¿Sãwũã ũrãgʼa biata diaseapanʉ?

1. ¿Kʼairaba ũrãgʼa biata diaibara akʉza kʼãrẽa?

DAYIRÃ jõmaʉ̃ba ũrãgʼa biata diaibara wuabemara ʉ̃kʉrʉbara ũrãgʼa diakĩrã ẽ mina, jõmaʉ̃ba ũrãgʼa biata diaibara. ¿Kʼãrẽa maʉ̃ ũrãgʼara diaibara? Jesúsba jarabarisi iyi kʼaidupanʉrãra maʉ̃neba wãrĩnu ũdukʼawuadaita yiya kãgapanʉta (Juan 13:35). Dayirã mebẽrãta kãgapanʉ baera ãya ũrãgʼa nesidabʉrʉde, ũrãgʼa biata diayi akʉza Daizeze Bedʼeabara jarabʉ dayirãba bia krĩcha kʼãrãpe ũrãgʼa bia diabʉrʉdera maʉ̃ba audre ãyi neũdukʼawua bia babibʉ (Prov. 27:9).

2. ¿Kʼãrẽta oibara zõrãrãbara akʉza kʼãrẽa? (Akʉra rekuadro «Sãwũã ũrãgʼa diabʉta mebẽrã diskurso diabʉra»).

² Jeowaba Jesúsʼʉ̃mebara zõrãrã kongregasionebemara diasi mebẽrã kongregasionebemata bia akʉdamarẽã, maʉ̃ba zõrãrã kongregasionebemabara ũrãgʼa biata diaibara mebẽrãra (1 Ped. 5:​2, 3). ¿Zõrãrãbara sãwũã kongregasion bia akʉbʉta ũdubibʉ? Maʉ̃ta opanʉ diskurso Daizeze Bedʼeadeba ũdubibʉde akʉza mebẽrã kongregasionebema ũrãgʼa bia diabʉde, adewara Jeowadeba jĩga wãnarabida, ¿sãwũã zõrãrãba mawũã ẽ bʉrʉ dayirã jõmaʉ̃ba ũrãgʼa biata diaseabʉ ãya nesidabʉrʉde?

3. (1) ¿Sãwũã ũrãgʼa biata dia kʼawuaseabʉ? (Isaías 9:6; akʉra rekuadrota «Ũrãgʼa diabʉrʉde Jesúsba oda kĩrãkʼa odadrʉ») (2) ¿Kʼãrẽta kʼawuadai naʉ̃ artikulodera?

³ Dayirãba Daizeze Bedʼeade eda akʉpanʉbʉrʉ, ʉ̃kʉrʉ ẽbẽrarãba sãwũã ũrãgʼa bia diada ʉ̃rʉ, maʉ̃neba dayirãbida kʼawuaseapanʉ sãwũã ũrãgʼa bia dia kʼawuaita, maʉ̃ranebema abara Jesúsbasi. Daizeze Bedʼeaba jarabʉ Jesúsʼra ũrãgʼa bia diabaribasita (akʉra Isaías 9:6). Naʉ̃ artikulode kʼawuadayi sãwũã ũrãgʼa bia diaseabʉta, mebẽã abaʉba iya ũrãgʼa diamarẽã widisibʉrʉ akʉza kʼawuadayi sãwũã mebẽãba ũrãgʼa bia diaseabʉta iya widi ẽ basimina ũrãgʼa diamarẽã, adewara kʼawuadayi sõbedebʉrʉ ũrãgʼa diaseabʉta.

DAYAʼA WIDIBɄDADE ŨRÃGʼA DIAMARẼÃ

4, 5. ¿Kʼãrẽ ʉ̃rʉ krĩchadaibara daya widibʉdade ũrãgʼa diamarẽã? Yiza aba jara ũrĩbira.

⁴ Bʉ neũdukʼawuaba mawũã ẽ bʉrʉ mebẽã kongregasionebemaba bʉa ũrãgʼata widira, ¿bʉmabida maʉ̃ba bʉra sobiabʉbaibara? Maʉ̃ba mesera ũrãgʼa diakĩrãbʉbaibara, mamina krĩchara naʉ̃ta, ¿mʉ̃ara kʼawuabʉka ãyi kʼãrẽ berabarinʉmʉra mawũã kʼarebaita? ¿Mʉ̃ara ũrãgʼa biata diaseabʉka iyara? Maʉ̃ta obe ẽ bʉrʉ jʉrʉseapanʉ kʼaiba audre ũrãgʼa bia diaseabʉta.

