Bʉyikʉza ĩjãra Jeowaba kãgabʉta

1. ¿Kʼãrẽa bʉ bebʉra Jeowa diaya asi? (Akʉra potota).

BɄ BEBɄ Jeowa diaya asidera bʉa jarasi Jeowaʼa bʉ soiduba, bʉ krĩchaiduba, bʉ zarea jõmainʉba kãgaita (Mar. 12:30). Adewara jarasi obaita iya kãgabʉta maʉ̃ mawũã jõma osi Jeowata ũdukʼawuabʉ baera akʉza kãgabʉ baera. Maʉ̃neba ʉ̃ta Jeowara ewariza mejãcha kãga zebʉrʉ maʉ̃ba ẽbẽra abaʉba bʉa wididara, «¿Jeowa kãgabʉka?» aramaʉ̃ta bʉa panʉñi, kʼãrẽ krĩcha ẽã iyira arigʉ kãgabʉta.

2, 3. (1) ¿Kʼãrẽta kãgabʉ Jeowabara? (Jeremías 31:3). (2) ¿Kʼãrẽta kʼawudai naʉ̃ artikulodera?

² Dayirãbara kʼawuabʉ Jeowara wãrĩnu kãgabʉta mamina edaʉde dayikʉza widiseabʉ Jeowaba kãgabʉ kʼawuaita, ¿kʼãrẽa? Krĩchabʉ baera jõma aripe o ẽãta Jeowaba zokʼabʉta. Mebẽã wẽrã iyi wiña bʉeda zʉbʉriadaba naʉ̃ta jarasi: «Mʉ̃ara kʼawuabʉ Jeowara wãrĩnu kãgabʉta, mamina badua mʉ̃yikʉza widibʉ Jeowaba mʉ̃ta kãgabʉ kʼawuaita» mamina, ¿bʉara sãwũã kʼawuai Jeowaba bʉra wãrĩnu kãgabʉta?

³ Jeowabara kãgabʉ bʉyikʉza ĩjãmarẽã iyara wãrĩnu kãgabʉta (akʉra Jeremías 31:3). Wãrinu Jeowabara kãgabasi baera iyi neũdukʼawua bamarẽã maʉ̃ba iyima wesi akʉza bʉ bebʉ Jeowaʼa diaside adewara buru kʼoeside Jeowaba maʉ̃ kʼarea nebiata diasi kãga jõkata ũdubisi bʉa Jeowabara wãrĩnu mejãcha kãgabʉ baera bʉra doba amae ẽ adewara Jeowabara jõma iyi odebʉrãra nebia zroma kĩrãkʼa akʉbʉ maʉ̃ba bʉsida iyitara nebia zroma (Mal. 3:​17, nota). Jeowabara kãgabʉ bʉabida apostol Pabloba sentida kĩrãkʼa sentimarẽã iya naʉ̃ta bʉsi: «Mʉ̃a biʼia kʼawuabʉ mia beiba, mia bebʉba, mia angeleraba, mia nokʼoraba, mia atia berabarinʉmʉba, mia nekʼãrẽ ʉ̃rabʉrʉ zeiba, mia zarearaba, mia ʉ̃tʉba, mia eidubʉba, mia awuru nekʼãrẽ parãnaba jĩgara bʉ ẽ bayi Daizeze kãgadebara» (Rom. 8:​38, 39 TNM). Naʉ̃ artikulode kʼawuadayi kʼãrẽa mejãchade bigata dayirãba ĩjãnaita Jeowaba wãrĩnu kãgata akʉza kʼãrẽba kʼarebaita dayirãba mawũã ewariza audre ĩjã wãita Jeowaba kãgata.

KʼÃRẼ KʼAREA BIGA ĨJÃITA JEOWABA DAYIRÃRA KÃGATA

4. ¿Kʼãrẽta ĩjãmarẽã kãgabʉ Diarubara akʉza kʼãrẽta odaibara Diarua yi sewabi ẽ baita?

