«Mʉ̃ra doba ba ẽ basi»

MɄ̃ YIBARIRÃBA NEBIATA JARADIASIDA

Mʉ̃ yibarirãra katoliko basi, ãyara maʉ̃ra soiduba opanasi. Mamina ãya Daizeze Bedʼeade kʼawuasidade Daizeze trʉ̃ra Jeowata, mamaʉ̃ba ʉ̃ta ãyira Jeowa ʉ̃rʉ Kʼawuabipanʉrã basida, maʉ̃sida soiduba opanasi ãyara. Mʉ̃ zezebara idubʉsi bakuruba Jesús kĩrãkʼa pãrãbadara. Mõbe, iya bakuru nekʼãrẽ parã kʼawuabʉ baera dai de edrebemata jõma ara osi mawũã mama ãba yi jʉredamarẽã. Pʉwʉrʉ San Juan del Montedera neẽ basi salonʼra. Mʉ̃ zezeba odatrʉ maʉ̃trʉ abapai basi, maʉ̃ pʉwʉrʉra Maniladebʉ, Manilara Filipinas kapital.

Mʉ̃ra tosida poaga 1952de. Mʉ̃ yibarirabara Jeowa ʉ̃rʉ jaradiapanasi mʉ̃ mebẽrãra, yumakẽrãra kimare panʉra akʉza yuwẽrãra ũbea panʉra, maʉ̃ba mʉ̃abida wiñayiru iduba jaradia jʉ̃drʉsida Jeowa ʉ̃rʉ. Mʉ̃ wari wãne mʉ̃ zezeba mʉ̃a jarabasi ewariza Daizeze Bedʼeata akʉmarẽã kapitulo aba, adewara kartara dayirã kongregasionebemata mʉ̃meba akʉbasi iyara. Maʉ̃ awuara, mʉ̃ yibarirabara kongregasionʼra akʉbari zõrãrãta akʉza betelitarata dai deda kʼãĩbibasi. Naʉ̃ra mebẽrãba nebʉrapanasi ãyi sãwũã berabaridata. Maʉ̃ba mejãcha so zarea diasi daiʼa akʉza kʼarebabasi dai mebẽrãbawara sobia bʼaita. Adewara naʉ̃ra mebẽrãba kʼarebasi daibida krĩchaita Jeowata nããra bʉeita nekʼãrẽ jõmaira.

Mʉ̃ara nekʼãrẽ biata kʼawuasi mʉ̃ yibariraneba, ãyira Jeoware kʼẽrẽpapanasi. Maʉ̃ta poaga 1971ne mʉ̃ papara kaya kʼãrãpe beisi. Maʉ̃neba mʉ̃ zezeba akʉza mʉ̃a yi nãã edebarita ojʉ̃drʉsida. Mamina poaga 1973de, mʉ̃ 20 poaga bʉde, mʉ̃ zezesida beisi. Ãyi ũme neẽbai mʉ̃ra mejãcha sopʉasi akʉza doba sentisi. Mamina Daizeze Bedʼeade nebia jʉ̃ãbibʉba kʼarebasi mʉ̃ sopʉa yi edebi ẽ baita akʉza Jeowadeba jĩga wã ẽ baita (Heb. 6:19). Mʉ̃ zeze beida tẽã mʉ̃ra trʉ̃gasida yi nãã edebari 100 ora diabari bʼaita isla Coronʼne, maʉ̃ra Palawanʼnebʉ.

MɄ̃ DOBA BESIDE ASINASION ZAREABɄTA DIASIDA

Mʉ̃ra 21 poaga basi Coronʼena jʉ̃ẽsidera. Mainʉ jʉ̃ẽira zarea basi mʉ̃ra pʉwʉrʉ zromane warisi baera. Mamina Coronʼena jʉ̃ẽbʉrʉdera namara neẽ basi luzta, baniata, mia karruta, mia motota. Mamara mebẽrã wiña basi, mamina neẽbasi yi nãã edebarirãra. Maʉ̃ba edaʉde doba jaradia wãibarabasi mʉ̃ara. Maʉ̃ islade jedeko ababayeda bʼaira mʉ̃itara jipade zarebasi. Mejãcha krĩchabasi mʉ̃ mebẽrãta akʉza mʉ̃ neũdukʼawuarata. Edaʉde diamasi, ʉ̃ta akʉbʉrʉdera, jẽgakĩrã deguebasi akʉza mʉ̃ asinasion idubʉ kʼãrãpe jẽda wãkĩrãbasi deda.

