BɄYITRɄ JɄ̃ZABA KRĨCHARÃRA ẼBẼRARÃ NAɄ̃ DRɄADEBEMABA OBɄ KĨRÃKʼA

ẼBẼRARÃBARA kãgapanʉ ãyitrʉ bia edadamarẽã akʉza yizroma kĩrãkʼa akʉdamarẽã, adewara nekʼãrẽ diapanʉne kãgapanʉ maʉ̃ne wũẽta diadamarẽã. Daizeze Bedʼeabara jarasi naʉ̃ ewari jõbodoarera mawũãbʉ ẽbẽrarãta mejãcha bʼaita (2 Tim. 3:2).

Ẽbẽrarã ãyikʉza krĩchabʉra aranuwedaʉba mawũãbʉ ẽ, bari jaraita, Adán Evaʉ̃mebara krĩchasida ãyikʉzabʉrʉ kʼawuaita saʉ̃ta bigata akʉza saʉ̃ta zeri ẽãta, ãya mawũã jidada kʼarea jõmaʉ̃ta zʉbʉriapanʉ. Adewara nokʼo Uzías Judádebemaba krĩchasi iyabida insienso baseabʉta templode mamina maʉ̃ra iya oibara ẽ basi (2 Crón. 26:​18, 19). Akʉza pariseoraba adewara saduseoraba krĩchapanasi ãyira Abrahánʼneba zesi baera Daizezebara ãyaʼa audre nebia diaibarata (Mat. 3:9).

Dayirãra panʉ baera ẽbẽrarã ãyitrʉ jʉ̃zaba krĩchapanʉrabawara dayirãbida ãyide kĩrãkʼa ojʉ̃drʉseabʉ (Gál. 5:26). Maʉ̃ba krĩchaseabʉ dayirãbʉrʉ diasepanʉta pribilegio biara akʉza dayirãtrʉ bia edadaibarata, ¿kʼãrẽta odaibara ãyide kĩrãkʼa oda ẽ baita? Nããra kʼawuadaibara sãwũã krĩchabʉta Jeowaba maʉ̃ ʉ̃rʉ. Akʉdaya Daizeze Bedʼearadebemaba jarabʉta ũme.

Jeowabʉrʉ dayirãʼa kʼawua diabʉ. Akʉdaya ʉ̃kʉrʉ yizarata.

• Jeowabara kãgabʉ yuwẽrãba yi kimaʼa wawia ũdubimarẽã akʉza yumakẽrãba yuwẽrã kãga ũdubimarẽã (Efes. 5:33). Adewara kãgabʉ yi juwa jidapanʉrabara jʉ̃zaba yi kima kãga ũdubidamarẽã (1 Cor. 7:3). Yibarirabara jʉ̃ãbʉ yi wũãwũãraba ãyi bedʼeata ũrĩnamarẽã, wũãwũãrabara jʉ̃ãbʉ yibariraba ãyita akʉdamarẽã akʉza kãgade erpanamarẽã (2 Cor. 12:14; Efes. 6:2).

• Mebẽrã kongregasionebemabara zõrãrã wawia ũdubibara ãya nekʼãrẽ obʉ kʼarea kongregasione (1 Tes. 5:12). Mamina zõrãrãbara ãya krĩchakʉta obi ẽ baibara mebẽrã kongregasionebemarãra (1 Ped. 5:​2, 3).

• Daizezeba iduaribibʉ nokʼoraba zokʼamarẽã, maʉ̃ba dayirãbara ãya widibʉta diaibara bari jaraita, luz pagaita akʉza baniata adewara nekʼãrẽ awuruta akʉza ãyaʼa wawia ũdubibara (Rom. 13:​1, 6, 7).

Jeowaba dayirã mejãcha kãgabʉ baera iyareba nekʼãrẽ mejãcha diabʉ. Dayirãra nemitia omia baera bari beitrʉ bʉ (Rom. 6:23). Mamina Jeowaba iyi kãga jõkata ũdubibʉ baera, dayirãʼa nekʼãrẽ biata mejãcha diabʉ (Sal. 103:​10, 11). Dayirãba pribilegio akʉza nekʼãrẽ bia erbʉra Daizeze Jeowaba iyareba diada (Rom. 12:​6-8; Efes. 2:8).

KʼÃRẼBA KʼAREBASEABɄ DAYITRɄ JɄ̃ZABA KRĨCHA Ẽ BAITA

Jʉra kʼawua bʼaibara naʉ̃ drʉadebemaba krĩchabʉ kĩrãkʼa krĩcha ẽ baita. Jʉra kʼawuapanʉ ẽ bʉrʉ krĩchaseabʉ dayabʉrʉ audre diadaibarata wuabemaraira. Jesúsba ewari aba naʉ̃ ʉ̃rʉ bedʼeabʉta jara ũrĩbisi kʼawuabita mawũã krĩchaira zeri ẽãta. Uba yibariba ẽbẽrarãta jʉrʉsi iyi ubade ewari aba traja kiʉmarẽã denario abaʉbari. Maʉ̃ tẽã kewarare jʉrʉsi wuabema ẽbẽrarãta ubade trajamarẽã mamina jõmaʉ̃a iyaba pagasi, ʉ̃kʉrʉta wiña trajasimina. Mamina yi diapedaʉba trajadabara jʉ̃ãpanasi audre pagadamarẽã diapedaʉba kiuyeda zarea trajasida baera (Mat. 20:​1-16). Naʉ̃ yizadeba Jesúsba iyi kʼaidubemara jaradiakĩrãbasi ãyira sobia bʼaibarata Daizezeba iyareba nekʼãrẽ bia diabʉ kʼarea.

Biga diaibara akʉza jʉ̃ã ẽ baibara wuabemaba dayaʼa nekʼãrẽ diamarẽã (1 Tes. 5:18). Awuarabʉrʉ Pablode kĩrãkʼa odaibara, mebẽrã Corintodebemabara akʉdaibarabasi Pablora mamina Pablobara nekʼãrẽ widi ẽ basi ãyara (1 Cor. 9:​11-14). Naʉ̃ba jaradiakĩrãbʉ daya wuabemara nekʼãrẽ widinʉmai kaude biga diaibarata ãya diabʉ kʼarea.

Eda krĩchabʉta ũdubibara. Ẽbẽra abaʉba yãrã ʉ̃tabʉta krĩchabʉbʉrʉ, krĩchabʉ iyaʼabʉrʉ nekʼãrẽ audre diaibarata wuabemaraira, mamina mawũãchura beneno kĩrãkʼabʉ, mamina maʉ̃ bebira edabʉta krĩchaibara.

Danielbara ũdubisi eda krĩchabʉta. Daniel mebẽrãbara nekʼãrẽ bia erbasi, iyira bia yirasi, buru bia basi akʉza nekʼãrẽ okʼawuabasi, maʉ̃ kʼãrẽa iya krĩchaseabasi bia edaibarata akʉza iyaʼa audre pribilegio diaibarata (Dan. 1:​3, 4, 19, 20). Mamina Danielbara eda krĩchabʉta ũdubisi, maʉ̃ kʼarea Jeowabara mejãcha kãgabasi iyira (Dan. 2:30; 10:​11, 12).

Zarea odadrʉ ẽbẽrarã naʉ̃ drʉadebemaba krĩchabʉ kĩrãkʼa krĩcha ẽ baita awuarabʉrʉ sobia panadrʉ Jeowaba iyareba dayirã nekʼãrẽ bia diabʉ kʼarea.