KARTARARABɄ INTERNET'NE Watchtower
Watchtower
KARTARARABɄ INTERNET'NE
embera katio
  • DAIZEZE BED'EA
  • KARTARA
  • ÃBA YI JɄREBARI
  • w25 noviembre pag. 8-9
  • ¿Nekʼãrẽ manejabʉta iduaribibaraka?

Bideo bʉa jʉrʉbʉra neẽ.

Naʉ̃ bideo ʉ̃tʉ ze ẽ.

  • ¿Nekʼãrẽ manejabʉta iduaribibaraka?
  • Karta Jeowa Nokʼo ʉ̃rʉ Jarakabʉ (kʼawuaita) 2025
  • Subtitulota
  • BɄYIKɄZA AKɄRA WABIDA MANEJASEABɄ KʼAWUAITA
  • DAIZEZE BEDʼEABA KʼAREBASEABɄ BIA JIDAITA
Karta Jeowa Nokʼo ʉ̃rʉ Jarakabʉ (kʼawuaita) 2025
w25 noviembre pag. 8-9
Mebẽã zõrã abaʉba wueda akʉbʉ iyi karruta, krĩchanʉmʉena iyi juwade erbʉ karru yabeta.

¿Nekʼãrẽ manejabʉta iduaribibaraka?

KRĨCHARA ẽbẽra zõrãbʉba nekʼãrẽ manejabʉta dããrabata. Iya manejakĩrã iya kãgamae edebʉ baera. Mamina yi neũdukʼawuaraba akʉza iyi mebẽrãba kãgada ẽ maneja bamarẽã, iyita neida berabariseabʉ baera, mamina ẽbẽra zõrãbʉbara iyikʉza krĩchabʉ iya bia manejabʉbʉrʉ kʼãrẽa mawũã jarapanʉta.

¿Bʉra naʉ̃ ẽbẽra kĩrãkʼa berabarinʉmʉka? Mawũãbʉrʉ, ¿kʼãrẽba kʼarebai kʼawua jidaita nekʼãrẽ maneja bʼaita mawũã ẽ bʉrʉ maneja ẽ baita?

Ʉ̃kʉrʉ drʉadera zõna baidu bʼaira jarapanʉ mediko eda wãmarẽã mawũã medikoraba jaramarẽã nekʼãrẽ manejaseabʉta mawũã ẽ bʉrʉ wua maneja ẽ baita. Kristianora mawũã jarabʉ drʉade panʉrabara opanʉ nokʼora mamabema leyba jarabʉde (Rom. 13:1). Mamina bʉ drʉade mawũã odamarẽã jarada ẽ mina bʉyikʉza akʉseabʉ bʉa waidide manejaseabʉ kʼawuaita mawũã ẽ bʉrʉ manejabe ẽãta.

BɄYIKɄZA AKɄRA WABIDA MANEJASEABɄ KʼAWUAITA

Organizasion zõrãrãitabʉba naʉ̃ta bʉyikʉza widimarẽã jarabʉ:

  • ¿Mʉ̃ara bia ũdu ẽka ode señalbʉra akʉza diamasira bia ũdu ẽka?

  • ¿Nekʼãrẽ manejabʉrʉdera jẽda akʉseabʉka akʉza espejodebida jẽda akʉseabʉka?

  • ¿Mʉ̃ara nekʼãrẽ manejanʉmʉnera nekʼãrẽ oyawabʉka, bari jaraita, karru wãbibarita katʉbʉrʉde mesera katʉseabʉka yi prenabarisida?

  • ¿Mʉ̃ra odera pikãga wãbʉka maʉ̃ba wuabemarata mesera wãbi ẽka?

  • ¿Dããraba ẽka mʉ̃ bera asidentadara akʉza mʉ̃a nekʼãrẽ manejabʉra rayakʉa erbʉka nekʼãrẽma zebisi baera?

  • ¿Mʉ̃a sãwũã manejabʉ kʼarea polisiaba kʼãrẽ jarabarika?

  • ¿Mʉ̃a manejanʉmʉne kʼãĩ totobarika?

  • ¿Mʉ̃a remedio dobʉbara mʉ̃ta kʼãĩbibʉka maʉ̃ba bia manejabi ẽka?

  • ¿Mʉ̃ mebẽrãba akʉza mʉ̃ neũdukʼawuaraba mʉ̃aʼa jarabarika ãyira krĩcha obʉta mʉ̃a manejabʉ baera?

Nama widibʉdebemata aba mawũã ẽ bʉrʉ ũme aja asibʉrʉ, bigabayi bʉyikʉza akʉita mawũã awuara oita, bari jaraita badua maneja ba ẽ baibara, audre diamasi maneja ẽ baibara. Adewara badua bʉyikʉza akʉbara waidide manejaseabʉ kʼawuaita. Widiseabʉ bʉ neũdukʼawua akʉza bʉ mebẽrãnebema bʉa sãwũã manejabʉta. Mamina bedʼea widibʉdebemata bio aja asibʉrʉ audre yibiabayi wua nekʼãrẽ maneja ẽ marẽã.a

DAIZEZE BEDʼEABA KʼAREBASEABɄ BIA JIDAITA

Edaʉde daya krĩchaseabʉ wabida bia manejabʉta mamina wãrĩnubaira mawũã obʉ ẽ. Akʉza bʉita mejãcha zarea baseabʉ nekʼãrẽ manejabʉta idubʉita. Mamina Daizeze Bedʼeaba erbʉ ũrãgʼa biata, naʉ̃ba kʼarebaseabʉ bʉa bia jidaita. Maʉ̃nebemata ũme akʉdaya.