Mʉ̃ mawũã sopʉa sentibasidera Jeowa jara ũrĩbibasi jõma mʉ̃ sãwũã nʉmʉra. Kĩrãbebasi naweda mʉ̃a Daizeze Bedʼeade bedʼea bia ũduda ʉ̃rʉ akʉza dayirã kartarane. Adewara badua krĩchabasi Salmo 19:14ba jarabʉ ʉ̃rʉ, maʉ̃ne mʉ̃a kʼawuasi mʉ̃a krĩchabʉbʉrʉ Jeowaba kʼãrẽ parãna ʉ̃rʉ, Jeowaba kʼãrẽ nebia erbʉ ʉ̃rʉ, mawũãra Jeowara mʉ̃ Mõgara bʼaibasita akʉza mʉ̃ Ẽdrʉbibari bʼaibasita. Adewara, mejãcha kʼarebasi karta La Atalaya, yi trʉ̃ «Usted nunca está solo» abʉba a. Mʉ̃a maʉ̃ kartara leda ʉ̃rʉ badua lebasi. Dayima mʉ̃ta Jeowaʉ̃me pai bedʼeabari kĩrãkʼabasi maʉ̃neba. Adewara yibia basi maʉ̃ oira, maʉ̃ne yiwidʼibasi baera, audre estudiabasi baera akʉza mʉ̃a kʼawuanʉmʉ ʉ̃rʉ audre pikãga krĩchaseabasi baera.

Mʉ̃ Coronʼena jʉ̃ẽnata audre ẽãne, zõrãrã kongregasionebema babisida. Mamara, mʉ̃trʉ abapai zõrãrã baera mʉ̃a jaradiaibarabasi Eskuela del Ministerio Teokratikode, Reunion de Serbisiota, Ãba yi jʉrebarimae Daizeze Bedʼeadebema libro akʉita adewara karta La Atalaya jaradiaibarabasi. Maʉ̃ awuara, semanaza diskursota diaibarabasi. Mamina maʉ̃ oira jipade yibiabasi ewari neẽbasi baera doba sentita awuarabʉrʉ nekʼãrẽ mejãcha oibarabasi.

Isla Coronʼne Daizeze Bedʼea jaradiara jipade yibia basi. Ẽbẽrarã mʉ̃a Daizeze Bedʼea kʼawuabipananara buru kʼoesida. Mamina mama jaradiaira zarebasi. Bari jaraita, ẽbẽrarãbʉidʉ jʉ̃ẽira wãibarabasi diapedaʉba ũmatipabayeda. Adewara mainʉ jʉ̃ẽbʉrʉdera mʉ̃ara kʼawua ẽ basi yi sama kʼãĩsida. Maʉ̃ awuara kongregasion maʉ̃ isladebemabara jaradiaibara basi awuru isla zakera ãyi kʼawabʉa, maʉ̃inʉ jʉ̃ẽira jãbade pusata kĩrãbaribarabasi mamina zarebasi edaʉde ewari kayiruanʉmʉnera mejãcha marasata basi baera maʉ̃ awuara mʉ̃sida dobe ẽ basi. Mamina Jeowaba mejãcha kʼarebasi mʉ̃ra, iya bia akʉsi mʉ̃ra. Maʉ̃nera Jeowaba mʉ̃aʼa jaradianʉmʉ kĩrãkʼa basi kʼãrẽta oibara tẽã nekʼãrẽ zareabʉ oibarade.

PAPÚA NUEVA GUINEA

Poaga 1978, mʉ̃ra zokʼa bʉesida Papúa Nueva Guineaʼena, maʉ̃ra Australia wãdearebʉ. Papúa Nueva Guineane mejãchabʉ katumarata adewara mamara 3 millon bʉ ẽbẽrarãta, mamabema ẽbẽrarãbara 800 bedʼea awuara awuaraka bedʼeapanʉ. Mamina yi audrebara bedʼeabʉ pidgin Nueva Guineanebemata, iyabaʉta tok pisin.

