¿Kʼãrẽ nebiata ũdupanʉ Jeowaba kãga ũdubibʉdeba?

1. ¿Sãwũã sobiabiseapanʉ Jeowara?

KRĨCHADAYA naʉ̃ta, dayirãba ẽbẽra mejãcha kãgabʉa nekʼãrẽ bari diapanʉta mamina, ¿sãwũã senti daya ũdura maʉ̃ ẽbẽraba daya diadara bari wuagasita? ¿Sopʉayi bʉmabida? Mamina maʉ̃ ẽbẽraba daya diadata biʼia wuaga erbʉbʉrʉ akʉza bia akʉbʉbʉrʉ dayirã mejãcha sobiayi, abarika berabaribʉ Jeowaʉ̃me. Jeowaba yi Warra iya audre kãgata diasi dayirã bari beimarẽã, dayirãba maʉ̃ kʼarea biga diabʉta ũdubidara akʉza iya dayirã kãga ũdubibʉ ʉ̃rʉ biga diabʉta ũdubidara Jeowara mejãcha sobiayi (Juan 3:16; Rom. 5:​7, 8).

2. ¿Kʼãrẽta akʉdai naʉ̃ artikulodera?

² Dayirãba nããra kʼawuaside Jesúsba akʉza Jeowaba dayirã kʼarea kʼãrẽ oda ʉ̃rʉ maʉ̃nera mejãchade biga diakĩrãpanasi, mamina ewari berabari wãne daya maʉ̃ra kĩrãdua wãseabʉ, idubʉseabʉ mawũã biga diabʉta. Dayima nekʼãrẽ bari diadapeadata miõba ũdu ẽ mae merai kĩrãkʼabʉ, mawũã berabari ẽ marẽã dayirãbara badua kĩrãbedaibara Jeowaba akʉza Jesúsba dayirã kʼarea kʼãrẽ oda ʉ̃rʉ mawũã ãyaʼa biga diaita. Naʉ̃ artikuloba kʼarebayi dayirãba maʉ̃ta oita, kʼawuadayi kʼãrẽ nebiata ũdupanʉta dayirãba atia akʉza kʼãrẽ nebiata ũdudaita ʉ̃ra zeide Jesústa dayirã kʼarea beisi baera adewara kʼawuadayi dayirãba sãwũã biga diaseabʉta Jeowaʼa iya dayirãʼa kãga ũdubibʉ kʼarea, maʉ̃ta audre oseapanʉ Jesús beida jẽda kĩrãbebʉrʉ ewari zebʉrʉde.

¿KʼÃRẼ NEBIATA ŨDUPANɄ ATIARA?

3. ¿Atiara kʼãrẽ nebiata ũdupanʉ Jesús dayirã kʼarea beidadeba?

³ Jesús dayirã kʼarea beidadeba nebiata ũdupanʉ atiabida, ¿saʉ̃ maʉ̃ra? Atiara Jeowabara dayirã nemitiara kĩrãduabʉ mamina iya maʉ̃ nemitiara kĩrãduabʉ wãrĩnu kĩrãduakĩrãbʉ baera, soiduba okĩrãbʉ baera ajuerzade oẽ. Salmistaba naʉ̃ta jarasi Jeowa biga diaita «Jeowa bʉra kʼãrẽ ẽbẽra bia akʉza kĩrãduabʉ dai kayiruara» (Sal. 86:5; 103:​3, 10-13).

4. ¿Kʼãĩra kʼarea beimarẽã zokʼasi Jeowabara yi Warrara? (Lucas 5:32; 1 Timoteo 1:15).

⁴ Dayirãnebema ʉ̃kʉrʉba krĩchabʉ Jeowabara dayirã nemitiara kʼãrẽa kĩrãduaira neẽãta, wãrĩnubaira Jeowabara ne ẽ dayirã nemitia kʼarea kĩrãduaira. Apostol Pabloba jarasi iyira kʼãrẽ kʼarea apostol trʉ̃gadaira neẽ basita, awuarabʉrʉ Jeowaba iyita so zʉbʉria akʉsi baera mawũãbʉta iyira (1 Cor. 15:​9, 10). Dayirãba nemitia obʉrʉde maʉ̃ kʼarea jẽda krĩchabʉrʉdera Jeowabara kĩrãduabʉ dayirã nemitiara mamina, ¿kʼãrẽa kĩrãduabʉ Jeowabara? Iyara dayirã nemitiara kĩrãduabʉ dayirãta mejãcha kãgabʉ baera, iyara mawũã obʉ ẽ iya mawũã oibara baera, maʉ̃ba bʉta bʉa nemitia oda kʼarea krĩcha obʉbʉrʉ akʉza krĩchabʉbʉrʉ Jeowaba kĩrãdua ẽãta kĩrãbera Jeowabara yi Warrata diasita dayirã bari beita akʉza kĩrãbeibara Jeowabara yi Warrara beibisita ẽbẽrarã nemitia opanʉra kʼarea, maʉ̃rata jẽda krĩchadara kĩrãduayi iyara (akʉra Lucas 5:32; 1 Timoteo 1:15).

