Angel Gabrielbara akʉ wãsi Maríara

Galilea drʉade basi Nazaret pʉwʉrʉta, mama basi wẽrã zake Maríata. Maríara Elisabet mebẽrãbasi, Maríara juwa jidaibasi Joséʉ̃me, iyira karpinterobasi. Elisabet biogoeda 6 jedekobaside angel Gabrielba akʉ jʉ̃ẽsi Maríata, maʉ̃ne jarasi: «Kʉa, Daizezeitara bʉra ẽbẽra wẽrã bia». Iya bia ũrĩ ẽ basi baera Gabrielba jaradata, Gabrielbara jẽda jara ũrĩbisi: «Bʉra biogo beya yumakẽrãta toyi, bʉara trʉ̃gaibara Jesús. Iyira nokʼobayi akʉza iya zokʼabʉra jõkabayi».

Maríaba panʉsi: «¿Sãwũã mawũãra, mʉ̃ara mia abaʉ yumakẽrãta erkʼãĩka?». Gabrielba panʉsi: «Daizezeba jõma jaradara aripe berabaribibʉ, bʉ ʉ̃rʉ zeyi jaure zareata, mawũã biogo beyi. Akʉza bʉ mebẽrãnebema Elisabetsida biogobʉa». Maríaba panʉsi: «Namabʉ Jeowa nezokʼara, mʉ̃ne bʉa jarada kĩrãkʼa aripe berabaribira».

Maríabara akʉ jʉ̃ẽsi Elisabetʼra pʉwʉrʉ katuma badaidu, mama jʉ̃ẽside Maríara bedʼeasi, maʉ̃ne Elisabet wũãwũãra pirapiranʉma kʼawuasi, mõbe Daizeze jaure zareata Elisabet ʉ̃rʉ ze kʼãrãpe iya jarasi: «María Jeowaba bʉara nebiata diabʉrʉa. ¿Mʉ̃ra kʼaipe kʼãwũã mʉ̃ nokʼo papaba akʉde zebʉrʉra?». Maríaba panʉsi: «Soiduba Jeowa ʉ̃rʉ ibia bedʼeabibʉ». Elisabetʼʉ̃me jedeko 3 bayeda besi, tẽã jẽda wãsi iyi deda Nazaretʼeda.

Joséba kʼawuaside María biogochuta juwa jidamasi iyiʉ̃me. Mõbe angelʼra kʼãĩmokʼãrãde Joséʼa yi ũdubisi, maʉ̃ne jarasi: «Perarãra iyiʉ̃me juwa jidaita, iyara nekayiruara oẽ chu». Maʉ̃ kʼarea Joséra Maríaʼʉ̃me juwa jida kʼãrãpe iyi deda edesi.