bedʼea estudiabʉrʉde nekʼãrẽ awuru yiwidita kʼawua ẽ bʉ kʼarea mejãcha krĩcha zroma orara. Bari jaraita, naʉ̃ra ẽbẽra abaʉba oro jʉrʉbʉ kĩrãkʼabʉ. Iya oro jʉrʉbʉrʉdera waña oro ũdueda ẽ, maʉ̃ kʼarea ewari bio berabaribʉ zarea obʉ jʉrʉita, iya kʼawuabʉ baera oro zake wiñakiruta ũdubʉrʉbʉsida mejãcha bale baita, maʉ̃ kĩrãkʼa dayirãba Daizeze Bedʼea estudiabʉrʉde dayima nekʼãrẽ yiwidita ũdu ẽ bʉrʉ maʉ̃ kʼarea krĩcha orara, daya wiña kʼawuadara audre balebʉ baera oroira, maʉ̃ kʼarea idubʉrãra Daizeze Bedʼeade nekʼawuabʉra (Sal. 119:127; Prov. 8:10). Akʉza zarea ora nekʼãrẽ yiwidi kʼawuaita Daizeze Bedʼeadeba (Sal. 1:2).

16. ¿Dayirãbara sãwũã Jeowa akʉza Jesúsde kĩrãkʼa oseapanʉ?

¹⁶ Bʉa Daizeze Bedʼea estudiabʉeda krĩchara mama jõma kʼawua wãta sãwũã oũdubita. Bari jaraita, Jeowadeba kʼawuara sãwũã wuabemara jõmaʉ̃ta daucha edaita adewara Jesúsde kĩrãkʼa oseabʉ, Jesúsbara mejãcha kãgabʉta ũdubisi yi zezera akʉza wuabemara ẽbẽrarãta. Bʉabida iyide kĩrãkʼa oseabʉ, ¿sãwũã? Bʉ zarea obʉde mejãcha zʉbʉriaibaramina kʼẽrẽpa bʼaita, bʉ zarea obʉde wuabemara mebẽrã kʼarebaita akʉza ẽbẽrarã jaradiaita Jesúsʼra dayirã jõmaʉ̃bari beisita mawũã ãyabida ũdudamarẽã dayirãba nebia ũdubʉta.

17. ¿Kʼãrẽta kʼawuadai wuarebema artikulodera?

¹⁷ Dayirãba biʼia kʼawuabʉrʉde kʼãrẽa beisita Jesúsʼra maʉ̃ne audre kãga wãñi Jeowata Jesúsʼʉ̃me akʉza ãyabida dayirãta kãgayi (Juan 14:21; Sant. 4:8). Maʉ̃ba nekʼãrẽ jõma odadrʉ kʼawuaita kʼãrẽta jarakĩrãbʉta Jeowaba, Jeowabara dayirã nekʼãrẽ mejãcha diabʉ kʼãrẽ kʼawuaita iyi ʉ̃rʉ, maʉ̃ne edabʉ sãwũã audre kʼawuaita kʼãrẽa ẽdrʉbisita dayirãra, maʉ̃ba audre yibia bayi dayirãba maʉ̃ ʉ̃rʉ estudiadaita kʼãrẽ nebiata ũdubʉta Jesústa dayirã ʉ̃rʉ beida kʼarea akʉza dayirãba sãwũã biga diaita mawũã beida kʼarea.