5. ¿Kʼãrẽa mia abaʉba jarabe ẽ Jeowabara iyi nemitiara kĩrãduaibarata? Jara ũrĩbira.

⁵ Jeowabara dayirã iyi ode kʼẽrẽpabʉra bia akʉbʉ, naʉ̃ba iyita sobiabibʉ (Heb. 6:10). Mamina dayirã Jeowa ode kʼẽrẽpabʉta dããrababa jarakĩrãkʉ ẽ Jeowabara dayirãba nemitia obʉrʉdera maʉ̃ra kĩrãduaibarata, wãrĩnubaira Jeowabara yi Warrara dayirãra diasi diakĩrãbʉ baera dayirãta kãga baera, mawũã dia ẽ basi maʉ̃ nebiara dayirãba iyi kʼarea nebia obʉrʉta pagaita, dayirãba krĩchadara dayirã Jeowa ode kʼẽrẽpabʉ kʼarea Jeowabara bia akʉibarata mawũãra jarabʉ kĩrãkʼa bayi nesida ẽ basita Jesús dayirã kʼarea beita (naʉ̃ testoʉ̃me akʉra Gálatas 2:21).

6. ¿Pablora kʼãrẽa zarea obasi Jeowaita trajaita?

⁶ Pablobara kʼawuabasi iya Jeowa kʼarea nekʼãrẽ bia mejãcha obʉmina akʉza iyi zarea obʉmina Jeowabara kʼãrẽa iyi nemitiara maʉ̃neba kĩrãduaira neẽ basita (Efes. 3:7). Pablora zarea trajabasi Jeowaita, biga diakĩrãbasi baera Jeowaba iyita bia akʉbʉ kʼarea akʉza zʉbʉria akʉbʉ kʼarea. Abarika dayirãsida Jeowaita zarea trajaibara mamina dayirãbara maʉ̃ra oẽ baibara dayirãba biata obʉ kʼarea Jeowaba kĩrãduamarẽã dayi nemitiata, awuarabʉrʉ oibara biga diakĩrãpanʉ baera iya dayirãta so zʉbʉria akʉbʉ bari.

7. ¿Adewara kʼãrẽ nebiata ũdupanʉ Jesús dayirã kʼarea beidadeba? (Romanos 5:1; Santiago 2:23).

⁷ Dayirãbara awuru nebiata ũdupanʉ Jesús dayirã kʼarea beidadeba, ¿saʉ̃ maʉ̃ra? Dayirã jõmaʉ̃ta Jeowa neũdukʼawua bia baseabʉ.a Yi nããbema artikulode dayirãba jarasida dayirã tobʉdadera Daizeze neũdukʼawua ba toda ẽ basita, Jesús dayirã kʼarea beisi baera dayirãra Jeowaʉ̃me aduʼa baseapanʉ akʉza iyi kʼawa baseapanʉ (akʉra Romanos 5:1; Santiago 2:23).

8. ¿Kʼãrẽa biga diadaibara Jeowaʼa iya yiwidʼimarẽã iduaribibʉ baera?

⁸ Dayirãbara awuru nebiata ũdupanʉ yiwidʼibʉdeba. Jeowabara dayirã aba abakaʉ bedʼeata ũrĩbʉ, iyara bari ũrĩbʉ ẽ ãba yi jʉrebari mae yiwidʼibʉrʉ bedʼeatrʉ. Wãrĩnubaira dayirã yiwidʼibʉba kʼarebabʉ dayirã so aduʼa bʼaita, dayirã krĩchasida aduʼa bʼaita, mamina bari maʉ̃ne kʼareba ẽ, kʼarebabʉ dayirãra audre Jeowa neũdukʼawua bia bʼaita (Sal. 65:2; Sant. 4:8; 1 Juan 5:14). Jesús nama egorode basidera Jeowaʼa badua yiwidʼibasi, ¿kʼãrẽa? Jesúsbara kʼawuabasi yi Zezebara iyi bedʼeara badua ũrĩbʉta akʉza kʼawuabasi iyi yiwidʼibʉdeba audre Jeowa neũdukʼawua bia baseabʉta (Luc. 5:16). Jipade biga diapanʉ Jeowaʼa kʼãwũã yi Warra dayirã bari beidadeba iyi neũdukʼawua babibʉ baera akʉza iyaʼa yiwidʼibibʉ baera.