⁵ Krĩchara naʉ̃ yiza ʉ̃rʉ: Bʉ neũdukʼawuaba iyi kayabʉ kʼarea jʉrʉbayi remediota internetʼne, kʼãrẽba iyi bebiseabʉta, maʉ̃ jʉrʉda tẽã iyira bʉidu jʉ̃ẽñi widide saʉ̃ remediota iya doseabʉta, ¿bʉmabida bʉara maʉ̃ kʼarea wãña jida ẽ bayi iya saʉ̃ remediota doibarata? Bʉ neũdukʼawua kʼarebakĩrãbʉmina, jara ẽ kʼãrẽta oibarata bʉra mediko ẽ baera akʉza bia kʼawua ẽ baera yi neũdukʼawua kʼãrẽba kayabʉta. Maʉ̃ kĩrãkʼa yi neũdukʼawuaba ũrãgʼa biata diabe ẽ bʉrʉ jʉrʉibara awuruba wãrĩnu ũrãgʼa bia diaseabʉta.

6. ¿Kʼãrẽa ũrãgʼa diai nããra mesera bedʼea totobe ẽ?

⁶ Edaʉde dayi neũdukʼawuaba dayaʼa widiseabʉ ũrãgʼata daya kʼawuabʉ baera iyi sãwũã berabarinʉmʉta, maʉ̃ kʼarea wãña panʉkĩrãbʉ mawũã ũrãgʼa bia diaita, mamina nama Proverbios 15:28ba jarabʉ «yi ẽbẽra so aripe obʉbara bia krĩchabʉ panʉi nãã». Yi ẽbẽraba kʼawuabʉmina iyi neũdukʼawua kʼãrẽ berabarinʉmʉta, nãã yiwidʼibʉ maʉ̃are jʉrʉbʉ Daizeze Bedʼeade akʉza kartarane mawũã ũrãgʼa diabʉrʉde bia diaita. Dayirãba mawũã odara ũrãgʼa diabʉrʉdera Jeowaba kãgabʉ kĩrãkʼa bayi. Akʉdaya kʼãrẽta berabarisita propeta Natánta.

7. ¿Natánba kʼãwũã odadeba, dayirã kʼãrẽta jaradiabʉ?

⁷ Davidbara Natánʼa widisi Jeowaita templota okĩrãbʉta, maʉ̃ kʼarea Natánbara jarasi wãña oibarata, mamina Jeowabara kãga ẽ basi Davidba maʉ̃ templo omarẽãra. Natánba Davidʼa maʉ̃ ũrãgʼa diai nãã, nãã widibarabasi Jeowaʼa (1 Crón. 17:​1-4). Naʉ̃ba dayirã jaradiabʉ ẽbẽra abaʉba daya ũrãgʼa diamarẽã wididara, «kʼawua ẽã bedʼeabe ẽ» (Sant. 1:19).

8. ¿Kʼãrẽa jʉra kʼawuabaibara ũrãgʼa diabʉrʉdera?

⁸ Ũrãgʼa diabʉrʉdera, jʉra kʼawuabaibara, daya ũrãgʼa diada kʼãrẽa maʉ̃ ẽbẽrarã bia wã ẽ baseabʉ, maʉ̃ kʼarea ũrãgʼa diai nãã bia krĩchaibara.

DAYAʼA ŨRÃGʼA DIAMARẼÃ WIDIDA Ẽ BASIMINA SÃWŨÃ DIASEABɄ

9. ¿Ũrãgʼa diai nãã, zõrãrãbara nãã kʼãrẽta bia kʼawuabaibara? (Gálatas 6:1).

⁹ Jõmaʉ̃ba ũrãgʼa diaseapanʉ, mamina zõrãrãba ũdura mebẽã abaʉba aña osita, zõrãrãba nãã jʉrʉibara ũrãgʼa diaira (akʉra Gálatas 6:1). Naʉ̃ testode ũdubibʉ ẽbẽraba wĩña wĩñane aña owãbʉrʉ, mamina iya wabida nekayirua zroma oẽ nãã, zõrãrãbara ũrãgʼa diaseabʉ mawũã iyisida maʉ̃ ũrãgʼaba bamarẽã ẽjũã kĩrãwãreãnẽ (Sant. 5:​19, 20). Zõrãrãbara nãã bia kʼawuaibara wãrĩnu wĩña wĩñane nekayirua owã kʼawuaita akʉza kĩrãduada ẽ baibara Jeowabara dayirã aba abakaʉʼa diabʉ kʼãrẽta dayirãba kʼawua jidadamarẽã (Rom. 14:​1-4). Mamina zõrãrãba kʼawuara mebẽã abaʉba aña osita, ¿sãwũã ũrãgʼa biata diaseabʉ?