Papúa Nueva Guineaʼena zokʼabʉedai naenara, mʉ̃ra zokʼa bʉesida kongregasion ingles bedʼea bedʼeabʉma, Port Moresbyde. Mamina mʉ̃ra mamara dããraba ẽ basi, tẽã wãsi kongregasion tok pisin bedʼea bedʼeabʉma. Mama mʉ̃aʼa jaradia jʉ̃drʉsida maʉ̃ bedʼeata, ãya mʉ̃aʼa jaradiapanʉta Daizeze bedʼea jaradia wãbʉrʉde zokʼabʉ baera, mesera kʼawuasi mʉ̃a maʉ̃ bedʼeara, audre ẽãne mʉ̃ara diskursota diabasi tok pisin bedʼeade. Papúa Nueva Guineanebʉta poaga aba berabarida tẽã, mʉ̃ra kongregasionʼra akʉbari zõrãrã babisida akʉza jarasida akʉ wãmarẽã kongregasionʼra tok pisin bedʼea bedʼeabʉma pʉwʉrʉ zromama.

Kongregasionʼrãra ara jĩga chubeasi, maʉ̃ba mʉ̃ara asamblea sirkuitodera bio oibarabasi mebẽrã jõmaʉ̃ta asamblea badamarẽã, maʉ̃nera mʉ̃ra badua aña wãnʉmaibarabasi. Nawerada mʉ̃ara bia ũdukʼawua ẽ basi maʉ̃ drʉara mia kʼawua ẽ basi sãwũã chuasita ẽbẽrarã mamabemata, maʉ̃ba mʉ̃itara zarebasi, doba sentibasi mʉ̃ra. Adewara maʉ̃ pʉwʉrʉra katuma baera zarebasi kongregasion abaʉdeba awuru kongregasionʼena wãira, maʉ̃ba mʉ̃ra semanaza abione wãibarabasi mamina abione wãira mʉ̃ara wawibasi, ¿kʼãrẽa? Maʉ̃ abionʼra, abion zõrãbasi baera akʉza edaʉde mʉ̃trʉ abapai wãbasi maʉ̃ abionera, maʉ̃ba maʉ̃ abione wãira pusade jãbade wãi kĩrãkʼa basi.

Maʉ̃ ewaridera ẽbẽra jõmaʉ̃ba erba ẽ basi teleponora, maʉ̃ba mebẽrãra kartata zokʼa bʉebasi. Mamina mʉ̃ta nããra jʉ̃ẽbasi maʉ̃ kartaira, maʉ̃ba mebẽrã ũduira ẽbẽrarã maʉ̃ pʉwʉrʉdebemara kʼareba widibarabasi. Mebẽrãʉ̃me yi ũdubʉrʉza ãya mʉ̃ra bia edapanasi akʉza kãga ũdubipanasi, naʉ̃ba mʉ̃a kĩrãbebibasi mʉ̃a Jeowaita zare obʉra bari ẽãta. Adewara mʉ̃a nekʼãrẽ mejãchade ũdusi Jeowaba sãwũã kʼarebabʉta, naʉ̃ba kʼarebasi mʉ̃ audre Jeowa kʼawa bʼaita.

Isla Bougainvillede, mʉ̃ nããra ãba yi jʉrebarieda jʉ̃ẽside ẽbẽrarã ũmeba ipida saludasida, ãya widisida: «¿Kĩrãbebʉka bʉa daira?», mʉ̃ara ãyira kĩrãbebasi. Mʉ̃ Bougainvillede baside, ãyaʼa Daizeze bedʼeata jaradiasi akʉza ãyi ũmeba kʼawua jʉ̃drʉsi Daizeze bedʼea ʉ̃rʉ. Ewari biobayeda mawũã osi mamina tẽã ãyira awuru mebẽã juwade amaeibarabasi, maʉ̃ta ãyira buru kʼoesida maʉ̃ tẽã. Papúa Nueva Guineanebʉta mʉ̃ra poaga ũbea basi, maʉ̃ne mʉ̃a nebiata mejãcha ũdusi, mamina kʼawuaita ãyi buru kʼoedata nebiabasi mʉ̃mara.