¿KÃRẼ NEBIATA ŨDUDAI Ʉ̃RA ZEIDE?

9. ¿Aranʉbai kʼãrẽ nebiata ũdudai Jeowa ode kʼẽrẽpapanʉrabara?

⁹ Ẽbẽrarã Jeowa ode kʼẽrẽpapanʉrabara, ¿kʼãrẽ nebiata ũdudai aranʉ bʼai Jesúsʼra ãyi kʼarea beisi baera? Jõmaʉ̃ta ewari jõmaʉ̃nẽ panañi. Mejãchaita zareabʉ naʉ̃ bedʼea ĩjãira, dayirãba audrera ũdu zebʉda baera ẽbẽrarã bei zebʉrʉta ũdudaka ewari jõmaʉ̃nẽ bʉra, mamina Jeowabara dayirãra parãsi ewari jõmaʉ̃nẽ panamarẽã, dayirãitara zareabʉ ĩjãita mawũã ewari jõmaʉ̃nẽ bʼaira, mamina ĩjãseapanʉ Jeowaba miõba okata osi baera, ¿saʉ̃ta? Yi Warra iya audre kãgata diasi dayirãbari, maʉ̃neba dayirãba ũduseabʉ ewari jõmaʉ̃nẽ bʼaira (Rom. 8:32).

10. ¿Kʼãrẽta sobiade jʉ̃ãpanʉ ʉ̃ta wãiraba akʉza nama egorode bʼairaba?

¹⁰ Dayirãbara jʉ̃ãpanʉ ẽjũã kĩrãwãreãnẽ ewari jõmaʉ̃nẽ bʼaita, maʉ̃ ewari zeyedara Jeowaba kãgabʉ kʼãwũãena mamabʉ kĩrãkʼa krĩchadamarẽã. Ʉ̃ta wãirabara sobiade jʉ̃ãpanʉ ãyi ʉ̃tʉ piradrʉita akʉza Jesúsbawaraʉba zokʼa jʉ̃drʉita (Apoc. 20:6). Nama egorode bʼairabara sobiade jʉ̃ãpanʉ ẽjũã kĩrãwãreãnẽ bʼaita pʉa neẽ mae, kʼãrẽ zʉbʉria neẽ mae (Apoc. 21:​3, 4). Bʉa nama egorode bʼaita jʉ̃ãbʉbʉrʉ kĩrãbera nama egorode jẽda piradrʉisida jipade yibiata, bari ʉ̃tʉ piradrʉitrʉ yibia ẽãta, ¿kʼãrẽa? Jeowaba dayirã parãsidera parãsi baera ewari jõmaʉ̃nẽ panamarẽã nama egorode, maʉ̃ba dayirãta ewari jõmaʉ̃nẽ bʼaibʉrʉ mejãchade sobiapanañi.

11, 12. ¿Ẽjũã kĩrãwãreã zebʉrʉdera kʼãrẽ nebiata jʉ̃ãpanʉ? (Akʉra potota).

¹¹ Jipade yibiabayi ẽjũã kĩrãwãreãnẽ panaita, kayata akʉza beita neẽbai baera (Is. 25:8; 33:24). Ẽjũã kĩrãwãreã zebʉrʉdera Jeowabara dayirãba oita krĩchabʉta obiyi, maʉ̃ba bʉyikʉza krĩchara kʼãrẽta okĩrãbʉta ẽjũã kĩrãwãreã zebʉrʉde, ¿nekʼãrẽ za kʼawuakĩrãbʉka? ¿Dibuja kʼawuakĩrãbʉka? Adewara ẽjũã kĩrãwãreãnẽra nesidayi ẽbẽrarã ne u kʼawuabʉrata, yiko okʼawuabʉrata, erramientara okʼawuabʉrata, de parã kʼawuabʉrata akʉza neponora u kʼawuabʉrata (Is. 35:1; 65:21). Ẽjũã kĩrãwãreã zebʉrʉdera bʉa ewari mejãcha erbayi bʉya kãga ʉ̃rʉ kʼawuaita.