10-12. ¿Zõrãrãbara kʼãrẽta oseabʉ iya ũrãgʼata widida ẽ basibʉrʉ? Yiza aba jara ũrĩbira (akʉra potorata).

¹⁰ Apostol Pabloba jarasi ẽbẽra abaʉba aña obʉbʉrʉ, iya kʼawua ẽ nãã, ũrãgʼa diaibarata, mamina zõrãrãbara ũrãgʼa diai nãã nekʼãrẽ oibara mawũã maʉ̃ ẽbẽraba ãya ũrãgʼa diabʉrʉde ũrĩmarẽã. Mamina zõrãrãitara zare mawũã ũrãgʼa diaira ãya widi ẽ basibʉrʉ.

¹¹ Krĩchadadrʉ naʉ̃ra yiza ʉ̃rʉ. Bʉmabida ne u uira nãã pegata oibara, maʉ̃ pega oda tẽã ne uta upanʉ, maʉ̃ bia pãwãramarẽãra baniata kʼoeibara. Maʉ̃ kĩrãkʼa zõrãrã abaʉba ũrãgʼata diakĩrãbʉbʉrʉ iya widida ẽãta, nãã akʉibara sãwũã maʉ̃ mebẽãba iya ũrãgʼa diabʉrʉra ũrĩseabʉta, maʉ̃ba zõrãrãta ũdukaʉdebʉrʉ ẽbẽra biata zare ẽ bayi maʉ̃ ũrãgʼa ũrĩra, mawũã maʉ̃ zõrãrãbara ũrãgʼara diaseabʉ akʉza jaraseabʉ maʉ̃ mebẽãʼa iyira wãrĩnu kãgabʉta adewara bia wãmarẽã kãgabʉta, mawũã jarada tẽã jaraseabʉ iyiʉ̃me wĩña bedʼeakĩrãbʉta.

¹² Zõrãrã mebẽãʉ̃me bedʼeabʉrʉdera, jaraseabʉ jõmaʉ̃ta nekayirua obarita akʉza maʉ̃ba edaʉde nesidabʉ ũrãgʼa diadamarẽã, maʉ̃nera pega obari kĩrãkʼabʉ (Rom. 3:23). Mamina mebẽã mawũã bedʼeabʉdera, ibiade bedʼeabaibara, adewara ũdubibara Daizeze Bedʼeadeba iya kʼãrẽta aña obʉta, maʉ̃ne mebẽãba ũdubʉrʉde iya kʼãrẽne aña obʉrʉta ũdubibʉ maʉ̃ netata ubʉ kĩrãkʼa, maʉ̃are zõrãrãbara jaraseabʉ maʉ̃ mebẽã kʼãrẽ nebia obʉta akʉza iyiʉ̃me ãba yiwidʼiseabʉ. Maʉ̃ obʉdera bania kʼoebʉ kĩrãkʼabʉ (Sant. 5:15).

13. ¿Zõrãrãbara kʼãrẽta oseabʉ iya ũrãgʼa diadara wãrĩnu mebẽãbara ũrĩsi kʼawuaita?

¹³ Edaʉde mebẽãbara maʉ̃ zõrãrãba ũrãgʼa diadara aña ũrĩseabʉ, maʉ̃ kʼarea, ¿zõrãrãbara sãwũã bia kʼawuaseabʉ iya ũrãgʼa diadara maʉ̃ mebẽãba ũrĩsi kʼawuaita? Maʉ̃ba zõrãrãbara ibiade maʉ̃ mebẽã widibara iya ũrãgʼa diadara bia ũrĩsi kʼawuaita akʉza iya mawũã bia kʼawuamarẽã maʉ̃ ũrãgʼa diadapeadara tẽã iya sãwũã oũdubiseabʉta (Ecl. 12:11).

ŨRÃGʼA DIABɄRɄDE KʼÃRẼ EWARIDE DIASEABɄ AKɄZA SÕBEDE

14. ¿Kʼãrẽa ũrãgʼata dia ẽ baibara dayirã kĩrʉbʉde?