⁴ Dayirãba ĩjãpanʉbʉrʉ Jeowaba wãrĩnu kãgabʉta mawũãra Diarua yi sewabida ẽ bayi (Efes. 6:11). ¿Diarubara dayirãra sãwũã sewa kĩrãbʉ? Nããrara Diarubara kãgabʉ ĩjãnamarẽã Jeowabara kãga ẽãta dayirãra maʉ̃ kʼarea Daizeze Bedʼeabara jarabʉ Diarura león kĩrãkʼabʉta (1 Ped. 5:​8, 9). Leónbara nedʉwʉrʉ zake abapaibʉta maʉ̃ta neẽbʉrʉ paebʉta bariedabʉ mawũã koita, abarikabʉ Diaruba jʉrʉbʉ mebẽrã krĩcha zroma obʉta nãã nekʼãrẽ berabarida kʼarea maʉ̃ta neẽbʉrʉ krĩcha zroma obʉta ʉ̃ra zei kʼarea akʉza biode krĩchabʉta idi sãwũã berabarinʉmʉta. Diarubara biode jʉrʉbʉ mawũãbʉ mebẽrã sewaita (Prov. 24:10). Mamina dayirãta Diarua yi sewabi ẽ baira nekʼãrẽ jõma odaibara ĩjãnaita Jeowabara wãrĩnu kãgata dayirãra (Sant. 4:7).

5. ¿Kʼãrẽa yibia ĩjãita Jeowaba dayirã kãgabʉta?

⁵ Bʉa ĩjãbʉbʉrʉ Jeowaba bʉta wãrĩnu kãgabʉta mawũãra jʉrʉyi bʉara audre iyi kʼawa bʼaita. Jeowabara parãsi dayirãba wuabema ẽbẽrata kãgabamarẽã akʉza sentita awuru ẽbẽraba dayirãta kãga bʼaita maʉ̃ba ẽbẽra abaʉba bʉa kãgabʉta ũdubira abarika kãgayi bʉa maʉ̃ ẽbẽrarã. Maʉ̃ kĩrãkʼabʉ Jeowata, bʉa ĩjãra Jeowaba bʉta kãgabʉta mawũãra bʉa iyira audre kãgabayi (1 Juan 4:19). Akʉza bʉa Jeowata audre kãgabʉbʉrʉ, Jeowaba bʉta audre kãgayi, maʉ̃ba Daizeze Bedʼeabara jarabʉ: «Daizeze kʼaita bʼaidua, mawũãra iyira mara kʼaita baya» (Sant. 4:8). Atia kʼawuadayi kʼãrẽba kʼarebaseabʉta dayirã aba abaka ĩjãita Jeowaba wãrĩnu kãgabʉta dayirãra.

¿KʼÃRẼBA KʼAREBAI ĨJÃITA JEOWABA BɄRA WÃRĨNU KÃGABɄTA?

6. Bʉa ĩjã ẽ bʉrʉ Jeowaba bʉta kãgabʉta, ¿kʼãrẽta oseabʉ?

⁶ Jeowa widida ʉ̃rʉ badua widibara kʼarebamarẽã ũrĩta kʼãrẽa iyara bʉra kãgabʉta (Luc. 18:1; Rom. 12:12). Mamina mawũã kʼawuaita edaʉde ewari abaʉde bio yiwidʼibara Jeowa iya kʼarebamarẽã daya audre ĩjãita Jeowabara wãrĩnu kãgabʉta, mamina bʉ soiduba ĩjã ẽ bʉrʉ Jeowaba bʉta kãgabʉta kĩrãbera Jeowabara jõma biʼia ũdukʼawuabʉta dayirã ʉ̃rʉra (1 Juan 3:​19, 20). Maʉ̃ba Jeowabara bʉyikʉzaira audre bia ũdukʼawuabʉ akʉza kʼawuabʉ bʉ sode kʼãrẽ nebia erbʉta bʉa maʉ̃ta ũdu ẽ mina (1 Sam. 16:7; 2 Crón. 6:30). Maʉ̃ba kʼãrẽ krĩcha ẽ jõma jarada Jeowa bʉ sãwũã sentibʉra akʉza widida kʼarebamarẽã ĩjãita iya bʉra kãgata (Sal. 62:8). Bʉ yiwidʼida tẽã naʉ̃ta oseabʉ.