¹² Ẽjũã kĩrãwãreã zebʉrʉdera dayirãbara ẽbẽrarã beida jẽda piradrʉbʉrʉra bia edadayi (Hech. 24:15). Akʉza audre ũdukʼawuadayi Jeowata adewara iya nekʼãrẽ parãnata (Sal. 104:24; Is. 11:9). Adewara ẽjũã kĩrãwãreã zebʉrʉdera dayirãra nemitia oka bayi maʉ̃ba audre biʼia odayi Jeowaba zokʼabʉta akʉza kʼãrẽa dayirã nemitia kĩrãduamarẽã widira neẽ bayi mawũẽra, ¿bʉmara yibia bʼaika mawũã ewari jõmaʉ̃nẽ sobia bʼaita aduaita bari atia sobia bʼai kʼarea? Mawũã ẽ (Heb. 11:25). Dayirãba nebia zei jʉ̃ãbʉra aranʉ bʼai wãrĩnu berabariyi, wãrĩnu zeyi maʉ̃ nebiara, maʉ̃ba yibia bayi nekʼãrẽ jõma oita dayirãba maʉ̃ nebia ũduita. Dayirãbara maʉ̃ nebiara ũduseabʉ Jeowaba dayirãta mejãcha kãga baera akʉza yi Warrata dayirã bari beimarẽã zokʼasi baera.

¿KʼÃRẼTA OSEABɄ BIGA DIABɄ ŨDUBITA?

13. ¿Sãwũã biga diaseapanʉ Jeowaʼa dayirã kãga ũdubibʉ kʼarea? (2 Corintios 6:1).

¹³ Jeowaba dayirãʼa yi Warrata diasi dayirã bari beimarẽã, maʉ̃ kʼarea biga diabʉ ũdubira nekʼãrẽ jõma odaibara Jeowaba zokʼabʉta nããra bʉeita (Mat. 6:33). Wãrĩnubaira Jesúsʼra «beisi jõmaʉ̃ra kʼarea yi zokʼaipanʉrãra ãyikʉzaita ba ẽ marẽã awuaraburu ãyi bari beidaita bamarẽã iyira jẽda piradrʉsi» (2 Cor. 5:15). Jeowabara dayirãra mejãcha kãgata ũdubibʉ akʉza iyara kĩrãduabʉ dayirã nemitiara, maʉ̃ba jipade yibia dayirãba nekʼãrẽ jõma oita iya zokʼabʉta nããra oita, mawũã ũdubipanʉ baera biga diapanʉta iya dayirã kʼarea kʼãrẽ ozebʉrʉ bari (akʉra 2 Corintios 6:1).

14. ¿Sãwũã ũdubipanʉ Jeowaba zokʼabʉ ʉ̃rʉ ĩjãpanʉta?

¹⁴ Adewara dayirãba Jeowaʼa biga diabʉta ũdubiseabʉ iya nekʼãrẽ omarẽã zokʼabʉ ʉ̃rʉ wãrĩnu ĩjãbʉta ũdubibʉde, ¿maʉ̃ra sãwũã oseabʉ? Dayirãba kʼãrẽãba estudiai ʉ̃rʉ krĩchabʉrʉde mawũã ẽ bʉrʉ kʼãrẽ trajo jʉrʉi ʉ̃rʉ krĩchabʉrʉde oibara Jeowaba kãgabʉde (1 Cor. 10:31; 2 Cor. 5:7). Dayirãba nekʼãrẽ obʉrʉdeba ũdubipanʉbʉrʉ ĩjãbʉta naʉ̃ba kʼarebayi daya ĩjãbʉra audre zarea bamarẽã akʉza audre Jeowa neũdukʼawua bia bamarẽã adewara dayirãba jʉ̃ãpanʉ ʉ̃rʉbida audre ĩjãnañi (Rom. 5:​3-5; Sant. 2:​21, 22).

