¿Jeowa ʉ̃rʉ Kʼawuabipanʉrãra ãba zebʉka awurura religionʼrabawara Daizezeʼa yiwidʼita?
Jeowa ʉ̃rʉ Kʼawuabipanʉrãra awurura religionʼrabawara aduʼa bedʼeapanʉ, mamina ãyibawara ãba ze ẽ Daizezeʼa yiwidʼita. Daizeze Bedʼeabara jarabʉ kristianora wãrĩnuarãra ãbabʉta, mawũã bʼaira iyabaʉta krĩchaibara (Efesios 4:16; 1 Corintios 1:10; Filipenses 2:2). Wãrĩnu kãga ũdubita, wuabemara so borekeabʉ ũdubita, jẽda kĩrãduaita akʉza nekʼãrẽ awuarabʉ oũdubira maʉ̃ oira yibia, mamina maʉ̃ awa ũdubi ẽ bʼaibara, Jeowa ʉ̃rʉ Kʼawuabipanʉrãbara Daizeze Bedʼeara biʼia akʉpanʉ akʉza badua, maʉ̃neba kʼawuapanʉ baera kʼãrẽta ĩjãibarata. Maʉ̃ta oda ẽ bʉrʉ dayirãba ĩjãbʉra bari ĩjãñi (Romanos 10:2, 3).
Daizeze Bedʼeaba jarabʉ ãba ba ẽ bamarẽã Daizeze ĩjã ẽ bʉbawara, maʉ̃ta ora abarika yiwidʼida ẽ bayi Daizezeʼa (2 Corintios 6:14-17). Ãya ĩjãbʉta abarikabʉ ẽ baera kristianoba ĩjãbʉra aduaseabʉ. Maʉ̃ kʼarea Jesubara iyi kʼaidupanʉrãra kãga ẽ basi awurura religionʼrabawara Daizezeʼa ãbaʉba yiwidʼira (Mateo 12:30; Juan 14:6). Adewara Daizezeba Ley diadaba Moisésʼa jarabasi israelitara awurura pʉwʉrʉrabawara ãba ze ẽ bamarẽã mawũã Daizezeʼa yiwidʼita (Éxodo 34:11-14). Ewari bio berabarida tẽã Israel pʉwʉrʉra kʼawa badaraba jarasi ãya kʼarebaita, mamina tẽã jʉ̃ãbasi ãyibawara yiwidʼimarẽã, mamina ãya Jeowaba Ley diadata ũrĩsida baera oda ẽ basi (Esdras 4:1-3).
¿Jeowa ʉ̃rʉ Kʼawuabipanʉrãra awurura religionʼrabawara bedʼeabʉka?
Mawũã, opanʉ. Kʼawuakĩrãpanʉ baera ẽbẽrarãba kʼãrẽta krĩchabʉta akʉza kʼãrẽta ĩjãbʉta (1 Corintios 9:19-22). Ãyibawara bedʼeabʉrʉdera wawiata ũdubipanʉ ãya ĩjãbʉ ʉ̃rʉ, Daizeze Bedʼeaba jarabʉ kĩrãkʼa (1 Pedro 3:15).