¿Sãwũã neũdukʼawua biabai?

¿BEDʼEA zroma erbʉdera bʉa krĩchabarika neẽãta kʼaiba kʼarebaita? Idi ewade bedʼea zromane panʉmina neẽ kʼãrẽa doba zʉbʉriaira (2 Tim. 3:1). Daizeze Bedʼeaba jarabʉ dayirãba bedʼea zroma ũdubʉrʉdera neũdukʼawuaraba kʼarebaseabʉta (Prov. 17:17).

NEŨDUKʼAWUARA BIABA SÃWŨÃ KʼAREBASEABɄ

Pabloba erbasi neũdukʼawuara biata, naʉ̃raba mejãcha kʼarebasi, ãyira pabloʉ̃me ãba wãpanasi (Col. 4:​7-11). Pablo karselde baside iyi neũdukʼawuaraba kʼarebasi oita iya kʼãrẽ obe ẽ badata. Bari jaraita Epafroditobara edesi mebẽrã Filiposdebemaba nekʼãrẽ diabʉedapeadata (Filip. 4:18). Kõbe Tíquicobara kʼarebasi Pabloba karta bʉdata wuabema kongregasionʼra dedekaita (Col. 4:7). Pablo iyi deda jida erpanaside akʉza karselde baside, mebẽrã so zarea diabasi iyi neũdukʼawuaraba kʼarebasida baera. ¿Dayirãbara idi ewaride sãwũã ũdubiseabʉ neũdukʼawua biata?

Idi ewade mebẽrãba obʉdeba ũdubipanʉ kʼãrẽãba yibiata neũdukʼawuara bia erbaita. Akʉdaya mebẽã Elísabet nebʉrata, iyira Españanebema. Iyaʼa jarasidade yi papa kanserba baribʉta akʉza jipa be ẽ baita maʉ̃nera iyira mejãcha sopʉasi, mamina yi neũdukʼawua abaʉba mejãcha kʼarebasi, iyaʼa kartata zokʼa bʉesi maʉ̃neba so zarea diaita, maʉ̃ne jara ũrĩbibasi ʉ̃kʉrʉ testoraba jarabʉta. Elísabetba jara ũrĩbibʉ iyi sãwũã sentisita, iya jarabʉ: «Mʉ̃a iyi karta ũdusidera mʉ̃ra mejãcha sobiasi kʼawuasi baera bʉta ẽbẽra aba mʉ̃ ʉ̃rʉ krĩchabʉta akʉza maʉ̃ba mʉ̃ãʼa mejãcha zarea diasi mʉ̃a oibarata oita» (Prov. 18:24).

Dayirãra audre mebẽrã neũdukʼawua bia baseabʉ nekʼãrẽ Daizezedebema ãba obʉde ãyibawaraʉba, bari jaraita, kʼarebaseabʉ mebẽrã zõrãpanʉrata ãba yi jʉre barieda edeita, mawũã ẽ bʉrʉ eda wãseabʉ jaradia wãita. Mawũã opanʉbʉrʉ yiya so zarea diadayi (Rom. 1:12). Mamina ʉ̃kʉrʉ mebẽrãra ãyi dedaʉba aña wã be ẽ. Maʉ̃nera dayirãbara, ¿sãwũã ũdubiseabʉ neũdukʼawua biata?

NEŨDUKʼAWUA BIA BAIBARA MEBẼRÃRA DEDAɄBA AÑA WÃ BE ẼɄ̃ME

Ʉ̃kʉrʉ mebẽrãra edaʉde ãba yi jʉrebari eda wã be ẽ, bari jaraita ʉ̃kʉrʉra mejãcha kayabʉ baera. Mawũã berabarisi mebẽã Davidta, iyira kanserba kayabasi. Maʉ̃neba beya tratamiento oibarabasi, maʉ̃ tratamientoitara jedeko seisbayeda iyi dedaʉba aña wã be ẽ basi, maʉ̃ba iyira yi kima Lidiaʉ̃me ãba yi jʉrebasi internetʼneba.

Mebẽrãba nekʼãre osida ãyi kʼarebaita, bari jaraita, ãba yi jʉre berabarida tẽãra ʉ̃kʉrʉ mebẽrãra mesera deda wã ẽ basi awuarabʉrʉ internetʼneba bedʼeabasi Davidʼʉ̃me akʉza Lidiaʉ̃me. Adewara Davidta yi kima Lidiaʉ̃me komentabʉrʉdera mebẽrãbara ãyaʼa mensajeta zokʼabʉepanasi ãya jaraita kʼãrẽãba kãgasita ãya bedʼea jaradara. Mebẽrãba mawũã obʉba kʼarebasi doba sentida ẽ baita.