7, 8. ¿Sãwũã ũdubibʉ Salmoraba Jeowaba wãrĩnu kãgabʉta dayirãra?

⁷ Ĩjãra Jeowaba jarabʉta iyi Bedʼeade. ¿Kʼãrẽa? Jeowaba iyi jaure zareaba bʉbisi baera yumakẽrãra, naʉ̃rabara aripe bʉsi Jeowa sãwũãbʉ ʉ̃rʉ maʉ̃ba ĩjãseapanʉ Daizeze Bedʼeaba jarabʉra. Davidʼba naʉ̃ bedʼeata jarasi Jeowaba sãwũã akʉbʉta dayirãra: «Jeowarabʉ yi jipa sopʉapanʉra kʼawa; kʼarebabʉ yi jipa kʼãrẽ ẽ kĩrãkʼa krĩchapanʉrãra» (Sal. 34:18). Mawũẽra bʉa krĩchaseabʉ bʉa krĩcha zroma obʉdera kʼaiba bʉra ũrĩ ẽãta akʉza kʼaiba kʼarebai neẽãta, mamina Jeowaba jarabʉ mawũã bʉdera bʉta kʼarebaita akʉza bʉa nesidabʉta diaita adewara Davidʼba jarasi naʉ̃ta: «Mʉ̃ daʉbara bʉara jibadode tʉ erbʉ» (Sal. 56:8). Ẽbẽra ode wãbʉitara jibadode bania tʉ erbʉra iyitara biode yibia maʉ̃ba nekʼãrẽ jõma obʉ mia kʼãrẽta adua bi ẽ baita, maʉ̃ kĩrãkʼa Jeowaba ũdubʉrʉde dayirã zʉbʉriabʉta iyira mejãcha pʉabʉ akʉza dayirã daubara wuagabʉ kĩrãkʼabʉ kĩrãdua ẽ baita akʉza Davidʼba naʉ̃ta jarasi: «Kʼawuabʉ jõma mʉ̃a obʉra» (Sal. 139:3). Jeowabara jõma akʉbʉ dayirãba kʼãrẽ obʉra, mamina iyara akʉbʉ bʉa kʼãrẽ nebia obʉtrʉ (Heb. 6:10). Jeowabara bia akʉbʉ bʉ zarea obʉra iyi sobiabita.a

⁸ Naʉ̃ra bersikulode jaradaba Jeowaba dayirã jarabʉrʉ kĩrãkʼabʉ: «Mʉ̃a bʉra mejãcha kãgabʉ» mamina kĩrãbera Diarubara kãgabʉta bʉa krĩchamarẽã Jeowabara kãga ẽãta. Maʉ̃ba ewari abaʉde bʉa krĩcha zebʉbʉrʉ Jeowaba bʉta kãga ẽãta naʉ̃ta bʉyikʉza widira: «¿Mʉ̃ara ĩjãika sewa nebʉrʉ omia zeze bedʼeata mawũã ẽ bʉrʉ Jeowa bedʼeata iya wãrĩnuta jarabʉ baera?» (Juan 8:44; Sal. 31:5).

9. ¿Jeowabara kʼãrẽta jarabʉ iyi kãgabʉara? (Éxodo 20:​5, 6).