MEBẼRÃ BARASI AKɄZA NEKʼÃRẼ MEJÃCHA OIBARA BASI

Coronʼne baside ũdukʼawuasi mebẽã wẽrã aba yi trʉ̃ Adel, naʉ̃ mebẽãra jipade ẽbẽra wẽrã biabasi. Maʉ̃ tẽã mʉ̃ra 1978de wãsi mamaʉ̃ba. Naʉ̃ mebẽã wẽrãbara wũãwũã ũme dobaʉba dapũẽbasi, Samuelta akʉza Shirleyta. Maʉ̃ awuara iyara yi papasida akʉibarabasi adewara iyira yi nãã edebaribasi, soiduba obasi maʉ̃ta. Maʉ̃ta poaga 1981ne mayode, mʉ̃ra jẽda wãsi Filipinasʼena iyiʉ̃me juwa jidaita, maʉ̃ tẽã yi nãã edebari 50 ora diabari ojʉ̃drʉsida ãbaʉba daibara akʉza dai mebẽrãta akʉ jʉ̃drʉsida.

Mʉ̃ mawũã mebẽrã barasimina poaga 1983de yi nãã edebari 100 ora diabari babisida akʉza jarasida Linapacanʼena wãmarẽã, maʉ̃ra Palawanʼne basi adewara jĩga chuasi maʉ̃ pʉwʉrʉra akʉza neẽbasi Jeowa ʉ̃rʉ Kʼawuabipanʉrãra mamara. Dai mamabʉta poaga aba babʉrʉde Adel papara beisi, mamina maʉ̃ʼa sopʉa yi edebi ẽ baita, audre jaradia jʉ̃drʉsida, audre nekʼãrẽ ojʉ̃drʉsida Jeowaita, maʉ̃ne ũdusida ẽbẽrarã bioʉba kʼawuakĩrãbasita audre Jeowa ʉ̃rʉ akʉza nekʼãrẽ idubʉsidata Jeowa kʼawa bʼaita. Maʉ̃ba kʼawuasida nesidabasita salonta oita, maʉ̃ kʼarea salon zaketa osida. Mejãchade sobiasida dai mamabʉta dããra ba ẽ basimina, poaga ũbea basimina ẽbẽrarã mejãcha jʉ̃ẽsi baera Jesús beida jẽda kĩrãbeita 110 jʉ̃ẽsida adewara maʉ̃ra ẽbẽrarãnebemara buru kʼoesida dai wãna tẽã.

Poaga 1986de mʉ̃aʼa jarasida isla Culionʼena wãmarẽã, maʉ̃ tẽã mʉ̃ kimasida yi nãã edebari 100 ora diabari babisida. Maʉ̃ isladera basi ẽbẽrarã lepraba kayabʉta, maʉ̃ba naweda Daizeze bedʼea jaradia jʉ̃drʉira daitara zarebasi mejãcha, perabasi daira, ẽbẽrarã mitia chubeabayi maʉ̃ kayaba. Mamina mamabema kongregasionebemaraba jarasida perada ẽ marẽã, maʉ̃ra ẽbẽrarã tratamiento diasida baera akʉza jarasida daira maʉ̃ba bari ẽ baita. Maʉ̃ra ẽbẽrarã maʉ̃ kaya erbʉrãra wãpanasi mebẽã wẽrã deidu ãba yi jʉrede. Daira mesera kʼawasida maʉ̃ drʉadera, daibara sobiade jaradiapanasi ẽbẽrarã Daizeze Bedʼea ʉ̃rʉ, audre naʉ̃ra ẽbẽrarã, ãyara krĩcha panasi baera Daizezebara ãyira kãga ẽãta mia ẽbẽrarãba kãga ẽãta. Mejãcha sobia panasi maʉ̃ kaya ãya erbʉ wua neẽbai jarabʉrʉde ãyi kirata sobiadogota ũdupanasi baera (Luc. 5:​12, 13).