15. Jesús beida jẽda kĩrãbebʉrʉ ewaridera, ¿sãwũã ũdubiseapanʉ biga diapanʉta Jeowaʼa?

¹⁵ Jeowaba dayirãʼa kãga ũdubibʉ kʼarea biga diaira dayirãbara nekʼãrẽ jõma odaibara Jesús beida jẽda kĩrãbebʉrʉ ewaride wãita, adua ẽ baita maʉ̃ ewarita, mamina maʉ̃ awuara nekʼãrẽ oseapanʉ. Trʉ̃seapanʉ ẽbẽrarãta jʉ̃ẽmarẽã maʉ̃ ewaride (1 Tim. 2:4). Dayirãba maʉ̃ obʉrʉdera jara ũrĩbiseapanʉ kʼãrẽta odaita Jesús beida jẽda kĩrãbebʉrʉde maʉ̃itara zokʼaseabʉ jw.org de bideora ũdubibʉta bari jaraita naʉ̃ta, ¿Kʼãrẽa beisi Jesura? akʉza Kĩrãbedaya Jesu beidata. Zõrãrã kongregasionebemaraba trʉ̃ñi ẽbẽrarã Jeowa ode kʉrãza panʉrãra. Naʉ̃ra ẽbẽrarãnebemata Jeowa organizasionʼena jẽda zeita krĩchara nama egorodepanʉrata akʉza ʉ̃tʉpanʉrata mejãcha sobiadayi (Luc. 15:​4-7). Yibiabayi Jesús beida jẽda kĩrãbebʉrʉ ewaride bari dayirãi yiya saluda ẽ baita awuara buru yi ʉ̃rabʉrʉ zebʉrʉra akʉza yi jʉ̃ẽ ẽ dããraba jʉ̃ẽbʉrʉra saludaisida biga bayi, maʉ̃ba kãgapanʉ maʉ̃ ewaridera ẽbẽrarã jõmaʉ̃ta bia sentidamarẽã (Rom. 12:13).

16. ¿Jesús beida jẽda kĩrãbebʉ ewaridera kʼãrẽa audre jaradia wãibara?

¹⁶ Jesús beida jẽda kĩrãbebʉrʉ ewaride dayirãba audre jaradia wãra naʉ̃ba kʼarebayi biga diabʉ ũdubita Jeowaʼa akʉza Jesúsʼa dayirã kʼarea kʼãrẽ oda bari. Dayirãba audre jaradia wãne ũdupanʉ Jeowaba sãwũã kʼarebabʉta dayirãra, naʉ̃ba kʼarebabʉ daya ĩjãbʉsida audre zarea bamarẽã (1 Cor. 3:9). Mamina nekʼãrẽ awuruta oseabʉ, Testo ewariza akʉbaridebema lebʉrʉde ʉ̃tʉ zebʉ Jesús beida kĩrãbebʉ ewaride kʼãrẽ testota leibarata, daya maʉ̃ta lera nebiata ũduyi, adewara Karta nekʼawuabaride ʉ̃tʉ zebʉ tablata, biga bayi maʉ̃ ʉ̃rʉ audre kʼawuaita. Bʉa kãgabʉrʉ bʉyi doba estudiabʉrʉde audre leseabʉ Jesús beida jẽda kĩrãbebʉ ewari ʉ̃rʉ bedʼeabʉta.

17. ¿Audrera Jeowabara kʼãrẽta akʉbʉ? (Akʉra rekuadro «¿Sãwũã biga diabʉta ũdubiseabʉ Jeowaʼa dayirãʼa kãga ũdubibʉ kʼarea?»).

¹⁷ Maʉ̃ ewaride naʉ̃ artikulode kʼawuadata bʉa jõma obe ẽ bʉrʉ krĩcha orãra maʉ̃ kʼarea, kĩrãbera Jeowabara akʉnʉmʉ ẽãta bʉa kʼãrẽta oẽãta akʉza wuabemaraba kʼãrẽta onʉmʉta, iyara audrera akʉbʉta dayirã sode kʼãrẽtabʉta. Jeowara sobiabʉ bʉa soiduba yi Warra beida kʼarea biga diakĩrãbʉbʉrʉ (1 Sam. 16:7; Mar. 12:​41-44).

18. ¿Kʼãrẽa biga diapanʉ Jeowaʼa akʉza Jesúsʼa?

¹⁸ Jesústa dayirã kʼarea beisi baera dayirãba nebiata ũduseapanʉ, ¿kʼãrẽ nebiata? Jeowaba dayirã nemitia kĩrãduaita, Jeowa neũdukʼawua bʼaita akʉza aranʉbai ewari jõmaʉ̃nẽ panaita, maʉ̃ kʼarea biga diadaibara Jeowaʼa iya dayirãʼa kãga ũdubibʉ baera. Jeowaba dayirãta kãga baera diasi maʉ̃ra nebiarata (1 Juan 4:19). Mamina Jesúsʼabida biga diadaibara iya dayirãta mejãcha kãga baera iyi bebʉta diasi dayirã ẽdrʉbita (Juan 15:13).