⁹ Krĩchara Jeowa sãwũã sentibʉta iyi kãgapanʉra ʉ̃rʉra. Bari jaraita, krĩchara Jeowaba Moisésʼa akʉza israelitara jaradata (akʉra Éxodo 20:​5, 6). Jeowabara jarabʉ ẽbẽra iyi kãgabʉra iyara ewari jõmaʉ̃nẽ kãga bʼaita, Jeowabara maʉ̃ra jõma aripe oyi (Neh. 1:5). Maʉ̃ba ewari abaʉde bʉa krĩchara Jeowaba bʉta kãga ẽãta, bʉyikʉza ĩjãbibara Jeowabara bʉra wãrĩnu kãgabʉta, ¿kʼãrẽa? Bʉa iyita kãga baera (Dan. 9:4; 1 Cor. 8:3). Mawũẽra bʉa kʼawuabʉbʉrʉ, bʉa Jeowata kãgata mawũãra Jeowabara bʉra kãgabʉ akʉza doba amae ẽ bayi.

10, 11. ¿Jeowabara yi Warra diadara sãwũã akʉmarẽã kãgabʉ? (Gálatas 2:20).

¹⁰ Krĩchara Jesús beida ʉ̃rʉ. Jeowabara yi Warra abapaibʉta jõmaʉ̃bari beimarẽã diasi (Juan 3:16). Mamina bari jõmaʉ̃bari dia ẽ basi, bʉ kʼareabida diasi. Bari jaraita krĩchara apostol Pablo ʉ̃rʉ iyi kristiano bai nawedara nemitia obasi akʉza kristianobada tẽãbida iyira zarea oibarabasi krĩcha mitia zebʉa yi edebi ẽ baita (Rom. 7:​24, 25; 1 Tim. 1:​12-14). Mawũãsidu Pablobara krĩchasi Jeowaba yi Warra jõmaʉ̃bari beimarẽã diadara iyi kʼareabida diasita (akʉra Gálatas 2:20). Kĩrãbera Jeowaba iyi jaure zareata zokʼasita Pabloba naʉ̃ bedʼeata Daizeze Bedʼeade bʉ amae marẽã, bʉa akʉmarẽã Pablode kĩrãkʼa Jeowaba yi Warra diadara bʉ baribida diasita (Rom. 15:4). Bʉa kĩrãkita krĩchara Jeowaba yi Warra abapaibʉta bʉ baribida diadata mawũãra bʉara audre ĩjãñi Jeowabara bʉra kãgabʉta.

¹¹ Dayirãbara Jeowa biga diapanʉ yi Warrata diabʉesi baera dayirãbari beimarẽã, mamina Jesúsʼra bari dayirã bari beita ze ẽ basi iyira zesi wãrĩnu jaradiaita Daizeze ʉ̃rʉ akʉza ũdukʼawuabita Jeowara kʼãrẽãba mia kãgabʉta (Juan 18:37).

JESÚSBARA JARADIASI JEOWABARA BɄRA MEJÃCHA KÃGABɄTA

12. ¿Kʼãrẽa ĩjãseapanʉ Jesúsba Jeowa ʉ̃rʉ jaradiadara?

¹² Jesús nama egorode basidera, Jeowa ʉ̃rʉ jaradiakĩrã jaradiasi wuabema ẽbẽrarã (Luc. 10:22). Dayirãbara ĩjãseabʉ Jesúsba Jeowa ʉ̃rʉ jaradiadara, ¿kʼãrẽa? Jesúsbʉrʉ bia ũdukʼawuabʉ Jeowara iyiʉ̃mebasi baera nama egoroeda zei naweda (Col. 1:15). Akʉza Jesúsbara kʼawuabʉ Jeowabara iyira mejãcha kãgabʉta adewara iyi dabʉba ũdu zebʉrʉ Jeowaba kʼãrẽãba kãgabʉta angelera kʼẽrẽpabʉta akʉza ẽbẽrarã nama egorode kʼẽrẽpapanʉrata. Akʉdaya sãwũã Jesúsba jaradiadaba dayirã ĩjãbibʉta Jeowabara wãrĩnu kãgata dayirãra.

