Bʉa naʉ̃ widibʉdeba nebia mejãcha ũduyi

Maryʼra Johnʼʉ̃mera panʉ apʉwʉrʉ ẽbẽrarã Filipinasnebema mejãcha jʉ̃ẽpanʉmae, maʉ̃ra ẽbẽrarãra trajade jʉ̃ẽpanʉ. Maryba Johnʼʉ̃mebara mejãcha jaradiakĩrã maʉ̃ra ẽbẽrarã. COVID-19 zeside, Marybara ẽbẽrarã mejãchaʉʼa jaradia jʉ̃drʉsi Daizeze Bedʼeata, mamina bari iyi pʉwʉrʉdebʉra jaradia ẽ basi awuarabʉrʉ jaradiasi awuru pʉwʉrʉdebʉrabida, ¿sãwũã osi iya maʉ̃ra?

Maryba iyi nekʼawuabarira naʉ̃ta widibasi: «¿Bʉa ũdukʼawuabʉka ẽbẽra aba Daizeze ʉ̃rʉ kʼawuakĩrãbʉta?». Maʉ̃ne iyaʼa ãjã abʉdadera Marybara widibasi iyaʼa ũdukʼawuabidamarẽã maʉ̃ ẽbẽrãta. Maʉ̃ bedʼea widibʉdeba dayirãba nebiata ũduseabʉ. ¿Sãwũẽra? Ẽbẽrarã Daizeze Bedʼea ũrĩkĩrãbara ãya kʼawua wãta jaradiakĩrãpanʉ baera ãyi mebẽrã akʉza ãyi neũdukʼawuara. Akʉdayi kʼãrẽ nebiata ũduseabʉta maʉ̃ widibʉrʉde.

Mary nekʼawuabariba, yi trʉ̃ Jasminba ẽbẽrarãta kimare ũdukʼawuabisi Daizeze Bedʼea ʉ̃rʉ kʼawuakĩrãbʉta. Maʉ̃ta ãyidebema yi trʉ̃ Kristineba Daizeze Bedʼeata mejãcha kʼawuakĩrãbʉ baera jarasi semanane ewari ũme jaradiamarẽã, aramaʉ̃ta Maryba widisi iya ũdukʼawuabʉ kʼawuaita kʼaiba Daizeze Bedʼea ʉ̃rʉ kʼawuakĩrãbʉta, aramaʉ̃ta Kristineba jarasi: «ãjã, mʉ̃ neũdukʼawuarata ũdukʼawuabiya». Mawũã jaradata semana aba berabaribʉrʉde iyi neũdukʼawuara kimarebʉta Maryʼa ũdukʼawuabisi. Adewara tẽã ũdukʼawuabisi awuru ẽbẽrarãta, maʉ̃rabida iyaba awururata ũdukʼawuabisi.

Kristineba kãgabasi yi mebẽrã Filipinasnebʉrabida Daizeze Bedʼea ʉ̃rʉ kʼawuamarẽã. Maʉ̃ kʼarea yi kau Andreata ũdukʼawuabisi Maryʼa. Nããra Andreabara kʼãwũã krĩchabasi: «Jeowa ʉ̃rʉ Kʼawuabipanʉrãra religion zeri ẽ kĩrãkʼabʉ akʉza ãyara Jesús ʉ̃rʉ ĩjã ẽ. Adewara bari ĩjãpanʉ Nuevo Testamento ʉ̃rʉbʉrʉ». Mamina Andreaba Daizeze Bedʼea kʼawuakata kʼawua jʉ̃drʉside kʼawuasi iya krĩchabadara aña krĩchabasita. Iya Daizeze Bedʼea kʼawuabʉrʉza jarabasi «Daizeze Bedʼeaba naʉ̃ta jarabʉbʉrʉ wãrĩnu bʼaibara».

Tẽã, Andreaba iyi neũdukʼawuara ũme trajodebemata Maryʼa ũdukʼawuabisi, naʉ̃rabida Daizeze Bedʼea ʉ̃rʉ kʼawua jʉ̃drʉsida. Adewara Andreaba erbasi yãba yõra aba, yi trʉ̃ra Angela, iyira dauberre basi. Iyara chuwẽã ũrĩbasi Maryba Andrea Daizeze Bedʼea jaradianʉmaside. Maʉ̃ne ewari aba Angelaba Andrea widisi Maryta iyaʼa ũdukʼawuabimarẽã, iyabida Daizeze Bedʼea ʉ̃rʉ kʼawuakĩrãbʉ baera. Angelabara iya kʼawua wãra mejãchade kãgabasi jipade yibia basi baera. Adewara Angelabara audre ẽãne burude kʼawuasi mejãcha testorata akʉza Maryʼa widisi semanane ewari kimare estudiaita. Mõbe iyira ãba yi jʉrebasi internetneba Andrea kʼarebadeba.

Kristineba Maryʼʉ̃meba Daizeze Bedʼea kʼawuanʉmasidera Kristine kima Joshuara, iyi kʼawabasi, Maryba maʉ̃ta kʼawuaside Joshuaʼa widisi ãyibawaraʉba Daizeze Bedʼea kʼawuakĩrãbʉ kʼawuaita, maʉ̃ne Joshuaba jarasi: «Mʉ̃ara bari ũrĩñi mamina mʉ̃aʼa bedʼeata widirãra, mʉ̃a widira wãñi mʉ̃ra». Mamina ãyi estudiabʉde audre ẽãne Joshuabara yi kimane audre bedʼea widibasi akʉza jarasi iyabida Daizeze Bedʼea kʼawuakĩrãbʉta.

Maryba nãã bedʼea wididaba kʼarebasi 28 ẽbẽra pʉwʉrʉ kimarenebema Daizeze Bedʼea jaradiaita. Mõbe Maryba nekʼãrẽ osi awuru mebẽrã kongregasionebemaraba ʉ̃kʉrʉ iyi nekʼawuabaridebemara jaradiadamarẽã.

Jasminʼra buru kʼoesi abril 2021ne. Kristineʼra buru kʼoesi mayo 2022de, maʉ̃ tẽã iyira jẽda wãsi Filipinasʼena yi mebẽrãbʉidu. Kristine neũdukʼawua ũmesida buru kʼoesida. Maʉ̃ audre ẽãne buru kʼoesi Angelasida, mõbe yi nãã edebari 50 ora diabaribasi. Waya Kristine kima Joshuara akʉza yi kau Andreara waidide Daizeze Bedʼea kʼawuapanʉ akʉza zarea opanʉ audre Jeowa kʼawa bʼaita.

Jesús ewaridera akʉza apostolera ewaridera ẽbẽrarãbara ãyi neũdukʼawuara akʉza ãyi mebẽrã jaradiapanasi ãya Jesús ʉ̃rʉ kʼawua wãta (Juan 1:​41, 42a; Hech 10:​24, 27, 48; 16:​25-33). Yi bia bayi dayirãbida dayi nekʼawuabaria mawũã ẽ bʉrʉ awuru ẽbẽrarã widita ũdukʼawuapanʉ kʼawuaita awuru ẽbẽra Daizeze Bedʼea ʉ̃rʉ kʼawuakĩrãbʉta. Dayirãba mawũã opanʉbʉrʉ ũdudayi ẽbẽrarã Daizeze Bedʼea kʼawuakĩrãbʉta.