Kʼawuabara sainʉ oita (Prov. 11:2). Jõmaʉ̃ta zõna bʼaidu bʼaira dabʉba bia ũdu ẽ wã, kʉwʉrʉba bia ũrĩ ẽ wã, nãã nekʼãrẽ obada kĩrãkʼa oẽ akʉza nekʼãrẽ oyawabʉta adua wã. Maʉ̃ kʼarea ẽbẽrarã mejãchaʉba ãya nãã nekʼãrẽ jemebadara idubʉebʉ, kʼawuapanʉ baera mawũã opanʉbʉrʉ neida berabariseabʉta. Maʉ̃ kĩrãkʼabʉ daya nekʼãrẽ maneja bʼaita, dayirãba kʼawuadara bia manejabe ẽãta bigabayi wua maneja ẽ baita neida berabari ẽ marẽã (Prov. 22:3). Adewara ẽbẽra abaʉba dayirã jaradara krĩcha obʉta dayirãba manejabʉ kʼarea, bigabayi ãyi bedʼea ũrĩta akʉza kʼawuaita sainʉpai manejaita (naʉ̃ testoʉ̃me akʉra 2 Samuel 21:​15-17).

Wuabemata beamapanʉ (Deut. 22:8). Nekʼãrẽ manejaira yibia mamina ẽbẽra bia maneja ẽãba manejabʉbʉrʉ wuabemata akʉza iyita poseabʉ. Adewara beaseabʉ awururata akʉza iyisida beiseabʉ, maʉ̃ kʼarea yibia ẽ bayi maneja bʼaita daya oaʉ ẽ bʉrʉ.

Bʉa krĩchabʉbʉrʉ manejabʉta idubʉita mawũã ẽ bʉrʉ idubʉ ẽ baita, krĩcharãra wuabemarabara bʉaʼa wawia ũdubida ẽ baita akʉza bʉra zeri ẽãta. Kĩrãbera Jeowabara mejãcha kãgata bʉ sode kʼãrẽ nebia erbʉ kʼarea, bari jaraita edabʉta ũdubibʉ baera, kʼawuabʉ baera sainʉ oita akʉza krĩchabʉ baera wuabemarata. Adewara Jeowabara jarabʉ bʉ kʼarebaita akʉza bʉaʼa so zarea diaita (Is. 46:4). Iyara bʉra doba amae ẽ bayi. Bʉara iyi ʉ̃rʉ ĩjãseabʉ iya bʉaʼa buru bia diaita akʉza kʼawuabiseabʉ saʉ̃ta bigata akʉza saʉ̃ta zeri ẽãta bʉa bia jidamarẽã, maʉ̃ba iyaʼa kʼareba widira.

¿Kʼãrẽta oseabʉ wuabemarabara?

Zõrãbʉba nekʼãrẽta manejabʉbʉrʉ bigabayi yi mebẽrãnebemaba iyaʼa ũrãgʼa diaita iya manejabʉ ʉ̃rʉ. Mawũẽ ẽ bʉrʉ edaʉde iyi neũdukʼawuaraba ũrĩbʉ iya sãwũã manejabʉ ʉ̃rʉ, bʉa maʉ̃ta ũrĩra jʉrʉda sãwũã kʼarebaita. Bari jaraita, iyiʉ̃me wãseabʉ kʼawuaita iya sãwũã manejabʉta, maʉ̃ne bʉa kʼawuara zõrãbʉba kʼarebata nesidabʉta, iyaʼa wãrĩnuta jarada, mamina ibiade jarada akʉza krĩchara iyi sãwũã sentibʉta. Iya jararãra iyi zõnabasita, awuarabʉrʉ ũdubira iya sãwũã manejabʉta. Bari jaraita, kʼãwũã jararãra «Bʉra zõnabasi baera, bia manejabe ẽ». Awuarabʉrʉ kʼãwũã jaraseabʉ «Bʉa manejabʉdera mʉ̃ra mejãcha krĩcha obʉ, kãga ẽ baera bʉta neida berabarimarẽã». Krĩchara naʉ̃ artikulode Daizeze Bedʼeaba kʼaseabʉta naʉ̃ ʉ̃rʉ.

Jõmaʉ̃ba krĩchadaibara zõrãrã nekʼãrẽ manejadaba idubʉebʉrʉdera sãwũã sentibʉta. Naʉ̃raba krĩchaseabʉ wua ãya kãgabʉta obe ẽãta akʉza ãyidobaʉba nekʼãrẽ obe ẽãta. ¿Dayirãbara sãwũã kʼarebaseapanʉ? Ãya nesidabʉde kʼarebayawabaibara (Prov. 17:17). Bari jaraita, jʉ̃ã ẽ baibara ãyiareba dayirã jaramarẽã ãyita edemarẽã, ãya krĩchaseabʉ baera dayirãbara ajuerzade edebʉta. Audre bigabayi ãyibawara bedʼeaita sõbede ãba yi jʉrebarieda edeita, jaradia wãita, ne edade wãita akʉza sõbede medikoma edeita. Adewara ãyaʼa jaraibara naʉ̃ jõma obʉta ãyita kãgapanʉ baera akʉza jõma soiduba obʉta (Rom. 1:​11, 12).

a Bʉa audre kʼawuaita akʉra artikulo «¿Corre usted un gran riesgo de sufrir accidentes de tránsito?» karta ¡Despertad! 22 agosto 2002debemata.

    Librora joma Ẽbẽra bedʼeade (2004-2025)
    Ãĩ wãita
    Eda wãita
    • embera katio
    • Dedekai
    • Mʉ̃a kãgata
    • Copyright © 2025 Watch Tower Bible and Tract Society of Pennsylvania
    • Kartadebʉ Sãwũã Zok'aita
    • Neida bʉkʉabe ẽ eda
    • Configuración de privacidad
    • JW.ORG
    • Eda wãita
    Dedekai