13. ¿Jesúsbara sãwũã akʉdamarẽã kãgabʉ yi Zeze Jeowara?

¹³ Jesúsbara kãgabasi dayirãba Jeowara iya akʉbʉ kĩrãkʼa akʉmarẽã, Zeze ẽbẽra biata maʉ̃ba libro Evangeliorane iya bedʼea «Zeze» jarabʉta 160 audre jarasi akʉza iyi kʼaidubemara bedʼeaita Jeowa ʉ̃rʉ jarabasi «marã Zeze ʉ̃tre bʼʉta» (Mat. 5:16; 6:26). Jesús nama egoroeda zei nawedara Daizeze odebʉ kʼẽrẽpa panʉrabara Jeowa ʉ̃rʉ jaraita jarapanasi nekʼãrẽ jõma oseabʉta, yãrãira ʉ̃tʉbʉta, nekʼãrẽ jõma parãnata, mamina Jesús nama egoroeda zesidera Jeowa ʉ̃rʉ bedʼeaita iya jarabasi Zeze. Naʉ̃ba ũdubikĩrãbʉ Jeowabara kãgabʉta iyi odepanʉrãra iyi kʼawa bamarẽã, abarika wũãwũã yi zeze mia kãgabʉ kʼawa bakĩrãbʉ kĩrãkʼa. Atia akʉdayi nekʼãrẽ ũmene Jesúsba zokʼasita Jeowa jaraita Zeze.

14. ¿Sãwũã ũdubisi Jesúsbara Jeowabara dayirãra mejãcha kãgata? (Mateo 10:​29-31 akʉza akʉra potota).

¹⁴ Nããra akʉdaya Jesúsba bedʼea jaradata Mateo 10:​29-31 bayeda (akʉra). Nama jarabʉ dayirã Zeze Jeowabara kʼawuabʉta ibana zakera sõbede uadeguewata, naʉ̃ra ibana zakerabara Jeowa kãga ũdubida ẽ akʉza yiwidʼida ẽ, mawũẽra krĩchara kʼãrẽãba kãgabʉta dayirãta dayirãbara Jeowa kãga ũdubipanʉ baera akʉza iya yiwidʼipanʉ baera adewara Jesúsbara jarasi Jeowabara kʼawuabʉta dayi burude sõbe abʉta budara, naʉ̃ba jarakĩrãbʉ Jeowabara dayirãra biʼia ũdukʼawuabʉta akʉza krĩchabʉta. Maʉ̃ba dayirãba ĩjãseabʉ Jeowabara mejãcha kãgata, naʉ̃ba ũdubibʉ Jesúsbara kãgabʉta dayirãba krĩchadamarẽã Jeowabara dayirãra mejãcha kãgata akʉ ẽãta kʼãrẽ ẽ kĩrãkʼa.

15. ¿Kʼãrẽta jarabʉ Juan 6:44ba Jeowa ʉ̃rʉ?

¹⁵ Adewara Jesúsbara zokʼasi Jeowa ʉ̃rʉ jaraita Zeze, naʉ̃ra dayirãbara ũduseabʉ Juan 6:44de (akʉra). Nama jarabʉ bʉ Zeze Jeowabara bʉra iyima wesita, ¿kʼãrẽa? Bʉ sode nekʼãrẽ biata ũdusi baera (Hech. 13:48). Naʉ̃ bedʼea Jesúsba Juan 6:44de jaradara, iya jarasikĩrãbʉ Jeremías 31:3de jarabʉta, nama jarabʉ: «Mʉ̃a bʉaʼa kãga jõka ũdubibʉba mʉ̃ma wesi» (Jer. 31:3; nota; naʉ̃ testoʉ̃me akʉra Oseas 11:4). Naʉ̃ba ũdubibʉ Jeowabara dayirãra kãga zebʉrʉta akʉza ewari jõmaʉ̃nẽ kãga bʼaita, naʉ̃ba jarakĩrãbʉ Jeowabara ewari jõmaʉ̃nẽ akʉ bʼaita bʉ sode kʼãrẽ nebia erbʉta bʉa maʉ̃ta ũdu ẽ mina.