¿Kʼãrẽta osida dai wũãwũãrãrata Culionʼne kʼawadamarẽã? Daiba trʉ̃sida mebẽã wẽrã ũme Coronʼnebemarata dai kʼaidu wãmarẽã, mawũã dai wũãwũãraba neũdukʼawua biarata erbamarẽã maʉ̃ pʉwʉrʉde. Samuelba Shirleyba akʉza maʉ̃ra wẽrã ũmeba sobiade jaradiapanasi ẽbẽrarã, ãyara Daizeze Bedʼeata kʼawuabipanasi wũãwũã zakera, maʉ̃ena Adelba akʉza mʉ̃a Daizeze bedʼeata kʼawuabipanasi maʉ̃ra wũãwũãra yibarira. Audre ẽãne ẽbẽra mejãchaʉba ũdubisida Jeowa kʼawa bakĩrãpanʉta maʉ̃ kʼarea kongregasion yiwidʼita osida.

Maʉ̃ ewadera mʉ̃trʉ abapai zõrãrã kongregasionebema baera, beteldebemaraba widisida kongregasionebema reunionta omarẽã Culionʼne 8 nejaradiabari bʉbawara akʉza iyabaʉta omarẽã 9 nejaradiabari bʉmae Marilyde. Maʉ̃inʉ jʉ̃ẽira 3 ora wãibarabasi jãbade, mõbe ãba yi jʉre berabarida tẽãra daira ʉ̃ta katumane wãibarabasi jĩga pʉwʉrʉ Halseyʼidu ẽbẽrarã mamabera Daizeze Bedʼea ʉ̃rʉ kʼawuabita.

Tẽã ẽbẽrarã mejãchaʉba ĩjãsida Jeowa ode wãita Marilyde akʉza Halsey pʉwʉrʉde, maʉ̃ kʼarea krĩchasida salonta oita maʉ̃ra pʉwʉrʉ zakeraza. Linapacan berabarida kĩrãkʼa mebẽrã mamabemaraba akʉza wuabema ẽbẽrarã Daizeze Bedʼea kʼawuakĩrãpanʉraba mejãcha kʼarebakĩrãpanasi, maʉ̃ kʼarea nekʼãrẽ maʉ̃ de parãita nesidabʉta diasida. Salon Marilydebemanera ẽbẽrarã 200 arabasi akʉza asamblea oidera maʉ̃ dera ara oedaseabasi.

SOPɄASI, DOBA SENTISI AKɄZA SOBIA SENTISI

Poaga1993de dai wũãwũãra yiroma chuidade, mʉ̃ra kongregasionʼra akʉbari zõrãrã babisida Filipinasne. Maʉ̃ta poaga 2000de mʉ̃ra trʉsida Escuela de Entrenamiento Ministerialʼeda mʉ̃a jaradiadaita maʉ̃ eskuelade nejaradiabari bamarẽã. Mʉ̃ã krĩchabasi maʉ̃ oira mʉ̃ita ẽãta, mamina Adelba so zarea diasi mʉ̃aʼa, iya kĩrãbebisi Jeowabara kʼarebabʉta daya aripe omarẽã iya asinasion diabʉta (Filip. 4:13). Adelbara kʼawuabasi iya kʼãrẽa mawũã jarabʉra, iyira kayabasimina Jeowaba kʼarebabasi iyi asinasion aripe omarẽã.