¹⁴ Dayirãta nekayirua omia baera edaʉde dayi bedʼeabʉba mebẽrãta sopʉabiseabʉ (Col. 3:13). Daizeze Bedʼeaba jarabʉ dayirãra edaʉde yiya kĩrʉseapanʉta (Efes. 4:26). ¿Kʼãrẽa ũrãgʼa dia ẽ baibarata kĩrʉbʉde? Daizeze Bedʼeaba nama jarabʉ «ẽbẽra kĩrʉbʉba iduaribi ẽ Jeowade kĩrãkʼa aripe omarẽã» (Sant. 1:20). Dayirã kĩrʉbʉde ũrãgʼa dia ẽ baibara, dayi kĩrʉbʉde ũrãgʼata diara mejãcha sopʉabiseabʉ awuru ẽbẽrata. Maʉ̃ba jarakĩrãbʉ ẽ daya sãwũã sentibʉta jarabe ẽãta, awuarabʉrʉ nãã dayi kĩrʉbita berabaribibara, mawũã ẽbẽraʉ̃me bedʼeabʉrʉde ibiade bedʼeaita. Akʉdaya kʼãrẽta kʼawuaseapanʉta Elihúba Jobʼa ũrãgʼa diaside.

15. ¿Elihú yizabara dayirãra kʼãrẽta jaradiabʉ? (Akʉra potota).

¹⁵ Jobʼba panʉita iyi neũdukʼawuaraba iyi ʉ̃rʉ aña jaradata Jeowa ʉ̃rʉ sewa nebʉrata jarasi, maʉ̃ne Elihúba chupea ũrĩ edaʉnʉmasi. Iyira Job kʼarea sopʉabasimina iyara ũrĩbasi sãwũã Jobʼba Jeowa ʉ̃rʉ aña jarabadara, mawũãsidu Elihúbara kʼãrẽ jara ẽ basi, adewara jʉ̃ãsi kʼãrẽ ewaridebʉrʉ bedʼeaibarata. Elihúba Jobʼa ũrãgʼa diasidera bedʼeasi ibiade (Job 32:2; 33:​1-7). ¿Dayirãbara kʼãrẽta kʼawuaseabʉ maʉ̃ yizadeba? Ũrãgʼa diabʉdadera, bia krĩcha kʼãrãpe ũrãgʼa diaibara mawũã ũrãgʼa diabʉrʉde ibiade jaraita (Ecl. 3:​1, 7).

ŨRĨBARA DAYAʼA ŨRÃGʼA DIAPANɄTA AKɄZA ŨRÃGʼARA DIAMABE Ẽ BAIBARA

16. ¿Bʉara kʼãrẽta kʼawuasi Salmo 32:8de jarabʉdebara?

¹⁶ Naʉ̃ testodebema artikuloba jarabʉ Jeowabara dayita akʉ kʼãrãpe ũrãgʼa diabʉta (akʉra Salmo 32:8). Maʉ̃bara jarakĩrãbʉ iya ũrãgʼa diabʉrʉdera akʉbʉta dayirãba maʉ̃ta ũdubidamarẽã, ¿bʉmabida maʉ̃ra yiza bia? Maʉ̃ kĩrãkʼa dayirãba ũrãgʼa diabʉrʉdera oibara Jeowaba obʉ kĩrãkʼa, kʼarebaibara mebẽrãta daya ũrãgʼa diadaba bia jida kʼawuadamarẽã.

17. Zõrãrãba ũrãgʼa Diazeze Bedʼeadeba diabʉrʉdera, ¿sãwũã diaibara? (Isaías 32:​1, 2).

¹⁷ Atiara audre yibia dayirã ũrãgʼa diadaita akʉza dayirãba ũrãgʼa diaita (2 Tim. 3:1). Zõrãrãba ũrãgʼa diabʉrʉde wuabemaraba ũrĩne diara akʉza Daizeze Bedʼeaba jarabʉ kĩrãkʼa diara, mawũãra bayi «drʉa ibuawabʉde do zakebʉ» kĩrãkʼa (akʉra Isaías 32:​1, 2). Jipa yibia dayi neũdukʼawuaba daya ũrãgʼa diabʉrʉde, mawũã ũrãgʼa diabʉrabʉ baera «manzana oro omata epedeko plata oma ʉ̃rʉ» bʉ kĩrãkʼa (Prov. 25:11). Kʼawua wãnaibara sãwũã ũrãgʼa bia dia kʼawuaita daya diabʉdade akʉza daya diaide.