Biga bayi dayirãba mebẽrãbawaraʉ̃ba jaradiaita ãyi kʼarebaita, bari jaraita, dayirãba nãã nekʼãrẽ obadata wiña awuara oseabʉ ãyaʼa ũdubita ãyira kĩrãduada ẽãta (Prov. 3:27). Dayirãra mebẽrã deidu wãseabʉ kartadeba jaradiaita akʉza telepononeba. Adewara zõrãrãbara nekʼãrẽ oseabʉ mebẽrãba internetʼneba ũrĩnamarẽã Daizeze Bedʼea jaradia wãi nãã ãba yi jʉrebʉta. Davidba Lidiaʉ̃meba mejãchade biga diapanʉ zõrãrãba ãyi kongregasione maʉ̃ta osi baera, Davidba jarabʉ: «Daira maʉ̃ reunion zakera internetʼneba ũrĩbasimina mebẽrãba jarabʉ ũrĩba akʉza yiwidʼiba mejãcha so zarea diasi». Bʉa mebẽã dedaʉba aña wã be ẽã widiseabʉ bʉ nekʼawuabarita iyi deidu erjʉ̃ẽseabʉ kʼawuaita ãbaʉba Daizeze Bedʼea ʉ̃rʉ jaradiaita.

Mebẽrã dedaʉba aña wã be ẽ bawara audre ãbapanʉbʉrʉ audre ũdukʼawuadayi ãyita akʉza ãyi sode kʼãrẽ nebia erbʉta audre ũdudayi. Bari jaraita, dayirãba ũdubʉrʉde maʉ̃ mebẽãba Daizeze Bedʼea sãwũã bia zokʼabʉta kʼarebaita ẽbẽrarã audre Jeowa kʼawa panamarẽã maʉ̃nera dayirãbara audre kãga zeyi ãyira. Bʉa mebẽrãta ãba yi jʉre barieda wãita akʉza jaradia wãita kʼarebabʉbʉrʉ neũdukʼawuara biarata erbayi (2 Cor. 6:13).

Pablo bedʼea zromane berabarinʉmasidera yi neũdukʼawua Titoba akʉ jʉ̃ẽbasi, maʉ̃ba kʼarebasi Pablo bia sentita (2 Cor. 7:​5-7). Yibia mebẽã so zarea diaita dayirãba jarabʉdeba, mamina Titoba odaba dayirã jaradiabʉ nekʼãrẽ awuruta oseabʉta mebẽrã so zarea diaita, ãyiʉ̃me audre bʼaibara akʉza kʼarebaibara ãya nekʼãrẽ nesidabʉde (1 Juan 3:18).

BɄ NEŨDUKʼAWUARA PẼWÃBɄDADE KʼAREBARA

Dayirã mebẽrã Rusiadebemaba yiza biata diabʉ dayirãi yiya kʼarebapanʉ baera. Akʉdaya mebẽã Sergey akʉza yi kima Tatyana nebʉrata. Ewaria aba polisiarata ãyi deidu nekʼãrẽ jʉrʉde jʉ̃ẽsida kʼawuaita ãya kʼãrẽta aña onʉmʉta, mõbe jida edesida ãyira. Maʉ̃ne ãyara Tatianata nãã ẽdrʉbisida. Sergeyba jara ũrĩbibʉ kʼãrẽta berabarisita iyi deda jʉ̃ẽside: «Tatyana deda jʉ̃ẽside mebẽã wẽrã abaʉta dai deidu jʉ̃ẽsi, maʉ̃ audre ẽãne mebẽrã bioʉta jʉ̃ẽsida dai de kʼareba ara oita».

Adewara Sergeyba jarabʉ: «Mʉ̃ara mejãchade kãga Proverbios 17:17ba jarabʉra, nama jarabʉ: ‹Neũdukʼawuarabara ewari jõmaʉ̃nẽ kãgabʉ akʉza bedʼea zroma zebʉrʉde mebẽãʼara kĩrãkʼabʉ›. Mʉ̃a ũdu zebʉrʉ nama jarabʉ testora aripe berabari zebʉrʉta dai kʼãwũã pẽwãpanʉne, maʉ̃nera mebẽrã kʼarebata mejãcha nesidapanʉ baera. Adewara mʉ̃a kʼawuabʉ maʉ̃ bedʼea zromara mʉ̃yi dobaʉba awuanta be ẽãta awuarabʉrʉ Jeowaba kʼarebabʉta neũdukʼawuara diabʉdeba».a

Idi ewade dayirãba mejãcha bedʼea zromata erpanʉ maʉ̃ba nesidapanʉ neũdukʼawua biata. Adewara ʉ̃ra zeide zʉbʉria zroma zebʉrʉde audre nesidayi maʉ̃ba kʼãwũãena zarea oibara neũdukʼawua bia bʼaita (1 Ped. 4:​7, 8).