Poaga 2006de mʉ̃a waide nejaradiabʉde mʉ̃a jarasida Adelʼra parkinsonba kayabʉta. Maʉ̃ra daibara ĩjã ẽ nʉmaedasi, mamina mʉ̃a Adelʼa jarasi dai asinasion idubʉdaita mawũã iyita akʉita. Adelba mʉ̃a jarasi: «Mʉ̃ bia okʼãrẽpe mediko biata jʉrʉda mʉ̃ kaya bebiseabʉta, mʉ̃a kʼawuabʉ Jeowaba kʼarebaita naʉ̃ asinasion bia oita». Maʉ̃neba 6 poagabayeda, Adelbara Jeowaba kãgabʉta osi, iyira mejãcha zarea osi. Iyi maʉ̃ kaya kʼarea wãbe ẽãsidera silla de ruedadeba jaradiasi adewara iyi bedʼea be ẽ besidera, komentario diabʉrʉdera bedʼea ũme pai mawũã ẽ bʉrʉ bedʼea aba pai jarabasi. Mawũã kʼẽrẽpabʉta ũdubibasi baera akʉza zarea obasi baera mebẽrã mejãchaʉba kartata dia bʉesida iyaʼa biga diabʉ ũdubidaita iyi beiyieda, maʉ̃ta poaga 2013de beisi mʉ̃ kimara. 30 poaga basi mʉ̃ kimaʉ̃me ãba bʉta, Jeowa ʉ̃rʉ ĩjã basi iyara akʉza kãga ũdubibasi, mamina mʉ̃ sopʉara akʉza doba sentibʉra jẽda abarika senti besi nãã bada kĩrãkʼa.

Mʉ̃ara Adelba kãga bada kĩrãkʼa mʉ̃ asinasionʼra idu ẽ basi, audre zarea osi Jeowadeta nããra bʉeita, naʉ̃ba mejãcha kʼarebasi doba senti ẽ baita. Poaga 2014deba 2017 bayeda, mʉ̃a jarasida akʉ wãmarẽã kongregasionʼra idu jaradiabi ẽ mae tagalo bedʼeade. Maʉ̃ tẽã mʉ̃a akʉ wãsi kongregasionʼra tagalo bedʼeade bedʼeabʉta Taiwánʼne, Estados Unidosde akʉza Canadáde. Poaga 2019de pʉwʉrʉ Indiade akʉza Tailandiade, mʉ̃ara jaradiasi Escuela Evangelizadoresde inglés bedʼeade, naʉ̃ra asinasione mejãcha sobia sentisi mʉ̃ra. Mʉ̃a kʼawuasi Jeowadeta nããra bʉebʉbʉrʉ audre sobiabʉta mʉ̃ra.

DAYIRÃBA NESIDABɄDE KʼAREBABɄRA ERPANɄ

Mʉ̃a nekʼãrẽ badu asinasion oibaramae, kãga ũdubibʉ mebẽrã jõmaʉ̃a maʉ̃ba ãyi amaeira mʉ̃itara zare. Mamina maʉ̃ne berabari zebʉrʉba mejãcha kʼarebabʉ Jeowa ʉ̃rʉ audre ĩjãita, mʉ̃a ũdubʉ sãwũã Jeowaba kʼarebada ʉ̃rʉ kʼarebabʉta akʉza naʉ̃ba kʼarebabʉ mʉ̃abida nekʼãrẽ awuara oibarabʉrʉ soiduba oita, zokea oita. Atiara mʉ̃ra yi nãã edebari 100 ora diabari Filipinasne. Mejãchade sobiabʉ kongregasion atiabemane, mebẽrã kongregasionebemara mʉ̃ mebẽrãʼara kĩrãkʼabʉ. Akʉzade mejãcha sobiabʉ Samuelta akʉza Shirleyta sãwũã wãta ũdubʉ kʼarea, ãya ũdubipanʉ Jeowa ʉ̃rʉ wãrĩnu ĩj̈ãpanʉta yi papaba ũdubibada kĩrãkʼa (3 Juan 4).

Wãrĩnubaira mʉ̃ra mejãcha bedʼea zromane berabaribʉrʉ, mʉ̃ kimasi beisi akʉza ũdusi mʉ̃ kima sãwũã zʉbʉriasita maʉ̃ kayaba adewara nekʼãrẽ awuara oibarabasi. Mamina ũdu zebʉrʉ Jeowara dayirã aba abakaʉ kʼawa bʉta (Hech. 17:27). Jeowabara iyi juwaba kʼarebabʉ iyi ode kʼẽrẽpabʉrãra jõmaʉ̃ta, ara kʼaita panʉta akʉza jĩga panʉta (Is. 59:1). Biga diabʉ Jeowaba mʉ̃ta doba amae ẽ basi baera, iyira ewari jõmaʉ̃nẽ mʉ̃ kʼawabasi baera mõgara kĩrãkʼa.