16. (1) ¿Kʼãrẽta jaradiabʉ Jesúsbara akʉza kʼãrẽa ĩjãibara iyi ʉ̃rʉ? (2) ¿Kʼãrẽba kʼarebai ĩjãita Jeowara bʉita Zeze biata? (Akʉra rekuadro «Zeze jõmaʉ̃ba nesidapanʉta»).

¹⁶ Jesúsbara jaradiasi Jeowara iyi Zezeta mamina maʉ̃ daucha jaradiasi bʉabida jaraseabʉta bʉ Zezeta. Jesúsbara kãgabʉ bʉa wãrĩnu ĩjãmarẽã Jeowabara bʉra kãgabʉta akʉza bʉ ʉ̃rʉ krĩchabʉta maʉ̃ba edaʉde bʉa krĩchabʉbʉrʉ Jeowaba bʉta kãga ẽãta kĩrãbera Jesúsba jaradata. Jesúsbara wãrĩnuta jarabʉ akʉza iyabʉrʉ biʼia ũdukʼawuabʉ Jeowara (1 Ped. 2:22).

EWARIZA ZAREA ORA AUDRE ĨJÃITA JEOWABA BɄRA KÃGABɄTA

17. ¿Kʼãrẽa ewariza audre ĩjãibara Jeowabara dayirãra kãgabʉta?

¹⁷ Diarubara mejãcha sewa kau akʉza iyara nekʼãrẽ jõma oyi dayirãta Jeowa ode ba ẽ marẽã iya nekʼãrẽ mejãcha zokʼabʉdebemata dayirã sewaita iya kãgabʉ dayirãba krĩchadamarẽã Daizeze Jeowabara kãga ẽãta mamina dayirãra Diarua yi sewabi ẽ baibara (Job 27:5). Maʉ̃ kʼarea dayirãra ewariza zarea oibara ĩjãita Jeowabara dayirãra wãrĩnu kãgabʉta.

18. ¿Kʼãrẽba kʼarebaseabʉ bʉa audre ĩjãita Jeowabara bʉra kãgata?

¹⁸ Naʉ̃ artikulode kʼawuasida kʼãrẽba kʼarebabʉta audre ĩjãita Jeowabara bʉra kãgata. Bari jaraita, Jeowa widiseabʉ kʼarebamarẽã Jeowaba dayi ʉ̃rʉ kʼãrẽ nebia akʉbʉta bʉyikʉzabida maʉ̃ta ũdumarẽã. Lera ʉ̃kʉrʉ testora Jeowaba ũdubibʉta iyi ode panʉra kãgabʉta mõbe maʉ̃ ʉ̃rʉ krĩchara adewara kĩrãbera Jeowabara iyaʼa kãga ũdubipanʉrãra abarika kãga ũdubibʉta adewara kĩrãbera Jesúsʼra bari ẽbẽra jõmaʉ̃ kʼarea bei ẽ basita, bʉ kʼareabida beisita akʉza kĩrãduarara Jesúsba jaradiadata Jeowara bʉ Zezeta. Naʉ̃ta jõma ora bia wãñi, maʉ̃ba ẽbẽra abaʉba bʉa widira, «¿bʉara ĩjãbʉka Jeowabara bʉra wãrĩnu kãgata?» aramaʉ̃ta bʉa wãña panʉñi: «Jeowabara kãga mʉ̃ra adewara mʉ̃ra ewariza zarea obʉ iya ũdubita kãgabʉta».